1. Kɛ fiɛɛmi ní tsumi ɔ he hia Yesu ha kɛɛ? Moo tsɔɔ nya.

YESU suɔ kaa e kɛ nihi maa sɛɛ Mawu Matsɛ Yemi ɔ he ní. Benɛ Yesu ngɛ zugba a nɔ ɔ, e tu Matsɛ Yemi ɔ he munyu pe ní kpahi. E wo Matsɛ Yemi ɔ ta pe si 100 ngɛ e fiɛɛmi ní tsumi ɔ mi. Matsɛ Yemi ɔ he hia Yesu wawɛɛ nitsɛ.—Kane Mateo 12:34.

2. Nihi enyɛmɛ nɛ a nu fami nɛ ngɛ Mateo 28:19, 20 ɔ, nɛ mɛni he je nɛ wa ma nya si jã a?

² Benɛ a tle Yesu si pɛ ɔ, e je e he kpo kɛ tsɔɔ nimli maa pee 500 kɛ se. Pee se ɔ nimli nɛ ɔmɛ ba pee e kaseli. (1 Korinto Bi 15:6) Eko ɔ, jamɛ a be ɔ mi nɛ Yesu kɛ fami ha kaa a ya fiɛɛ ngɛ ‘je ma a mɛ tsuo a mi ngɛ he tsuaa he’ ɔ nɛ. A be ní tsumi nɛ ɔ nae gbɔjɔɔ. * (Hyɛ sisi ningma.) E de mɛ ke a maa fiɛɛ hluu kɛ yaa su “je mi nyagbe.” Ke o ngɛ sane kpakpa a fiɛɛe mwɔnɛ ɔ, lɛɛ mo hu o ha nɛ gbami nɛ ɔ ngɛ mi bae.—Mateo 28:19, 20.

3. Mɛni níhi etɛ ye bua wɔ nɛ wa nyɛ fiɛɛ sane kpakpa a?

 ³ Benɛ Yesu fã mɛ ke a ya fiɛɛ se ɔ, e de ke: “I kɛ nyɛ maa hi si.” (Mateo 28:20) Lɔ ɔ he ɔ, Yesu wo e se nyɛɛli ɔmɛ si kaa e maa hyɛ fiɛɛmi ní tsumi ɔ nɔ, nɛ e maa ye bua mɛ konɛ a fiɛɛ ngɛ je ɔ mi tsuo. Yehowa hu kɛ wɔ ngɛ. Yehowa ha wɔ ‘ní kpakpahi’ tsuo nɛ maa ye bua wɔ konɛ wa nyɛ nɛ waa fiɛɛ. (Hebri Bi 13:20, 21) Wa ma susu ní kpakpa nɛ ɔmɛ a kpɛti etɛ a he ngɛ munyu nɛ ɔ mi. Ní nɛ ɔmɛ ji: (1) níhi nɛ a ha wɔ nɛ ye bua wɔ nɛ wa nyɛ fiɛɛ, (2)  blɔ slɔɔtohi a nɔ nɛ wa gu kɛ fiɛɛ, kɛ (3) tsɔsemi nɛ a ha wɔ nɛ wa nyɛ fiɛɛ. Kekleekle ɔ, nyɛ ha nɛ wa susu ní nɛ ɔmɛ ekomɛ nɛ waa kɛ tsu ní ngɛ jeha 100 nɛ be ɔ mi ɔ a he nɛ waa hyɛ.

4. Ngɛ mɛni blɔ nɔ ní slɔɔtoslɔɔtohi fuu nɛ a ha wɔ ɔ ye bua wɔ ngɛ wa fiɛɛmi ní tsumi ɔ mi?

⁴ Yesu ngɔ Matsɛ Yemi sɛ gbi ɔ ngɔ to wu ko nɛ a du ngɛ zugba slɔɔtohi a nɔ ɔ he. (Mateo 13:18, 19) Loko ní dulɔ ma du ní ɔ, e ngɔɔ ní tsumi dade slɔɔtoslɔɔtohi kɛ dlaa zugba a. Jã kɛ̃ nɛ wa Matsɛ ɔ hu ha wɔ níhi nɛ waa kɛ ma nyɛ ma tsu ní konɛ nihi nɛ a kplɛɛ wa sɛ gbi ɔ nɔ. Waa kɛ ní nɛ ɔmɛ ekomɛ tsu ní be kpiti ko, nɛ ekomɛ lɛɛ waa kɛ ngɛ ní tsue kɛ ba si mwɔnɛ ɔ. Se ní nɛ ɔmɛ nɛ a ha wɔ ɔ tsuo ye bua wɔ nɛ wa he be ngɛ fiɛɛmi ní tsumi ɔ mi.

5. Mɛni ji testimony card, nɛ kɛ a kɛ tsu ní ha kɛɛ?

⁵ Ngɛ jeha 1933 ɔ mi ɔ, fiɛɛli ngɔ kaadi ko nɛ a kɛ yeɔ odase nɛ a tsɛɛ ke testimony card ɔ kɛ tsu ní. Enɛ ɔ ye bua nihi fuu nɛ a je fiɛɛmi yami sisi. E ji kaadi nyafii ko nɛ a ngma Baiblo mi sɛ gbi kpiti nɛ e sisi numi yi ngɛ nɔ. Be komɛ ɔ, a peeɔ kaadi ɔ ehe nɛ a ngmaa sɛ gbi ehe ngɛ nɔ. Benɛ Nyɛminyumu Erlenmeyer kɛ kaadi nɛ ɔ tsu ní kekleekle ɔ, jamɛ a be ɔ mi ɔ, e ye jeha nyɔngma. E tsɔɔ nya ke: “Nɔ́ kɛkɛ nɛ o ma de ji, ‘I kpa mo pɛɛ nɛ o kane munyu nɛ ngɛ kaadi nɛ ɔ nɔ ɔ?’ Ke wetsɛ ɔ kane ta a, wa haa lɛ wa womi ɔmɛ eko, kɛkɛ wa je.”

6. Mɛni blɔ nɔ kaadi ɔ ye bua fiɛɛli ngɛ?

⁶ Kaadi nɛ ɔ ye bua fiɛɛli ngɛ blɔ slɔɔtohi a nɔ. Kaa nɔ hyɛmi nɔ́ ɔ, fiɛɛli komɛ suɔ kaa a maa fiɛɛ se akɛnɛ a gboɔ zo he je ɔ, a li nɔ nɛ a ma de. Fiɛɛli komɛ hu ngɛ kã wawɛɛ. Jamɛatsɛmɛ ɔmɛ nyɛɛɔ nɛ a deɔ wetsɛ ɔ nɔ́ tsuaa nɔ́ nɛ a le ngɛ hɛngmɛfia bɔɔ ko pɛ mi, se tsa pi be fɛɛ be nɛ a kɛ ga tsuɔ ní. Kaadi nɛ ɔ ye bua fiɛɛli tsuo nɛ a fiɛɛ sɛ gbi ɔ nɛ e mi tɛ, nɛ e sisi numi hu yi.

7. Benɛ fiɛɛli ngɔ kaadi ɔ kɛ tsu ní ɔ, mɛni haomi komɛ a kɛ kpe?

⁷ Fiɛɛli kɛ haomi komɛ hu kpe. Nyɛmiyo Grace Estep de ke: “Be komɛ ɔ, nihi biɔ wɔ ke, ‘Mɛni a ngma ngɛ nɔ? Anɛ mo nitsɛ o be nyɛe ma de mi nɔ́ nɛ a ngma ngɛ nɔ ɔ lo?’” Ni komɛ hu nyɛ we nɔ́ nɛ a ngma ngɛ kaadi ɔ nɔ ɔ kanemi. Ni komɛ hu sɔleɔ kaadi ɔ, kɛkɛ a kpale sɛ  tsu mi. Ni komɛ a bua jɔɛ wa sɛ gbi ɔ he, enɛ ɔ he ɔ ke a ngɔ kaadi ɔ ngɛ wa dɛ ɔ, a híaa mi pueɔ si. Ngɛ haomi nɛ ɔmɛ tsuo se ɔ, kaadi ɔ ye bua fiɛɛli nɛ a fiɛɛ kɛ tsɔɔ nihi, nɛ nihi le mɛ kaa a ji Matsɛ Yemi ɔ fiɛɛli.

8. Kɛ a kɛ glamafoo nyafinyafi ɔmɛ tsu ní ha kɛɛ? (Moo hyɛ foni nɛ ngɛ ní kasemi ɔ sisije ɔ.)

⁸ Ngɛ jeha 1930 ɔ se ɔ, nɔ́ kpa ko hu nɛ a kɛ tsu ní ji glamafoo nyafinyafihi. Nyɛmimɛ komɛ tsɛɛ klama nɛ ɔ ke Aaron, ejakaa lɔ ɔ nɛ tuɔ munyu kɛ haa mɛ. (Kane 2 Mose 4:14-16.) Ke wetsɛ ɔ bua jɔ he kaa e maa bu tue ɔ, fiɛɛlɔ ɔ maa fia Baiblo mi munyu kpiti ko kɛ ha lɛ, nɛ lɔ ɔ se ɔ, e ma ha lɛ womi. Be komɛ ɔ, nihi tsuo nɛ a ngɛ weku ɔ mi ɔ ba buaa a he nya nɛ a buɔ munyu ɔ tue! Ngɛ jeha 1934 ɔ mi ɔ, Watch Tower Society ɔ pee mɛ nitsɛmɛ a glamafoo nyafinyafihi konɛ nyɛmimɛ nɛ a kɛ tsu ní ngɛ fiɛɛmi mi. Nyagbenyagbe ɔ, nyɛmimɛ ɔmɛ nyɛ nɛ a nu Baiblo mi munyu slɔɔtoslɔɔtohi 92 kɛ wo glamafoo nɔ.

9. Kɛ fiɛɛli ná glamafoo ɔ he se ha kɛɛ?

⁹ Benɛ Hillary Goslin bu Baiblo mi munyuhi nɛ a nu kɛ wo glamafoo nɔ ɔ eko tue ɔ, e ba glamafoo ɔ nɛ e hi e dɛ otsi kake. E fia ngɔ tsɔɔ nihi nɛ a ngɛ e kpɔ ɔ mi ɔ. Enɛ ɔ he je ɔ, nihi fuu a bua jɔ anɔkuale ɔ he nɛ a ha nɛ a baptisi mɛ. Nyagbenyagbe ɔ, Nyɛminyumu Goslin biyihi enyɔ ya Gilead Sukuu ɔ nɛ a ba pee ma se sane kpakpa fiɛɛli. Kaa bɔ nɛ kaadi ɔ ye bua fiɛɛli fuu nɛ a nyɛ je fiɛɛmi sisi ɔ, jã nɔuu nɛ e ji ngɛ glamafoo ɔ hu blɔ fa mi. Pee se ɔ, Matsɛ ɔ maa gu Teokrase Sɔmɔmi Sukuu ɔ nɔ kɛ tsɔse e we bi konɛ a he nɛ be ngɛ ní tsɔɔmi mi.

10, 11. Mɛni blɔ nɔ adafi fiami womihi kɛ hleedio ye bua ngɛ sane kpakpa a fiɛɛmi mi, nɛ mɛni he je nɛ blɔ nɛ ɔmɛ a nɔ nɛ a gu kɛ fiɛɛ sane kpakpa a ye manye ɔ?

¹⁰ Wa Matsɛ ɔ ye bua Mawu we bi nɛ a gu blɔ slɔɔtohi a nɔ kɛ fiɛɛ nɛ a nine su nihi fuu a nɔ. Jamɛ a be ɔ mi ɔ, fiɛɛli bɔɔ ko pɛ lɛ ngɛ, enɛ ɔ he ɔ, blɔ slɔɔtohi a nɔ nɛ a gu kɛ fiɛɛ ɔ ye bua mɛ wawɛɛ. (Kane Mateo 9:37.) Kaa nɔ hyɛmi nɔ́ ɔ, jehahi fuu nɛ be ɔ, nyɛmimɛ gu adafi fiami womihi a nɔ kɛ fiɛɛ sane kpakpa a. Daa otsi ɔ, Nyɛminyumu Russell ngmaa Baiblo mi munyu kɛ ya haa adafi fiami ní tsumi he ko. Adafi fiami ní tsumi he ɔ hu ngɔɔ munyu ɔ kɛ woɔ adafi fiami womihi nɛ a kaneɔ ngɛ Canada, Yuropa, kɛ United States ɔ mi. Benɛ e ke e suu jeha 1913 ɔ mi ɔ, a ngɔɔ Baiblo mi munyuhi nɛ Nyɛminyumu Russell ngmaa a kɛ woɔ adafi fiami womi slɔɔtoslɔɔtohi 2,000 a mi, nɛ nihi maa pee 15,000,000 kaneɔ!

¹¹ A gu hleedio hu nɔ kɛ fiɛɛ sane kpakpa a kɛ pi si. Ngɛ April 16, 1922 ɔ mi ɔ, Nyɛminyumu Rutherford tu e kekleekle hleedio nɔ munyu ɔmɛ a kpɛti kake, nɛ nihi maa pee 50,000 bu tue. E kɛ we nɛ wɔ nitsɛmɛ wa bli wa hleedio tesia nɛ a tsɛɛ ke WBBR ɔ. Kekleekle be nɛ ma bi nu wa  hleedio tesia nɛ ɔ he ji February 24, 1924. December 1, 1924 blɛfo gbi Hwɔɔmi Mɔ ɔ de ke: “Wa he ye kaa hleedio nɛ wa guɔ nɔ kɛ fiɛɛɔ sɛ gbi ɔ ha we nɛ wa puɛɔ sika fuu, nɛ lɔ ɔ ha nɛ nihi fuu ngɛ sane kpakpa a he nue.” Kaa bɔ nɛ e ji ngɛ adafi fiami womi ɔmɛ a blɔ fa mi ɔ, jã kɛ̃ nɛ hleedio ɔ hu ye bua nɛ nihi fuu nɛ a ngɛ hehi nɛ fiɛɛli a he pi ngɛ ɔ hu nu sane kpakpa a.

12. (a) Ma nɔ odase yemi ɔ mimi te nɛɛ lɛ o bua jɔ he wawɛɛ? (b) Ke eko ɔ, wa yeɔ gbeye kaa waa kɛ wa he maa wo ma nɔ odase yemi mi ɔ, mɛni maa ye bua wɔ nɛ wa ná kã?

¹² Mwɔnɛ ɔ, ma nɔ odase yemi hu ji blɔ nɛ wa guu nɔ kɛ fiɛɛɔ ha nihi nɛ e yeɔ manye wawɛɛ. Amlɔ nɛ ɔ, wa ngɛ mɔde bɔe kaa wa maa fiɛɛ ngɛ lɔlehi a si dami hehi, tlee tesiahi, lɔle mami hehi, pakihi a nɔ, magbɛhi a nɔ, kɛ juahi a mi. Anɛ o yeɔ gbeye kaa o kɛ o he maa wo ma nɔ odase yemi mi lo? Ke jã a, lɛɛ moo sɔle kɛ bi yemi kɛ buami nɛ o susu munyu nɛ nyɛɛ se nɛ ɔ nɛ Nyɛminyumu Manera nɛ ji kpɔ mi nɔ hyɛlɔ tu ɔ he. E de ke: “Wa naa blɔ ehehi a nɔ nɛ wa guɔ kɛ fiɛɛɔ ɔ kaa blɔ kpa ko nɛ wa ma nyɛ maa gu nɔ kɛ sɔmɔ Yehowa nɛ waa tsɔɔ kaa wa yeɔ lɛ anɔkuale. Wa suɔ wawɛɛ kaa wa ma sɔmɔ lɛ ngɛ blɔ tsuaa blɔ nɛ e suɔ kaa waa gu nɔ kɛ pee jã a nɔ.” Ke wa ná kã, nɛ wa guɔ blɔ ehehi a nɔ kɛ fiɛɛɔ ɔ, lɔ ɔ maa ha nɛ hɛ kɛ nɔ fɔmi nɛ wa ngɛ ngɛ Yehowa mi ɔ mi maa wa nɛ wa maa pee fiɛɛli nɛ wa he be.—Kane 2 Korinto Bi 12:9, 10.

13. Mɛni he je nɛ wa wɛbsaiti ɔ nɛ waa kɛ tsuɔ ní ngɛ fiɛɛmi mi ɔ ji blɔ nɛ hi wawɛɛ ɔ, nɛ mɛni níhi a si kpamihi o ná ngɛ enɛ ɔ mi?

 ¹³ Fiɛɛli fuu suɔ kaa a maa tu wa wɛbsaiti nɛ ji jw.org ɔ he munyu kɛ tsɔɔ nihi. Nihi ma nyɛ maa gbla aloo a kane Baiblo kasemi womihi ngɛ gbihi nɛ hiɛ 700 mi ngɛ nɔ. Daa ligbi ɔ, nihi nɛ hiɛ pe 1,600,000 yaa wa wɛbsaiti ɔ nɔ. Be ko nɛ be ɔ, wa gu hleedio nɔ kɛ fiɛɛ kɛ ha nihi ngɛ mahi nɛ a tsɔ a he banee ɔ nɔ. Mwɔnɛ ɔ, wa wɛbsaiti ɔ hu yeɔ bua wɔ nɛ wa nyɛɔ peeɔ jã.

14. Mɛni tsɔsemi lɛ fiɛɛli hia, nɛ mɛni sukuu ye bua mɛ nɛ a ba plɛ tsɔɔli kpakpahi?

¹⁴ Níhi nɛ waa kɛ fiɛɛ kɛ blɔhi a nɔ nɛ wa gu kɛ fiɛɛ nɛ wa susu he piɔ ɔ, ye manye wawɛɛ. Se ngɛ jamɛ a be ɔ mi ɔ, e he ba hia nɛ a tsɔse fiɛɛli. Kaa nɔ hyɛmi nɔ́ ɔ, be komɛ ɔ, nihi nui munyuhi nɛ a buɔ tue ngɛ glamafoo ɔ nɔ ɔ sisi. Be komɛ hu ngɛ nɛ ni komɛ a bua jɔ munyu ɔ he nɛ a suɔ kaa a maa kase babauu kɛ piɛɛ he. E he hia nɛ fiɛɛli nɛ a le bɔ nɛ a maa gu ga blɔ nɔ kɛ tsɔɔ nihi nɛ teɔ si kɛ woɔ mɛ ɔ níhi a nya ha, kɛ bɔ nɛ a ma plɛ kɛ pee tsɔɔli kpakpahi. Atsinyɛ jemi ko be he kaa Mawu mumi klɔuklɔu ɔ nɛ ye bua Nyɛminyumu Knorr nɛ e na kaa e sa nɛ fiɛɛli nɛ a kase bɔ nɛ a tuɔ munyu ngɛ fiɛɛmi tso mi ha a nɛ. Enɛ ɔ he ɔ, kɛ je jeha 1943 ɔ mi ɔ, a bɔni Teokrase Sɔmɔmi Sukuu ɔ peemi ngɛ asafohi a mi. Sukuu nɛ ɔ ye bua mɛ tsuo nɛ a ba plɛ tsɔɔli kpakpahi.

15. (a) Ke a ha ni komɛ ní peemi ngɛ Teokrase Sɔmɔmi Sukuu ɔ mi nɛ a ngɛ he ní tsue ɔ, kɛ a peeɔ a ní kɛɛ? (b) Ngɛ mɛni blɔ nɔ si nɛ Yehowa wo ngɛ La 32:8 ɔ ba mi ngɛ o blɔ fa mi?

¹⁵ Nyɛmimɛ nyumuhi fuu li bɔ nɛ a daa nihi a hɛ mi kɛ tuɔ munyu ha. Nyɛminyumu Ramu kai kekleekle ní peemi nɛ e tsu he ní ngɛ sukuu ɔ mi ngɛ jeha 1944 ɔ mi ɔ. E ní peemi ɔ kɔɔ nyumu ko nɛ Baiblo ɔ wo e ta nɛ a tsɛɛ lɛ ke Doeg ɔ he. Ramu de ke: “Ye nakutsohi bɔni domi ngɛ ye sisi, ye ninehi ngɛ doe blibliibli, nɛ ye nya hu ngɛ doe kpakpaakpa.” E de hu ke: “Lɔ ɔ ji kekleekle be nɛ i tu munyu ngɛ munyu tumi kpoku ɔ nɔ, se jamɛ a gbeye ɔ ha we nɛ ma kpa.” E ngɛ mi kaa enɛ ɔ peemi be gbɔjɔɔ mohu lɛɛ, se a haa jokuɛwi hu ní peemi ngɛ sukuu ɔ mi. Nyɛminyumu Manera kai be ko nɛ jokuɛ nyumuyo ko ba tsu ní peemi ko nɛ a ha lɛ ngɛ sukuu ɔ mi ɔ he ní ɔ. Manera de ke: “Sawale nu jokuɛ ɔ hluu kaa ngɛ e ní peemi ɔ mi tsuo ɔ, e gbi pee kaa nɔ ko nɛ e ngɛ ya foe. Se akɛnɛ e fia e pɛɛ si kaa e ma tsu e ní peemi ɔ he ní he je ɔ, e gbi pee kaa nɔ ko nɛ e ngɛ ya foe mohu lɛɛ, se e nyɛ nɛ e gbe e ní tsumi ɔ nya.” Eko ɔ, ke o ya asafo mi kpe ɔ, o ha we sane heto, ejakaa o gbo ɔ zo, aloo o susu kaa o be nyɛe ma ha sane heto. Ke jã a, lɛɛ  moo sɔle konɛ Yehowa nɛ ye bua mo konɛ o ná kã. E maa ye bua mo kaa bɔ nɛ e ye bua blema bi ɔmɛ nɛ a kɛ a he wo Teokrase Sɔmɔmi Sukuu ɔ mi ɔ.—Kane La 32:8.

16. (a) Blema a, mɛni yi mi tomi he je nɛ a haa nɛ nihi yaa Gilead Sukuu ɔ? (b) Kɛ je jeha 2011 ɔ mi kɛ ma nɛ ɔ, mɛni yi mi tomi he je nɛ a haa nɛ nihi yaa Gilead Sukuu ɔ?

¹⁶ Mawu asafo ɔ haa nɛ nihi yaa Gilead Sukuu ɔ konɛ a tsɔse mɛ. Yi mi tomi kake he je nɛ a tsɔseɔ nihi nɛ yaa sukuu nɛ ɔ ji kaa a ye bua mɛ nɛ suɔmi nɛ a ngɛ kɛ ha fiɛɛmi ní tsumi ɔ mi nɛ wa. A je Gilead Sukuu ɔ sisi ngɛ jeha 1943 mi, nɛ kɛ ba si piɔ ɔ, a tsɔse nihi 8,500 nɛ a wo mɛ blɔ kɛ ho mahi 170 a nɔ ya. Kɛ je jeha 2011 kɛ ma nɛ ɔ, nihi nɛ a fɔɔ mɛ nine kɛ yaa sukuu nɛ ɔ ji nihi nɛ a ngɛ sɔmɔe kaa blɔ gbali klɛdɛɛ, kpɔ mi nɔ hyɛli, nihi nɛ a ngɛ ní tsue ngɛ Betel, aloo ma se sane kpakpa fiɛɛli nɛ a yɛ Gilead Sukuu ɔ eko lolo.

17. Kɛ tsɔsemi nɛ a kɛ ha nihi ngɛ Gilead Sukuu ɔ wo yiblii ha kɛɛ?

¹⁷ Anɛ Gilead Sukuu ɔ wo yiblii lo? Ee. Mo susu nɔ nɛ ba ngɛ Japan ɔ he nɛ o hyɛ. Ngɛ August 1949 ɔ mi ɔ, fiɛɛli nɛ a ngɛ lejɛ ɔ sui nyɔngma. Se benɛ jamɛ a jeha a ke e gboɔ ɔ, ma se sane kpakpa fiɛɛli 13 ya piɛɛ fiɛɛli nɛ a ngɛ lejɛ ɔ a he. Mwɔnɛ ɔ, fiɛɛli maa pee 216,000 nɛ a ngɛ Japan ma a mi, nɛ lɔ ɔ ji kaa a mi fã ngɛ sɔmɔe kaa blɔ gbali!

18. Mɛni sukuu kpahi nɛ wa ngɛ?

¹⁸ Wa ngɛ sukuu kpahi fuu. Ekomɛ ji, Matsɛ Yemi Sɔmɔmi Sukuu, Blɔ Gbali A Tsɔsemi Sukuu, Sukuu Kɛ Ha Matsɛ Yemi Sane Kpakpa Fiɛɛli, Kpɔ Mi Nɔ Hyɛli Kɛ A Yihi A Sukuu, kɛ Asafo ɔ Ní Tsumi Kɔni Ajla Toli Kɛ A Yihi A Sukuu. Sukuu nɛ ɔmɛ tsɔse nyɛmimɛ nyumuhi kɛ yihi nɛ a hemi kɛ yemi ɔ mi wa. E ngɛ heii kaa loloolo ɔ, Yesu ngɛ nihi fuu tsɔsee.

19. Mɛni Nyɛminyumu Russell de ngɛ fiɛɛmi ní tsumi ɔ he, nɛ kɛ enɛ ɔ ngɛ mi bae ha kɛɛ?

¹⁹ Mawu Matsɛ Yemi ɔ ngɛ nɔ yee jeha 100 kɛ se ji nɛ ɔ nɛ. Ngɛ jeha 100 nɛ ɔ tsuo mi ɔ, wa Matsɛ Yesu Kristo ngɛ fiɛɛmi ní tsumi ɔ kudɔe. Ngɛ jeha 1916 mi tɔɔ ɔ, Nyɛminyumu Russell he ye kaa a maa fiɛɛ sane kpakpa a kɛ kpa je ɔ mi tsuo. E de ke: “Ní tsumi ɔ yi ngɛ blie mlamlaamla nɛ e maa ya nɔ maa pee jã, ejakaa e he hia nɛ a fiɛɛ ‘Matsɛ Yemi ɔ he sane kpakpa’ a kɛ kpa je ɔ mi tsuo.” (Faith on the March, nɛ A. H. Macmillan ngma a ba fa 69) Wa ngɛ ní tsumi nɛ ɔ tsue mwɔnɛ ɔ! Wa naa Yehowa, tue mi jɔmi Mawu ɔ si kaa e haa wɔ níhi tsuo nɛ wa hia konɛ wa nyɛ nɛ waa pee e suɔmi nya ní!