1-3. (a) Ke nɔ ko pia e he ɔ, mɛni lɔɔ tsɔɔ, nɛ kɛ níhi nɛ wa pee kɛ be ɔ saa wa he ha kɛɛ? (b) Mɛni wa ma nyɛ maa kase kɛ je Paulo nɔ hyɛmi nɔ́ ɔ mi?

ASILƐ ngmalɔ ko ngma ke: “Ngɛ munyuhi tsuo nɛ a tuɔ loo a ngmaa a kpɛti ɔ, nɔ́ nɛ ngɛ aywilɛho pe kulaa ji: ‘I le jinɛ!’” Asilɛ ngmalɔ nɛ ɔ biɛ ji J. G. Whittier, nɛ nɔ́ nɛ he munyu nɛ e ngɛ tue ɔ ji níhi nɛ nihi peeɔ nɛ pee se ɔ, a piaa a he, nɛ a ná jinɛ a ko pee we jamɛ a ní ɔmɛ. Ke nɔ ko “pia e he” ɔ, nɔ́ nɛ e tsɔɔ ji kaa nɔ ɔ ye aywilɛho, aloo e hao, aloo e dɔ lɛ kaa e pee nɔ́ ko aloo e dɔ lɛ kaa e nyɛ we nɛ e pee nɔ́ ko. Wɔ tsuo wa pee ní komɛ kɛ be nɛ wa ná jinɛ wa ko pee we jamɛ a ní ɔmɛ. Anɛ o pia o he ngɛ ní komɛ nɛ o pee kɛ be ɔ a he lo?

² Ni komɛ pee ní komɛ ngɛ a si himi mi nɛ hí kulaa, aloo a pee yayamihi po nɛ hɛdɔ ngɛ a he. Ni komɛ hu ngɛ nɛ a pee we nɔ́ yaya ko mohu lɛɛ, se a yi mi kojoɔ mɛ ngɛ juɛmi ko nɛ a pee ngɛ a si himi mi ɔ he. Ni komɛ nyɛ nɛ a je a juɛmi kɛ je níhi nɛ a pee kɛ be ɔ a nɔ. Ni komɛ hu yi mi kojoɔ mɛ kpamisaa ngɛ níhi nɛ a pee kɛ be ɔ a he, nɛ daa nɛ ɔ, a deɔ ke, “I le jinɛ” i pee we jã. (La 51:3) Kɛ mohu o nuɔ he ha kɛɛ? Kɛ je mwɔnɛ ɔ kɛ ya a, anɛ o ná nɛ jinɛ o ko sɔmɔ Mawu nɛ o ko pia we o he ngɛ nɔ́ ko nɔ́ ko he lo? Anɛ nɔ ko pee enɛ ɔ he nɔ hyɛmi nɔ́ ko ngɛ Baiblo ɔ mi lo? Ee, lɛ ji bɔfo Paulo.

³ Paulo pee yayami nguahi kɛ níhi nɛ da tsuo ngɛ e si himi mi. E pia e he ngɛ níhi nɛ e pee nɛ dɛ ɔ a he, se e kɛ e juɛmi ma ní kpakpahi nɛ e maa pee ngɛ Mawu sɔmɔmi mi ɔ nɔ. Nyɛ ha nɛ waa hyɛ nɔ́ nɛ wa ma nyɛ maa kase ngɛ e nɔ hyɛmi nɔ́ ɔ mi.

4. Mɛni ji ní komɛ nɛ Paulo pee kɛ be nɛ e pia e he?

⁴ Benɛ Paulo wɛ nɛ e ji Farisi no ɔ, e pee níhi nɛ pee se ɔ, e pia e he. Kaa nɔ hyɛmi nɔ́ ɔ, e wa Kristo kaseli ɔmɛ yi mi wawɛɛ. Baiblo ɔ tsɔɔ kaa amlɔ nɔuu nɛ a gbe Stefano se ɔ, “Saulo [nɛ pee se ɔ, a le lɛ kaa Paulo  ɔ] . . . ka kaa e ma kpata asafo ɔ hɛ mi. E yaa wehi a mi, nɛ e ya nuɔ nyumuhi kɛ yihi, nɛ e ya wo ɔ mɛ tsu.” (Níts. 8:3) Ní lelɔ kpanaa nɛ a tsɛɛ lɛ ke Albert Barnes ɔ tsɔɔ kaa Hela munyu nɛ a tsɔɔ sisi kaa “kpata” a ji “munyu nɛ mi wa, nɛ e tsɔɔ kã kɛ abofu nɛ [Saulo] kɛ wa Kristo se nyɛɛli ɔmɛ yi mi.” Enɛ ɔ he ɔ, Barnes tsɔɔ nya kaa, “Saulo wa asafo ɔ yi mi wawɛɛ kaa bɔnɛ lohwe awi yelɔ peeɔ e ní ɔ.” Akɛnɛ Saulo ji Yuda no heje ɔ, e he ye kaa Mawu ha lɛ he blɔ kaa e gu Kristo jami. Enɛ ɔ he ɔ, e wa Kristofoli ɔmɛ yi mi wawɛɛ. “E woɔ a he gbeye wawɛɛ kaa e ma pue a muɔ si . . . Nyumuhi jio, yihi jio,” e bɔ mɔde kaa e ma kpata a hɛ mi.—Níts. 9:1, 2; 22:4. *

5. Moo tsɔɔ nɔ́ heje nɛ Saulo kpa Yesu kaseli ɔmɛ yi mi wami nɛ e bɔni Kristo he munyu fiɛɛmi ɔ.

⁵ Saulo to e yi mi kaa e maa ya Damasko nɛ e ya nuu Yesu se nyɛɛli ɔmɛ ngɛ a wehi a mi, nɛ e kɛ mɛ nɛ ho Yerusalem ya nɛ a ya gbla a tue ngɛ Yudabi ɔmɛ a kojomi he ngua a nɛ a tsɛɛ ke Sanhedrin ɔ. Se e nyɛ we nɛ e ye manye, ejakaa Yesu nɛ ji Kristofoli asafo ɔ Yi ɔ tsi e nya. (Efe. 5:23) Benɛ Saulo ngɛ blɔ nɔ kɛ yaa Damasko ɔ, Yesu je e he si kɛ tsɔɔ lɛ, kɛkɛ nɛ la ko kpɛ kɛ je hiɔwe ba bɔle Saulo nɛ e hɛngmɛ yu. Lɔɔ se ɔ, Yesu ha nɛ Saulo ho Damasko ya konɛ Saulo nɛ ya mlɛ kɛ yaa si benɛ a kɛ blɔ tsɔɔmi ma ha lɛ. Wa le níhi nɛ ya nɔ ngɛ enɛ ɔ se ɔ.—Níts. 9:3-22.

6, 7. Mɛni tsɔɔ kaa Paulo le kaa e pee tɔmihi nɛ hɛdɔ ngɛ a he?

⁶ Benɛ Paulo ba pee Kristofono ɔ, amlɔ nɔuu ɔ, e tsake bɔnɛ e peeɔ e níhi ha a. E kpa Kristo kaseli ɔmɛ yi mi wami, nɛ e bɔni Yesu he sane fiɛɛmi kɛ kã. Pee se ɔ, e ngma kɛ kɔ lɛ nitsɛ e he ke: “Nyɛ nu bɔnɛ i ba ye je mi sa a ngɛ Yuda bi a jami ɔ nya. Nyɛ nu bɔnɛ i wa Mawu asafo ɔ yi mi wawɛɛ, nɛ i bɔ mɔde kaa ma kpata asafo ɔ hɛ mi pɛsɛpɛsɛ.” (Gal. 1:13) Jehanɛ se hu ɔ, benɛ e ngɛ womi ngmae kɛ ya ha Korintobi ɔmɛ, Filipibi ɔmɛ, kɛ Timoteo ɔ, e wo níhi nɛ e pee nɛ e pia e he ɔ a ta ekohu. (Kane 1 Korintobi 15:9; Filip. 3:6; 1 Tim. 1:13) Paulo bua jɔɛ kaa e pee jamɛ a ní ɔmɛ, nɛ e laa we nɔ kaa e pee jã hulɔ. E le kaa e pee tɔmihi nɛ hɛdɔ ngɛ a he wawɛɛ.—Níts. 26:9-11.

⁷ Baiblo he ní lelɔ ko nɛ a tsɛɛ lɛ ke Frederic W. Farrar tsɔɔ kaa Saulo “wa nihi yi mi wawɛɛ nitsɛnitsɛ.” Farrar de hu kaa “ke wa susu bɔnɛ Paulo wa Kristofoli ɔmɛ yi mi ha a he ɔ, wa ma nyɛ maa nu bɔnɛ e dɔ lɛ ha, kɛ bɔnɛ nihi maa tu munyu kɛ si lɛ ha a sisi saminya.” Eko ɔ, ke Paulo ya slaa asafo ɔmɛ ɔ, nyɛmimɛ ɔmɛ ya náa lɛ nɛ a biɔ lɛ ke: ‘Ãa mo ji Paulo ɔ, mo nɛ o wa wɔ yi mi ɔ!’—Níts. 9:21.

8. Kɛ Paulo pee e ní ngɛ mɔbɔ nɛ Yehowa kɛ Yesu na lɛ ɔ he ha kɛɛ, nɛ mɛni wa ma nyɛ maa kase kɛ je mi?

⁸ Se Paulo le kaa Mawu dloomi nya nɛ e nyɛ tsu e sɔmɔmi nítsumi ɔ nɛ. E kɛ munyu nɛ ji “Mawu dloomi” ɔ tsu ní maa pee si 90 sɔuu ngɛ Baiblo ɔ mi womihi 14 nɛ e ngma a mi pe Baiblo ngmali kpa amɛ tsuo. (Kane 1 Korintobi 15:10.) Paulo bua jɔ mɔbɔ nɛ a na lɛ ɔ he wawɛɛ, nɛ e sume kaa dloomi nɛ Mawu dloo lɛ ɔ nɛ pee yaka. Enɛ ɔ he ɔ, e “tsu ní wawɛɛ” ngɛ bɔfo ɔmɛ tsuo a kpɛti. Paulo nɔ hyɛmi nɔ́ ɔ tsɔɔ heii kaa ke wa pee yayami nguanguahi po nɛ wa jaje wa yayami ɔ kɛ tsɔɔ Mawu, nɛ wa kpa jamɛ a yayami ɔmɛ peemi ɔ, Yehowa maa je e tsui mi nɛ e maa da Yesu kpɔmi afɔle sami ɔ nɔ kɛ ngɔ wa yayami ɔ kɛ pa wɔ. Nihi tsuo nɛ e he wa ha mɛ kaa a ma he ye kaa a ma nyɛ  ma ná Kristo afɔle sami ɔ he se ɔ ma nyɛ maa kase nɔ́ ko kɛ je Paulo sane ɔ mi! (Kane 1 Timoteo 1:15, 16.) E ngɛ mi kaa Paulo wa Kristo yi mi wawɛɛ mohu lɛɛ, se e nyɛ nɛ e ngma ke: ‘Mawu Bi ɔ suɔ mi, nɛ e ngɔ e wami ngɔ ha ngɛ ye he.’ (Gal. 2:20; Níts. 9:5) Niinɛ, Paulo le bɔnɛ a sɔmɔɔ Mawu ha nɛ a pia we he. Mo hu nɛɛ?

9, 10. (a) Mɛni heje nɛ Yehowa webi komɛ piaa a he? (b) Mɛni heje nɛ e sɛ nɛ waa ya nɔ nɛ waa hao ngɛ níhi nɛ wa pee kɛ be ɔ a he?

⁹ Anɛ o pee ní komɛ hyɛ nɛ amlɔ nɛ ɔ, o ngɛ o he piae lo? Anɛ o kɛ o he wami kɛ o be ya di ní komɛ nɛ a he hia we a se lo? Anɛ o pee nɔ́ ko nɛ ye nihi awi lo? Aloo eko ɔ, o piaa o he ngɛ nɔ́ kpa ko nɛ o pee ɔ heje. Mɛni o ma nyɛ maa pee ngɛ he?

¹⁰ Nihi fuu haoɔ! Ke nɔ ko haoɔ kpamisaa a, e yeɔ lɛ nitsɛ e he awi, nɛ e mi mi fuɔ e he. E haa nɛ nɔ peeɔ yeyeeye wawɛɛ. Ke o ngɛ haoe ɔ, anɛ lɔɔ ma nyɛ ma ha nɛ o tsu haomi ɔ he ní lo? Dɛbi! Ngɔɔ lɛ kaa o hii si ngɛ akpasa mi nɛ o suɔ kaa o gbla akpasa a kɛ ya hɛ mi. O kɛ o he wami tsuo gbla akpasa a ngmlɛfiahi abɔ, se he nɛ o ngɛ ɔ, lejɛ ɔ nɔuu nɛ o ngɛ! E sɛ nɛ o hao, mohu ɔ, e sa nɛ o bɔ mɔde wawɛɛ nɛ o tsu haomi ɔ he ní. O ma nyɛ ma kpa nɔ nɛ o tɔ̃ e nɔ ɔ pɛɛ, konɛ o ha nɛ tue mi jɔmi nɛ ba o kɛ lɛ nyɛ kpɛti. Koo pee nɔ́ nɛ o pee ɔ hu. Se be komɛ hu ngɛ nɛ e ma bi nɛ o to o tsui si ngɛ jamɛ a si himi ɔ mi. Ke o haoɔ ngɛ níhi nɛ be ɔ a he ɔ, lɔɔ ma jɔ̃ o kɔni mi nɛ o be nyɛe ma sɔmɔ Yehowa saminya. Ke o haoɔ ngɛ nɔ́ ko he ɔ, nɔ́ kpakpa ko ji mi kɛ bɛ!

11. (a) Mɛni wa ma nyɛ maa pee loko Yehowa maa na wɔ mɔbɔ? (b) Mɛni Mawu tsɔɔ kaa ke wa pee ɔ, lɔɔ be hae nɛ wa yi mi nɛ kojo wɔ?

¹¹ E peeɔ ni komɛ kaa tɔmi nɛ a tɔ̃ be ko nɛ be ɔ kle tsɔ pe bɔnɛ Mawu maa na mɛ mɔbɔ. Eko ɔ, e maa pee mɛ kaa a tɔmi ɔ kle tsɔ aloo a tɔ̃ɔ kpamkpam tsɔ.  Se anɔkuale sane ji kaa a tɔmi ɔ kle jio, e klee we jio, a ma nyɛ ma pia a he, nɛ́ a tsake a je mi bami, nɛ́ a kpa Mawu pɛɛ nɛ e ngɔ a tɔmi ɔ kɛ pa mɛ. (Níts. 3:19) Yehowa ma nyɛ maa na mɛ hu mɔbɔ kaa bɔnɛ e na ni kpahi mɔbɔ ɔ. Yehowa maa je mi mi jɔmi mi nɛ e kɛ nɔ ko nɛ e baa e he si, nɛ e yeɔ anɔkuale, nɛ e jeɔ e tsui mi nɛ e piaa e he ngɛ yayamihi nɛ e pee ɔ he ɔ he yayamihi nɛ pa lɛ. Mawu na Hiob mɔbɔ, enɛ ɔ he ɔ, Hiob de ke: “I kɛ tabo zu kɛ la zu to okadi kaa i pia ye he niinɛ.” (Hiob 42:6) Mawu de wɔ nɔ́ ko nɛ ke wa pee ɔ, wa yi mi be wɔ kojoe, nɛ e sa nɛ wɔ tsuo waa pee jã. E de ke: “Nɔ nɛ laa e yayamihi a nɔ ɔ, e yɛ nɔ. Se nɔ nɛ jajeɔ e he yayami, nɛ e kpaa yayami peemi ɔ, a maa na lɛ mɔbɔ.” (Abɛ 28:13; Yak. 5:14-16) Enɛ ɔ he ɔ, wa ma nyɛ maa jaje wa tɔmi ɔ kɛ ha Mawu, konɛ waa sɔle nɛ Mawu kɛ wa yayamihi nɛ pa wɔ, nɛ́ wa dla nɔ́ nɛ wa puɛ ɔ. (2 Kor. 7:10, 11) Ke wa peeɔ ní nɛ ɔmɛ ɔ, lɛɛ Yehowa nɛ “e kɛ tɔmi paa” a maa na wɔ mɔbɔ.—Yes. 55:7.

12. (a) Kɛ wa ma plɛ kɛ kase David kɛɛ ke wa yi mi ngɛ wɔ kojoe ngɛ yayami ko nɛ wa pee kɛ be ɔ he? (b) Mɛni blɔ nɔ nɛ Yehowa pia e he ngɛ, nɛ mɛni ma nyɛ maa ye bua wɔ ngɛ lɔɔ nɛ wa le ɔ mi? (Hyɛ daka a.)

¹² Ke wa sɔleɔ nɛ wa biɔ konɛ Mawu nɛ ye bua wɔ ɔ, e maa ye bua wɔ. David tsɔɔ ngɛ La womi ɔ mi kaa e ngɛ hemi kɛ yemi kaa Yehowa ha e sɔlemi heto. (Kane La 32:1-5.) Kaa bɔnɛ David de ɔ, benɛ e jaje we e tɔmi ɔ, e he nile fiaa lɛ kpa wawɛɛ! E pee yeyeeye, nɛ e hao wawɛɛ. Mɛni ha nɛ a kɛ David yayami ɔ pa lɛ nɛ e he jɔ lɛ ɔ? E jaje e tɔmi kɛ ha Mawu. Yehowa ha David sɔlemi ɔ heto, nɛ e wo lɛ he wami konɛ e ya nɔ nɛ e pee nɔ́ nɛ da. Jã nɔuu kɛ̃ nɛ ke o jeɔ o tsui mi nɛ o sɔleɔ ɔ, o ma nyɛ ma ná nɔ mi mami kaa Yehowa maa bu o sɔlemi ɔ tue. Ke o yi mi kojoɔ mo ngɛ yayami ko nɛ o pee kɛ be ɔ he ɔ, moo bɔ mɔde nɛ o je o juɛmi ngɛ nɔ, nɛ́ o ná hɛ kɛ nɔ fɔmi kaa Yehowa kɛ o yayami ɔ pa mo!—La 86:5.

13, 14. (a) Amlɔ nɛ ɔ, mɛni nɔ e sa kaa waa kɛ wa juɛmi nɛ ma titli? (b) Mɛni sane bimihi nɛ waa kɛ ma nyɛ maa hyɛ wa si himi mi?

¹³ E ngɛ mi kaa wa ma nyɛ maa kase ní kɛ je níhi nɛ wa pee kɛ be ɔ mi mohu lɛɛ, se e sɛ nɛ waa ya nɔ nɛ waa hao ngɛ lɔɔ he. Enɛ ɔ he ɔ, e sɛ nɛ waa hao wa he ngɛ níhi nɛ be ɔ a he, mohu ɔ, e sa nɛ wa susu níhi nɛ ngɛ nɔ yae amlɔ nɛ ɔ a he. Mɛni wa ngɛ pee aloo wa nyɛ we nɛ waa pee amlɔ nɛ ɔ nɛ hwɔɔ se ɔ, wa ma pia wa he ngɛ he? Anɛ waa kɛ anɔkuale yemi ngɛ Mawu suɔmi nya ní pee mwɔnɛ ɔ konɛ hwɔɔ se ɔ, wa ko pia wa he lo?

¹⁴ E be kɛe kulaa nɛ amanehlu ngua a ma fɛ, enɛ ɔ he ɔ, wa sume kaa wa yi mi nɛ kojo wɔ nɛ wa de ke: ‘Anɛ jinɛ  i ko nyɛ tsu babauu ngɛ Mawu sɔmɔmi mi lo? Mɛni heje nɛ benɛ e ná he blɔ nɛ i ko sɔmɔ kaa blɔ gbalɔ ɔ, i pee we jã a? Mɛni ha nɛ i nyɛ we nɛ ma sɔmɔ kaa asafo mi sɔmɔlɔ ɔ? Anɛ i bɔɔ mɔde kaa ma wo nɔmlɔ su ehe ɔ lo? Anɛ Yehowa maa suɔ kaa ma piɛɛ nihi nɛ a maa hi e je ehe ɔ mi ɔ he lo?’ E sɛ nɛ waa hi sane bimi nɛ ɔmɛ a he susue nɛ waa hi tsui yee, mohu ɔ, e sa nɛ waa da sane bimi ɔmɛ a nɔ kɛ hyɛ wa si himi mi konɛ waa kɛ wa tsui tsuo nɛ sɔmɔ Yehowa. Se ke wa yaa nɔ nɛ wa susuɔ sane bimi nɛ ɔmɛ a he kɛ yeɔ wa tsui ɔ, lɔɔ ma ha nɛ wa yi mi maa hi wɔ kojoe kpamisa.—2 Tim. 2:15.

15, 16. (a) Mɛni ji ní komɛ nɛ nihi kɛ sã afɔle konɛ a nyɛ nɛ a ngɔ Mawu sɔmɔmi kɛ sɛ hlami ngɛ a si himi mi? (b) Mɛni heje nɛ e sɛ nɛ wa pia wa he kaa waa kɛ Matsɛ Yemi ɔ sɛ hlami ngɛ wa si himi mi ɔ?

¹⁵ Nɛ nyɛ nihi nɛ nyɛɛ kɛ níhi sã afɔle nɛ nyɛɛ kɛ nyɛ be tsuo ngɛ Yehowa sɔmɔe ɔ hu nɛɛ? Eko ɔ, nyɛ ngmɛɛ helo nya nítsumi ko nɛ haa nɛ nyɛ náa sika fuu ɔ he, nɛ nyɛ pee nyɛ si himi hlɛhlɛɛhlɛ nɛ nyɛ ná be fuu kɛ ngɛ Matsɛ Yemi ɔ he níhi a se die. Aloo eko ɔ, nyɛ sɛ we gba si himi mi, aloo ke nyɛ sɛ gba si himi mi po ɔ, nyɛ fɔ we konɛ nyɛ nyɛ nɛ nyɛɛ kɛ nyɛ he nɛ wo be tsuo sɔmɔmi nítsumi ɔ mi. Be tsuo sɔmɔmi nítsumi ɔ ekomɛ ji, sɔmɔmi ngɛ Betel, Matsɛ Yemi Asahi kɛ kpe peemi asahi a mami, kpokpa nɔ hyɛmi, kɛ ma se sane kpakpa fiɛɛmi nítsumi. Amlɔ nɛ ɔ nɛ o ngɛ wae ɔ, anɛ o piaa o he kaa o kɛ o he wo be tsuo sɔmɔmi nítsumi nɛ ɔ ekomɛ a mi lo? Anɛ e sa nɛ e pee mo kaa se nami ko be o he nɛ o kɛ sã afɔle ngɛ blɔ nɛ ɔ nɔ ɔ he lo? E sɛ nɛ o pia o he kɔkɔɔkɔ!

¹⁶ Akɛnɛ o ngɛ suɔmi nɛ mi kuɔ kɛ ha Yehowa nɛ o suɔ hu kaa o ye bua nihi heje nɛ o kɛ o be tsuo ngɛ Yehowa sɔmɔe ɔ nɛ. Ko susu kaa ke o tsu we be tsuo sɔmɔmi nítsumi ɔ, jinɛ o si himi ko pee kpakpa pe bɔnɛ e ngɛ amlɔ nɛ ɔ. O tsui ma nyɛ maa nɔ o mi akɛnɛ o le kaa o ngɛ nɔ́ nɛ da pee ɔ heje. O bua ma nyɛ maa jɔ kaa o tsu babauu ngɛ Yehowa sɔmɔmi mi. Yehowa hɛ be wa he nɛ waa kɛ sã afɔle ɔ nɔ jee. Ke o nine su wami nɛ ngɛ kɛ yaa neneene ɔ nɔ ɔ, Yehowa maa jɔɔ mo kɛ ní kpakpahi pe bɔnɛ o maa hyɛ blɔ!—La 145:16; 1 Tim. 6:19.

17, 18. (a) Mɛni ye bua Paulo nɛ ha nɛ e nyɛ nɛ e sɔmɔ Mawu nɛ e pia we e he? (b) Mɛni o mwɔ o yi mi kpɔ kaa o maa pee ngɛ sɔmɔmi nɛ o kɛ ha Yehowa be ko nɛ be ɔ, kɛ sɔmɔmi nɛ o kɛ ngɛ lɛ hae amlɔ nɛ ɔ, kɛ nɔ́ nɛ o kɛ ma ha lɛ hwɔɔ se ɔ he?

¹⁷ Mɛni Paulo kase nɛ lɔɔ ye bua lɛ nɛ e nyɛ nɛ e sɔmɔ Mawu nɛ́ e pia we e he? Kaa bɔnɛ J. B. Phillips Baiblo ɔ tsɔɔ, Paulo ngma ke: “I ngmɛɛ níhi nɛ be ɔ a he nɛ i kpa ye nine mi konɛ ma pɛtɛ níhi nɛ ngɛ ye hɛ mi ɔ a he.” (Kane Filipibi 3:13, 14.) Paulo susuu we níhi nɛ dɛ nɛ e di se ngɛ Yuda jami mi ɔ a he hu. Mohu ɔ, e bɔ mɔde wawɛɛ nɛ e pee níhi nɛ ma ha nɛ e nine maa su neneene wami nɛ ngɛ e hɛ mi ɔ nɔ.

¹⁸ Wɔ tsuo wa ma nyɛ maa kase nɔ́ ko kɛ je Paulo munyu ɔ mi. E sɛ nɛ waa hi níhi nɛ a be nɛ wa be nyɛe maa pee nɔ́ ko ngɛ a he ɔ he susue, mohu ɔ, e sa nɛ waa di níhi nɛ ngɛ wa hɛ mi ɔ a se. E ngɛ mi kaa wa hɛ be nyɛe maa je níhi nɛ wa pee kɛ be ɔ nɔ mohu ɔ lɛɛ, se e sɛ nɛ wa ha nɛ jamɛ a ní ɔmɛ nɛ a wo wa kɔni mi nyu. Wa ma nyɛ maa bɔ mɔde nɛ́ wa je wa juɛmi kɛ je níhi nɛ be ɔ nɔ nɛ́ waa kɛ wa juɛmi nɛ ma ní kpakpahi nɛ wa ma ná hwɔɔ se ɔ a nɔ!