1, 2. (a) Mɛni he je nɛ o ngɛ nɔ mi mami kaa Yehowa suɔ e we bi ɔ? (b) A bɔ adesahi konɛ a na kaa e he hia nɛ a pee mɛni?

MƐNI he je nɛ o ngɛ nɔ mi mami kaa Yehowa suɔ e we bi ɔ? Loko o ma ha sane bimi nɛ ɔ heto ɔ, mo susu nɔ hyɛmi níhi nɛ nyɛɛ se nɛ ɔ a he nɛ o hyɛ: Nyɛmimɛ nyumuhi kɛ yihi fuu je mi mi jɔmi mi nɛ a kɛ jehahi fuu wo nyɛmiyo ko nɛ a tsɛɛ lɛ ke Taylene ɔ he wami. A de lɛ kaa e ko susu kaa nɔ́ nɛ e ngɛ tsue ngɛ Yehowa sɔmɔmi mi ɔ sɛ Yehowa hɛ mi. Taylene de ke: “Kaa Yehowa sume ye sane ɔ, jinɛ e ko wui mi ga nɔtonɔto.” Nyɛmiyo Brigitte huno gbo, nɛ lɛ nɔ kake pɛ lɛ e ngɛ a bimɛ enyɔ hyɛe. Lɛ hu e de ke: “Haomihi nɛ a mi wa wawɛɛ nɛ nihi kɛ kpeɔ ngɛ Satan je nɛ ɔ mi ɔ a kpɛti kake ji bimɛ a tsɔsemi, titli ɔ, ke o ji fɔlɔ kake. Se i ngɛ nɔ mi mami kaa Yehowa suɔ mi, ejakaa e yeɔ bua mi ngɛ ye haomi kɛ ye ya fomi behi a mi, nɛ e haa nɛ i nyɛɔ daa ye haomi ɔmɛ a nya.” (1 Korinto Bi 10:13) Sandra hu nu hiɔ ko nɛ be tsaba. Ligbi ko ngɛ kpe ko sisi ɔ, nyɛmiyo ko je suɔmi kpo kɛ tsɔɔ Sandra. Sandra huno ɔ de ke: “E ngɛ mi kaa wa li nyɛmiyo ɔ  mohu lɛɛ, se bɔ nɛ e susu wa he ha a ha nɛ wa bua jɔ wawɛɛ nitsɛ. Ní nyafinyafihi po nɛ wa nyɛmimɛ nyumuhi kɛ yihi peeɔ kɛ haa wɔ kɛ tsɔɔ kaa a suɔ wɔ ɔ, ha nɛ i na kaa Yehowa suɔ wɔ wawɛɛ nitsɛ.”

² Yehowa bɔ adesahi konɛ a na kaa e he hia nɛ a je suɔmi kpo kɛ ha nihi, nɛ mɛ hu a na kaa nihi suɔ mɛ. Se hiɔ, aloo ohia ma nyɛ ma ha nɛ wa kɔni mi ma jɔ̃. E ma nyɛ maa ba jã hulɔ ke wa fiɛɛmi ní tsumi ɔ wui yiblii. Ke e bɔni wɔ peemi kaa Yehowa sume wa sane hu ɔ, e sa nɛ wa kai kaa wa he jua wa ha lɛ, e ngɛ wa kasa nya, nɛ e pɛtɛ wa hiɔ nine he, nɛ e yeɔ bua wɔ. Ke wa yeɔ lɛ anɔkuale ɔ, e be wɔ sie kɔkɔɔkɔ.—Yesaya 41:13; 49:15.

3. Mɛni ma nyɛ ma ha nɛ nɔ mi mami nɛ wa ngɛ kaa suɔmi nɛ Yehowa ngɛ ha wɔ ɔ maa hi si daa a mi maa wa?

³ Odasefohi nɛ a wo a ta kɛ sɛ hlami ɔ ngɛ nɔ mi mami kaa Mawu si we mɛ ngɛ haomi behi a mi. Wɔ hu wa ma nyɛ ma ná nɔ mi mami kaa Mawu ngɛ wa kasa nya. (La 118:6, 7) Ngɛ munyu nɛ ɔ nɛ wa ngɛ kasee ɔ mi ɔ, wa ma susu ní eywiɛ komɛ nɛ Yehowa ke wɔ kɛ tsɔɔ kaa e suɔ wɔ ɔ a he. Ní nɛ ɔmɛ ji (1) níhi nɛ e bɔ, (2) Baiblo ɔ, (3) sɔlemi, kɛ (4) kpɔmi nɔ́ ɔ. Ke wa susuɔ ní kpakpahi nɛ Yehowa peeɔ kɛ haa wɔ ɔ he wawɛɛ ɔ, lɔ ɔ ma nyɛ maa ye bua wɔ nɛ wa bua maa jɔ e suɔmi nɛ ngɛ daa a he.—Kane La 77:11, 12.

4. Mɛni wa kaseɔ ngɛ Yehowa nibɔ níhi a he?

⁴ Ke wa hyɛ níhi nɛ Yehowa bɔ ɔ, wa naa kaa e suɔ wɔ wawɛɛ. (Roma Bi 1:20) Kaa nɔ hyɛmi nɔ́ ɔ, Yehowa bɔ zugba a konɛ waa hi nɔ kɛ bua jɔmi. E ha wɔ nɔ́ fɛɛ nɔ́ nɛ wa hia nɛ ma ha nɛ wa ma ná bua jɔmi. Yehowa le kaa e he hia nɛ waa ye ní, se bɔ nɛ pee nɛ wa bua nɛ jɔ ní yemi he ɔ, e ha wɔ niye ní mimi slɔɔtoslɔɔtohi! (Fiɛlɔ 9:7) Nyɛminyo ko nɛ a tsɛɛ lɛ ke Catherine ɔ bua jɔɔ adebɔ níhi nɛ e naa, titli ɔ, ngɛ gbiɛ be mi ngɛ Canada a he. E de ke: “Bɔ nɛ a plɛ kɛ bɔ níhi ha a ngɛ nyakpɛ nitsɛnitsɛ. Mɔmɔhi nɛ puɛɔ kɛ jeɔ zu mi, lohwe pɛlitsɛmɛ nɛ a teɔ kɛ yaa ma kpahi a nɔ nɛ a kpaleɔ a se kɛ baa we, kɛ lohwe pɛlitsɛ nyafii ko nɛ e teɔ ba yeɔ ní ngɛ ye kpata a saflɛ ɔ se. Ní nɛ ɔmɛ nɛ Yehowa pee konɛ wa ná bua jɔmi ɔ tsɔɔ kaa e suɔ wɔ niinɛ.” Wa Tsɛ ɔ bua jɔ níhi nɛ e bɔ ɔ a he, nɛ e suɔ kaa wɔ hu wa bua nɛ jɔ ní nɛ ɔmɛ a he.—Bɔfo Ɔmɛ A Ní Tsumi 14:16, 17.

5. Mɛni blɔ nɔ wa naa Yehowa suɔmi ɔ ngɛ bɔ nɛ e plɛ kɛ bɔ adesahi ha a mi?

⁵ Yehowa bɔ wɔ nɛ́ wa nyɛ nɛ wa tsu ní tsumi nɛ ma ha wa ná bua jɔmi, konɛ wa tsui hu nɛ nɔ wa mi. (Fiɛlɔ 2:24) E ha adesahi ní tsumi kaa a fɔ nɛ a hyi zugba a nɔ tsuo, nɛ a hwu nɔ, nɛ a hyɛ pa mi lohi, lohwe pɛlitsɛmɛ, kɛ ní kpahi nɛ wami ngɛ a mi ngɛ zugba a nɔ ɔ tsuo a nɔ. (1 Mose 1:26-28) Jehanɛ se hu ɔ, e bɔ wɔ kɛ su kpakpahi konɛ wa nyɛ nɛ waa kase lɛ!—Efeso Bi 5:1.

6. Mɛni he je lɛ e sa kaa wa bua nɛ jɔ Mawu Munyu ɔ he saminya a?

⁶ Yehowa ha wɔ Baiblo ɔ, ejakaa e suɔ wɔ saminya. Baiblo ɔ tsɔɔ wɔ níhi nɛ a he hia kaa waa le ngɛ Yehowa he, kɛ bɔ nɛ e susuɔ ngɛ adesahi a he ha. Kaa nɔ hyɛmi mi nɔ́ ɔ, Baiblo ɔ tsɔɔ bɔ nɛ Yehowa peeɔ e ní ha be fɛɛ be nɛ Israel bi ɔmɛ ma tɔ̃ e nɔ. La 78:38 ɔ de ke: “Akɛnɛ mɔbɔ nalɔ ji Mawu he je ɔ, e ngɔ a he yayami ɔ ngɔ pa mɛ, nɛ e kpataa we a hɛ mi. Behi fuu ke e mi mi miɔ nɛ e ma fu, kɛkɛ e tsi nya amlɔ.” Ke o susu ngmami nɛ ɔ he saminya a, e maa ye bua mo nɛ o maa na kaa Yehowa suɔ mo saminya, nɛ e susuɔ o he wawɛɛ. Wa ma nyɛ ma ná nɔ mi mami kaa Yehowa susuɔ wa he wawɛɛ nitsɛ.—Kane 1 Petro 5:6, 7.

7. Mɛni he je nɛ e sa kaa waa na Baiblo ɔ kaa nɔ́ ko nɛ se nami ngɛ he ɔ?

 ⁷ E sa nɛ waa na Baiblo ɔ kaa nɔ́ ko nɛ se nami ngɛ he wawɛɛ nitsɛ. Mɛni he je? Ejakaa Yehowa guɔ Baiblo ɔ nɔ nɛ e kɛ wɔ tuɔ munyu. Ke fɔlɔ ko kɛ e bi sɛɛɔ ní faa a, suɔmi kɛ hɛ kɛ nɔ fɔmi nɛ a ngɛ a ha a sibi ɔ mi waa. Yehowa ji wa Tsɛ, nɛ e suɔ wɔ. Nɛ e ngɛ mi kaa wa nɛ lɛ hyɛ nɛ wa nui e gbi hu hyɛ mohu lɛɛ, se e ngɛ kaa nɔ́ nɛ e guɔ Baiblo ɔ nɔ nɛ e kɛ wɔ tuɔ munyu tɛ̃ɛ. E sa nɛ waa ya nɔ nɛ waa bu lɛ tue! (Yesaya 30:20, 21) Ke wa kaneɔ Mawu Munyu ɔ, wa leɔ Yehowa, nɛ wa náa hɛ kɛ nɔ fɔmi ngɛ e mi, ejakaa lɛ nɛ e kudɔɔ wɔ, nɛ e buɔ wa he.—Kane La 19:7-11; Abɛ 1:33.

8, 9. Mɛni Yehowa suɔ kaa waa le? Mo ha Baiblo mi nɔ hyɛmi nɔ́ ko nɛ tsɔɔ jã.

⁸ Yehowa suɔ nɛ waa le kaa e suɔ wɔ, nɛ pi mluku nɛ wa yi ɔ pɛ nɛ e hyɛɛ. Mohu ɔ, e hyɛɛ su kpakpahi nɛ ngɛ wa mi ɔ hulɔ. (2 Kronika 16:9) Nyɛ ha nɛ wa susu bɔ nɛ Yehowa plɛ kɛ na su kpakpa ngɛ Yuda Matsɛ Yehoshafat mi ɔ he nɛ waa hyɛ. Ligbi ko ɔ, Yehoshafat pee juɛmi ko nɛ dɛ. E ya piɛɛ Israel Matsɛ Ahab he nɛ a kɛ Siria bi ɔmɛ ya hwu ta ngɛ Ramot nɛ ngɛ Gilead ɔ. E ngɛ mi kaa lakpa gbali 400 de Ahab yiwutsotsɛ ɔ ke e maa ye kunimi ngɛ ta a mi mohu lɛɛ, se Yehowa we anɔkuale gbalɔ Mikaya de Yehoshafat kɛ a Ahab kaa ke a ya ta a, a ya be kunimi yee. Nɛ e ba mi jã pɛpɛɛpɛ hulɔ. Ahab gbo ngɛ ta a mi, nɛ e piɛ nguɛ nya nɛ Yehoshafat hu gbo. Benɛ a hwu ta a ta a, Yehowa gu Yehu nɔ kɛ wo Yehoshafat ga ngɛ nɔ́ nɛ e pee ɔ he. Se Yehu de Yehoshafat hu ke: “Su kpakpa komɛ ngɛ o mi.”—2 Kronika 18:4, 5, 18-22, 33, 34; 19:1-3.

⁹ Jeha komɛ nɛ sɛ hlami ɔ, Yehoshafat de ma nimeli ɔmɛ, Levi bi ɔmɛ, kɛ osɔfo ɔmɛ kaa a ya Yuda ma amɛ tsuo a mi nɛ a ya tsɔɔ ni ɔmɛ Yehowa Mlaa a. A ní tsumi ɔ wo yiblii nɛ ma jeli tete po ba le Yehowa. (2 Kronika 17:3-10) E ngɛ mi kaa pee se ɔ, Yehoshafat pee juɛmi ko nɛ nile be mi mohu lɛɛ, se Yehowa hɛ ji ní kpakpahi nɛ e pee ɔ a nɔ. Nɔ hyɛmi nɔ́ nɛ ɔ woɔ wa bua wawɛɛ, ejakaa be komɛ ɔ, wa tɔ̃ɔ. Se ke wa bɔ mɔde wawɛɛ nɛ wa sɔmɔ Yehowa a, lɛ hu e maa ya nɔ maa suɔ wɔ, nɛ e hɛ be ní kpakpahi nɛ wa peeɔ ɔ nɔ jee.

10, 11. (a) Mɛni he je nɛ sɔlemi ji nike ní nɛ se be nɛ je Yehowa ngɔ ɔ? (b) Mɛni blɔ nɔ Mawu ma nyɛ maa gu kɛ ha wa sɔlemihi a heto? (Moo hyɛ foni nɛ ngɛ ní kasemi ɔ sisije ɔ.)

¹⁰ Tsɛ nɛ ngɛ suɔmi ɔ suɔ kaa e ma ná e bimɛ a he deka nɛ́ e bu mɛ tue ke a ngɛ lɛ nɔ́ ko dee. E suɔ kaa e maa le a susumi ngɛ níhi a he, ejakaa e susuɔ a he wawɛɛ. Yehowa wa Tsɛ nɛ ngɛ suɔmi ɔ hu peeɔ jã. Ke wa sɔle ɔ, e buɔ tue. E ji he blɔ nɛ se be nɛ wa ná kaa waa kɛ wa Tsɛ ɔ maa sɛɛ ní!

¹¹ Wa ma nyɛ maa sɔle ha Yehowa be fɛɛ be. Wa Huɛ ji lɛ, nɛ e pee klaalo kaa be fɛɛ be nɛ wa maa sɔle ɔ, e maa bu wɔ tue. Taylene, nɛ wa wo e ta kɛ sɛ hlami ɔ de ke, “O ma nyɛ ma de Yehowa nɔ́ tsuaa nɔ́.” Ke wa de Yehowa níhi nɛ ngɛ wa tsui mi ɔ, e ma nyɛ maa gu ngmami ko, loo munyu ko nɛ a ngma ngɛ wa womi ɔmɛ a mi ɔ nɔ kɛ ha wɔ heto. E ma nyɛ maa gu nyɛmi ko nɔ kɛ wo wɔ he wami. Ke wa je wa tsui mi kɛ bi Yehowa nɔ́ ko ɔ, e maa pee ha wɔ. Ke nihi nui wɔ sisi po ɔ, lɛɛ lɛɛ  e nuɔ wɔ sisi. Blɔ nɔ nɛ e guu kɛ haa wɔ heto ɔ tsɔɔ kaa suɔmi nɛ e ngɛ ha wɔ ɔ se be poe gblee.

12. Mɛni he je nɛ e sa kaa waa kase sɔlemihi nɛ a ngma ngɛ Baiblo ɔ mi ɔ? Mo ha enɛ ɔ he nɔ hyɛmi nɔ́.

¹² Wa ma nyɛ maa kase níhi nɛ a he hia kɛ je sɔlemihi nɛ a ngma ngɛ Baiblo ɔ mi ɔ mi. Be komɛ ɔ, e maa hi kaa wa maa kase sɔlemi nɛ ɔmɛ ekomɛ ngɛ wa weku Mawu jami ɔ mi. Ke wa susuɔ sɔlemihi nɛ Mawu sɔmɔli nɛ a hi si blema a je a tsui mi nɛ a sɔle ɔ he ɔ, wa sɔlemi maa nu tso. Kaa nɔ hyɛmi nɔ́ ɔ, moo kase sɔlemi nɛ Yona je he si bami mi nɛ e sɔle ngɛ lo ngua a mi mi ɔ. (Yona 1:17–2:10) O ma nyɛ maa kase sɔlemi nɛ Salomo je e tsui mi nɛ e sɔle ha Yehowa benɛ e ngɛ sɔlemi we ɔ nɔ jɔɔe ɔ. (1 Matsɛmɛ 8:22-53) O ma nyɛ ma pue o yi mi tɛ ngɛ Yesu sɔlemi he nɔ hyɛmi nɔ́ ɔ hu he. (Mateo 6:9-13) Nɔ́ nɛ he hia pe kulaa a, be fɛɛ be ɔ, moo ‘wo o hiami ní ɔmɛ a ta ha Mawu.’ Enɛ ɔ ma ha nɛ ‘Mawu he jɔmi nɛ pã adesa juɛmi tsuo ɔ, maa bu o tsui, kɛ o juɛmi he.’ Lɔ ɔ ma ha nɛ wa bua maa jɔ Yehowa suɔmi nɛ ngɛ daa a he wawɛɛ.—Filipi Bi 4:6, 7.

13. Mɛni he blɔ kpɔmi nɔ́ ɔ ha nɛ wa ná?

¹³ Yehowa ha wɔ kpɔmi nɔ́ ɔ konɛ “wa ná wami.” (1 Yohane 4:9) Benɛ bɔfo Paulo ngɛ suɔmi agbo nɛ ɔ nɛ Mawu je kpo tsɔɔ wɔ ɔ he munyu tue ɔ, e ngma ke: “Kristo ba gbo ngɛ yayami peeli a he. Ejakaa e maa wa kaa nɔ ko maa suɔ nɛ e gbo ngɛ nɔ nɛ yeɔ mlaa nɔ ɔ he; pohu nɔmlɔ kpakpa he ɔ, e maa ba mi kaa nɔ ko ma si gugue kaa e ma gbo. Se suɔmi kpetekpleenyɛ nɛ Mawu je kpo ji nɛ ɔ nɛ, kaa be nɛ wa ji yayami peeli ɔ, jamɛ a be ɔ Kristo ba gbo ngɛ wa he.” (Roma Bi 5:6-8) Kpɔmi nɔ́ ɔ ji suɔmi kpetekpleenyɛ nɛ ɔ nɛ Mawu je kpo ha adesahi. Enɛ ɔ bli blɔ ha adesahi konɛ a ha nɛ huɛ bɔmi kpakpa nɛ hi a kɛ Mawu a kpɛti.

14, 15. (a) Mɛni se Kristofohi nɛ a pɔ mɛ nu ɔ ma ná ngɛ kpɔmi nɔ́ ɔ he? (b) Mɛni se nihi nɛ a ngɛ hɛ kɛ nɔ fɔmi kaa a maa hi zugba a nɔ ɔ ma ná ngɛ kpɔmi nɔ́ ɔ he?

¹⁴ Kristofohi bɔɔ ko ná Yehowa suɔmi nɛ ngɛ daa a he se ngɛ blɔ klɛdɛɛ ko nɔ. (Yohane 1:12, 13; 3:5-7) Mawu ngɔ mumi klɔuklɔu ɔ kɛ pɔ jamɛatsɛmɛ ɔmɛ nu, enɛ ɔ he ɔ, amlɔ nɛ ɔ, a ba plɛ Mawu bimɛ. (Roma Bi 8:15, 16) Akɛnɛ a ti ni komɛ ngɛ zugba a nɔ loloolo he je ɔ, mɛni he je nɛ Paulo de ke a ‘tle mɛ si nɛ a kɛ Kristo ngɛ hiɔwe’ ɔ? (Efeso Bi 2:6) Ejakaa Yehowa ha nɛ a ngɛ hɛ kɛ nɔ fɔmi kaa a ma ná neneene wami ngɛ hiɔwe.—Efeso Bi 1:13, 14; Kolose Bi 1:5.

¹⁵ Nihi tsuo nɛ mɛɛ lɛɛ a kɛ mumi klɔuklɔu ɔ pɔɛ mɛ nu ɔ ma nyɛ maa pee Mawu huɛmɛ ke a ná hemi kɛ yemi ngɛ kpɔmi nɔ́ ɔ mi. Mɛ hu a ma nyɛ ma plɛ Mawu bimɛ, nɛ a maa hi si kɛ ya neneene ngɛ paradeiso mi ngɛ zugba a nɔ.  Kpɔmi nɔ́ ɔ ha nɛ wa na kaa Yehowa suɔ adesahi tsuo. (Yohane 3:16) Hyɛ bɔ nɛ wa bua jɔ ha kaa wa le kaa ke wa sɔmɔ Mawu ngɛ anɔkuale mi ɔ, e ma ha wɔ si himi kpakpa ngɛ je ehe ɔ mi! Lɛɛ nyɛ ha nɛ waa tsɔɔ kaa wa bua jɔ kpɔmi nɔ́ ɔ he. Kpɔmi nɔ́ ɔ tsɔɔ kaa suɔmi nɛ Mawu ngɛ ha wɔ ɔ maa hi si daa.

16. Ke wa susuɔ suɔmi nɛ Mawu ngɛ ha wɔ ɔ he ɔ, mɛni se wa ma ná?

¹⁶ Wa be nyɛe maa kane blɔhi tsuo nɛ Yehowa guɔ nɔ kɛ jeɔ suɔmi kpo kɛ haa wɔ ɔ. Matsɛ David la ke: “Mawu, yi mi tomi nɛ o ngɛ ha mi ɔ he jua wa wawɛɛ nitsɛ. Ní kpakpahi nɛ o susuɔ ha mi ɔ, a he hiɛ babauu. Ke i ke ma kane mɛ ɔ, i be nyɛe, ejakaa a he hiɛ babauu pe zia.” (La 139:17, 18) Ke wa susu blɔ slɔɔtohi nɛ Yehowa guɔ nɔ kɛ jeɔ suɔmi kpo kɛ haa wɔ ɔ he ɔ, e maa wo wɔ he wami konɛ wɔ hu waa suɔ lɛ, nɛ wa sɔmɔ lɛ kɛ wa tsui tsuo.

17, 18. Mɛni blɔ komɛ a nɔ wa ma nyɛ maa gu kɛ tsɔɔ kaa wa suɔ Mawu?

¹⁷ Wa ma nyɛ maa gu blɔhi fuu a nɔ kɛ tsɔɔ kaa wa suɔ Yehowa. Kaa nɔ hyɛmi nɔ́ ɔ, waa kɛ kã ma nyɛ maa fiɛɛ Matsɛ Yemi ɔ he sane kpakpa a kɛ tsɔɔ nihi. (Mateo 24:14; 28:19, 20) Wa ma nyɛ maa tsɔɔ hu kaa wa suɔ Mawu kɛ gu anɔkuale nɛ wa maa ye lɛ, nɛ wa maa da wa hemi kɛ yemi ɔ he kahi a nya a nɔ. (Kane La 84:11; Yakobo 1:2-5.) Ke kahi nɛ waa kɛ kpeɔ ɔ nya wa po ɔ, wa ma nyɛ ma ná nɔ mi mami kaa Yehowa le haomihi nɛ waa kɛ ngɛ kpee ɔ, nɛ e maa ye bua wɔ, ejakaa wa he jua wa ha lɛ.—La 56:8.

¹⁸ Suɔmi nɛ wa ngɛ ha Yehowa a woɔ wɔ he wami nɛ wa pueɔ wa yi mi tɛ ngɛ níhi tsuo nɛ e bɔ ɔ a he. Wa tsɔɔ hu kaa wa suɔ Yehowa kɛ e Munyu ɔ kɛ gu Baiblo ɔ nɛ wa kaseɔ wawɛɛ ɔ nɔ. Wa sɔleɔ kɛ haa Yehowa daa, ejakaa wa suɔ lɛ, nɛ wa suɔ hu kaa huɛ bɔmi nɛ ngɛ waa kɛ lɛ wa kpɛti ɔ mi nɛ wa. Nɛ ke wa susu nike ní nɛ he jua wa, nɛ ji kpɔmi nɔ́ ɔ nɛ e ha wɔ ɔ he ɔ, suɔmi nɛ wa ngɛ kɛ ha lɛ ɔ mi waa wawɛɛ. (1 Yohane 2:1, 2) Wa guu blɔhi fuu a nɔ kɛ tsɔɔ kaa wa bua jɔ suɔmi nɛ ngɛ daa nɛ Yehowa jeɔ kpo kɛ tsɔɔ wɔ ɔ he. A kpɛti bɔɔ pɛ he nɛ wa susu nɛ ɔ nɛ.