1, 2. (a) Mɛni si himi o ngɛ blɔ hyɛe kaa o ma ná ngɛ Paradeiso ɔ mi? (Moo hyɛ foni nɛ ngɛ ní kasemi ɔ sisije ɔ.) (b) Mɛni ma ha wɔ bua jɔmi pe kulaa ngɛ je ehe ɔ mi?

WA NGƐ blɔ hyɛe wawɛɛ kaa wa ma ná “neneene wami.” (Kane 1 Timoteo 6:12, 19.) Nihi babauu ma ná wami nɛ ɔ ngɛ zugba a nɔ ngɛ Paradeiso mi kɛ ya neneene. Wa be nyɛe maa kale bɔ nɛ si himi ɔ ma ji ngɛ jamɛ a be ɔ mi ke wa te si mɔtu nɛ wa na kaa wa ngɛ nɔmlɔ tso mi he wami, bua jɔmi, nɛ wa tsui hu nɔ wa mi. (Yesaya 35:5, 6) Mo susu bɔ nɛ o bua maa jɔ ha ke o kɛ o weku li, o huɛmɛ, kɛ nihi nɛ a ma tle mɛ si ɔ maa pee kake kɛ hi si ɔ he nɛ o hyɛ. (Yohane 5:28, 29; Bɔfo Ɔmɛ A Ní Tsumi 24:15) O ma ná be kɛ kase ní ehehi, nɛ o he maa be ngɛ níhi nɛ o bua jɔ a peemi he ɔ mi. Kaa nɔ hyɛmi nɔ́ ɔ, o ma nyɛ maa kase je mi si kpami he níhi fuu, aloo bɔ nɛ a fiaa saku ha, aloo bɔ nɛ o maa po mo nitsɛ o we ha.

² E ngɛ mi kaa wa ngɛ ní kpakpa nɛ ɔmɛ blɔ hyɛe mohu lɛɛ, se nɔ́ nɛ ma ha wɔ bua jɔmi pe kulaa ji Yehowa sɔmɔmi. Hyɛ bɔ nɛ si himi ɔ maa pee bua jɔmi ha ke nihi fuu naa Yehowa  biɛ ɔ kaa e ngɛ klɔuklɔu, nɛ a kplɛɛ nɔ kaa Yehowa ji a Nɔ Yelɔ. (Mateo 6:9, 10) Wa bua maa jɔ kaa nihi nɛ a ye mluku ma hyi zugba a nɔ kaa bɔ nɛ Mawu to e yi mi ɔ. Mo susu he nɛ o hyɛ, bɔɔbɔɔbɔɔ ɔ, wa maa ye mluku, nɛ ke e ba jã a, e be yee ha wɔ kaa wa ma ha nɛ huɛ bɔmi nɛ ngɛ waa kɛ Yehowa wa kpɛti ɔ mi maa wa!—La 73:28; Yakobo 4:8.

3. Mɛni e sa kaa wa dla wa he kɛ to amlɔ nɛ ɔ?

³ Wa ngɛ nɔ mi mami kaa Yehowa maa pee nyakpɛ ní nɛ ɔmɛ tsuo, ejakaa ‘Mawu nyɛɔ peeɔ nɔ́ tsuaa nɔ́.’ (Mateo 19:25, 26) Ke wa suɔ nɛ waa hi je ehe ɔ mi ɔ, e sa nɛ waa ‘pɛtɛ neneene wami ɔ he wawɛɛ’ amlɔ nɛ ɔ. Wa le kaa e be kɛe kulaa nɛ nyagbe ɔ maa ba, enɛ ɔ he ɔ, e sa nɛ wa ha nɛ wa je mi bami nɛ tsɔɔ kaa wa ngɛ blɔ hyɛe kaa nyagbe ɔ maa ba be fɛɛ be. E he hia nɛ waa bɔ mɔde wawɛɛ konɛ wa dla wa he kɛ to amlɔ nɛ ɔ kɛ ha je ehe ɔ mi himi. Ha nɛ waa hyɛ bɔ nɛ wa ma plɛ kɛ pee enɛ ɔ ha.

4. Mɛni wa ma nyɛ maa pee kɛ dla wa he kɛ ha je ehe ɔ mi himi amlɔ nɛ ɔ? Mo ha enɛ ɔ he nɔ hyɛmi nɔ́.

⁴ Mɛni wa maa pee kɛ dla wa he amlɔ nɛ ɔ kɛ ha je ehe ɔ mi himi? Ke wa ngɛ blɔ nya toe kaa waa maa hia kɛ ho ma ko nɔ ya a, eko ɔ, wa maa pee ní komɛ kɛ dla wa he kɛ ha jamɛ a ma a mi himi. Kaa nɔ hyɛmi nɔ́ ɔ, eko ɔ, wa ma bɔni gbi nɛ a tuɔ ngɛ jamɛ a ma a mi ɔ kasemi, nɛ wa maa kase bɔ nɛ nihi nɛ a ngɛ jamɛ a ma a mi ɔ peeɔ a ní ha a hulɔ. Eko ɔ, wa maa bɔ mɔde kaa wa maa kase niye ní komɛ nɛ a yeɔ ngɛ jamɛ a ma a mi ɔ yemi. Jã kɛ̃ nɛ wa ma nyɛ ma dla wa he kɛ ha je ehe ɔ mi himi amlɔ nɛ ɔ kɛ gu wa je mi nɛ wa maa ba kaa nɔ́ nɛ wa ngɛ lejɛ ɔ momo ɔ nɔ. Ha nɛ wa susu blɔ komɛ a nɔ nɛ wa maa gu kɛ pee jã a he nɛ waa hyɛ.

5, 6. Mɛni he je nɛ ke wa buɔ blɔ tsɔɔmi nɛ Yehowa asafo ɔ kɛ haa wɔ ɔ tue ɔ, lɔ ɔ ma dla wɔ kɛ ha je ehe ɔ mi himi ɔ?

⁵ Ngɛ je nɛ ɔ mi ɔ, Satan suɔ kaa nihi nɛ a susu kaa a ma nyɛ maa pee a tsui nya ní. Nihi fuu susu kaa e he hia we nɛ a bu Mawu tue, mohu ɔ, e he hia nɛ a pee níhi ngɛ a dɛ he. Mɛni je mi kɛ ba? Haomi kɛ nɔ́ nami sɔuu. (Yeremia 10:23) Se Yehowa ji Nɔ Yelɔ nɛ ngɛ suɔmi. Hyɛ bɔ nɛ wa ma ná si himi kpakpa ngɛ je ehe ɔ mi ha ke nɔ fɛɛ nɔ bu lɛ tue!

⁶ Ngɛ je ehe ɔ mi ɔ, wa ma ná blɔ tsɔɔmi kɛ je Yehowa asafo ɔ ngɔ nɛ maa ye bua wɔ konɛ wa dla zugba a kɛ pee paradeiso nɛ ngɛ fɛu. Blɔ tsɔɔmi nɛ ɔ hu maa ye bua wɔ nɛ wa ma nyɛ maa tsɔɔ nihi nɛ a ma tle mɛ si ɔ ní. Yehowa ma ha wɔ ní tsumihi fuu nɛ wa ma tsu. Nɛ ke nihi nɛ a maa nyɛɛ wa hɛ mi ɔ de wɔ ke waa pee nɔ́ ko nɛ́ wa bua jɔɛ he hu nɛɛ? Anɛ wa maa bu mɛ tue lo? Anɛ wa maa bɔ mɔde wawɛɛ kaa waa kɛ bua jɔmi ma tsu ní tsumi nɛ a kɛ maa wo wa dɛ ɔ lo? Loko wa ma nyɛ ma dla wa he kɛ ha je ehe ɔ mi himi ɔ, e he hia nɛ waa bu blɔ tsɔɔmi nɛ jee Yehowa asafo ɔ ngɔ ɔ tue amlɔ nɛ ɔ.

7, 8. (a) Mɛni he je nɛ e sa kaa waa kɛ nihi nɛ a nyɛɛɔ wa hɛ mi ɔ nɛ pee kake ɔ? (b) Mɛni tsakemi ba nyɛmimɛ komɛ a blɔ fa mi? (d) Mɛni wa ngɛ nɔ mi mami kaa wa ma ná ngɛ je ehe ɔ mi?

⁷ Ke wa suɔ nɛ wa dla wa he kɛ ha je ehe ɔ mi himi ɔ, e he hia nɛ wa bua nɛ jɔ níhi nɛ wa ngɛ ɔ a he, nɛ waa bu Yehowa asafo ɔ tue, nɛ waa kɛ wa nyɛmimɛ hu nɛ pee kake. Kaa nɔ hyɛmi nɔ́ ɔ, ke a kɛ ní tsumi ehe ko wo wa dɛ ɔ, e sa nɛ waa je wa tsui mi nɛ waa pɛtɛ he nɛ wa bua hu nɛ jɔ  he. Ke waa kɛ nihi nɛ a nyɛɛɔ wa hɛ mi ɔ peeɔ kake amlɔ nɛ ɔ, e ngɛ heii kaa ngɛ je ehe ɔ mi ɔ, wa maa pee jã. (Kane Hebri Bi 13:17.) Benɛ Israel bi ɔmɛ ya su Si Womi Zugba a nɔ ɔ, a tsɔɔ a ti nɔ tsuaa nɔ he nɛ e sa kaa e hi. (4 Mose 26:52-56; Yoshua 14:1, 2) Wa li he nɛ a ma ha wa ti nɔ fɛɛ nɔ kaa e hi ngɛ je ehe ɔ mi. Se ke waa kɛ nihi nɛ a nyɛɛɔ wa hɛ mi ɔ peeɔ kake amlɔ nɛ ɔ, waa kɛ bua jɔmi maa pee Yehowa suɔmi nya ní ngɛ je ehe ɔ mi.

⁸ E ji he blɔ nɛ wa ma ná kaa wa ma sɔmɔ Mawu ngɛ je ehe ɔ mi ngɛ Matsɛ Yemi ɔ sisi! Enɛ ɔ he ɔ, wa bua jɔ kaa waa kɛ Yehowa asafo ɔ maa pee kake amlɔ nɛ ɔ, nɛ wa ma tsu nɔ́ fɛɛ nɔ́ nɛ asafo ɔ kɛ maa wo wa dɛ kaa wa tsu ɔ. Se be komɛ ɔ, a ma nyɛ ma tsake ní tsumihi nɛ a kɛ wo wa dɛ ɔ. Kaa nɔ hyɛmi nɔ́ ɔ, a ha nɛ nyɛmimɛ komɛ nɛ a sɔmɔɔ ngɛ United States Betel ɔ ya ngɛ sɔmɔe kaa blɔ gbali. Nɛ a ha nɛ kpɔ mi nɔ hyɛli komɛ hu ya ngɛ sɔmɔe kaa blɔ gbali klɛdɛɛ akɛnɛ a wa ngɛ jeha mi ɔ he je. A kɛ bua jɔmi ngɛ ní tsumihi nɛ a kɛ wo a dɛ ɔ tsue, nɛ Yehowa ngɛ mɛ jɔɔe. Ke wa sɔleɔ kaa Yehowa nɛ ye bua wɔ, nɛ waa kɛ wa tsui tsuo sɔmɔɔ lɛ, nɛ wa bua jɔɔ ní tsumi saisaa nɛ a kɛ woɔ wa dɛ ɔ he ɔ, wa bua maa jɔ, nɛ Yehowa maa jɔɔ wɔ. (Kane Abɛ 10:22.) Nɛ ngɛ je ehe ɔ mi ɔ, ke wa suɔ kaa waa maa hi he pɔtɛɛ ko, se Yehowa asafo ɔ ha wɔ he kpa hu nɛɛ? Jamɛ a be ɔ mi ɔ, tsa pi he nɛ wa maa hi aloo nɔ́ nɛ wa ma tsu ɔ nɛ he hia, mohu ɔ, wa bua maa jɔ kaa wa ngɛ je ehe ɔ mi.—Nehemia 8:10.

9, 10. (a) Mɛni he je nɛ eko ɔ, e he maa hia kaa waa to wa tsui si ngɛ je ehe ɔ mi ɔ? (b) Mɛni wa ma nyɛ maa pee amlɔ nɛ ɔ kɛ tsɔɔ kaa wa toɔ wa tsui si?

⁹ Ngɛ je ehe ɔ mi ɔ, eko ɔ, be komɛ ɔ, e he maa hia nɛ waa to wa tsui si. Kaa nɔ hyɛmi nɔ́ ɔ, eko ɔ, wa maa nu kaa a tle ní komɛ a weku li kɛ a huɛmɛ si nɛ a bua jɔ. Se eko ɔ, wɔɔ lɛɛ e ma bi nɛ waa mlɛ kɛ ya si benɛ a ma tle wa suɔli a si. Ke e ba jã a, anɛ wa maa piɛɛ ni kpahi a he kɛ nya, nɛ wa maa to wa tsui si lo? (Roma Bi 12:15) Ke wa toɔ wa tsui si ha Yehowa amlɔ nɛ ɔ konɛ e ha e si womi ɔmɛ nɛ ba mi ɔ, lɔ ɔ maa ye bua wɔ nɛ wa maa to wa tsui si ha lɛ ngɛ je ehe ɔ mi.—Fiɛlɔ 7:8.

¹⁰ Jehanɛ se hu ɔ, wa ma nyɛ ma dla wa he kɛ ha je ehe ɔ mi himi kɛ gu wa tsui si nɛ wa maa to ke a pee tsakemi ko ngɛ bɔ nɛ wa nu Baiblo mi anɔkuale ko sisi ha a he. Anɛ wa kaseɔ tsakemi nɛ ɔ, nɛ ke wa nui sisi kpakpa ko ɔ, wa toɔ wa tsui si lo? Ke jã a, lɛɛ ngɛ je ehe ɔ mi ɔ, be fɛɛ be nɛ Yehowa ma ha wɔ blɔ tsɔɔmi ehe ko ɔ, e be yee ha wɔ kaa wa maa to wa tsui si.—Abɛ 4:18; Yohane 16:12.

11. Mɛni he je nɛ e sa kaa waa kɛ nihi a tɔmihi nɛ pa mɛ amlɔ nɛ ɔ, nɛ kɛ jã peemi maa ye bua wɔ ngɛ je ehe ɔ mi ha kɛɛ?

¹¹ Blɔ kpa nɛ wa ma nyɛ maa gu nɔ kɛ dla wa he kɛ ha je ehe ɔ mi himi ji, nɛ waa kɛ nihi a tɔmi maa pa mɛ. Ngɛ Kristo Jeha Akpe Nɔ Yemi ɔ mi ɔ, e ma he be loko nɔ fɛɛ nɔ maa ye mluku. (Bɔfo Ɔmɛ A Ní Tsumi 24:15) Anɛ wa maa suɔ wa  sibi nɛ waa kɛ a tɔmihi maa pa mɛ lo? Ke wa nyɛɛɔ nɛ waa kɛ nihi a tɔmihi paa mɛ nɛ waa kɛ mɛ hii si saminya amlɔ nɛ ɔ, e be yee ha wɔ kaa wa maa pee jã ngɛ je ehe ɔ mi.—Kane Kolose Bi 3:12-14.

12. Mɛni he je e sa kaa wa dla wa he kɛ ha je ehe ɔ mi himi amlɔ nɛ ɔ?

¹² Ngɛ je ehe ɔ mi ɔ, eko ɔ, pi be tsuaa be nɛ wa nine maa su níhi nɛ wa ngɛ hlae ɔ a nɔ, aloo eko ɔ, ja wa mlɛ loko wa nine maa su nɔ. E maa hia nɛ wa bua nɛ jɔ si himi saisaa nɛ wa ma ya je mi ɔ he. Ngɛ anɔkuale mi ɔ, suhi nɛ Yehowa ngɛ wɔ tsɔɔe amlɔ nɛ ɔ, jamɛ a su ɔmɛ nɔuu nɛ wa maa hia ngɛ je ehe ɔ mi. Enɛ ɔ he ɔ, ke wa nyɛɔ nɛ wa jeɔ su nɛ ɔmɛ kpo amlɔ nɛ ɔ, lɔ ɔ tsɔɔ kaa wa ngɛ nɔ mi mami kaa je ehe ɔ maa ba, nɛ wa ngɛ wa he dlae ke ha neneene wami nami. (Hebri Bi 2:5; 11:1) Lɔ ɔ hu maa tsɔɔ kaa wa suɔ nitsɛnitsɛ kaa wa maa hi je ko nɛ nɔ fɛɛ nɔ buɔ Mawu tue ngɛ mi ɔ mi.

13. Ngɛ je ehe ɔ mi ɔ, mɛni waa kɛ maa pee nɔ́ titli ngɛ wa si himi mi?

¹³ Ngɛ je ehe ɔ mi ɔ, wa nine maa su nɔ́ fɛɛ nɔ́ nɛ ma ha nɛ wa ma ná bua jɔmi ngɛ si himi mi ɔ nɔ. Se nɔ́ nɛ ma ha wɔ bua jɔmi pe kulaa ji, huɛ bɔmi nɛ maa hi waa kɛ Yehowa wa kpɛti ɔ. (Mateo 5:3) Waa kɛ Yehowa sɔmɔmi maa pee nɔ́ titli ngɛ wa si himi mi, nɛ wa ma ná Yehowa he bua jɔmi. (La 37:4) Enɛ ɔ he ɔ, ke waa kɛ Yehowa sɔmɔmi pee nɔ́ titli ngɛ wa si himi mi amlɔ nɛ ɔ, wa ngɛ wa he dlae kɛ ha je ehe ɔ mi himi.—Kane Mateo 6:19-21.

14. Mɛni otihi nihewi kɛ zangmawi ma nyɛ ma kɛ ma a hɛ mi ngɛ Yehowa sɔmɔmi mi?

¹⁴ Mɛni wa ma nyɛ maa pee konɛ waa kɛ bua jɔmi nɛ sɔmɔ Yehowa pe bɔ nɛ wa ngɛ pee nɛ ɔ? E sa kaa waa kɛ otihi nɛ ma wa hɛ mi. Ke o ji niheyo aloo zangmayo ɔ, mo susu bɔ nɛ o kɛ o wami ma nyɛ ma sɔmɔ Yehowa ha a he saminya. Mɛni he je  nɛ o hla we níhi a mi ngɛ asafo ɔ womihi a mi konɛ o le be tsuo sɔmɔmi ní tsumi ɔ mimi slɔɔtoslɔɔtohi nɛ ngɛ ɔ? O ma nyɛ maa ngɔ eko kɛ ma o hɛ mi. * (Hyɛ sisi ningma.) O kɛ ni komɛ nɛ a kɛ a be tsuo sɔmɔ Yehowa jehahi babauu ɔ nɛ sɛɛ ní. Ke o sɔmɔ Yehowa o wami be tsuo ɔ, o ma ná tsɔsemi nɛ he maa ba se nami ha mo. Níhi a si kpami nɛ o ma ná a maa ye bua mo konɛ o sɔmɔ Yehowa ngɛ je ehe ɔ mi.

15. Mɛni oti kpa komɛ waa kɛ ma nyɛ maa ma wa hɛ mi ngɛ Yehowa sɔmɔmi mi?

¹⁵ Otihi fuu ngɛ nɛ waa kɛ ma nyɛ maa ma wa hɛ mi ngɛ Yehowa sɔmɔmi mi. Kaa nɔ hyɛmi nɔ́ ɔ, wa ma nyɛ maa kase blɔ kpahi a nɔ nɛ waa maa gu kɛ tsu wa fiɛɛmi ní tsumi ɔ. Aloo wa ma nyɛ maa bɔ mɔde konɛ waa nu Baiblo sisi tomi mlaahi a sisi saminya nɛ waa le bɔ nɛ waa kɛ ma tsu ní ha. Wa ma nyɛ maa kase bɔ nɛ a kaneɔ ní saminya ngɛ nihi a hɛ mi, bɔ nɛ a tuɔ munyu, aloo a haa sanehi a heto nɛ pii si ha ngɛ kpehi a sisi. Mo kadi kaa ke o kɛ otihi ma o hɛ mi ngɛ Yehowa sɔmɔmi mi ɔ, e maa ye bua mo nɛ o ma na kã kɛ sɔmɔ Yehowa, nɛ o ma dla o he kɛ ha si himi ngɛ je ehe ɔ mi.

16. Mɛni he je nɛ Yehowa sɔmɔmi ji nɔ́ nɛ hi pe kulaa a?

¹⁶ Ke wa ngɛ wa he dlae kɛ ha Mawu je ehe ɔ mi himi ɔ, anɛ lɔ ɔ tsɔɔ kaa nɔ́ ko maa bɔ wɔ ngɛ si himi mi mwɔnɛ ɔ lo? Dabi! Nɔ́ nɛ hi pe kulaa nɛ wa ma nyɛ maa pee ji, sɔmɔmi nɛ wa ma sɔmɔ Yehowa. Nɔ ko nyɛ we wa nɔ kaa wa sɔmɔ Yehowa, nɛ tsa pi nɛ wa suɔ kaa wa ná yi baami ngɛ haomi ngua a mi pɛ he je nɛ wa peeɔ jã ngɛ. Ke huɛ bɔmi kpakpa ngɛ waa kɛ Yehowa wa kpɛti ɔ, wa si himi peeɔ kpakpa nɛ wa bua jɔɔ. Yehowa bɔ wɔ kaa wa bua nɛ jɔ. Suɔmi nɛ Yehowa ngɛ ha wɔ kɛ blɔ  tsɔɔmi nɛ e kɛ haa a wɔ ɔ hi pe nɔ́ tsuaa nɔ́. (Kane La 63:1-3.) Akɛnɛ wɔ tsuo wa jeɔ wa tsui mi kɛ sɔmɔɔ Yehowa he je ɔ, wa náa bua jɔmi. Nihi nɛ a ngɛ lɛ sɔmɔe jehahi babauu ji nɛ ɔ ma nyɛ ma de kɛ nɔ mi mami kaa nɔ́ ko be nɛ hi pe Yehowa sɔmɔmi.—La 1:1-3; Yesaya 58:13, 14.

17. Loko níhi nɛ wa bua jɔ he kɛ hɛja jemi ma ha wɔ bua jɔmi nitsɛnitsɛ ngɛ Paradeiso ɔ mi ɔ, mɛni e sa kaa e he nɛ hia wɔ?

¹⁷ Ngɛ Paradeiso ɔ mi ɔ, waa kɛ wa be ma tsu níhi nɛ wa ngɛ he bua jɔmi, nɛ wa ma je wa hɛja hulɔ. Yehowa bɔ wɔ kaa wa ná bua jɔmi, nɛ e wo si kaa e ma ha ‘nɔ́ tsuaa nɔ́ nɛ ngɛ hɛ ngmengmle ɔ maa tɔ’ kɛ níhi nɛ a ngɛ hlae. (La 145:16; Fiɛlɔ 2:24) E he hia nɛ wa je wa hɛja nɛ waa jɔɔ wa he hulɔ. Se loko ní nɛ ɔmɛ ma ha nɛ wa ma ná bua jɔmi wawɛɛ ɔ, ja wa ha nɛ huɛ bɔmi nɛ ngɛ waa kɛ Yehowa wa kpɛti ɔ he hia wɔ. Jã nɛ e ma ji ngɛ je ehe ɔ mi. Enɛ ɔ he ɔ, juɛmi ngɛ mi kaa wa ma ‘hla Matsɛ Yemi ɔ kekle,’ nɛ waa kɛ wa juɛmi maa ma jɔɔmihi nɛ wa ma ná ke wa sɔmɔ Yehowa a nɔ.—Mateo 6:33.

18. Mɛni wa ma nyɛ maa pee kɛ tsɔɔ kaa wa ngɛ wa he dlae kɛ ha neneene wami ngɛ Paradeiso ɔ mi?

¹⁸ Ngɛ je ehe ɔ mi ɔ, wa si himi maa pee kpakpa pe bɔ nɛ wa ma nyɛ maa kale. Nyɛ ha nɛ waa tsɔɔ kaa wa suɔ wawɛɛ kaa wa maa sɛ je ehe ɔ mi kɛ gu wa he nɛ wa ma dla kɛ ha “neneene wami” amlɔ nɛ ɔ nɔ. Nyɛ ha nɛ waa kase suhi nɛ Yehowa ngɛ wɔ tsɔɔe ɔ kaa wa je kpo ɔ, nɛ waa kɛ kã nɛ fiɛɛ sane kpakpa a. Nyɛ ha nɛ waa ngɔ Yehowa jami kɛ pee nɔ́ titli ngɛ wa si himi mi konɛ wa ná bua jɔmi nɛ jeɔ mi kɛ baa a eko. Wa ngɛ nɔ́ mi mami nitsɛnitsɛ kaa ngɛ je ehe ɔ mi ɔ, Yehowa maa pee nɔ́ fɛɛ nɔ́ nɛ e wo si kaa e maa pee ha wɔ ɔ. Enɛ ɔ he ɔ, nyɛ ha nɛ waa pee wa ní kaa nɔ́ nɛ wa ngɛ je ehe ɔ mi momo!