1. Mɛni ya nɔ ngɛ jeha 66 mi? (Moo hyɛ foni nɛ ngɛ ní kasemi ɔ sisije ɔ.)

NGƆƆ lɛ kaa Kristofo no ji mo nɛ o ngɛ Yerusalem ngɛ jeha 66 mi. Níhi fuu ngɛ nɔ yae. Roma amlaalo ko nɛ a tsɛɛ lɛ Florus ɔ ya ju sika tsu yi akpe 17 ngɛ sɔlemi we ɔ nito he ɔ. Amlɔ nɔuu nɛ Yuda bi ɔmɛ a mi mi fu. A gbe Roma ta buli fuu, nɛ a de ke a ye a he kɛ je Roma bi ɔmɛ a nɔ yemi sisi. Se e kɛ we kulaa nɛ Roma bi ɔmɛ te si kɛ wo mɛ. Ngɛ nyɔhiɔ etɛ kpɛ mi ɔ, Cestius Gallus nyɛɛ ta buli 30,000 a hɛ mi kɛ ya sa Yerusalem ma a yi. Yuda bi atua tsɔli ɔmɛ ya laa ngɛ sɔlemi we ɔ, se nyagbe ɔ, Roma ta buli ɔmɛ ya su gbogbo nɛ a fia kɛ bɔle sɔlemi we ɔ he nɛ a bɔni gbogbo ɔ ywiami konɛ a sɛ mi. Gbeye nu ma a mi bi ɔmɛ tsuo. Ke o na nɛ ní nɛ ɔmɛ tsuo nɛ ngɛ nɔ yae ɔ, kɛ o maa pee o ní ha kɛɛ?

2. Mɛni e he hia nɛ Kristofohi nɛ a pee benɛ Roma ta buli ɔmɛ ba sa ma a yi ɔ, nɛ mɛni he je nɛ a nyɛ nɛ a pee jã a?

² Loko e maa su jamɛ a be ɔ, Yesu sɛ hlami nɛ e bɔ e kaseli ɔmɛ kɔkɔ nɛ e tsɔɔ mɛ nɔ́ nɛ e sa kaa a pee. E de mɛ  ke: “Ke nyɛ na nɛ he nyɛli ba sa Yerusalem ma a yi ɔ, kɛkɛ nyɛ maa le kaa ma a hɛ mi kpatami be ɔ su ta. Jamɛ a be ɔ, nihi nɛ ngɛ Yudea a, a tu fo kɛ ya yo ɔmɛ a nɔ; nihi nɛ ngɛ ma a mi ɔ, a je, nɛ nihi ngɛ ngmɔ si ɔ, a ko ba ma a mi.” (Luka 21:20, 21) Mɛni blɔ nɔ kaseli ɔmɛ maa gu konɛ a bu Yesu blɔ tsɔɔmi ɔ tue, nɛ a je Yerusalem ma a mi be mi nɛ ta buli sa ma a yi ɔ? Nyakpɛ nɔ́ ko ya nɔ. Roma ta buli ɔmɛ je Yerusalem tlukaa! Kaa bɔ nɛ Yesu de ɔ, ‘a po tuami ɔ nɔ kpiti.’ (Mateo 24:22) Benɛ ta buli ɔmɛ je ɔ, Kristofohi anɔkualetsɛmɛ ná he blɔ nɛ a bu Yesu blɔ tsɔɔmi ɔ tue. A tu fo kɛ je ma a mi amlɔ nɔuu kɛ ho yoku ɔmɛ a nɔ ya. * (Hyɛ sisi ningma.) Pee se ngɛ jeha 70 ɔ mi ɔ, Roma ta buli kpahi kpale kɛ ba Yerusalem. Amlɔ nɛ ɔ lɛɛ a kpata ma a hɛ mi. Se nɔ tsuaa nɔ nɛ bu Yesu blɔ tsɔɔmi ɔ tue ɔ yi ná wami.

3. Mɛni e be kɛe nɛ Kristofohi nɛ a ngɛ mwɔnɛ ɔ hu kɛ maa kpe, nɛ mɛni he wa ma susu ngɛ munyu nɛ ɔ mi?

³ Kɔkɔ bɔmihi kɛ blɔ tsɔɔmihi nɛ Yesu kɛ ha e kaseli ɔmɛ ɔ kɔ wɔ hu wa he mwɔnɛ ɔ. E be kɛe kulaa nɛ wɔ hu wa ma ya je si fɔfɔɛ ko kaa jã mi. Yesu ngɔ níhi nɛ ya nɔ ngɛ kaseli ɔmɛ a be ɔ mi ɔ kɛ tsɔɔ níhi nɛ maa ya nɔ ke “haomi ngua” a je sisi tlukaa a nya. (Mateo 24:3, 21, 29) Kaa bɔ nɛ a baa anɔkuale Kristo se nyɛɛli komɛ a yi ngɛ Yerusalem hɛ mi kpatami ɔ mi ɔ, jã kɛ̃ nɛ a maa baa “nimli asafo” ko hu yi ngɛ hɛ mi kpatami nɛ maa ba je ɔ tsuo nɔ ɔ mi. (Kane Kpojemi 7:9, 13, 14.) E he hia wawɛɛ nɛ waa le nɔ́ nɛ Baiblo ɔ de ngɛ ní nɛ ɔmɛ nɛ maa ba hwɔɔ se ɔ a he. Mɛni he je? Ejakaa wa wami daa si ngɛ nɔ. Enɛ ɔ he ɔ, nyɛ ha nɛ wa susu bɔ nɛ ní nɛ ɔmɛ maa sa wa ti nɔ tsuaa nɔ he ha a he nɛ waa hyɛ.

4. Kɛ haomi ngua a maa je sisi ha kɛɛ?

⁴ Kɛ haomi ngua a maa je sisi ha kɛɛ? E maa je sisi kɛ lakpa jamihi a hɛ mi kpatami. Ngɛ Baiblo ɔ mi ɔ, a tsɛɛ lakpa jami ke, “Babilon Kpetekpleenyɛ, ajuamahi a nyɛ.” (Kpojemi 17:5-7) Mɛni he je nɛ a tsɛɛ lakpa jami ke yo ajuama a? Ejakaa lakpa jami nya dali yi Mawu anɔkuale. Ngɛ be mi nɛ e sa kaa a fĩ Yesu kɛ e Matsɛ Yemi ɔ se ɔ, a ya fĩ adesahi a nɔ yemihi mohu a se, nɛ a kɛ Baiblo ɔ mi tsɔɔmihi tsu we ní, ejakaa a suɔ nɛ a ná nihi fuu a nɔ he wami. A jami ɔ he tsɔ we kaa bɔ nɛ nihi nɛ a pɔ mɛ nu ɔ a jami ɔ he tsɔ ɔ. (2 Korinto Bi 11:2; Yakobo 1:27; Kpojemi 14:4) Se mɛnɔ ma kpata Babilon Kpetekpleenyɛ ɔ hɛ mi? Yehowa ma ha nɛ “lohwe awi yelɔ tsutsuu” ɔ e “koli nyɔngma” amɛ ma tsu Yehowa ‘yi mi tomi ɔ he ní’ ha lɛ. “Lohwe awi yelɔ tsutsuu” ɔ daa si ha Je Ma Amɛ A Kake Peemi Kuu ɔ, nɛ “koli nyɔngma” a hu daa si kɛ ha ma kudɔmi he wamihi tsuo nɛ a fĩ e se ɔ.—Kane Kpojemi 17:3, 16-18.

5, 6. Mɛni he je nɛ wa tsɔɔ kaa ke a kpata Babilon Ngua a hɛ mi ɔ, a be e mi bimɛ ɔmɛ tsuo a hɛ mi kpatae ɔ?

⁵ Ke a ngɛ Babilon Ngua a hɛ mi kpatae ɔ, anɛ a ma kpata lakpa jami mi bimɛ tsuo a hɛ mi lo? Dɛbi. Yehowa ha  nɛ gbalɔ Zakaria ngma nɔ́ nɛ maa ba a kɛ fɔ si. Jamɛ a be ɔ mi ɔ, nɔ ko nɛ be ko nɛ e be ɔ e ngɛ lakpa jami mi ɔ ma de ke: “‘Imi lɛɛ, pi gbalɔ ji mi; ngmɔ i huɔ. Kɛ je ye jokuɛwi a si ɔ, zugba pɛ ji ye weto ní.’ Ke nɔ ko ma bi lɛ ke, ‘Mɛni pa dokuhi ngɛ o gugue mi nɛ ɔ?’ e ma he nɔ ke, ‘Ye huɛ ko we mi nɛ i ya ná kɛ je.’” (Zakaria 13:4-6) Enɛ ɔ tsɔɔ kaa jami nya dali po maa bua pee a ní kaa a kɛ jami be nɔ́ ko peemi, nɛ a ma de ke a kɛ a he wui jami ko mi hyɛ.

⁶ Mɛni maa ba Mawu we bi a nɔ jamɛ a be ɔ mi? Yesu tsɔɔ nya ke: ‘Mawu maa po ligbi ɔmɛ a nɔ kpiti; ke e pee we jã, adesa ko adesa ko yi be wami nae. Mawu bimɛ ɔmɛ nɛ e hla a he je ɔ, a maa po jamɛ a ligbi ɔmɛ a nɔ kpiti.’ (Mateo 24:22) Ngɛ kaseli ɔmɛ a be ɔ mi ɔ, a po haomi nɛ ba Yerusalem ma a nɔ ɔ nɔ “kpiti.” Enɛ ɔ ha nɛ ‘nihi nɛ a hla’ nɛ ji Kristofohi nɛ a pɔ mɛ nu ɔ, tu fo kɛ je ma a mi. Jã kɛ̃ nɛ a maa po haomi ngua a kekleekle fã a nɔ “kpiti” ngɛ ‘nihi nɛ a hla’ a he je. A be ma kudɔmi he wamihi nɛ ji “koli nyɔngma” a blɔ ngmɛe nɛ e kpata Mawu we bi a hɛ mi. Mohu ɔ, ke a kpata lakpa jami hɛ mi ta a, níhi a mi ma ba jɔ be kpiti ko.

7, 8. Mɛni he blɔ wa ma ná ke a kpata lakpa jami hɛ mi se, nɛ ngɛ jamɛ a be ɔ mi ɔ, mɛni blɔ nɔ e maa slo Mawu we bi ngɛ nihi tsuo a he ngɛ?

⁷ Ke a kpata lakpa jami hɛ mi se ɔ, mɛni maa ba? Jamɛ a be ɔ ji be nɛ waa kɛ maa tsɔɔ nɔ́ tutuutu nɛ ngɛ wa tsui mi. Jamɛ a be ɔ mi ɔ, adesahi fuu maa bɔ mɔde kaa a ma ya laa a he ngɛ “tɛ sahi a sisi ngɛ yo ɔmɛ a nɔ” kɛ ha he piɛ pomi. Tɛ sa amɛ a sisi ngɛ yo ɔmɛ a nɔ ɔ ji adesahi a blɔ nya tomihi. (Kpojemi 6:15-17) Se Yehowa we bi lɛɛ a ma hla he piɛ pomi kɛ je Yehowa ngɔ. Benɛ a po tuami ɔ nɔ “kpiti” ngɛ kaseli ɔmɛ a be ɔ mi ɔ, tsa pi jamɛ a be ɔ mi nɛ kpaako Yuda bi ɔmɛ tsuo ma tsake si kake too ba pee Kristofohi. Mohu ɔ, jamɛ a be ɔ mi ji be nɛ nihi nɛ a ji Kristofohi momo ɔ, kɛ maa tu fo kɛ je Yerusalem kaa bɔ nɛ Yesu de mɛ kaa a pee ɔ. Jã kɛ̃ nɛ hwɔɔ se ɔ, ke a po tuami nɛ a ma tua Babilon Ngua a nɔ “kpiti” ɔ, e sɛ nɛ waa hyɛ blɔ kaa nihi fuu ma tsake kɛ pee anɔkuale Kristofohi si kake too. Mohu ɔ, jamɛ a be ɔ mi ɔ, nihi tsuo nɛ a jaa Yehowa ngɛ anɔkuale mi ɔ ma ná he blɔ kɛ tsɔɔ kaa a suɔ Yehowa, nɛ a fĩ nihi nɛ a pɔ mɛ nu ɔ a se.—Mateo 25:34-40.

⁸ Wa li nɔ́ tutuutu nɛ maa ya nɔ jamɛ a be ɔ mi mohu lɛɛ, se wa ngɛ blɔ hyɛe kaa níhi a mi maa wa nɛ e ma bi nɛ waa kɛ níhi nɛ sã afɔle. Ngɛ kaseli ɔmɛ a be ɔ mi ɔ, bɔ nɛ pee nɛ Kristofohi nɛ ná yi baami ɔ, a je a wehi a mi nɛ a ya na nɔ́ wawɛɛ. (Marko 13:15-18) E sa nɛ wa bi wa he ke: ‘Anɛ i pee klaalo kaa ma ngmɛɛ he lo nya níhi a he lo? Anɛ i suɔ kaa ma pee nɔ́ tsuaa nɔ́ nɛ ma nyɛ konɛ ma ye Yehowa anɔkuale daa lo?’ Mo  susu he nɛ o hyɛ! Ngɛ nɔ́ tsuaa nɔ́ nɛ maa ya nɔ ngɛ jamɛ a be ɔ mi tsuo se ɔ, wɔ pɛ nɛ wa maa hi wa Mawu ɔ jae kaa bɔ nɛ gbalɔ Daniel hu pee ɔ.—Daniel 6:10, 11.

9, 10. (a) Mɛni sɛ gbi Mawu we bi maa fiɛɛ ngɛ haomi ngua a mi? (b) Kɛ Mawu we bi a he nyɛli maa pee a ní ha kɛɛ?

⁹ Ke haomi ngua a ngɛ nɔ yae ɔ, tsa pi jamɛ a be ɔ mi nɛ wa maa fiɛɛ ‘Matsɛ Yemi ɔ he sane kpakpa’ a kɛ ha nihi. Sɛ gbi nɛ ɔ fiɛɛmi se maa po ngɛ jamɛ a be ɔ mi, ejakaa “nyagbe ɔ” su si ta! (Mateo 24:14) Mawu we bi kɛ kã maa fiɛɛ kojomi sɛ gbi nɛ maa sa nihi tsuo a he. Eko ɔ, a maa fiɛɛ kaa Satan je yaya a tsuo hɛ mi ma kpatami. Baiblo ɔ ngɔ sɛ gbi nɛ ɔ kɛ to gbiɛ ngo ngu he. Baiblo ɔ de ke: “Gbiɛ ngo ngu lokpolokpohi nɛ eko tsuaa eko jiimi ji kilo nyingmi enuɔ je hiɔwe ba nɔɔ nimlihi a nɔ. Nimli adesahi tu musu bɔmi munyu kɛ si Mawu ngɛ gbiɛ ngo ngu nɛ e kɛ hao mɛ ɔ he, ejakaa nɔ́ ɔ nya wa tsɔ.”—Kpojemi 16:21.

¹⁰ Wa he nyɛli ɔmɛ maa nu kojomi sɛ gbi nɛ nya wa nɛ ɔ. Yehowa ha nɛ gbalɔ Ezekiel tsɔɔ bɔ nɛ je mahi a kuu ko nɛ Baiblo ɔ tsɛɛ lɛ ke Gog nɛ je Magog zugba a nɔ ɔ maa pee e ní ha: ‘Bɔ nɛ Nyɔmtsɛ Yehowa ngɛ Gog dee ji nɛ ɔ nɛ; “Ke jamɛ a be ɔ su ɔ, susumi slɔɔtoslɔɔtohi maa ba o yi mi, se ga yaya mohu o maa to. O ma de ke o ma ya tua ma ko nɛ e mi bi hii si kpoo ngɛ tue mi jɔmi, kɛ he jɔmi mi. Gbogbo be ma amɛ a he ɔ, agbo se lami dade ko hu be. O ma ya tua ma amɛ, nɛ o maa ha a mi ní. O ma ya tua ma doku ɔmɛ nɛ amlɔ nɛ ɔ lɛɛ a mi hyi kɛ nimli ɔ. O ma ya tua ni ɔmɛ nɛ a bua a nya kɛ je je ma amɛ a mi ɔ. Nimli nɛ ɔmɛ ngɛ na, to, kɛ weto ní babauu, nɛ a ngɛ he jɔmi mi ngɛ he nɛ je ɔ tsuo nya ba kpe ngɛ.”’ (Ezekiel 38:10-12) Mawu we bi maa je ekpa ngɛ nihi tsuo a he, nɛ e maa pee kaa nɔ́ nɛ a “ngɛ he nɛ je ɔ tsuo nya ba kpe ngɛ.” Je ma amɛ be nyɛe maa ye a he nɔ hu. A maa suɔ wawɛɛ kaa a ma tua nihi nɛ Yehowa pɔ mɛ nu, kɛ nihi nɛ a fĩ a se ɔ.

11. (a) Mɛni e he hia nɛ wa kai ngɛ bɔ nɛ níhi maa ya nɔ setsɔsetsɔ ha ngɛ haomi ngua a mi ɔ he? (b) Ke nihi na okadi ɔmɛ ɔ, kɛ a maa pee a ní ha kɛɛ?

¹¹ Mɛni maa ba ngɛ lɔ ɔ se? Baiblo ɔ de we wɔ bɔ nɛ níhi maa ya nɔ setsɔsetsɔ ha mohu lɛɛ, se eko ɔ, ní komɛ maa ya nɔ ngɛ be kake mi. Yesu gba kɛ kɔ je ɔ nyagbe ɔ he. Ngɛ jamɛ a gbami ɔ mi ɔ e de ke: “Nyakpɛ níhi maa ba pu, nyɔhiɔ, kɛ dodoehi a hɛ mi. Nihi babauu ngɛ je ɔ mi a kɔni mi ma jɔ̃; ke wo gli nɛ oslɔke pɛ kɛkɛ gbeye nu mɛ. Níhi nɛ ma je ɔ mi ɔ maa wo nihi a he gbeye, nɛ a maa hɛli, ejakaa he wamihi nɛ ngɛ hiɔwe ɔ, a maa fie mɛ kɛ je a blɔ hehi. Kɛkɛ ɔ, a maa na Nɔmlɔ Bi ɔ hɛ mi ngɛ bɔku mi kɛ he wami, kɛ hɛ mi nyami babauu.” (Luka 21:25-27; kane Marko 13:24-26.) Anɛ gbami nɛ ɔ mi bami ɔ tsɔɔ kaa okadihi kɛ ní gbeyegbeyehi maa ya nɔ ngɛ hiɔwe lo? Nyɛ ha waa mlɛ  nɛ waa hyɛ. Se wa le kaa ke Mawu he nyɛli ɔmɛ na okadi ɔmɛ ɔ, a tsui maa po, nɛ sawale maa nu mɛ.

12, 13. (a) Mɛni maa ba ke Yesu ba “kɛ he wami, kɛ hɛ mi nyami babauu”? (b) Kɛ Mawu we bi maa pee a ní ngɛ jamɛ a be ɔ mi ha kɛɛ?

¹² Mɛni maa ba ke Yesu ba “kɛ he wami, kɛ hɛ mi nyami babauu”? E maa jɔɔ nihi nɛ a maa ye anɔkuale ɔ, nɛ e maa gbla nihi nɛ be anɔkuale yee ɔ a tue. (Mateo 24:46, 47, 50, 51; 25:19, 28-30) Yesu ngɔ nɔ́ hetomi nɔ́ ko kɛ tsu ní kɛ tsɔɔ sane nɛ ɔ nya fitsofitso. E de ke: “Ligbi ɔ nɛ Nɔmlɔ Bi ɔ maa ba kaa matsɛ, nɛ bɔfo ɔmɛ tsuo maa piɛɛ e he kɛ ba a, jamɛ a be ɔ mi ɔ, e maa hi e matsɛ sɛ saminyayoo ɔ nɔ, nɛ a ma bua je ma amɛ tsuo a nya ngɛ e hɛ mi. Kɛkɛ ɔ, e ma gba a mi kaa bɔ nɛ to hyɛlɔ gbaa jijɔ, kɛ apletsi mi ɔ. E maa ngɔ jijɔ ɔmɛ ngɔ da e hiɔ nɔ, nɛ apletsi ɔmɛ maa da e muɔ nɔ.” (Mateo 25:31-33) Mɛni maa ba jijɔ ɔmɛ kɛ apletsi ɔmɛ a nɔ? A maa kojo mɛ. Apletsi ɔmɛ aloo nihi nɛ a yi anɔkuale ɔ “maa ya neneene he hiami mi.” Se jijɔ ɔmɛ aloo nihi nɛ yeɔ anɔkuale ɔ ma ná neneene wami.—Mateo 25:46.

¹³ Ke apletsi ɔmɛ yɔse kaa a ma kpata a hɛ mi ɔ, kɛ a maa pee a ní ha kɛɛ? “A maa wo yana.” (Mateo 24:30) Se kɛ nihi nɛ a pɔ mɛ nu ɔ, kɛ nihi nɛ fĩ a se ɔ maa pee a ní ha kɛɛ? A maa pee nɔ́ nɛ Yesu de kɛ nyɛɛ se nɛ ɔ: “Ke ní nɛ ɔmɛ bɔni mi bami ɔ, nyɛɛ te si, nɛ nyɛ wo nyɛ yi nɔ; ejakaa e be kɛe nɛ Mawu ma he nyɛ yi wami.”—Luka 21:28.

14, 15. Ke Gog nɛ je Magog ɔ je e tuami ɔ sisi se ɔ, mɛni nihi a nya buami nɛ maa ya nɔ, nɛ kɛ enɛ ɔ ma plɛ kɛ ba mi ha kɛɛ?

¹⁴ Ke Gog nɛ je Magog ɔ bɔni Mawu we bi tuami ɔ, mɛni maa ba ngɛ lɔ ɔ se? Baiblo ɔ tsɔɔ kaa nɔmlɔ Bi ɔ ‘maa tsɔ hiɔwe bɔfo ɔmɛ kɛ ya bua nihi nɛ Mawu hla a a nya kɛ je je ɔ kɔ nya eywiɛ ɔmɛ tsuo, kɛ je zugba nyagbe he kɛ yaa si hiɔwe nyagbe he.’ (Marko 13:27; Mateo 24:31) Nihi a nya buami nɛ ɔ kɔ we be nɛ a je Kristofohi nɛ a pɔ mɛ nu ɔ a hlami sisi ɔ he. Nɛ e kɔ we nihi nɛ a pɔ mɛ nu nɛ a piɛ ngɛ zugba a nɔ ɔ a nyagbe nya sɔumi ɔ hu he. (Mateo 13:37, 38) Nya sɔumi nɛ ɔ maa ya nɔ ke e piɛ bɔɔ nɛ haomi ngua a maa je sisi. (Kpojemi 7:1-4) Ke jã a, lɛɛ mɛni nihi a nya buami he munyu Yesu tu ɔ mɔ? Lɔ ɔ ji be nɛ nihi nɛ a pɔ mɛ nu nɛ a piɛ ngɛ zugba a nɔ ɔ a nine maa su a hiɔwo ɔ nɔ, nɛ a maa ho hiɔwe ya a nɛ. (1 Tesalonika Bi 4:15-17; Kpojemi 14:1) Ke Gog nɛ je Magog ɔ je e tuami ɔ sisi ɔ, lɔ ɔ se ɔ, nɔ́ nɛ ɔ maa ya nɔ. (Ezekiel 38:11) Kɛkɛ ɔ, kaa bɔ nɛ Yesu de ɔ, ‘dali ɔmɛ ma kpɛ kaa pu ngɛ a Tsɛ ɔ Matsɛ Yemi ɔ mi.’—Mateo 13:43. * (Hyɛ sisi ningma.)

¹⁵ Anɛ enɛ ɔ tsɔɔ kaa a ma “sa” nihi nɛ a pɔ mɛ nu ɔ kɛ ho hiɔwe ya lo? Sɔlemi yali fuu susu kaa a ma sa Kristofohi kɛ ho hiɔwe ya kɛ a we adesa nɔmlɔ tso ɔ. A susu hu kaa Yesu maa kpale kɛ ba zugba a nɔ ba ye matsɛ nɛ a kɛ a hɛngmɛ maa na lɛ. Se Baiblo ɔ tsɔɔ heii kaa Yesu maa kpale kɛ ba ngɛ mumi mi. E de ke: “Nɔmlɔ Bi ɔ we okadi ɔ maa je kpo ngɛ hiɔwe” nɛ Yesu maa ba “ngɛ bɔku ɔmɛ a mi.” (Mateo 24:30) Baiblo ɔ tsɔɔ hu kaa “he lo kɛ muɔ nine be Mawu matsɛ yemi ɔ nɔ sue.” Enɛ ɔ he ɔ, e ma bi nɛ a ‘tsake nihi nɛ a maa ngɔ mɛ kɛ ho hiɔwe ya a ngɛ hɛngmɛfia mi ke nyagbe titimati ɔ pɛ.’ * (Hyɛ sisi ningma.) (Kane 1 Korinto Bi 15:50-53.) Wa be dee ke a ma “sa” mɛ kɛ ho, ejakaa munyungu nɛ ɔ kɛ lakpa Kristofohi a tsɔɔmi ngɛ tsakpa. Se kɛ̃ ɔ, a ma bua anɔkualetsɛmɛ nɛ a pɔ mɛ nu ɔ a nya ngɛ hɛngmɛfia mi.

16, 17. Mɛni maa ya nɔ loko To Bi ɔ yo kpeemi be ɔ maa su?

¹⁶ Ke a ná nɛ a ngɔ nimli 144,000 ɔ kɛ ho hiɔwe ya a, To Bi ɔ ma bɔni nyagbe níhi nɛ e he hia kaa e dla kɛ ha yo kpeemi ɔ he ní tsumi. (Kpojemi 19:9) Se nɔ́ kpa ko maa ya nɔ loko bua jɔmi be nɛ ɔ maa su. Mo kai kaa Gog ma tua Mawu we bi be mi nɛ nihi nɛ a pɔ mɛ nu ɔ a kpɛti nihi nɛ piɛ ɔ ngɛ zugba a nɔ loloolo. (Ezekiel 38:16) Ke e ba jã a, kɛ Mawu we bi maa pee a ní ha kɛɛ? A kɛ blɔ tsɔɔmi nɛ nyɛɛ se nɛ ɔ ma tsu ní: ‘Nyɛɛ lɛɛ nyɛ ya da nyɛ blɔ hehi ngɛ nyɛ ta a nya, nɛ nyɛɛ mlɛ; nyɛ maa na kunimi nɛ Yehowa maa ye ha nyɛ. Nyɛ ko ye gbeye, nɛ nyɛ tsui ko po.’ (2 Kronika 20:17) Ke Gog je e tuami ɔ sisi ɔ, pee se ɔ, a maa ngɔ nihi nɛ a pɔ mɛ nu nɛ a maa piɛ ngɛ zugba a nɔ ɔ kɛ ho hiɔwe ya. Kpojemi 17:14 ɔ tsɔɔ wɔ nɔ́ nɛ maa ya nɔ ngɛ hiɔwe pee se ke Gog je e tuami ɔ sisi. Mawu we  bi a he nyɛli ɔmɛ ‘ma ya tua To Bi ɔ. Se To Bi ɔ, kɛ e se nyɛɛli ɔmɛ maa ye a nɔ kunimi. Lɛ ji nyɔmtsɛmɛ a Nyɔmtsɛ, kɛ matsɛmɛ a Matsɛ, nɛ e se nyɛɛli ɔmɛ ji nihi nɛ Mawu tsɛ, nɛ e hla mɛ ngɔ to, nɛ a yeɔ lɛ anɔkuale.’ Enɛ ɔ he ɔ, Yesu kɛ e matsɛmɛ 144,000 nɛ a pɔ mɛ nu nɛ a ngɛ hiɔwe ɔ maa je ngmlaa ha Mawu we bi nɛ a ngɛ zugba a nɔ ɔ.

¹⁷ Enɛ ɔ kɛ Harmagedon ta a maa ba, nɛ lɔ ɔ maa wo Yehowa biɛ klɔuklɔu ɔ hɛ mi nyami. (Kpojemi 16:16) A ma kpata nihi nɛ a kojo mɛ nɛ a bu mɛ kaa a ji apletsihi, aloo nihi nɛ a yi anɔkuale ɔ a hɛ mi. Yayami peelɔ ko be zugba a nɔ hie hu, nɛ “nimli asafo” ɔ ma ná yi baami ngɛ Harmagedon ta a mi. Nyagbe ɔ, Kpojemi womi ɔ mi nyagbe munyu nɛ ngɛ bua jɔmi ɔ maa ba mi. Lɔ ɔ ji To Bi ɔ yo kpeemi ɔ nɛ! (Kpojemi 21:1-4) * (Hyɛ sisi ningma.) Mawu bua maa jɔ nihi tsuo nɛ a maa baa a yi ngɛ zugba a nɔ ɔ a he, nɛ e ma je suɔmi agbo kpo kɛ ha mɛ, nɛ e ma ha mɛ a hiami níhi tsuo faa. Wa ngɛ jamɛ a be ɔ blɔ hyɛe wawɛɛ nitsɛ. Yo kpeemi nɛ ɔ maa pee bua jɔmi wawɛɛ nitsɛ!—Kane 2 Petro 3:13.

18. Ngɛ gbamihi nɛ a ngɛ bua jɔmi nɛ e be kɛe nɛ a maa ba mi ɔ nya a, mɛni e sa kaa waa fia wa pɛɛ si kaa wa maa pee?

¹⁸ Akɛnɛ e be kɛe nɛ bua jɔmi ní nɛ ɔmɛ maa ba he je ɔ, mɛni e sa kaa wa ti nɔ tsuaa nɔ nɛ hi pee amlɔ nɛ ɔ? Yehowa ha nɛ bɔfo Petro ngma ke: ‘Akɛnɛ ní nɛ ɔmɛ tsuo pɛpɛɛpɛ a hɛ mi ma kpata kikɛ nɛ ɔ, lɛɛ kɛ e sa kaa nyɛɛ ba nyɛ je mi kɛɛ? E sa kaa nyɛɛ pee klɔuklɔu nɛ nyɛɛ ngɔ nyɛ he ngɔ ha Mawu, konɛ nyɛɛ hi Mawu ligbi ɔ blɔ hyɛe, nɛ nyɛɛ hi sɔlee nɛ e su mla. Lɔ ɔ he ɔ, ye nyɛmimɛ nɛ i suɔ! Be mi nɛ nyɛ ngɛ ní nɛ ɔmɛ blɔ nyɛe ɔ, nyɛɛ bɔ mɔde nɛ Mawu ko na mu, loo piami nɔ́ ko ngɛ nyɛ he; nyɛɛ kɛ lɛ nɛ hi si ngɛ he jɔmi mi.’ (2 Petro 3:11, 12, 14) Ke jã a, lɛɛ nyɛ ha nɛ waa fia wa pɛɛ si kaa waa kɛ lakpa jami mi nɔ́ ko be wa jami ɔ futue, konɛ wa jami ɔ he nɛ tsɔ nɛ wa fĩ Yesu Kristo nɛ ji Tue Mi Jɔmi Matsɛ ɔ se.