1, 2. Blema a, mɛni Mawu pee, nɛ eko ɔ, mɛni hiɔtsɛmɛ komɛ hu ma susu kaa e pee ha mɛ mwɔnɛ ɔ?

KE HIƆ ko nɛ mi wa fia mo hyɛ ɔ, eko ɔ, o bi o he ke, ‘Mɛni be ma ná he wami?’ Aloo eko ɔ, o weku no ko loo o huɛ ko be he wami nɛ o biɔ o he ke, anɛ e ma ná he wami ekohu lo? Tɔmi ko be he kaa o maa suɔ kaa mo, aloo nihi nɛ o suɔ mɛ ɔ nɛ a ná nɔmlɔ tso mi he wami kpakpa. Baiblo ɔ wo ni komɛ nɛ hiɔ fia mɛ, nɛ a suɔ kaa a maa le ke ji kaa a ma ná he wami loo a be he wami náe ɔ a ta. Kaa nɔ hyɛmi nɔ́ ɔ, benɛ Matsɛ Ahazia, nɛ ji Ahab kɛ Yezebel a binyumu ɔ plaa a, e suɔ kaa e maa le ke ji e ma ná he wami loo e be he wami náe. Benɛ Matsɛ Benhadad nɛ e je Siria a hu be he wami ɔ, e bi ke ji e ma ná he wami ekohu aloo e be he wami náe.—2 Matsɛmɛ 1:2; 8:7, 8.

² Jehanɛ hu ɔ, Baiblo ɔ tsɔɔ kaa blema a, Yehowa tsa nihi ngɛ nyakpɛ blɔ nɔ, nɛ e gu e gbali a nɔ kɛ tle ni komɛ nɛ a gbo po si. (1 Matsɛmɛ 17:17-24; 2 Matsɛmɛ 4:17-20, 32-35) Mwɔnɛ ɔ, eko ɔ, hiɔtsɛmɛ komɛ ma susu kaa e sa nɛ Mawu nɛ tsa mɛ ngɛ nyakpɛ blɔ nɔ jã nɔuu.

3-5. Mɛni Yehowa kɛ Yesu ma nyɛ maa pee, nɛ mɛni sane bimihi a he wa ma susu?

 ³ Yehowa ngɛ he wami nɛ e kɛ ma nyɛ ma tsa hiɔtsɛmɛ aloo e kɛ ha nɛ hiɔ nɛ e fia nihi. E ngɔ hiɔ kɛ gbla ni komɛ a tue. Nimli nɛ ɔmɛ a kpɛti ni komɛ ji Farao nɛ e hi si ngɛ Abraham be ɔ mi ɔ, kɛ Mose nyɛmiyo Miriam. (1 Mose 12:17; 4 Mose 12:9, 10; 2 Samuel 24:15) Yehowa ngɔ “hiɔ munomunohi, kɛ gbenɔ hiɔ yayamihi” kɛ gbla Israel bi ɔmɛ a tue benɛ a yi lɛ anɔkuale ɔ. (5 Mose 28:58-61) Be komɛ hu ɔ, Yehowa po e we bi a he piɛ konɛ a ko nu hiɔ. (2 Mose 23:25; 5 Mose 7:15) E tsa a ti ni komɛ po. Kaa nɔ hyɛmi nɔ́ ɔ, benɛ hiɔ ngua ko fia Hiob nɛ e suɔ kaa e gbo ɔ, Yehowa tsa lɛ.—Hiob 2:7; 3:11-13; 42:10, 16.

⁴ Wa ngɛ nɔ mi mami kaa Yehowa ngɛ he wami nɛ e kɛ ma nyɛ ma tsa hiɔtsɛmɛ. Yesu hu ma nyɛ ma tsa hiɔtsɛmɛ. Benɛ e ngɛ zugba a nɔ ɔ, e tsa kpititsɛmɛ kɛ kɔkɔtsɛmɛ. E tsa hɛ yuyuili kɛ hulemi hiɔtsɛmɛ. (Kane Mateo 4:23, 24; Yohane 9:1-7) Nyakpɛ ní nɛ ɔmɛ nɛ Yesu pee ɔ yeɔ bua wɔ nɛ wa hyɛɛ nyakpɛ ní nɛ e maa pee ha wɔ ngɛ je ehe ɔ mi ɔ blɔ. Jamɛ a be ɔ mi ɔ, “nɔ ko nɔ ko be dee hu ke, ‘I be he wami.’”—Yesaya 33:24.

⁵ Se ke hiɔ ko nɛ mi wa fia wɔ mwɔnɛ ɔ, anɛ e sa nɛ waa hyɛ blɔ kaa Yehowa aloo Yesu ma tsa wɔ ngɛ nyakpɛ blɔ nɔ lo? Nɛ ke wa ngɛ hiɔ tsami blɔ nɔ tomi ko hlae ɔ, mɛni he e sa kaa wa susu?

6. Mɛni Baiblo ɔ de ngɛ nyakpɛ níhi nɛ Kristofohi nɛ a hi si ngɛ kaseli ɔmɛ a be ɔ mi ɔ pee ɔ he?

⁶ Ngɛ kaseli ɔmɛ a be ɔ mi ɔ, Yehowa ngɔ mumi klɔuklɔu ɔ kɛ pɔ Kristofohi nu, nɛ e ha a ti ni komɛ he wami nɛ a pee nyakpɛ níhi. (Bɔfo Ɔmɛ A Ní Tsumi 3:2-7; 9:36-42) Kaa nɔ hyɛmi nɔ́ ɔ, a nyɛ nɛ a tsa nihi, nɛ a tu gbi slɔɔtohi hulɔ. (1 Korinto Bi 12:4-11) Se pee se ɔ, kaa bɔ nɛ Baiblo ɔ tsɔɔ ɔ, nyakpɛ ní peemi nɛ ɔmɛ a se po. (1 Korinto Bi 13:8) Lɔ ɔ he ɔ, mwɔnɛ ɔ, wa be nyɛe maa hyɛ blɔ kaa ke wɔ aloo wa suɔlɔ ko be he wami ɔ, Mawu ma tsa wɔ ngɛ nyakpɛ blɔ ko nɔ.

7. Mɛni blɔ nɔ La 41:3 ɔ ma nyɛ maa wo wɔ he wami ngɛ?

⁷ Se ke o be he wami ɔ, Yehowa maa wo o bua, nɛ e maa ye bua mo kaa bɔ nɛ e pee ha e sɔmɔli nɛ a hi si blema a. Matsɛ David ngma ke: ‘A gbaa nɔ nɛ susuɔ nihi nɛ a ní ngɛ mɔbɔ a he; ke haomi ba e nɔ ɔ, Yehowa maa piɛɛ e he. Yehowa maa bu e he, nɛ e yi ma na wami.’ (La 41:1, 2) Ngɛ anɔkuale mi ɔ, David tsɔɔ we kaa nɔmlɔ kpakpa nɛ e susuɔ nihi nɛ a ní ngɛ mɔbɔ a he jamɛ a be ɔ mi ɔ, be gboe gblegbleegble. Lɛɛ mɛni blɔ nɔ Yehowa maa gu kɛ ye bua nɔmlɔ kpakpa kaa jã? David tsɔɔ nya ke: ‘Ke e be he wami ɔ, Yehowa maa piɛɛ e he, nɛ e ma tle lɛ si ngɛ e hiɔ sa nɔ.’ (La 41:3) Yehowa le haomi nɛ e we bi kɛ ngɛ kpee wawɛɛ, nɛ  e hɛ be a nɔ jee kɔkɔɔkɔ. E ma nyɛ maa wo mɛ kã, nɛ e ma ha mɛ juɛmi hulɔ. Jehanɛ se hu ɔ, Yehowa bɔ adesa nɔmlɔ tso ɔ konɛ lɛ nitsɛ e nyɛ nɛ e tsa e he.

8. Ngɛ La 41:4 ɔ nya a, benɛ David be he wami wawɛɛ ɔ, mɛni e de Yehowa kaa e pee ha lɛ?

⁸ Ngɛ La 41 ɔ mi ɔ, David tu be ko nɛ e be he wami wawɛɛ, nɛ e gbɔjɔ, nɛ e pee yeyeeye ɔ he munyu. E ma nyɛ maa ba kaa jamɛ a be ɔ mi ɔ, e bi Absalom ngɛ hlae ma je lɛ ngɛ matsɛ sɛ ɔ nɔ konɛ lɛ Absalom ɔ nɛ ba ye matsɛ. David be he wami wawɛɛ, enɛ ɔ he ɔ, e nyɛ we nɛ e tsi Absalom nya. David le kaa nyagbahi tsuo nɛ e weku ɔ kɛ ngɛ kpee ɔ je yayami nɛ e kɛ Batsheba pee ɔ. (2 Samuel 12:7-14) Enɛ ɔ he ɔ, mɛni e pee? E sɔle ke: ‘Yehowa, i pee mo yayami; naa mi mɔbɔ, nɛ o tsa mi.’ (La 41:4) David le kaa Yehowa ngɔ e yayami ɔ kɛ pa lɛ, enɛ ɔ he ɔ, benɛ e be he wami ɔ, e kɛ e hɛ fɔ Mawu nɔ konɛ e ye bua lɛ. Se, anɛ David ngɛ blɔ hyɛe kaa Yehowa ma tsa lɛ ngɛ nyakpɛ blɔ nɔ lo?

9. (a) Mɛni Yehowa pee ha Matsɛ Hezekia? (b) Mɛni David hyɛ blɔ kaa Yehowa nɛ pee ha lɛ?

⁹ Ngɛ anɔkuale mi ɔ, Mawu tsa ni komɛ hyɛ. Kaa nɔ hyɛmi nɔ́ ɔ, benɛ Matsɛ Hezekia ngɛ gboe ɔ, Yehowa tsa lɛ. E ngɔ jeha 15 kɛ piɛɛ Hezekia wami ligbi ɔmɛ a he ha lɛ. (2 Matsɛmɛ 20:1-6) Se David hyɛ we nyakpɛ nɔ́ ko blɔ. Mohu ɔ, e ngɛ blɔ hyɛe kaa Mawu nɛ ye bua lɛ kaa bɔ nɛ e maa ye bua “nɔ nɛ susuɔ nihi nɛ a ní ngɛ mɔbɔ a he” ɔ. Huɛ bɔmi kpakpa ngɛ David kɛ Yehowa a kpɛti, enɛ ɔ he ɔ, benɛ e be he wami ɔ, e nyɛ nɛ e de Yehowa kaa e wo e bua, nɛ e hyɛ e nɔ. E de Yehowa hu kaa e ha nɛ e nɔmlɔ tso ɔ nɛ ná he wami. Wɔ hu wa ma nyɛ ma bi Yehowa konɛ e ye bua wɔ jã nɔuu.—La 103:3.

10. Mɛni ba Trofimo kɛ Epafrodito a nɔ, nɛ mɛni wa kaseɔ ngɛ mi?

¹⁰ Ngɛ kaseli ɔmɛ a be ɔ mi ɔ, e ngɛ mi kaa bɔfo Paulo kɛ ni kpahi nyɛ nɛ a tsa hiɔtsɛmɛ ngɛ nyakpɛ blɔ nɔ mohu lɛɛ, se tsa pi Kristofohi tsuo nɛ a ná tsami ngɛ nyakpɛ blɔ nɔ. (Kane Bɔfo Ɔmɛ A Ní Tsumi 14:8-10.) Benɛ asla yaya ko fia Publio papaa a, bɔfo Paulo tsa lɛ. Paulo “sɔle. E ngɔ e nine ngɔ pue hiɔtsɛ ɔ nɔ, nɛ e tsa lɛ.” (Bɔfo Ɔmɛ A Ní Tsumi 28:8) Se tsa pi nɔ fɛɛ nɔ nɛ Paulo le ɔ nɛ e tsa. Ngɛ Paulo ma se sane kpakpa fiɛɛmi blɔ hiami ɔ eko mi ɔ, e huɛmɛ ɔmɛ a kpɛti nɔ kake nɛ a tsɛɛ lɛ ke Trofimo ɔ piɛɛ e he. (Bɔfo Ɔmɛ A Ní Tsumi 20:3-5, 22; 21:29) Benɛ Trofimo be he wami ɔ, Paulo tsa we lɛ. Enɛ ɔ he ɔ, e ba su he ko nɛ e sa kaa Paulo nɛ si lɛ ngɛ Mileto kɛ ya si be nɛ e ma ná he wami. (2 Timoteo 4:20) Hiɔ fia Paulo huɛ Epafrodito, nɛ e piɛ nguɛ nya nɛ e yi ta. Se Baiblo ɔ de we ke Paulo tsa lɛ.—Filipi Bi 2:25-27, 30.

11, 12. Mɛni wa le ngɛ Luka he, nɛ mɛni yemi kɛ buami nɛ eko ɔ, e kɛ ha Paulo?

¹¹ Dɔkita ji Luka, nɛ e piɛɛ Paulo he kɛ hia blɔ. (Bɔfo Ɔmɛ A Ní Tsumi 16:10-12; 20:5, 6; Kolose Bi 4:14). Eko ɔ, e ye bua Paulo kɛ ni kpahi nɛ a piɛɛ Paulo he kɛ tsu ma se sane kpakpa fiɛɛmi ní tsumi ɔ be mi nɛ a be he wami. (Galatia Bi 4:13) Kaa bɔ nɛ Yesu de ɔ, “nihi nɛ be he wami ɔ,” tsopatsɛ he hia mɛ.—Luka 5:31.

¹² Luka pi nɔ ko kɛkɛ nɛ e woɔ nihi ga  ngɛ nɔmlɔ tso mi he wami nami he. E ji dɔkita nɛ a tsɔse lɛ. Baiblo ɔ tsɔɔ we he nɛ e kase dɔkita ní tsumi ɔ ngɛ, aloo be nɛ e kɛ kase. Se Baiblo ɔ tsɔ kaa Paulo de Kolose bi ɔmɛ kaa Luka biɔ mɛ. Enɛ ɔ he ɔ, e ma nyɛ maa ba kaa a tsɔse Luka ngɛ tsopa peeli a sukuu ngɛ Laodikea. Ma nɛ ɔ kɛ Kolose kɛ we. Jehanɛ se hu ɔ, benɛ Luka ngma e Sane Kpakpa a kɛ Bɔfo Ɔmɛ A Ní Tsumi ɔ, e ngɔ tsopa peeli a munyungu pɔtɛɛ komɛ kɛ tsu ní. Akɛnɛ dɔkita ji lɛ he je ɔ, e tu hiɔhi fuu nɛ Yesu tsa a he munyu.

13. Loko wa maa wo nɔ ko ga, aloo wa maa kplɛɛ ga womi ko nɛ kɔɔ nɔmlɔ tso mi he wami nami he ɔ nɔ ɔ, mɛni e sa kaa wa kai?

¹³ Mwɔnɛ ɔ, wa nyɛmimɛ ɔmɛ a ti nɔ ko be nɛ ma nyɛ ma tsa wɔ ngɛ nyakpɛ blɔ nɔ. Se akɛnɛ a suɔ kaa a maa ye bua wɔ he je ɔ, eko ɔ, a ti ni komɛ maa wo wɔ ga be mi nɛ wa bi we ga womi ngɛ a dɛ po. Ngɛ anɔkuale mi ɔ, ga womi ɔmɛ ekomɛ ngɛ nɛ e yi nɔ awi. Kaa nɔ hyɛmi nɔ́ ɔ, Paulo wo Timoteo ga kaa e nu wai bɔɔ. Mi mi hiɔ ko ngɛ Timoteo he. Eko ɔ, e ná jamɛ a hiɔ kɛ je nyu yaya ko nɛ e nu mi. * (Hyɛ sisi ningma.) (Kane 1 Timoteo 5:23.) Se e he hia nɛ waa hyɛ nɛ hi. Nyɛmi ko ma nyɛ maa bɔ mɔde kaa e ma plɛ wa yi mi konɛ waa nu tsopa ko, waa kɛ ba ko nɛ tsu ní, waa ye niye ní pɔtɛɛ ko, aloo waa yu wa he ngɛ niye ní komɛ a he. Eko ɔ, e ma de wɔ kaa jamɛ a nɔ́ ɔ ye bua e weku no ko nɛ ngɛ nyagba ko kaa jã. Se enɛ ɔ tsɔɔ we kaa wɔ hu e maa ye bua wɔ. E sa nɛ wa kai kaa ke nihi fuu kɛ tsopa ko aloo hiɔ tsami blɔ nɔ tomi ko tsu ní po ɔ, loloolo ɔ, e ma nyɛ maa ye ni kpahi awi.—Kane Abɛ 27:12.

14, 15. (a) Mɛnɔmɛ a he nɛ e sa kaa waa hyɛ wa he ngɛ? (b) Mɛni wa ma nyɛ maa kase ngɛ munyu nɛ ngɛ Abɛ 14:15 ɔ mi?

¹⁴ Wɔ tsuo wa suɔ nɛ wa ná nɔmlɔ tso mi he wami kpakpa konɛ wa ná bua jɔmi, nɛ wa nyɛ nɛ wa tsu ní wawɛɛ kɛ ha Yehowa. Se akɛnɛ wa yi mluku he je ɔ, wa be nyɛe maa tu hiɔhi tsuo a nya fo. Ke wa be he wami ɔ, nihi ma nyɛ maa gu blɔ slɔɔtohi a nɔ kɛ tsa wɔ. Wa ti nɔ tsuaa nɔ ngɛ he blɔ nɛ e hlaa hiɔ tsami blɔ nɔ tomi nɛ e suɔ. Aywilɛho sane ji kaa ni kakaaka komɛ kɛ ní tsumi kuu komɛ tsɔɔ kaa a na hiɔ komɛ a nya tsaba. A peeɔ jã, ejakaa a suɔ nɛ a ná sika fuu. A ma nyɛ ma de ke nihi fuu kɛ jamɛ a tsopa a tsu ní, nɛ e tsa mɛ. Nɛ ke wa be he wami ɔ, eko ɔ, wa maa suɔ kaa tsopa saisaa nɛ nihi maa tsɔɔ kaa e ma tsa wɔ ɔ, wa maa pee konɛ wa se nɛ kɛ ngɛ je mi. Se e sɛ kaa wa hɛ nɛ je ga nɛ nyɛɛ se nɛ ɔ nɛ Mawu Munyu ɔ wo wɔ ɔ nɔ. E de ke: “Kuasia heɔ nɔ́ tsuaa nɔ́ yeɔ. Ní lelɔ lɛɛ e le e nane nya hyɛmi.”—Abɛ 14:15.

 ¹⁵ Ke wa le ní, aloo wa ngɛ juɛmi nɛ nɔ ko wo wɔ ga ngɛ tsopa peemi he ɔ, wa ma susu he saminya, titli ɔ, ke nɔ ɔ ná we tsɔsemi ko ngɛ tsopa peemi mi. Wa ma bi wa he ke: ‘Asimasi ɔ tsɔɔ kaa tsopa nɛ ɔ, ba nɛ ɔ, loo niye ní nɛ ɔ ye bua nihi, se anɛ i le kaa e ye bua mɛ niinɛ lo? Nɛ ke e ye bua nihi po ɔ, kɛ ma plɛ kɛ le kaa e maa ye bua mi ha kɛɛ? Anɛ e he maa hia kaa ma hla níhi a mi kɛ ya tsitsaa, nɛ i kɛ nɔ ko nɛ a tsɔse lɛ ngɛ tsopa peemi mi nɛ tu ye hiɔ ɔ he munyu lo?’—5 Mose 17:6.

16. Mɛni e sa kaa wa susu ke wa ngɛ nɔmlɔ tso mi he wami nami he juɛmi pee?

¹⁶ Ke wa ngɛ juɛmi pee ngɛ hiɔ tsami blɔ nɔ tomi ko nɛ waa kɛ ma tsu ní he ɔ, e he hia nɛ waa kɛ “juɛmi nɛ mi tsɔ,” aloo hɛ si kami nɛ tsu ní. (Tito 2:12, NW) Enɛ ɔ he hia wawɛɛ nitsɛ, titli ɔ, ke o yi mi tɛ̃ mo ngɛ hiɔ tsami blɔ nɔ tomi ɔ he. Anɛ tsopatsɛ ɔ ma nyɛ maa tsɔɔ wɔ bɔ nɛ hiɔ tsami blɔ nɔ tomi ɔ tsuɔ ní ha lo? Anɛ o yi mi tɛ̃ mo ngɛ nɔ́ nɛ e de ɔ he lo? Anɛ dɔkitahi fuu kplɛɛ nɔ kaa jamɛ a hiɔ tsami blɔ nɔ tomi ɔ ma nyɛ ma tsu ní lo? (Abɛ 22:29) Eko ɔ, nɔ ko de wɔ kaa hiɔ ko nɛ dɔkitahi nɛ nya tsaba lolo ɔ, ni komɛ nɛ a ngɛ tsitsaa he ko na e nya tsaba. Se anɛ nɔ́ ko ngɛ nɛ wa ma nyɛ maa da nɔ kɛ ná nɔ mi mami kaa a na hiɔ ɔ nya tsaba niinɛ lo? Eko ɔ, ni komɛ maa  tsɔɔ mo kaa o pee tsopa ko nɛ ní komɛ ngɛ mi nɛ o li, aloo mumi ko ngɛ se. Oslaa ma nyɛ maa hi hiɔ tsami blɔ nɔ tomi ko kaa jã a he. Mo kai kaa Mawu bɔ wɔ kɔkɔ ngɛ mumihi kɛ ní tsumi, kɛ kunya yemi ní peepeehi a he.—5 Mose 18:10-12; Yesaya 1:13, NW.

17. Mɛni wɔ tsuo wa suɔ kaa wa ná?

¹⁷ Ngɛ kaseli ɔmɛ a be ɔ mi ɔ, blɔ tsɔɔmi ajla toli ɔmɛ ngma sɛ womi ya ha nyɛmimɛ ɔmɛ ngɛ asafo ɔmɛ a mi, nɛ a tsɔɔ mɛ níhi nɛ e sa kaa a yu a he ngɛ he. Ngɛ sɛ womi ɔ nyagbe ɔ, blɔ tsɔɔmi ajla toli ɔmɛ ngma ke: “Nyɛɛ bɔ mɔde nɛ nyɛɛ yu nyɛ he kɛ je ní nɛ ɔmɛ a he. Nyɛɛ hi si saminya.” (Bɔfo Ɔmɛ A Ní Tsumi 15:29) Ngɛ gbi komɛ a mi ɔ, a tsɔɔ ngmami nɛ ɔ nyagbe munyu ɔ sisi ke, “Nyɛ ná nɔmlɔ tso mi he wami kpakpa.” Wa suɔ wawɛɛ kaa wa ma ná nɔmlɔ tso mi he wami kpakpa.

18, 19. Mɛni wa ma nyɛ maa hyɛ blɔ kaa wa ma ná ngɛ je ehe ɔ mi?

¹⁸ Akɛnɛ wa yi mluku he je ɔ, wa be nyɛe maa tu hiɔhi tsuo a nya fo. Nɛ ke wa be he wami ɔ, wa hyɛ we blɔ kaa Yehowa nɛ tsa wɔ ngɛ nyakpɛ blɔ nɔ. Se wa ma nyɛ maa hyɛ blɔ kaa hwɔɔ se ɔ, Yehowa ma tsa wa he hiɔhi tsuo ha wɔ. Ngɛ Kpojemi 22:1, 2 ɔ, bɔfo Yohane tu “nyu nɛ haa nɔ wami” kɛ ‘tsohi nɛ haa nɔ wami’ nɛ ma tsa nɔ fɛɛ nɔ ɔ he munyu. Tsa pi zugba tsopahi nɛ wa ma nyɛ maa nu mwɔnɛ ɔ, aloo ngɛ je ehe ɔ mi konɛ wa ná tsami ɔ he munyu nɛ a ngɛ tue. Mohu ɔ, e daa si kɛ ha níhi tsuo nɛ Yehowa kɛ Yesu maa pee konɛ wa nyɛ nɛ waa hi si kɛ ya neneene ɔ.—Yesaya 35:5, 6.

¹⁹ Wa ngɛ jamɛ a be kpakpa a blɔ hyɛe wawɛɛ nitsɛ. Se amlɔ nɛ ɔ, wa ngɛ nɔ mi mami kaa Yehowa suɔ wa ti nɔ tsuaa nɔ, nɛ ke wa ngɛ nɔ́ nae ɔ, e le bɔ nɛ e peeɔ wɔ ha. Kaa bɔ nɛ e ji ngɛ David blɔ fa mi ɔ, wɔ hu wa ngɛ hɛ kɛ nɔ fɔmi kaa ke wa be he wami ɔ, Yehowa be wɔ kuae kɔkɔɔkɔ. E maa hyɛ nihi nɛ a yeɔ lɛ anɔkuale ɔ a nɔ be fɛɛ be.—La 41:12.