YEHOWA ji Mawu nɛ haa nɔ nɔ́ faa. (Yakobo 1:17) Ke wa hyɛ níhi tsuo nɛ e bɔ ɔ, wa naa kaa e haa nɔ nɔ́ faa niinɛ. E bɔ dodoehi nɛ a hyi hiɔwe tɔ, nɛ e ha nɛ zugba a nɔ hu hyi kɛ tsohi nɛ a ngɛ fɛu.—La 65:12, 13; 147:7, 8; 148:3, 4.

Nɔ nɛ ngma La 104 ɔ bua jɔ níhi tsuo nɛ Yehowa bɔ ɔ he, enɛ ɔ he ɔ, e po la ko konɛ a kɛ je Yehowa yi. Ke o kane la nɛ ɔ, anɛ o nuɔ he kaa e sa nɛ o na Yehowa si kaa bɔ nɛ la polɔ ɔ pee ɔ lo? E de ke: ‘Ma la kɛ je Yehowa yi ye wami be ɔ tsuo. Be mi nɛ i ngɛ je mi kɛ mwɔɔ ɔ, ma la kɛ je ye Mawu ɔ yi.’ (La 104:33) Anɛ o suɔ kaa o maa pee jã lo?

Yehowa suɔ kaa waa kase lɛ konɛ wɔ hu wa ha nɔ nɔ́ faa. E tsɔɔ wɔ yi mi tomi kpakpa he je nɛ e sa kaa waa pee jã. E ha nɛ bɔfo Paulo ngma ke: “Niatsɛmɛ nɛ ngɛ nyɛ kpɛti ɔ, nyɛɛ a nɔ nɛ a ko wo a he nɔ. Á ko ngɔ a hɛ ngɔ fɔ ní nɛ a ná a nɔ, ejakaa ní nami se maa po. Á ngɔ a hɛ ngɔ fɔ Mawu mohu nɔ. Lɛ nɛ e haa wɔ ní kpakpahi babauu nɛ wa yeɔ faa. A ko pee kpɛle, se a bɔle nine ha nɔ tsuaa nɔ. Ke a pee jã a, a maa to juetli kpakpa si ha a he kɛ ha hwɔɔ se; nɛ a nine maa su wami nɛ ngɛ kɛ yaa neneene ɔ nɔ.”—1 Timoteo 6:17-19.

Ngɛ sɛ womi enyɔne nɛ Paulo ngma ya ha Korinto bi ɔmɛ mi ɔ, e tsɔɔ juɛmi nɛ e sa kaa waa hɛɛ ke wa ngɛ nihi nɔ́ hae. E de ke: “Nɔ tsuaa nɔ nɛ ha bɔ nɛ e to kaa e ma ha. E ha kɛ bua jɔmi, se pi kaa a ngɛ e nɔ nyɛe ke e pee; ejakaa Mawu suɔ nɔ nɛ haa nɔ́ kɛ tsui mi jɔmi.” (2 Korinto Bi 9:7) Ke wa haa nɔ nɔ́ faa a, mɛnɔmɛ wa yeɔ bua? Paulo tsɔɔ kaa wa yeɔ bua nihi kɛ gu a hiami níhi nɛ wa haa mɛ ɔ nɔ. Se ke wa pee jã a, wa yeɔ bua wɔ nitsɛmɛ wa he hulɔ, ejakaa Yehowa maa jɔɔ wɔ.—2 Korinto Bi 9:11-14.

Lɔ ɔ se ɔ, Paulo tsɔɔ nɔ́ nɛ pe kulaa nɛ Mawu pee kɛ tsɔɔ kaa e haa nɔ nɔ́ faa. E de ke: “Nyɛ ha waa na Mawu si ngɛ e nike ní nɛ nɔ ko be nyɛe maa kale ɔ he.” (2 Korinto Bi 9:15) Ní kpakpahi nɛ Yehowa haa wɔ kɛ guɔ Yesu Kristo nɔ ɔ piɛɛ e “nike ní” ɔmɛ a he. Wa be nyɛe maa kale bɔ nɛ nike ní nɛ ɔ he jua wa ha.

Mɛni wa maa pee kɛ tsɔɔ kaa wa bua jɔ níhi tsuo nɛ Yehowa kɛ Yesu pee ha wɔ kɛ níhi nɛ a maa pee ha wɔ hwɔɔ se ɔ he? Wa ma nyɛ maa ngɔ wa be, wa he wami, kɛ wa he lo nya níhi kɛ ja Yehowa konɛ waa ye bua nihi nɛ a kase e he ní. Wa ngɛ níhi fuu jio, ní bɔɔ pɛ wa ngɛ jio, wa ma nyɛ maa pee ní nɛ ɔmɛ.—1 Kronika 22:14; 29:3-5; Luka 21:1-4.