1, 2. Mɛni ha nɛ e slo adesahi ngɛ lohwehi a he?

ADESA kalegbɔ ɔ se be. Kaa nɔ hyɛmi nɔ́ ɔ, adesahi ngɛ nyɛmi nɛ a kɛ kaseɔ gbi. Gbi yeɔ bua wɔ nɛ wa nyɛɔ kaneɔ ní, wa ngmaa ní, wa tuɔ munyu, nɛ ke nɔ ko de nɔ́ ko hu ɔ, wa nuɔ sisi. E yeɔ bua wɔ nɛ wa nyɛɔ sɔleɔ kɛ haa Yehowa nɛ wa jeɔ e yi. Ní nɛ ɔmɛ tsuo nɛ wa nyɛɔ peeɔ ɔ ha nɛ e slo wɔ ngɛ lohwehi a he. Je mi si kpali nui bɔ nɛ wa kalegbɔ ɔ tsuɔ ní nɛ ɔmɛ a he ní ha a sisi fitsofitso.

² Gbi nɛ wa nyɛɔ tuɔ ɔ ji nike ní nɛ je Yehowa ngɔ. (La 139:14; Kpojemi 4:11) E ha wɔ nike ní kpa ko hu nɛ ha nɛ wa je ekpa ngɛ lohwehi a he. ‘Mawu bɔ nɔmlɔ ngɛ e subai nɔ.’ Wɔ nitsɛmɛ wa ma nyɛ maa hla nɔ́ nɛ wa suɔ kaa wa maa pee. Nɛ waa kɛ gbi nɛ wa nyɛɔ tuɔ ɔ ma nyɛ ma je Yehowa yi.—1 Mose 1:27.

3. Mɛni Yehowa ha wɔ konɛ wa ná juɛmi?

³ Yehowa ha wɔ Baiblo ɔ konɛ waa le bɔ nɛ wa ma plɛ kɛ sɔmɔ lɛ ha nɛ wa je e yi. A pee Baiblo mluku ɔ aloo e fã ko ngɛ gbihi nɛ hiɛ pe 2,800 mi. Ke wa pueɔ wa yi mi tɛ ngɛ  níhi nɛ Baiblo ɔ deɔ ɔ a he ɔ, wa ma nyɛ ma susu níhi a he kaa bɔ nɛ Mawu peeɔ ɔ. (La 40:5; 92:5; 139:17) Ke wa susuɔ níhi a he kaa Yehowa a, wa ma ná juɛmi, nɛ lɔ ɔ ma ha wa ma ná neneene wami.—Kane 2 Timoteo 3:14-17.

4. Mɛni ji yi mi tɛ puemi, nɛ mɛni sane bimihi a he wa ma susu?

⁴ Ke nɔ ko ngɛ e yi mi tɛ puee ngɛ nɔ́ ko he ɔ, lɔ ɔ tsɔɔ kaa nɔ ɔ kɛ e juɛmi ma jamɛ a nɔ́ ɔ nɔ, nɛ e susuɔ nɔ́ ɔ he kɛ yaa tsitsaa. (La 77:12; Abɛ 24:1, 2) Ke wa pueɔ wa yi mi tɛ ngɛ níhi nɛ wa kaseɔ ngɛ Yehowa kɛ Yesu a he ɔ he ɔ, wa náa he se wawɛɛ. (Yohane 17:3) Ngɛ munyu nɛ ɔ mi ɔ, wa ma ha sane bimihi nɛ nyɛɛ se nɛ ɔ a heto: Mɛni blɔ nɔ lɛ ke wa gu kɛ kane ní ɔ, e be yee ha wɔ kaa wa ma pue wa yi mi tɛ ngɛ he? Mɛni he wa ma nyɛ ma pue wa yi mi tɛ ngɛ? Mɛni ma nyɛ maa ye bua wɔ konɛ wa bua nɛ jɔ yi mi tɛ puemi he nɛ waa pe jã daa?

5, 6. Mɛni ma nyɛ maa ye bua wɔ konɛ wa kai níhi nɛ wa kaneɔ ɔ nɛ́ waa nu sisi saminya?

⁵ Anɛ o yɔse kaa ní komɛ ngɛ nɛ o peeɔ nɛ o juɛmi be nɔ lo? Ní nɛ ɔmɛ ekomɛ ji mumu womi, nyɛɛmi, kɛ baisikle hluimi. Be komɛ ɔ, o nyɛɔ kaneɔ ní nɛ o juɛmi be nɔ́ nɛ o ngɛ kanee ɔ nɔ. Eko ɔ, benɛ o ngɛ ní ɔ kanee ɔ, o juɛmi ngɛ si kpae kɛ ngɛ bee ngɛ he komɛ. Mɛni o ma nyɛ maa pee kɛ tsi nɔ́ ko kaa jã a nya? E he hia kaa o kɛ o juɛmi nɛ ma nɔ́ nɛ o ngɛ kanee ɔ nɔ, konɛ o susu nɔ́ nɛ e tsɔɔ ɔ he. Ke o ngɛ womi ko kanee nɛ o kane kuku ko ta, aloo o su munyuyi nyafii ko he ɔ, moo mlɛ bɔɔ nɛ o pue o yi mi tɛ ngɛ níhi nɛ o kane kɛ be ɔ a he. Mo susu nɔ́ nɛ o kaseɔ he, nɛ o hyɛ kaa o nu sisi saminya lo.

⁶ Je mi si kpali tsɔɔ kaa ke wa kane nɔ́ ko nɛ e je kpo ɔ, e yi ha wɔ kaa wa ma kai. Wa Bɔlɔ ɔ le enɛ ɔ, lɔ ɔ he ɔ, e de Yoshua kaa e “kane” Mlaa womi ɔ. Ngɛ Hebri gbi nɛ a kɛ ngma Baiblo ɔ mi ɔ, enɛ ɔ tsɔɔ kaa Yoshua nɛ kane Mlaa womi ɔ nɛ e je kpo. (Kane Yoshua 1:8.) Ke wa kaneɔ Baiblo ɔ nɛ e jeɔ kpo ɔ, lɔ ɔ hu maa ye bua wɔ nɛ wa juɛmi maa hi nɔ́ nɛ wa ngɛ kanee ɔ nɔ, nɛ wa ma kai.

7. Mɛni be nɛ e hi wawɛɛ kaa ke wa kane Baiblo ɔ wa pue wa yi mi tɛ ngɛ he? (Moo hyɛ foni nɛ ngɛ ní kasemi ɔ sisije ɔ.)

⁷ E biɔ mɔde bɔmi wawɛɛ loko wa ma nyɛ ma pue wa yi mi tɛ ngɛ níhi nɛ wa kaseɔ ɔ a he konɛ wa juɛmi nɛ hi nɔ. Enɛ ɔ he je ɔ, e maa hi wawɛɛ kaa wa ma pue wa yi mi tɛ be mi nɛ pɔ tɔɛ wa he, nɛ wa ngɛ he ko nɛ ngmlaa be, nɛ nɔ́ ko be wa juɛmi jee ngɛ nɔ́ nɛ wa ngɛ kasee ɔ nɔ. La polɔ David na kaa be nɛ hi pe kulaa nɛ e kɛ ma nyɛ ma pue e yi mi tɛ ji nyɔ mi benɛ e hɛ tsɛ̃ ngɛ sa mi. (La 63:6) Yesu nɛ e ye mluku ɔ po sɔle nɛ e pue e yi mi tɛ ngɛ he ko nɛ jɔ dii.—Luka 6:12.

8. (a) Mɛni he wa ma nyɛ ma pue wa yi mi tɛ ngɛ? (b) Ke wa tsɔɔ nihi Yehowa he ní ɔ, kɛ e nuɔ he ha kɛɛ?

⁸ Ngɛ níhi nɛ o kaneɔ ngɛ Baiblo ɔ mi ɔ se ɔ, o ma nyɛ ma pue o yi mi tɛ ngɛ ní kpa komɛ hu a he. Kaa nɔ hyɛmi nɔ́ ɔ, ke o na Yehowa nibɔ ní ko nɛ ngɛ nyakpɛ ɔ, moo hyɛ nɔ́ ɔ dii nɛ o bi o he ke, ‘Mɛni enɛ ɔ tsɔɔ mi ngɛ Yehowa he?’ Atsinyɛ jemi ko be he kaa enɛ ɔ maa wo mo he wami, nɛ o maa sɔle nɛ o maa na Yehowa si, nɛ ke o kɛ nihi ngɛ he ko po ɔ, o maa suɔ kaa o maa tu Yehowa he munyu kɛ tsɔɔ mɛ. (La 104:24; Bɔfo Ɔmɛ A Ní Tsumi 14:17) Ke wa pueɔ wa yi mi tɛ ngɛ níhi nɛ Yehowa bɔ ɔ a he, wa sɔleɔ kɛ haa lɛ, nɛ wa tuɔ e he munyu kɛ tsɔɔ nihi ɔ, e buɔ tue nɛ e bua jɔɔ. Baiblo ɔ ma nɔ mi ha wɔ ke: “A ngma kaimi womi ko ngɛ Yehowa hɛ mi kɛ ha nihi nɛ a yeɔ lɛ gbeye nɛ a pueɔ a yi mi tɛ ngɛ e biɛ ɔ he ɔ.”—Malaki 3:16, NW.

9. (a) Mɛni Paulo de Timoteo kaa e pue e yi mi tɛ ngɛ he? (b) Ke wa ngɛ wa he dlae nɛ wa maa ya fiɛɛmi ɔ, mɛni he wa ma nyɛ ma pue wa yi mi ngɛ?

⁹ Bɔfo Paulo de Timoteo kaa e pue e yi mi tɛ ngɛ bɔ nɛ e munyu tutui, kɛ e je mi bami, kɛ e ní tsɔɔmi ma ná nihi a nɔ he wami ha a he. (Kane 1 Timoteo 4:12-16.) Mo hu o ma nyɛ ma pue o yi mi tɛ ngɛ níhi kaa jã a he. Kaa nɔ hyɛmi nɔ́ ɔ, ke o ngɛ o he dlae nɛ o kɛ nɔ ko ma ya kase Baiblo ɔ, e he hia nɛ o pue o yi mi  tɛ. Mo susu Baiblo kaselɔ ɔ he, nɛ o bɔ mɔde kaa o maa na sane bimi loo nɔ́ hetomi nɔ́ ko nɛ ke o kɛ tsu ní ɔ, e maa ye bua lɛ nɛ e ya e hɛ mi. Ke o guu blɔ kaa kikɛ ɔ nɔ kɛ dlaa o he kɛ haa Baiblo mi ní kasemi peemi ɔ, mo nitsɛ o hemi kɛ yemi ɔ mi maa wa, nɛ o kɛ gɛjɛmi ma nyɛ maa tsɔɔ nihi Baiblo ɔ mi. Ke o pueɔ o yi mi tɛ loko o yaa fiɛɛmi ɔ, o ma ná he se. (Kane Ezra 7:10.) O ma nyɛ maa kane yi ko ngɛ Bɔfo Ɔmɛ A Ní Tsumi ɔ mi konɛ lɔ ɔ nɛ ye bua mo nɛ o kɛ kã nɛ tsu fiɛɛmi ní tsumi ɔ. Jehanɛ se hu ɔ, o ma nyɛ ma pue o yi mi tɛ ngɛ Baiblo ngmamihi nɛ o pee o juɛmi kaa o kɛ ma tsu ní jamɛ a ligbi ɔ, kɛ womihi nɛ o suɔ kaa o kɛ ma ha nihi ɔ a he. (2 Timoteo 1:6) Mo susu nihi nɛ a ngɛ o zugba kpɔ ɔ mi, kɛ nɔ́ nɛ o ma nyɛ ma de nɛ a bua maa jɔ he ɔ he. Ke o dlaa o he kikɛ ɔ, o ma nyɛ maa ngɔ Baiblo ɔ kɛ ye nihi odase kɛ pi si.—1 Korinto Bi 2:4.

10. Mɛni ní kpakpa komɛ hu lɛ o ma nyɛ ma pue o yi mi tɛ ngɛ a he?

¹⁰ Mɛni ji nɔ́ kpa ko hu nɛ wa ma nyɛ ma pue wa yi mi tɛ ngɛ he? Ke o ya bu magbɛ nɔ munyu ko tue, aloo o ya kpɔ mi kpe aloo kpokpa nɔ kpe ko nɛ o ngma nɔ́ ko kɛ fɔ̃ si ɔ, mo he be kɛ nylɔ mi. Benɛ o ngɛ jã pee ɔ, mo bi o he ke, ‘Mɛni Mawu Munyu ɔ kɛ Yehowa asafo ɔ tsɔɔ mi?’ O ma nyɛ ma pue o yi mi tɛ ngɛ níhi nɛ o kaneɔ ngɛ Hwɔɔmi Mɔ kɛ Awake! womi tɛtlɛɛ ɔmɛ a mi, kɛ níhi nɛ o kane ngɛ womi ehehi nɛ a je kpo ngɛ kpehi a sisi ɔ he. Ke o ngɛ Yearbook ɔ kanee nɛ o kane níhi a si kpami ko ta a, moo mlɛ bɔɔ nɛ o susu he, nɛ o ha nɛ e sɛ o tsui mi. Ke o ngɛ wa womi ɔmɛ kanee ɔ, o ma nyɛ maa po munyu oti ɔmɛ a sisi, aloo o ma nyɛ maa ngma níhi nɛ a he hia a ngɛ womi ɔ nya. Ke o pee jã a, e maa ye bua mo ke o ngɛ o he dlae konɛ o kpale kɛ ya slaa nihi nɛ a ngɛ munyu ɔ he bua jɔmi ɔ, aloo ke o ji asafo mi nɔkɔtɔma nɛ o ngɛ o he dlae nɛ o ya slaa nyɛmi ko, aloo o yaa tu magbɛ nɔ munyu ko. Nɔ́ nɛ he hia pe kulaa a, ke o pueɔ o yi mi tɛ ngɛ níhi nɛ o kaneɔ ɔ a he ɔ, lɔ ɔ haa nɛ níhi nɛ o kaneɔ ɔ sɛɔ o tsui mi, nɛ o náa be kɛ sɔleɔ nɛ o naa Yehowa si ngɛ ní kpakpahi nɛ o ngɛ kasee ɔ he.

11. Mɛni ji womi nɛ he hia pe kulaa nɛ e sa kaa wa pue wa yi mi tɛ ngɛ he, nɛ kɛ jã nɛ wa maa pee ɔ maa ye bua wɔ kɛɛ? (Hyɛ sisi ningma.)

¹¹ Ngɛ anɔkuale mi ɔ, Baiblo ɔ ji womi nɛ he hia pe kulaa nɛ e sa nɛ waa kane nɛ wa pue wa yi mi tɛ ngɛ he. Se ke e ba kaa ligbi ko ɔ, a ngmɛ́ mo blɔ kaa o hɛɛ Baiblo ɔ hu nɛɛ? * (Hyɛ sisi ningma.) Nɔ ko be nyɛe maa tsi o nya kaa o ko pue o yi mi tɛ ngɛ níhi nɛ o kase wo o yi mi ɔ a he. Ní nɛ ɔmɛ ekomɛ ji ngmami ko loo Matsɛ Yemi la ko nɛ o bua jɔ he. (Bɔfo Ɔmɛ A Ní Tsumi 16:25) Mawu mumi ɔ maa ye  bua mo konɛ o kai níhi nɛ o kase kɛ be ɔ, nɛ lɔ ɔ maa ye bua mo nɛ o maa ya nɔ maa ye Yehowa anɔkuale.—Yohane 14:26.

12. Mɛni blɔ nya o ma nyɛ maa to konɛ o nyɛ nɛ o kane Baiblo ɔ daa ligbi?

¹² Mɛni blɔ nya o ma nyɛ maa to konɛ o nyɛ nɛ o kane Baiblo ɔ daa ligbi? Ngɛ otsi ɔ mi ɔ, o ma nyɛ maa hla ligbi komɛ kɛ kane daa otsi Baiblo kanemi nɛ a to he blɔ nya ngɛ Teokrase Sɔmɔmi Sukuu ɔ mi ɔ, nɛ o pue o yi mi tɛ ngɛ he. Ngɛ ligbi kpahi hu a mi ɔ, o ma nyɛ maa kane Mateo, Marko, Luka, kɛ Yohane Sane Kpakpa amɛ konɛ o pue o yi mi tɛ ngɛ níhi nɛ Yesu de kɛ níhi nɛ e pee ɔ a he. (Roma Bi 10:17; Hebri Bi 12:2; 1 Petro 2:21) Jehanɛ se hu ɔ, wa ngɛ womi ko nɛ tu Yesu si himi he munyu setsɔsetsɔ. Womi nɛ ɔ ma nyɛ maa ye bua mo konɛ o ná níhi nɛ o maa kane ngɛ Sane Kpakpa amɛ a mi ɔ he se kɛ pi si.—Yohane 14:6.

13, 14. Mɛni he je nɛ e he hia wawɛɛ kaa wa pue wa yi mi tɛ ngɛ Yehowa kɛ Yesu a he ɔ, nɛ mɛni enɛ ɔ maa wo wɔ he wami nɛ waa pee?

¹³ Ke nɔ ko pueɔ e yi mi tɛ ngɛ Yehowa kɛ Yesu a he ɔ, lɔ ɔ maa ye bua lɛ nɛ e maa pee Kristofo no nɛ e wa, nɛ e hemi kɛ yemi ɔ hu mi maa wa daa. (Hebri Bi 5:14; 6:1) Ke nɔ ko ngɔɛ be fuu kɛ susu Mawu he ɔ, huɛ bɔmi nɛ ngɛ e kɛ Yehowa a kpɛti ɔ ma puɛ. (Hebri Bi 2:1; 3:12) Yesu bɔ wɔ kɔkɔ kaa ke waa kɛ ‘tsui kpakpa’ bui Mawu Munyu tue ɔ, waa kɛ be nyɛe ma ‘tsu ní.’ Mohu ɔ, e be yee kaa “je nɛ ɔ mi haomi, kɛ ní nami, kɛ níhi nɛ ngɔɔ nɔ nya” a, ma puɛ wa juɛmi.—Luka 8:14, 15.

¹⁴ Enɛ ɔ he ɔ, nyɛ ha nɛ wa pue wa yi mi tɛ ngɛ níhi nɛ wa kaneɔ ngɛ Baiblo ɔ mi ɔ he, konɛ waa le Yehowa saminya. Enɛ ɔ maa wo wɔ he wami konɛ waa kase e su ɔmɛ kɛ blɔhi a nɔ nɛ e guu kɛ peeɔ níhi ɔ saminya. (2 Korinto Bi 3:18) Wa ma nyɛ maa kase wa hiɔwe Tsɛ ɔ he ní fuu konɛ waa pee wa ní kaa lɛ kɛ ya neneene. He blɔ kpa ko be nɛ wa ma ná nɛ e kɛ enɛ ɔ sɔ!—Fiɛlɔ 3:11.

15, 16. (a) Kɛ o náa o yi mi tɛ nɛ o pueɔ ngɛ Yehowa kɛ Yesu a he ɔ he se ha kɛɛ? (b) Mɛni he je nɛ be komɛ ɔ, eko ɔ, e maa ye ha wɔ kaa wa ma pue wa yi mi tɛ ngɛ níhi a he, se mɛni he je nɛ e sa kaa waa bɔ mɔde nɛ waa pee jã daa a?

¹⁵ Ke o pueɔ o yi mi tɛ ngɛ Yehowa kɛ Yesu a he ɔ, e maa ye bua mo konɛ o kɛ kã nɛ pɛtɛ anɔkuale ɔ he. Kã nɛ o ngɛ ɔ maa wo nyɛmimɛ ngɛ asafo ɔ mi kɛ nihi nɛ o fiɛɛɔ kɛ tsɔɔ mɛ ɔ he wami. Nɛ Ke o pueɔ o yi mi tɛ ngɛ nɔ́ nɛ Yehowa pee kɛ ha mo kɛ gu Yesu nɛ e kɛ ha kaa kpɔmi nɔ́ ɔ he ɔ, lɔ ɔ ma ha o maa ya nɔ maa bu huɛ bɔmi nɛ ngɛ o kɛ Mawu nyɛ kpɛti ɔ kaa nɔ́ ko nɛ he hia wawɛɛ. (Roma Bi 3:24; Yakobo 4:8) Nyɛminyumu ko nɛ a tsɛɛ lɛ ke Mark nɛ e je South Africa nɛ a wo lɛ tsu jeha etɛ ngɛ e hemi kɛ yemi ɔ he ɔ de ke: “Waa kɛ yi mi tɛ puemi ma nyɛ maa to níhi a mi hlami ko nɛ ngɛ bua jɔmi he. Be abɔ nɛ wa ngɛ wa yi mi tɛ puee ngɛ mumi mi níhi a he ɔ, jã kɛ̃ nɛ wa naa ní hehi fuu ngɛ wa Mawu nɛ ji Yehowa a he. Be komɛ ɔ, ke i ngɛ  yeyeeye pee ngɛ níhi nɛ maa ba hwɔɔ se he, aloo ye kɔni mi ngɛ nyu woe ɔ, i woɔ Baiblo ɔ nɛ i kaneɔ ngmami ko nɛ i pueɔ ye yi mi tɛ ngɛ he. Ke i pee jã a, i naa kaa ye tsui nɔɔ ye mi nitsɛnitsɛ.”

¹⁶ Níhi fuu ngɛ je ɔ mi nɛ ma nyɛ ma je wa juɛmi ngɛ Yehowa sɔmɔmi nɔ, nɛ ma ha e maa ye ha wɔ kaa wa maa kane Baiblo ɔ nɛ wa pue wa yi mi tɛ ngɛ he. Nyɛminyumu ko nɛ a tsɛɛ lɛ ke Patrick nɛ e je Afrika a de ke: “Ye kalegbɔ ɔ ngɛ kaa posɔfisi kɛ e mi sɛ womi slɔɔtoslɔɔtohi fuu. Ekomɛ a he hia, nɛ ekomɛ hu a he hia we. E he hia nɛ daa ligbi ɔ, ma hla mi. Ke i ngɛ ye yi mi kpae ɔ, behi fuu ɔ, ní komɛ haa nɛ i ‘susuɔ ye yi mi tsɔ.’ Ja i sɔle kɛ ha Yehowa loko ye tsui nɔɔ ye mi nɛ i nyɛɔ pueɔ ye yi mi tɛ saminya. E ngɛ mi kaa jã peemi heɔ be bɔɔ loko i nyɛɔ pueɔ ye yi mi tɛ ngɛ mumi mi níhi a he mohu lɛɛ, se lɔ ɔ ha nɛ huɛ bɔmi gbagbanii ngɛ i kɛ Yehowa wa kpɛti. Enɛ ɔ bli ye juɛmi nya nɛ i nuɔ anɔkuale ɔ sisi saminya.” (La 94:19) Niinɛ, ke wa kaneɔ Baiblo ɔ daa ligbi nɛ wa pueɔ wa yi mi tɛ ngɛ he ɔ, wa náa he se ngɛ blɔhi fuu a nɔ.—Bɔfo Ɔmɛ A Ní Tsumi 17:11.

17. Mɛni be o ma nyɛ ma pue o yi mi tɛ?

¹⁷ Ni komɛ teɔ si makɛ nɛ a kaneɔ ní, a pueɔ a yi mi tɛ ngɛ níhi nɛ a kaneɔ ɔ he, nɛ a sɔleɔ. Ni komɛ hu peeɔ jã ngɛ a piani he jɔɔmi be mi. Eko ɔ, ngɛ moo lɛɛ o blɔ fa mi ɔ, be nɛ hi pe kulaa nɛ o kɛ ma nyɛ maa kane Baiblo ɔ ji gbɔkuɛ aloo ke o yaa hwɔ si. Ni komɛ kaneɔ Baiblo ɔ mɔtu, nɛ ke a yaa hwɔ si hu a kaneɔ. (Yoshua 1:8) Nɔ́ nɛ he hia ji kaa ‘o kɛ o be ma tsu ní saminya.’ Enɛ ɔ tsɔɔ kaa e sɛ nɛ o puɛ be ngɛ níhi nɛ a he hia we tsɔ ɔ a he, konɛ o ná be kɛ kane Mawu Munyu ɔ daa ligbi nɛ o pue o yi mi tɛ ngɛ he.—Efeso Bi 5:15, 16, NW.

18. Mɛni Baiblo ɔ tsɔɔ kaa nihi tsuo nɛ a pueɔ a yi mi tɛ ngɛ Mawu Munyu ɔ he daa ligbi, nɛ a kɛ níhi nɛ a kaseɔ ɔ tsuɔ ní ɔ ma ná?

¹⁸ Baiblo ɔ tsɔɔ kaa Yehowa maa jɔɔ nihi tsuo nɛ a pueɔ a yi mi tɛ ngɛ e Munyu ɔ he, nɛ́ a bɔɔ mɔde wawɛɛ kaa a kɛ níhi nɛ a kaseɔ ɔ ma tsu ní ɔ. (Kane La 1:1-3.) Yesu de ke: “A gbaa ni nɛmɛ nɛ nuɔ Mawu munyu ɔ, nɛ a yeɔ nɔ ɔ!” (Luka 11:28) Se nɔ́ nɛ he hia pe kulaa ji kaa ke wa pueɔ wa yi mi tɛ ngɛ Yehowa Munyu ɔ he daa ligbi ɔ, lɔ ɔ maa ye bua wɔ nɛ wa maa ba wa je mi ngɛ blɔ nɛ maa sa e hɛ mi nɔ. Ke wa pee jã a, Yehowa maa jɔɔ wɔ nɛ wa ma ná bua jɔmi amlɔ nɛ ɔ, nɛ wa ma ná neneene wami ngɛ e je ehe ɔ mi.—Yakobo 1:25; Kpojemi 1:3.