A fɔ mi ngɛ Santo Domingo, ngɛ Dominican Republic. A fɔ wɔ nihi eywiɛ, nɛ imi ji nyagbe nɔ. Ye fɔli ya sukuu wawɛɛ nɛ a suɔ nɛ a tsɔse wɔ saminya ngɛ nimli kpakpahi a kpɛti. Jeha eywiɛ loko a ma fɔ mi ɔ, ye fɔli kɛ Mormon jami ɔ mi ma se sane kpakpa fiɛɛli komɛ kpe. Bɔnɛ nihewi ɔmɛ dla a he saminya ha a muɔ ye fɔli ɔmɛ a hɛ wawɛɛ. E kɛ we kɛkɛ nɛ ye fɔli mwɔ a yi mi kpɔ kaa wa weku ɔ tsuo kɛ a he maa wo Mormon jami nɛ a tsɛɛ ke Church of Jesus Christ of Latter-day Saints ɔ mi.

Benɛ i ngɛ wae ɔ, ye bua jɔ níhi nɛ a peeɔ ngɛ Mormon jami ɔ mi ɔ he wawɛɛ, nɛ ye bua jɔ bɔnɛ wa weku ɔ hiɔ si ha kɛ bɔnɛ wa baa wa je mi ha a hu he. E pee we mi zo kaa i ngɛ Mormon jami ɔ mi, nɛ i kɛ ma ye hɛ mi kaa ma pee Mormon jami ɔ mi ma se sane kpakpa fiɛɛlɔ.

Benɛ i ye jeha 18 ɔ, wa weku ɔ hia kɛ ya hi United States konɛ ma nyɛ nɛ ma ya yunivɛsiti kpakpa. Maa pee jeha kake se ɔ, ye nyɛwayo ko kɛ e huno nɛ a ji Yehowa Odasefoli ɔ ba slaa wɔ ngɛ Florida. A fɔ wɔ nine nɛ waa kɛ mɛ ya Baiblo kasemi kpe ko nɛ a pee ɔ sisi. Nɔ́ nɛ muɔ ye hɛ ji kaa i na kaa nihi tsuo nɛ hii si ngɛ ye kasa nya a bliɔ a Baiblo ɔ nɛ a kaneɔ ngmamihi nɛ a tsɛɛ ɔ, nɛ a ngmaa munyu otihi kɛ fɔɔ si. Enɛ ɔ he ɔ, i bi nɛ a ha mi ningma tso kɛ womi konɛ imi hu ma pee jã.

Benɛ a gbe kpe ɔ nya a, ye nyɛwayo ɔ kɛ e huno ɔ de mi ke akɛnɛ i suɔ nɛ ma pee ma se sane kpakpa fiɛɛlɔ heje ɔ, a maa suɔ nɛ a ye bua mi konɛ ma kase Baiblo ɔ. I susu kaa nɔ́ nɛ a de ɔ da, ejakaa jamɛ a be ɔ mi ɔ, i le Mormon Jami ɔ Mi Womi ɔ mi níhi fuu pe Baiblo ɔ.

Benɛ ye nyɛwayo ɔ kɛ e huno ɔ kɛ mi ngɛ Baiblo ɔ kasee ngɛ tɛlifoo nɔ ɔ, a wo mi he wami konɛ ma ngɔ níhi nɛ i heɔ yeɔ kɛ to níhi nɛ i  ngɛ kasee ngɛ Baiblo ɔ mi ɔ he. A suɔ nɛ imi nitsɛ ma le nɔ́ tutuutu nɛ Baiblo ɔ tsɔɔ.

I kplɛɛ Mormon tsɔɔmihi fuu a nɔ mohu lɛɛ, se i be nɔ mi mami kaa Ngmami ɔ fi jamɛ a tsɔɔmi ɔmɛ a se. Ye nyɛwayo ɔ mane mi November 8, 1995 Awake! womi tɛtlɛɛ ɔ nɛ Yehowa Odasefoli pee ɔ eko, nɛ e mi munyu ɔ ekomɛ kɔɔ Mormonbi a hemi kɛ yemi ɔ he. E pee mi nyakpɛ kaa Mormon tsɔɔmihi babauu ngɛ nɛ i li. Lɔɔ wo mi he wami konɛ ma ya hla níhi a mi ngɛ Mormonbi a Internet nítsumi he ɔ konɛ ma hyɛ kaa níhi nɛ Awake! ɔ de ɔ ngɛ mi niinɛ lo. Níhi hu nɛ i ya na ngɛ Mormonbi a blema nito he nɛ ngɛ Utah a ha nɛ i ná nɔ mi mami wawɛɛ ngɛ nɔ́ nɛ Awake! de ɔ mi.

Jinɛ i heɔ yeɔ kaa Mormon jami ɔ mi womi ɔ kɛ Baiblo ɔ kɔ. Se benɛ i bɔni Baiblo ɔ kanemi saminya a, i ba yɔse kaa slɔɔto ngɛ Mormon tsɔɔmihi kɛ níhi nɛ Baiblo ɔ tsɔɔ ɔ a kpɛti. Kaa nɔ hyɛmi nɔ́ ɔ, Baiblo de ngɛ Ezekiel 18:4 ɔ ke, susuma gboɔ. Se Mormon Jami ɔ Mi Womi ɔ de ngɛ Alma 42:9 ɔ ke: “Susuma be nyɛe ma gbo kɔkɔɔkɔ.”

Jehanɛ se hu ɔ, ngɛ Mormonbi a tsɔɔmihi nɛ kɛ Baiblo ɔ kɔ we ɔ se ɔ, nɔ́ kpa hu nɛ gbaa ye nya ji kaa a tsɔɔ nihi konɛ a ná ma he suɔmi. Kaa nɔ hyɛmi nɔ́ ɔ, a tsɔɔ Mormon jami ɔ mi bi kaa Eden abɔɔ ɔ ngɛ Jackson County, Missouri, ngɛ United States, Amerika. Mormon jami nya dali ɔmɛ deɔ ke, “ke Mawu Matsɛ Yemi ɔ bɔni nɔ yemi ɔ, a ma wo United States aflangaa a nɔ gojoo, nɛ Mawu Matsɛ Yemi ɔ maa gu United States nɔ yemi ɔ nɔ kɛ ye adesahi tsuo nɛ a ngɛ zugba a nɔ ɔ a nɔ.”

I susu he kaa mɛni maa ba ma nɛ i je mi ɔ kɛ ma kpahi lɛɛ a nɔ mɔ? Ligbi ko gbɔkuɛ benɛ niheyo ko nɛ a tsɔse lɛ konɛ e ba pee Mormon jami ɔ mi ma se sane kpakpa fiɛɛlɔ ɔ fia mi ngɛ tɛlifoo nɔ ɔ, i wo munyu nɛ ɔ nɔ ta kɛ tsɔɔ lɛ. I bi lɛ kaa ke ta ko te si ngɛ ma nɛ e je mi kɛ ma kpa ko a kpɛti ɔ, anɛ e maa suɔ nɛ e kɛ Mormonbi nɛ a ngɛ jamɛ a ma a nɔ ɔ nɛ hwu ta lo. E pee mi nyakpɛ kaa e ha heto ke ee! I hla Mormon Jami ɔ mi tsɔɔmi ɔmɛ a mi saminya, nɛ jehanɛ se hu ɔ, i bi Mormon jami nya dali ɔmɛ sanehi. A de mi ke sanehi nɛ i ngɛ bie ɔ a heto ɔmɛ ji laami mi sanehi, nɛ ke la a ngɛ kpɛe wawɛɛ ɔ, ma ba nu sisi.

Nɔ́ nɛ a de mi ɔ ha nɛ ye kɔni mi jɔ. I bɔni nɔ́ heje nɛ i suɔ kaa ma pee Mormon jami ɔ mi ma se sane kpakpa fiɛɛlɔ ɔ he susumi. I yɔse kaa yi mi tomi heje nɛ i ngɛ hlae nɛ ma pee Mormon jami ɔ mi ma se sane kpakpa fiɛɛlɔ ɔ ji, nɛ́ ma ye bua nihi. Nɔ́ kpa hu heje nɛ i ngɛ hlae nɛ ma pee Mormon jami ɔ mi ma se sane kpakpa fiɛɛlɔ ɔ ji, konɛ nihi nɛ a ná bumi kɛ ha mi. Se i li Mawu he nɔ́ ko tsɔ. E ngɛ mi kaa, be nɛ be ɔ, i kane Baiblo ɔ si abɔ mohu, se ye bua jɔɛ Baiblo ɔ he kpakpa ko. I li Mawu yi mi tomi kɛ ha zugba a aloo kɛ ha adesahi.

Kɛ gu Baiblo ɔ nɛ Yehowa Odasefoli kɛ mi kase ɔ nɔ ɔ, i ba le níhi babauu. Ní nɛ ɔmɛ ekomɛ ji, Mawu biɛ, si fɔfɔɛ mi nɛ ni gbogboehi ngɛ, kɛ níhi nɛ Yesu tsuɔ konɛ Mawu yi mi tomihi nɛ ba mi. Nyagbe ɔ, i ba le womi kpakpa nɛ ɔ mi munyuhi fuu, nɛ i ná bua jɔmi kaa i kɛ ni kpahi susuɔ anɔkuale ɔmɛ a he. I le kaa Mawu ngɛ, se amlɔ nɛ ɔ, i kɛ lɛ ma nyɛ maa tu munyu kaa ye Huɛ nitsɛnitsɛ. A baptisi mi kaa Yehowa Odasefoli ɔmɛ a kpɛti nɔ kake ngɛ July 12, 2004, nɛ nyɔhiɔ ekpa se ɔ, i ba pee be tsuo sɔmɔlɔ.

Jeha enuɔ ji nɛ ɔ nɛ i ngɛ ní tsue ngɛ Yehowa Odasefoli asafo ɔ nítsumi he yi ɔ ngɛ Brooklyn, New York. Ye bua jɔ wawɛɛ kaa i ngɛ ye buae konɛ a pee Baiblo kɛ Baiblo kasemi womihi kɛ ha nimli ayɔhi abɔ ngɛ je kɛ wɛ. Ye bua hu jɔ kaa i yaa nɔ nɛ i yeɔ bua nihi konɛ a kase Mawu he ní.