1. Ke a wo nyɔguɛ ta a, mɛni baa nihi a juɛmi mi?

MAA pee jeha 2,500 nɛ be ɔ, Hela fiɛmi ngmalɔ ko ngma ke: “Tsa pi nɔ ko bua nɔ ji e pee nyɔguɛ.” Mwɔnɛ ɔ, nihi fuu kplɛɛ nɔ́ nɛ e de ɔ nɔ. Ke a wo nyɔguɛ ta a, nɔ́ nɛ baa nihi a juɛmi mi ji, nɔ ko nɛ a nyɛɔ e nɔ nɛ́ e sɔmɔɔ ni kpahi, nɛ e tsuɔ ní kɛ haa e nyɔmtsɛ, aloo nɔ ko nɛ a waa lɛ yi mi.

2, 3. (a) Kɛ Kristo kɛ e tsɔli ɔmɛ hiɔ si ha kɛɛ? (b) Mɛni sane bimihi nɛ kɔɔ tsɔli a he lɛ wa ma susu?

² Se kɛ̃ ɔ,Yesu tsɔɔ kaa e kaseli ɔmɛ maa pee tsɔli aloo nyɔguɛhi nɛ a baa a he si. E ngɛ mi kaa anɔkuale Kristofoli ji nyɔguɛhi mohu lɛɛ, se a nyɔmtsɛ ɔ pue we a hɛ mi si nɛ e wɛ mɛ yi mi hulɔ. A nyɔmtsɛ ɔ woɔ a hɛ mi nyami, nɛ e ngɛ hɛ kɛ nɔ fɔmi ngɛ a mi, nɛ e buɔ mɛ. Kaa nɔ hyɛmi nɔ́ ɔ, benɛ e piɛ bɔɔ nɛ Yesu ma gbo ɔ, mo susu munyu nɛ e tu kɛ kɔ “tsɔlɔ” ko he ɔ he nɛ o hyɛ. Kristo de to kaa e kɛ nítsumi maa wo “tsɔlɔ anɔkualetsɛ kɛ ní lelɔ” ko dɛ.—Mat. 24:45-47.

³ Mo kadi kaa ngɛ Luka womi ɔ mi hu ɔ, Yesu tu e se nyɛɛli nɛ a pɔ mɛ nu ɔ a he munyu ke a ji ‘tsɔli.’ (Kane Luka 12:42-44.) Kristofoli anɔkualetsɛmɛ nɛ a ngɛ wami mi mwɔnɛ ɔ a kpɛti nihi babauu piɛɛ we tsɔlɔ kuu ɔ he. Se Baiblo ɔ tsɔɔ kaa Mawu sɔmɔli tsuo a ji tsɔli. Mɛni blɔ nya nítsumihi nɛ a kɛ wo wa dɛ? Kɛ e sa kaa waa na blɔ nya nítsumi nɛ ɔmɛ ha kɛɛ? Bɔnɛ pee nɛ waa na heto ɔ, nyɛ ha nɛ waa hyɛ nítsumi nɛ tsɔli nɛ a hi si blema a tsuɔ.

4, 5. Mɛni nítsumihi nɛ tsɔli nɛ a hi si blema a tsuɔ? Mo ha enɛ ɔ he nɔ hyɛmi níhi.

⁴ Blema a, tsɔlɔ ji nɔ ko nɛ e nyɔmtsɛ he lɛ ye nɛ e haa nɛ e hyɛɛ e we aloo e nítsumi nɔ kɛ haa  lɛ. E hyɛɔ e nyɔmtsɛ ɔ weto ní kɛ sika nɔ, nɛ lɛ ji sɔmɔli kpa amɛ a nya tsɛ. Enɛ ɔ he nɔ hyɛmi nɔ́ ji Eliezer. Lɛ nɛ e hyɛɔ níhi babauu nɛ Abraham ngɛ ɔ a nɔ. Abraham tsɔ Eliezer kɛ ho Mesopotamia ya konɛ e ya hla yo kɛ ha e binyumu Isak. Enɛ ɔ ji blɔ nya nítsumi ngua nitsɛnitsɛ!—1 Mose 13:2; 15:2; 24:2-4.

⁵ Abraham bibimibi Yosef nɛ e hyɛ Potifar we ɔ nɔ. (1 Mose 39:1, 4) Pee se ɔ, Yosef nitsɛ hu ba ná e tsɔlɔ nɛ “hyɛɛ Yosef we ɔ nɔ” ha lɛ. Yosef tsɔlɔ ɔ pee Yosef nyɛmimɛ nyɔngma amɛ nibwɔ. Benɛ Yosef to ga kaa e kɛ sika hiɔ kplu ɔ maa ka e nyɛmimɛ ɔmɛ ɔ, e tsɔlɔ ɔ ji nɔ nɛ e fã nɛ e tsu he ní ha lɛ. Enɛ ɔ tsɔɔ heii kaa nyɔmtsɛmɛ ngɛ hɛ kɛ nɔ fɔmi nɛ mi wa ngɛ a tsɔli a mi.—1 Mose 43:19-25; 44:1-12.

6. Mɛni nítsumihi asafo mi nikɔtɔmahi tsuɔ?

⁶ Jeha lafa komɛ a se ɔ, bɔfo Paulo ngma ke asafo mi nikɔtɔmahi ji ‘Mawu nítsumi nɔ hyɛli.’ (Tito 1:7) Akɛnɛ asafo mi nikɔtɔma amɛ hyɛɔ “Mawu asafo ɔ” nɔ heje ɔ, a kɛ blɔ tsɔɔmi haa asafo ɔ, nɛ a nyɛɛɔ hɛ mi ngɛ asafo ɔmɛ a mi. (1 Pet. 5:1, 2) Ngɛ anɔkuale mi ɔ, asafo mi nikɔtɔma amɛ tsuɔ nítsumi slɔɔtoslɔɔtohi. Kaa nɔ hyɛmi nɔ́ ɔ, a kpɛti nihi babauu sɔmɔɔ asafo kake. Kpokpa wayo kɛ kpokpa ngua nɔ nyɛli sɔmɔɔ asafohi fuu. Asafo ɔ Nítsumi He Kɔni Ajla Toli hu hyɛɔ asafohi nɛ ngɛ ma nɛ a ngɛ mi ɔ a nɔ. Se a hyɛɔ blɔ kaa a ti nɔ tsuaa nɔ kɛ anɔkuale yemi ma tsu e blɔ nya nítsumihi a he ní; mɛ tsuo a “maa bu akɔtaa” kɛ ha Mawu.—Heb. 13:17.

7. Kɛ wa plɛ kɛ le kaa Kristofoli tsuo ji tsɔli kɛɛ?

⁷ Nɛ Kristofoli anɔkualetsɛmɛ babauu nɛ tsa pi asafo mi nikɔtɔmahi ji mɛ ɔ hu nɛɛ? Bɔfo Petro ngma womi ha Kristofoli tsuo ke: “Nike ní pɔtɛɛ komɛ nɛ Mawu kɛ dloo nyɛ ti nɔ tsuaa nɔ ɔ, nyɛ kɛ sɔmɔ nyɛ sibi kaa Mawu dloomi nike ní slɔɔto ɔmɛ a nɔ hyɛli kpakpahi.” (1 Pet. 1:1; 4:10) Mawu je mi mi himi mi nɛ e dloo wa ti nɔ tsuaa nɔ kɛ nike ní, nile, aloo nyɛmi slɔɔtohi konɛ wa kɛ ye bua wa nyɛmimɛ Kristofoli. Enɛ ɔ he ɔ, nihi tsuo nɛ a sɔmɔɔ Mawu ɔ ji tsɔli, nɛ Mawu buɔ mɛ, e ngɛ hɛ kɛ nɔ fɔmi ngɛ a mi, nɛ e kɛ blɔ nya nítsumi wo a dɛ.

8. Mɛni ji sisi tomi mlaa ko nɛ he hia nɛ e sa kaa e hi wa juɛmi mi?

⁸ Amlɔ nɛ ɔ, wa ma susu sisi tomi mlaahi etɛ nɛ e sa kaa Kristofoli tsuo nɛ a ji tsɔli ɔ nɛ a le ɔ a he nɛ waa hyɛ. Kekleekle sisi tomi mlaa a ji: Mawu níhi ji wɔ tsuo, nɛ wa maa bu akɔtaa ha lɛ. Paulo ngma ke: “Nyɛ be nyɛ dɛhe; Mawu níhi ji nyɛ. Mawu hé nyɛ kɛ jua wawɛ.” Kristo muɔ ɔ ji nɔ́ nɛ Mawu kɛ he wɔ. (1 Kor. 6:19, 20) Akɛnɛ Yehowa níhi ji wɔ heje ɔ, e sa nɛ waa ye e kita amɛ a nɔ, nɛ e kita amɛ a nɔ yemi hu yi. (Rom. 14:8; 1 Yoh. 5:3) Wa ba plɛɔ Kristo tsɔli hulɔ. Kaa bɔnɛ e ji ngɛ tsɔli nɛ a hi si blema a a blɔ fa mi ɔ, wɔ hu a ha wɔ he yemi fuu, se huzu ngɛ he yemi nɛ a ha wɔ ɔ he. E sa nɛ waa kɛ blɔ tsɔɔmi nɛ tsu wa blɔ nya nítsumihi a he ní. A kɛ sɔmɔmi he blɔhi fuu wo wa dɛ ngɛ asafo ɔ mi jio, a kɛ sɔmɔmi he blɔhi wui wa dɛ jio, Mawu kɛ Kristo a sɔmɔli ji wɔ.

9. Kɛ Yesu tsɔɔ bɔnɛ nyɔmtsɛ kɛ e nyɔguɛ hiɔ si ha a mi kɛɛ?

⁹ Yesu ye bua wɔ konɛ waa na bɔnɛ nyɔmtsɛ kɛ e nyɔguɛ hiɔ si ha. Ligbi ko ɔ, e de e kaseli ɔmɛ sane ko nɛ kɔɔ nyɔguɛ ko nɛ e je nítsumi kɛ ba we mi ɔ he. Anɛ e nyɔmtsɛ ɔ de lɛ ke: ‘Ba hi si esɔesɔ nɛ o ye ní lo?’ Dɛbi. E de lɛ ke: “Yaa nɛ o ya hoo ní ha mi. Lɔɔ se ɔ, dla o he, nɛ o ba sɔmɔ mi kɛ yaa si ma ye ní nɛ ma nu nɔ́ ko.” Kɛ Yesu tsɔɔ nɔ́ hetomi nɔ́ nɛ ɔ sisi ha kɛɛ? E tsɔɔ nya ke: “Ke nyɛ pee níhi tsuo nɛ a fã nyɛ ke nyɛɛ pee ɔ,  nyɛ de ke, ‘Wɔɔ lɛɛ sɔmɔli nɛ he be se nami kɛkɛ ji wɔ. Nítsumi nɛ sa kaa wa tsu ɔ, lɔɔ pɛ wa tsu nɛ ɔ nɛ.’”—Luka 17:7-10.

10. Mɛni tsɔɔ kaa Yehowa bua jɔɔ mɔde nɛ wa bɔɔ kɛ jaa lɛ ɔ he?

¹⁰ Ngɛ anɔkuale mi ɔ, Yehowa bua jɔɔ mɔde nɛ wa bɔɔ kɛ sɔmɔɔ lɛ ɔ he. Baiblo ɔ ma nɔ mi ha wɔ ke: “Mawu yi tue gbogboe sane. Ní nɛ nyɛ tsu, kɛ suɔmi nɛ nyɛ je kpo ha lɛ ɔ, e hɛ be nɔ jee gblegbleegble.” (Heb. 6:10) Yehowa de we wɔ ke waa pee nɔ́ ko nɛ wa be nyɛe maa pee. Jehanɛ se hu ɔ, níhi nɛ maa hi ha wɔ ji níhi nɛ e deɔ wɔ ke waa pee, nɛ jamɛ a ní ɔmɛ a peemi yi tsɔ. Loloolo ɔ, ngɛ nɔ́ hetomi nɔ́ nɛ Yesu kɛ tsu ní ɔ nya a, nyɔguɛ pee we lɛ nitsɛ e tsui nya ní loo níhi nɛ lɛ nitsɛ e ma ná he se kekle. Oti ɔ ji kaa ke wa jɔɔ wa he nɔ kɛ ha Mawu ɔ, lɔɔ tsɔɔ kaa wa suɔ nɛ waa pee níhi nɛ e suɔ kekle, se pi níhi nɛ wɔɔ wa suɔ. Anɛ o kplɛɛ we nɔ jã lo?

11, 12. Akɛnɛ wa ji tsɔli heje ɔ, mɛni su nɛ e sa nɛ wa je kpo, nɛ mɛni e sa nɛ waa yu wa he ngɛ he?

¹¹ Sisi tomi mlaa enyɔne ɔ ji: Akɛnɛ wɔ tsuo wa ji tsɔli heje ɔ, wa yeɔ mlaa kake nɔ. Ngɛ anɔkuale mi ɔ, a kɛ blɔ nya nítsumi komɛ wo nihi bɔɔ komɛ a dɛ ngɛ Kristofoli asafo ɔ mi. Se blɔ nya nítsumihi fuu ngɛ nɛ wɔ tsuo wa tsuɔ he ní. Kaa nɔ hyɛmi nɔ́ ɔ, akɛnɛ wa ji Kristo kaseli kɛ Yehowa we Odasefoli heje ɔ, e he hia nɛ waa suɔ wa sibi. Yesu tsɔɔ kaa suɔmi ji nɔ́ nɛ kadiɔ anɔkuale Kristofoli. (Yoh. 13:35) Se pi wa nyɛmimɛ Kristofoli pɛ nɛ wa suɔ. Wa bɔɔ mɔde kaa wa ma je suɔmi kpo kɛ ha nihi nɛ pi Odasefoli ji mɛ ɔ hulɔ. Enɛ ɔ ji nɔ́ ko nɛ wɔ tsuo wa ma nyɛ maa pee, nɛ e sa kaa waa pee jã hulɔ.

¹² E sa nɛ waa ba wa je mi saminya hulɔ. Wa suɔ nɛ waa yu wa he ngɛ je mi bami kɛ ní peepeehi nɛ Mawu Munyu ɔ kplɛɛ we a nɔ ɔ he. Paulo ngma ke: “Yaholi, loo amaga jali, loo gba puɛli, loo nyumu kɛ yihi sɔuu nɛ a kɛ a sibi peeɔ yakayaka ní, loo juli, loo hɛ tsuli, loo dã tɔli, loo nihi a biɛ puɛli, loo ojo fiali a nine be Mawu matsɛ yemi ɔ nɔ sue kɔkɔɔkɔ.” (1 Kor. 6:9, 10) Niinɛ, e biɔ mɔde bɔmi loko waa kɛ Mawu dami mlaa amɛ ma nyɛ ma tsu ní. Se kɛ̃ ɔ, se nami ngɛ he kaa wa maa pee jã. Se nami ɔmɛ ekomɛ ji, e ma ha nɛ wa ma ná nɔmlɔtso mi he wami kpakpa, waa kɛ nihi a kpɛti maa pee kpakpa, nɛ wa ma ná si dami kpakpa ngɛ Mawu hɛ mi.—Kane Yesaya 48:17, 18.

13, 14. Mɛni blɔ nya nítsumi nɛ a kɛ wo Kristofoli tsuo a dɛ, nɛ kɛ e sa nɛ waa bu nítsumi nɛ ɔ ha kɛɛ?

¹³ Mo kai hu kaa tsɔlɔ ngɛ nítsumi nɛ e tsuɔ. Jã nɔuu nɛ e ji ngɛ wɔ hu wa blɔ fa mi. A ha wɔ nike ní nɛ he jua wa nɛ lɔɔ ji anɔkuale ɔ he nile. Mawu ngɛ blɔ hyɛe kaa waa tsɔɔ nihi anɔkuale nɛ ɔ. (Mat. 28:19, 20) Paulo ngma ke: ‘Nyɛɛ bu wɔ kaa Kristo tsɔli nɛ Mawu ngɔ laami sɛ gbi ɔ ngɔ ha wɔ ke waa fiɛɛ.’ (1 Kor. 4:1) Paulo yɔse kaa tsɔmi nɛ ɔ nɛ a tsɔ wɔ ɔ biɔ nɛ waa hyɛ “laami sɛ gbi ɔ” nɔ saminya, konɛ waa kɛ anɔkuale yemi nɛ tsɔɔ nihi anɔkuale ɔ kaa bɔnɛ Nyɔmtsɛ Yesu Kristo fã wɔ ke waa pee ɔ.—1 Kor. 9:16.

¹⁴ Ke wa tsɔɔ nihi anɔkuale ɔ, lɔɔ tsɔɔ kaa wa suɔ mɛ. Ngɛ anɔkuale mi ɔ, e slo Kristofono tsuaa Kristofono si himi. Pi wɔ tsuo nɛ wa ma nyɛ ma tsu babauu ngɛ fiɛɛmi nítsumi ɔ mi. Yehowa le jã. Nɔ́ nɛ he hia ji, nɛ wa ti nɔ tsuaa nɔ ma tsu fiɛɛmi nítsumi ɔ kɛ e tsui tsuo. Ke wa peeɔ jã a, lɔɔ tsɔɔ kaa wa suɔ Mawu kɛ wa nyɛmi nɔmlɔ wawɛɛ.

15-17. (a) Mɛni heje nɛ e he hia nɛ tsɔlɔ nɛ ye anɔkuale ɔ? (b) Mɛni Yesu tsɔɔ kaa e maa ba wa nɔ ke wa yi anɔkuale?

¹⁵ Sisi tomi mlaa etɛne ɔ ngɛ kaa sisi tomi mlaahi enyɔ nɛ wa susu a he kɛ sɛ hlami ɔ, nɛ lɔɔ ji: E sa nɛ waa ye anɔkuale. Tsɔlɔ ko ma nyɛ maa pee nɔ nɛ ngɛ nyɛmi kɛ su kpakpahi fuu, se ke e bui e nyɔmtsɛ ɔ aloo e yi anɔkuale ɔ, se nami ko be nyɛmi kɛ su kpakpahi nɛ e ngɛ ɔ a he hie. Loko nɔ ko ma nyɛ maa pee tsɔlɔ nɛ ye manye ɔ, e he hia nɛ e ye anɔkuale. Mo kai kaa Paulo ngma ke: “Nɔ́ nɛ a ngɛ hlae ngɛ tsɔli kaa kikɛ nɛ ɔ a dɛ ji kaa a ye anɔkuale ha a nyɔmtsɛ.”—1 Kor. 4:2.

¹⁶ Ke wa yeɔ anɔkuale ɔ, bɔ tsuaa bɔ nɛ ji ɔ, a maa jɔɔ wɔ. Ke wa yi anɔkuale ɔ, wa be Mawu hɛ mi sae. Wa naa enɛ ɔ ngɛ nɔ́ hetomi nɔ́ nɛ Yesu kɛ tsu ní nɛ kɔɔ sika a he ɔ mi. A ha tsɔli ɔmɛ nɛ a kɛ a nyɔmtsɛ ɔ sika a “ya tsu ní” ɔ ayekoo, nɛ a jɔɔ mɛ. Tsɔlɔ ɔ nɛ e hyɛ we nɔ́ nɛ e nyɔmtsɛ ɔ to kɛ wo e dɛ ɔ nɔ saminya a lɛɛ, e nyɔmtsɛ ɔ kojo lɛ nɛ e tsɛ lɛ ke, “tsɔlɔ yaya kɛ alitsɛ,” nɛ e “he be se nami.” A kpɔ sika a ngɛ e dɛ, nɛ a fiee lɛ.—Kane Mateo 25:14-18, 23, 26, 28-30.

¹⁷ Be ko hu ɔ, Yesu tsɔɔ nɔ́ nɛ ke nɔ ko yi anɔkuale ɔ nɛ a maa pee lɛ. E de ke: “Nyumu niatsɛ ko hi si, nɛ e ngɛ tsɔlɔ nɔkɔtɔma nɛ hyɛɛ e níhi a nɔ ha lɛ. Be ko ɔ, a ba po tsɔlɔ nɛ ɔ nya ngɔ ha niatsɛ ɔ ke e ngɛ e ní ɔmɛ a hɛ mi kpatae. Lɔɔ he ɔ, niatsɛ ɔ tsɛ e tsɔlɔ ɔ, nɛ e de lɛ ke, ‘Nɔ́ nɛ a ngɛ dee ngɛ o he ɔ, e ngɛ mi niinɛ lo? I be hae nɛ o hyɛ ye ní ɔmɛ a nɔ hu; nítsumi nɛ i ngɔ kɛ wo o dɛ ɔ, ba bu he akɔtaa.’” (Luka 16:1, 2) Akɛnɛ tsɔlɔ ɔ kpata e nyɔmtsɛ ɔ ní ɔmɛ a hɛ mi heje ɔ, e nyɔmtsɛ ɔ fiee lɛ. Ní kasemi agbo ngɛ munyu nɛ ɔ mi kɛ ha wɔ nitsɛnitsɛ! E ngɛ heii kaa wa suɔ nɛ waa kɛ  anɔkuale yemi nɛ tsu nɔ́ nɛ a kɛ wo wa dɛ ɔ he ní.

18. Mɛni heje nɛ e sɛ nɛ waa ngɔ wa he kɛ to nihi a he ɔ?

¹⁸ Wa ti nɔ tsuaa nɔ ma nyɛ ma bi e he ke, ‘Kɛ i buu tsɔlɔ nɛ i ji ɔ ha kɛɛ?’ Ke waa kɛ wa he toɔ nihi a he ɔ, lɔɔ ma nyɛ maa ye wɔ awi. Baiblo ɔ wo wɔ ga ke: “Nɔ tsuaa nɔ nɛ hyɛ lɛ nitsɛ e ní peepee. Ke e hi ɔ, e ma nyɛ maa fĩa ngɔ fɔ nɔ, nɛ e be hiae kaa e maa ngɔ e he ngɔ to nɔ kpa he.” (Gal. 6:4) E sɛ nɛ waa ngɔ wa he kɛ to nihi a he, mohu ɔ, e sa nɛ waa kɛ wa juɛmi nɛ ma nɔ́ nɛ wɔ nitsɛmɛ wa nyɛɔ peeɔ ɔ nɔ. Enɛ ɔ be hae nɛ wa wo wa he nɔ, nɛ e be hae nɛ wa kɔni mi hu nɛ jɔ. Ke wa ngɛ nɔ́ nɛ wa nyɛɔ tsuɔ ɔ he susue ɔ, e sa nɛ wa yɔse kaa si himi nyɛɔ tsakeɔ. Eko ɔ, nɔmlɔtso mi he wami kpakpa nɛ wa be, aloo bwɔmi, aloo blɔ nya nítsumi slɔɔtohi a heje ɔ, wa be nyɛe ma tsu babauu ngɛ fiɛɛmi nítsumi ɔ mi kaa bɔnɛ wa peeɔ sa a. Se eko ɔ, wa ma nyɛ ma tsu babauu pe bɔnɛ wa ngɛ tsue amlɔ nɛ ɔ. Ke jã a, lɛɛ mɛni heje nɛ wa bɔɛ mɔde nɛ waa pee jã mɔ?

19. Ke wa nine sui sɔmɔmi he blɔ ko nɔ ɔ, mɛni heje nɛ e sɛ nɛ wa kɔni mi nɛ jɔ?

¹⁹ Nɔ́ kpa ko hu nɛ e sa kaa wa susu he ji blɔ nya nítsumihi nɛ a kɛ wo wa dɛ aloo blɔ nya nítsumihi nɛ wa suɔ kaa a kɛ wo wa dɛ. Kaa nɔ hyɛmi nɔ́ ɔ, eko ɔ, nyɛminyumu ko maa suɔ kaa e sɔmɔ kaa asafo mi nɔkɔtɔma aloo a ha nɛ e tu munyu ngɛ kpe wawi kɛ kpe nguahi a sisi. E maa hi kaa wa ma tsu ní wawɛɛ konɛ wa he nɛ su kɛ ha he blɔ nɛ ɔmɛ, se ke wa nine sui blɔ nya nítsumi nɛ ɔmɛ a nɔ be nɛ wa ngɛ blɔ hyɛe ɔ, e sɛ nɛ wa kɔni mi nɛ wo nyu. E se ma nyɛ maa kɛ loko wa nine maa su sɔmɔmi he blɔ komɛ a nɔ ngɛ yi mi tomihi nɛ eko ɔ, wa be sisi nue piɔ ɔ a heje. Mo kai kaa eko ɔ, Mose susu kaa e dla e he nɛ́ e ma nyɛ maa nyɛɛ Israelbi ɔmɛ a hɛ mi kɛ je Egipt, se e sa nɛ e mlɛ jeha 40 loko e pee jã. Enɛ ɔ ha nɛ e ná be babauu kɛ kase suhi nɛ maa ye bua lɛ nɛ e nyɛ nɛ e nyɛɛ nimli nɛ a tue mi ti, nɛ a tsɔɔ atua a a hɛ mi.—Níts. 7:22-25, 30-34.

20. Mɛni wa ma nyɛ maa kase ngɛ Yonatan he?

²⁰ Be komɛ ngɛ nɛ wa nine be sɔmɔmi he blɔ ko nɔ sue kulaa. Jã ji bɔnɛ e ba ngɛ Yonatan blɔ fa mi. Saul binyumu ji lɛ, enɛ ɔ he ɔ, e ngɛ he blɔ nɛ e yeɔ Israel ma a tsuo nɔ matsɛ. Se Mawu hla David, nɔ ko nɛ Yonatan wa pe lɛ kulaa mohu konɛ e pee Israel ma a nɔ matsɛ. Kɛ Yonatan pee e ní ha kɛɛ? E kplɛɛ nɔ nɛ e fi David se, nɛ e kɛ e wami wo oslaa mi kɛ ye bua David. E de David ke: “Mo lɛ o ma ba ye matsɛ ngɛ Israel, nɛ ma pee o se yelɔ.” (1 Sam. 23:17) Mɛni o kadi? Yonatan kplɛɛ si himi mi nɛ e ya je ɔ nɔ, nɛ e ji David hunga kaa bɔnɛ e tsɛ Saul pee ɔ. E sɛ nɛ wa hɛ nɛ kɔ he blɔhi nɛ a kɛ ha nihi ɔ nɔ, mohu ɔ, wɔ tsuo waa kɛ wa juɛmi ma nyɛ maa ma blɔ nya nítsumihi nɛ a kɛ wo wa dɛ piɔ ɔ a tsumi nɔ. Wa ma nyɛ ma ná nɔ mi mami kaa ngɛ je ehe ɔ mi ɔ, Yehowa ma ha nɛ e sɔmɔli tsuo a nine maa su níhi nɛ sa nɛ a ngɛ hlae ɔ a nɔ.

21. Kɛ e sa kaa waa bu tsɔli nɛ wa ji ɔ ha kɛɛ?

²¹ Nyɛ ha nɛ e hi wa juɛmi mi kaa, wɔ nɛ wa ji tsɔli nɛ wa yeɔ anɔkuale ɔ, waa kɛ si himi yayahi kɛ yi mi wamihi nɛ nyɔguɛhi kɛ kpeɔ ɔ eko kpi. Mohu ɔ, wa nyɔmtsɛ ɔ wo wa hɛ mi nyami nɛ e kɛ nítsumi nɛ a be tsue ekohu nɛ ji, sane kpakpa a nɛ a maa fiɛɛ ngɛ nyagbe ligbi nɛ ɔmɛ a mi ɔ wo wa dɛ. Wɔ nitsɛmɛ wa nyɛɔ tsɔɔ bɔnɛ wa ma plɛ kɛ tsu blɔ nya nítsumi nɛ ɔ he ní ha. Lɛɛ nyɛ ha nɛ waa pee wa he tsɔli nɛ yeɔ anɔkuale. Nyɛ ha nɛ wa bua nɛ jɔ he blɔ nɛ wa ná nɛ waa kɛ ngɛ Nɔmlɔ ngua pe kulaa ngɛ je mluku ɔ mi ɔ sɔmɔe ɔ he.