ANƐ mo hu o yeɔ gbeye kaa a be nyɛe maa po nɔ sisimi se gblegbleegble kaa bɔnɛ nihi fuu yeɔ gbeye ɔ lo? Ke jã a, lɛɛ sisi numi ngɛ he kaa mo hu o yeɔ gbeye. Ngɛ yinɔ sane mi tsuo ɔ, adesahi ka nɔ yemi slɔɔtoslɔɔtohi nɛ a hyɛ. Se kɛ̃ ɔ, a nyɛ we nɛ a po nɔ sisimi se kulaa. Anɛ hɛ kɛ nɔ fɔmi ko ngɛ kaa be ko maa su nɛ nihi maa ye a sibi anɔkuale lo?

Bua jɔmi sane ji kaa Baiblo ɔ ha heto ke ee! E de wɔ ke e be kɛe nɛ Mawu ma je nɔ sisimi kɛ je zugba a nɔ. Mɛni blɔ nɔ e maa gu kɛ pee enɛ ɔ? E maa pee enɛ ɔ kɛ gu e Matsɛ Yemi nɛ ji hiɔwe nɔ yemi nɛ ma ba tsake zugba a kɛ pee ehe ɔ nɔ. Matsɛ Yemi nɛ ɔ nɔuu he nɛ Yesu tsɔɔ e kaseli ɔmɛ kaa a sɔle ngɛ ɔ nɛ. Ngɛ sɔlemi nɛ a tsɛɔ be komɛ ke Nyɔmtsɛ ɔ Sɔlemi ɔ loo Wa Tsɛ ɔ Nɛ Ngɛ Hiɔwe ɔ sɔlemi ɔ mi ɔ, Yesu de ke: “O matsɛ yemi ɔ nɛ ba. A pee nɔ́ nɛ o suɔ ngɛ zugba a nɔ.”—Mateo 6:10.

Baiblo ɔ gba kɛ kɔ Matsɛ nɛ da Matsɛ Yemi nɛ ɔ nya nɛ ji Yesu Kristo ɔ he ke: ‘Ke ohiatsɛ, loo nɔ nɛ e fi lɛ, loo nɔ nɛ be nɔ ko tsɛ lɛ ɔ, e maa bu lɛ tue. Nihi nɛ gbɔjɔ, kɛ nihi nɛ e fi mɛ ɔ, e maa na mɛ mɔbɔ. Nihi nɛ e fi mɛ ɔ, e ma he a yi wami. E ma he a yi wami kɛ je yi mi wami kɛ awi yemi mi.’ (La 72:12-14) Mo kadi kaa Yesu mi mi sãa lɛ ngɛ nihi nɛ a sisiɔ mɛ ɔ a he, nɛ e maa ye bua mɛ! Anɛ pi bua womi munyu ji nɛ ɔ lo?

Mawu Matsɛ Yemi ɔ nya Matsɛ nɛ e mi mi sãa lɛ ɔ maa po nɔ sisimi se kulaa ngɛ zugba a nɔ. Kɛ gu mɛni blɔ nɔ? E maa pee enɛ ɔ kɛ gu níhi etɛ nɛ kɛ nɔ sisimi ba, nɛ wa susu a he kɛ sɛ hlami ɔ nɛ e ma je ɔ nɔ.

Amlɔ nɛ ɔ, e sa nɛ wɔ tsuo waa kɛ yayami nɛ ngɛ wa mi, nɛ haa nɛ wa foɔ wɔ pɛ wa nɔ́ mi ɔ nɛ hwu ta. (Romabi 7:21-23) Loloolo ɔ, nimli kpakpa komɛ ngɛ nɛ a suɔ kaa a maa pee nɔ́ nɛ da. A ngɛ hemi kɛ yemi ngɛ Yesu kpɔmi afɔle sami ɔ mi nɛ a kɛ a yayami ma nyɛ maa pa mɛ. * (1 Yohane 1:7, 9) Nimli nɛ ɔmɛ ma nyɛ ma ná suɔmi nɛ kle pe kulaa nɛ Mawu je kpo kɛ tsɔɔ mɛ ɔ he se. Wa kaneɔ ngɛ Yohane 3:16 ke: “Ejakaa Mawu suɔ je ɔ saminya, nɛ e ngɔ e Bi kake ɔ ngɔ ha, konɛ nɔ tsuaa nɔ nɛ heɔ lɛ yeɔ ɔ, e hɛ mi ko kpata, se mohu e ná neneene wami.”

 Mawu maa pee nyakpɛ nɔ́ ko nitsɛnitsɛ kɛ ha nihi nɛ a yeɔ anɔkuale ɔ. Mawu ma je yayami tsuo bɔɔbɔɔbɔɔ kɛ je adesahi nɛ a yeɔ anɔkuale ɔ a mi, nɛ e ma ha nɛ a ye mluku konɛ a ná si dami kpakpa ngɛ e hɛ mi. (Yesaya 26:9; 2 Petro 3:13) Yayami be hae nɛ nɔ ko nɛ sisi e nyɛmi hu kɔkɔɔkɔ. Adesahi nɛ yeɔ anɔkuale ɔ maa ye a he ngɛ nɔ sisimi he ngɛ Mawu Matsɛ Yemi ɔ sisi.

Aywilɛho sane ji kaa mwɔnɛ ɔ, nihi jeɔ blɔ nɛ a sisiɔ nihi. A sisiɔ nihi nɛ a be nɔ́ ko kɛ ohiatsɛmɛ, nɛ a woɔ nihi he wami konɛ mɛ hu a sisi ni kpahi. Baiblo ɔ wo jamɛatsɛ ɔmɛ ga ke: “Nyɛ yiwutsotsɛmɛ, nyɛ kpa awi yemi, nyɛ yayami peeli, nyɛ ko susu nɔ́ yaya hu.” Baiblo ɔ wo mɛ si kaa ke a tsake a tsui ɔ, Mawu kɛ a ‘tɔmihi maa pa mɛ.’—Yesaya 55:7.

Se ke a pia we a he ɔ, Mawu ma kpata a hɛ mi. Baiblo ɔ mi si womi nɛ nyɛɛ se nɛ ɔ maa ba mi kɛ gu Mawu Matsɛ Yemi ɔ nɔ. E de ke: ‘Ngɔɔ o hɛ ngɔ fɔ Yehowa nɔ, nɛ o ye e mlaa amɛ a nɔ. Ke a ngɛ yayami peeli a hɛ mi kpatae ɔ, o hɛngmɛ kɛkɛ o kɛ maa hyɛ mɛ.’ * (La 37:34) Ke a kpata nimli yayamihi nɛ a tue mi ti ɔ a hɛ mi ɔ, nɔ ko be nihi nɛ a yeɔ Mawu anɔkuale nɛ a jaa lɛ ɔ sisie hu gblegbleegble.

Satan Abosiami ji yayami peelɔ kpanaku. Bua jɔmi sane ji kaa e be kɛe nɛ́ Yehowa maa tsi Satan nya nɛ e ko sisi adesahi hu. Nyagbenyagbe ɔ, Mawu ma kpata Satan hɛ mi kulaa. Yiwutsotsɛ kpanaku ɔ be hae nɛ nihi nɛ a sisi nɔ ko hu gblegbleegble.

Ngɛ anɔkuale mi ɔ, e ma nyɛ maa pee mo kaa e ji susumi gu ko kɛkɛ kaa a ma de ke Mawu ma ba po nɔ sisimi se kulaa. Enɛ ɔ he ɔ, eko ɔ, o ma bi ke, ‘Anɛ Mawu ma nyɛ maa po nɔ sisimi se niinɛ lo? Ke e ma nyɛ ɔ, lɛɛ mɛni heje mɔ nɛ e pee we he nɔ́ ko lolo ɔ?’ Sane bimi nɛ ɔmɛ ji sane bimi kpakpahi nɛ Baiblo ɔ ha heto nɛ haa nɛ nɔ tsui nɔ ɔ nɔ mi. * Baiblo ɔ tsɔɔ kaa e be kɛe nɛ a maa po nɔ sisimi se kɛ ya neneene. Wa suɔ nɛ mo nitsɛ o kase enɛ ɔ he ní.