E NGƐ mi kaa yayami nɛ ngɛ wa he, kɛ je ɔ nɛ wa ngɛ mi ɔ, kɛ Abosiami ma nyɛ maa nyɛ wa nɔ mohu lɛɛ, se wa ma nyɛ maa yu wa he ngɛ nɔ sisimi he! Ngɛ mɛni blɔ nɔ? Kɛ gu Mawu he nɛ wa maa hɛ wɔ kɛ su, nɛ waa kɛ e Munyu nɛ ji Baiblo ɔ mi sisi tomi mlaahi nɛ se nami ngɛ a he be tsuaa be ɔ ma tsu ní ɔ nɔ. Mo susu nɔ hyɛmi níhi enyɔ a he nɛ o hyɛ.

BAIBLO SISI TOMI MLAA: “Nyɛ ko ba nyɛ je mi kaa je mi bi ɔmɛ hu.”—Romabi 12:2.

Sane nɛ ya nɔ nitsɛnitsɛ: Guilherme ji Brazil no jua yelɔ kpanaa ko. E kplɛɛ nɔ kaa anɔkuale yemi yee. E de ke: “E yi kaa jua yelɔ ko maa sisi nihi ngɛ e jua yemi nítsumi mi, eko ɔ, konɛ e nyɛ nɛ e su otihi nɛ e kɛ ma e hɛ mi ɔ a he, aloo konɛ e nítsumi ɔ nɛ nyɛ nɛ ya hɛ mi ngɛ je nɛ nihi siɔ koli ngɛ mi nɛ ɔ mi. Nihi fuu buɔ nyɔ mi ní hemi kɛ nyɔ mi ní hami kaa ní peepeehi nɛ tɔmi ko be a he. Ke o je nítsumi ehe sisi ɔ, o hia sika nɛ o kɛ ma bli nítsumi ɔ mi, enɛ ɔ heje ɔ, anɔkuale yemi yee.”

E ngɛ mi jã mohu lɛɛ, se Guilherme nyɛ nɛ e ya nɔ ye anɔkuale. E de ke: “Ngɛ nítsumihi nɛ nɔ tsuaa nɔ nyɛɔ peeɔ nɔ́ nɛ e suɔ ngɛ mi ɔ a mi po ɔ, wa ma nyɛ maa ye anɔkuale. Nɔ́ nɛ he hia ji nɛ wa maa ba wa je mi saminya. Baiblo ɔ ye bua mi nɛ i na kaa se nami ngɛ anɔkuale yemi he. Ke nɔ ko yeɔ anɔkuale ɔ, e náa he nile kpakpa, e tue mi jɔɔ lɛ, nɛ nihi hu buɔ lɛ. Nihi nɛ bɔle lɛ ɔ ma nyɛ maa kase nɔ́ kpakpa ko kɛ je e ngɔ.”

BAIBLO SISI TOMI MLAAHI: “Nihi nɛ hlaa kaa a ná ní ɔ, a sɛɛ ka mi. A ya dii kuasia níhi, kɛ akɔnɔ yayami se. Enɛ ɔ haa nɛ a hemi kɛ yemi taa, nɛ a hɛ mi kpataa. Ejakaa sika suɔmi ji yayami tsuo sipoku.”—1 Timoteo 6:9, 10.

Sane nɛ ya nɔ nitsɛnitsɛ: André ngɛ nítsumi ko nɛ a toɔ he piɛ pomi klamahi a he blɔ nya kɛ haa nihi. A tsuɔ ní ha bɔɔlu fiami kuu ngua ko hulɔ. Ligbi ko benɛ a fia bɔɔlu ngua ko ta a, André ya bɔɔlu fiami kuu ɔ mi nikɔtɔma amɛ a ngɔ kaa e yaa ngɔ e sika ngɛ ní nɛ e tsu ha mɛ ɔ he. Benɛ e su lejɛ ɔ, nihi nɛ a hyɛɛ sika nɔ ɔ hɛdɔ kɛ ngɛ sika nɛ a ná jamɛ a ligbi ɔ kanee. Akɛnɛ je jɔ heje ɔ, nɔkɔtɔma nɛ da kuu ɔ nya a kɛ oya yemi wo André kɛ nihi nɛ a piɛɛ e he ɔ hiɔ.

André de ke: “Benɛ i yaa we mi ɔ, i yɔse kaa sika nɛ kuu ɔ nya dalɔ ɔ ha mi ɔ be nɔ. I le kaa e be nɔ tutuutu nɛ e wo lɛ hiɔ kɛ be nɔ ɔ lee mohu. Se i le hu kaa lɛ nitsɛ e ma je e kotoku mi sika kɛ wo mi! I kpale ye se kɛ ho e ngɔ ya. I bɔ mɔde nɛ i gu nimli asafo nɛ a ba hyɛ bɔɔlu ɔ a kpɛti, nɛ i kpale sika nɛ  be nɔ ɔ ya ha kuu ɔ nya dalɔ ɔ. E nya kpɛ e he wawɛɛ nitsɛ. Nɔ ko kpale we sika se ba ha we lɛ hyɛ.”

André tsa nɔ nɛ e de ke: “Anɔkuale nɛ ɔ nɛ i ye ɔ ha nɛ kuu ɔ nya dalɔ ɔ ná bumi kɛ ha mi. Kuu ɔ kɛ nihi fuu kpa nítsumi. Imi pɛ lɛ a kɛ mi ngɛ ní tsue loloolo jehahi babauu ji nɛ ɔ. Ye bua jɔ kaa Baiblo sisi tomi mlaahi nɛ a nɔ kuɔ nɛ i kɛ tsu ní ɔ ha nɛ i ná biɛ kpakpa.”

E ji nɔ́ ko nɛ woɔ nɔ he wami kaa wa maa le kaa Mawu ma nyɛ maa ye bua wɔ nɛ waa yu wa he ngɛ su yayahi a he. Se adesahi be nyɛe maa po nɔ sisimi se kulaa. Nɔ́ nɛ kɛ nɔ sisimi ba a kle kulaa pe bɔnɛ adesahi nɛ a yi mluku ɔ ma nyɛ ma tsu he ní. Anɛ enɛ ɔ tsɔɔ kaa nɔ sisimi se be poe gblegbleegble lo? Wa maa na heto nɛ woɔ nɔ he wami nɛ Baiblo ɔ kɛ ha a ngɛ nyagbe munyu nɛ nyɛɛ se ɔ mi.