1, 2. Mɛni heje nɛ eko ɔ, ni komɛ suɔ ngmɔkɔ ɔ?

A TSƐƐ tso yiblii ko ke ngmɔkɔ. Blema a, Israelbi ɔmɛ yeɔ tso yiblii nɛ ɔ? (Nah. 3:12; Luka 13:6-9) Ngmɔkɔ haa nɔ he wami; ni komɛ po deɔ ke e hi ha tsui ɔ.

² Be ko ɔ, Yehowa kɛ ngmɔkɔ to tsui ɔ he. Nɔ́ nɛ e de kɛ gu gbalɔ Yeremia nɔ ɔ kɔɔ o tsui kɛ o suɔli hu a tsui he. Pi he wami nɛ a náa ngɛ ngmɔkɔ mi ɔ he munyu nɛ Yehowa ngɛ tue. E ngɛ okadi peemi mi tsui ɔ he munyu tue. Ke wa ngɛ nɔ́ nɛ e de ɔ he sɛsɛe ɔ, wa ma susu nɔ́ nɛ wɔ nɛ wa ji Kristofoli ɔ wa ma nyɛ maa kase ngɛ mi ɔ he.

3. Ngmɔkɔhi nɛ a tu a he munyu ngɛ Yeremia yi 24 ɔ daa si ha mɛni?

³ Kekleekle ɔ, nyɛ ha nɛ wa susu nɔ́ ko nɛ Mawu de ngɛ ngmɔkɔ he ngɛ Yeremia be ɔ mi ɔ he nɛ waa hyɛ. Ngɛ jeha 617 L.M.B. ɔ, Yudabi ɔmɛ pee níhi nɛ Yehowa sume. Mawu kɛ ngmɔkɔ slɔɔtohi enyɔ, nɛ ji “ngmɔkɔ kpakpahi” kɛ “ngmɔkɔ yayahi” tsu ní ngɛ nina ko mi kɛ tsɔɔ nɔ́ nɛ maa ba hwɔɔ se. (Kane Yeremia 24:1-3.) Ngmɔkɔ yaya amɛ daa si ha Matsɛ Zedekia kɛ nihi nɛ a ngɛ kaa lɛ nɛ Matsɛ Nebukadnezar kɛ e ta buli ɔmɛ wa mɛ yi mi ɔ. Se Ezekiel, Daniel kɛ e huɛmɛ etɛ ɔmɛ nɛ a ngɛ Babilon momo ɔ, kɛ Yudabi komɛ nɛ a nuu mɛ nyɔguɛ kɛ ho Babilon ya pee se ɔ hu nɛɛ? A ngɛ kaa ngmɔkɔ kpakpahi. A kpɛti nihi nɛ a piɛ ɔ kpale a se kɛ ya fia Yerusalem gbogbo ɔ kɛ sɔlemi we ɔ ekohu pee se.—Yer. 24:8-10; 25:11, 12; 29:10.

4. Mɛni heje nɔ́ nɛ Mawu de kɛ kɔ ngmɔkɔ kpakpahi a he ɔ ma nyɛ maa wo wɔ he wami ɔ?

⁴ Yehowa tu nihi nɛ ngmɔkɔ kpakpa amɛ daa si kɛ ha a a he munyu ke: ‘Ma ha nɛ a maa nu he ngɛ  a tsui mi tɔɔ kaa imi ji Yehowa. A maa pee ye ma.’ (Yer. 24:7) A kɛ munyu nɛ ɔ nɛ wa ngɛ kasee ɔ da ngmami nɛ ɔ nɔ, nɛ e woɔ wɔ he wami wawɛɛ nitsɛ! Mawu suɔ nɛ waa ‘nu he ngɛ wa tsui mi kaa lɛ ji Yehowa.’ “Tsui” ɔ nɛ a kɛ tsu ní ngɛ hiɛ ɔ kɔɔ bɔnɛ wa peeɔ wa níhi ha a he. E ngɛ heii kaa o maa suɔ nɛ o kɛ o ní peepee nɛ tsɔɔ kaa o le Yehowa, konɛ o ba piɛɛ e webi a he. Níhi nɛ ma ha nɛ o ma nyɛ maa pee jã a ekomɛ ji, e Munyu ɔ nɛ o maa kase nɛ o kɛ ma tsu ní, o tsui nɛ o ma tsake nɛ o ma kpa ní yayamihi peemi, kɛ o he nɔ nɛ o maa jɔɔ kɛ ha Mawu, nɛ o ma ha nɛ a baptisi mo kɛ wo Tsɛ ɔ, Bi ɔ, kɛ mumi klɔuklɔu ɔ biɛ mi. (Mat. 28:19, 20; Níts. 3:19) Eko ɔ, o ngɛ ní nɛ ɔmɛ pee momo, aloo eko ɔ, o kɛ Yehowa Odasefoli ngɛ bɔe konɛ o bɔni jã peemi.

5. Mɛnɔmɛ a he munyu titli nɛ Yeremia ngma?

⁵ Ke wa ngɛ níhi nɛ a tu he munyu nɛ ɔmɛ ekomɛ pee jio, wa pee kulaa momo jio, e sa nɛ waa hyɛ wa ní peepee kɛ wa je mi bami saminya. Mɛni heje? Wa maa na nɔ́ heje nɛ e sa kaa waa pee jã a ngɛ nɔ́ kpa ko hu nɛ Yeremia ngma kɛ kɔ tsui ɔ he ɔ mi. Yeremia womi ɔ mi munyu ɔ ekomɛ kɔɔ mahi nɛ bɔle Yuda a he. Se e womi ɔ mi munyuhi fuu kɔɔ Yuda ma a he ngɛ Yuda matsɛmɛ enuɔ komɛ a nɔ yemi be ɔmɛ a mi. (Yer. 1:15, 16) Niinɛ, Yeremia munyu ɔ kɔɔ nyumuhi, yihi, kɛ jokuɛwi nɛ a jɔɔ a he nɔ kɛ ha Yehowa a a he titli. A nɛmɛ ɔmɛ je a tsui mi nɛ a jɔɔ a he nɔ kɛ ha Yehowa. (2 Mose 19:3-8) Ngɛ Yeremia be ɔ mi ɔ, ni ɔmɛ ma nɔ mi kaa a jɔɔ a he nɔ kɛ ha Mawu. A de ke: ‘Wa ba Yehowa ngɔ, ejakaa lɛ ji wa Mawu.’ (Yer. 3:22) Se kɛ o susu kaa a tsui ngɛ ha kɛɛ?

6. Mɛni heje e sa kaa wa bua nɛ jɔ nɔ́ nɛ Mawu de kɛ kɔ tsui ɔ he ɔ he ɔ?

⁶ Dɔkitahi ma nyɛ maa ngɔ klamahi kɛ hyɛ wa mi nɛ a hyɛ kaa wa tsui ɔ ngɛ he wami lo. Se Yehowa ma nyɛ maa na níhi kɛ ya tsitsaa pe jã. E ma nyɛ maa na bɔnɛ wa we okadi peemi mi tsui ɔ ngɛ ha, nɛ ji bɔnɛ wa ngɛ ha tutuutu ɔ. E de ke: ‘Mɛnɔ maa le nɔmlɔ adesa tsui mi? E nɔ nɔ sisilɔ ko be ɔ, e hiɔ hu be tsaba? Imi Yehowa, i hlaa nimli a tsui mi. I woɔ nɔ tsuaa nɔ hiɔ ngɛ e ní peepee, kɛ e je mi bami he.’ (Yer. 17:9, 10) Mawu ma nyɛ maa na nɔ́ nɛ wa suɔ, níhi nɛ wa susuɔ, bɔnɛ wa nuɔ níhi a he ha, wa su, kɛ níhi nɛ wa suɔ nɛ waa pee ngɛ wa si himi mi. Mawu maa hyɛ o tsui ɔ mi. Se mo nitsɛ hu o ma nyɛ maa bɔ mɔde konɛ o hyɛ níhi nɛ ngɛ o tsui ɔ mi.

7. Kɛ Yeremia kale Yudabi fuu nɛ a hi si ngɛ e be ɔ mi ɔ a tsui ha kɛɛ?

⁷ Bɔnɛ pee nɛ wa nyɛ nɛ waa hyɛ wa tsui mi ɔ, wa ma nyɛ ma bi wa he ke, ‘Ngɛ Yeremia be ɔ mi ɔ, kɛ Yudabi ɔmɛ a we okadi peemi mi tsui ɔ ngɛ ha kɛɛ?’ Yeremia de ke e ngɛ mi kaa a po Yudabi ɔmɛ mohu lɛɛ, se ‘a yi somi nɛ pomi okadi nɛ ɔ daa si ha a nɔ.’ (Yer. 9:25, 26) Ee, a yi Yehowa anɔkuale?

8, 9. Mɛni e sa kaa Yudabi fuu nɛ a pee ngɛ a tsui he?

⁸ Mawu wo Yudabi ɔmɛ he wami kaa “a jɔɔ yayami peemi nɛ a dla a blɔ ɔmɛ, nɛ a pee nɔ́ nɛ da.” (Yer. 18:11) A ní peepeehi hí, ejakaa a tsui hu hí. (Kane Marko 7:20-23.) Niinɛ, kɛ gu Yeremia nɔ ɔ, Mawu na nɔ́ nɛ ha nɛ Yudabi ɔmɛ pee ní yayahi ɔ. A ji atua tsɔli nɛ kplii a tsui. A susumihi kɛ a ní peepeehi sɛ Yehowa hɛ mi. (Kane Yeremia 5:23, 24; 7:24-26.) Mawu de mɛ  ke: “Nyɛɛ po nyɛ he ha Yehowa, nɛ nyɛ je mɔmlɔtɔ nɛ ngɛ nyɛ tsui he ɔ kɛ je.”—Yer. 4:4, NW.

⁹ Yudabi nɛ ngɛ Yeremia be ɔ mi ɔ, pee we tue bumi ha Mawu. Israelbi nɛ a hi si ngɛ Mose be ɔ mi ɔ hu pee jã nɔuu. (5 Mose 10:16; 30:6) E sa nɛ Yudabi ɔmɛ nɛ a yu a he ngɛ susumihi aloo níhi nɛ a suɔ, aloo ní kpahi nɛ ma ha nɛ a kua Yehowa mlaa amɛ ɔ a he.—Níts. 7:51.

10. Mɛni David pee nɛ e sa kaa waa kase?

¹⁰ E sa nɛ wa bua nɛ jɔ kaa Mawu ha nɛ wa le nɔ́ nɛ ji okadi peemi mi tsui ɔ! Se ni komɛ ma bi ke, ‘Anɛ e he hia nɛ Yehowa Odasefoli nɛ a ngɛ mwɔnɛ ɔ nɛ a susu a tsui he lo?’ Nihi nɛ a ngɛ asafo ɔ mi a kpɛti nihi babauu ngɛ Yehowa sɔmɔe ngɛ anɔkuale mi, nɛ a baa a je mi saminya hulɔ. Pi “ngmɔkɔ yayahi” ji mɛ. Se kɛ̃ ɔ, mo susu nɔ́ nɛ David de Yehowa a he nɛ o hyɛ. E de ke: ‘Mawu, hyɛ ye tsui mi nɛ o le mi. Kaa mi nɛ o hyɛ, nɛ o na níhi nɛ ngɛ ye juɛmi mi. Hyɛ kaa yayami ko pa ngɛ ye mi lo.’—La 17:3; 139:23, 24.

11, 12. (a) Mɛni heje e sa kaa wa ti nɔ tsuaa nɔ nɛ hyɛ e tsui mi ɔ? (b) Mɛni nɛ Mawu be pee?

¹¹ Yehowa suɔ nɛ wa ti nɔ tsuaa nɔ nɛ e le lɛ nɛ́ e pee e suɔmi nya ní. Yeremia de kɛ kɔ dali a he ke: ‘Mo Yehowa tabohiatsɛ! Moo lɛɛ o hyɛɛ nimli a tsui mi kɛ a juɛmi mi.’ (Yer. 20:12) Ke Ope ɔ hyɛɛ dalɔ po tsui mi ɔ, anɛ e sɛ kaa wɔ nitsɛmɛ waa kɛ anɔkuale yemi nɛ hyɛ bɔnɛ wa tsui ɔ ngɛ ha lo? (Kane La 11:5.) Ke wa pee jã a, eko ɔ, wa maa na kaa e sa nɛ waa pee tsakemi ngɛ su ko nɛ wa ngɛ, otihi nɛ waa kɛ maa wa hɛ mi, aloo bɔnɛ wa nuɔ he ha a mi. Eko ɔ, wa ma yɔse kaa ní komɛ ngɛ wa tsui mi nɛ ha we nɛ waa pee tue bumi mla kɛ ha Yehowa. E ma bi nɛ wa je jamɛ a ní ɔmɛ ke je wa tsui ɔ mi kaa bɔnɛ dɔkita gbaa tsui nɛ e jeɔ hiɔ ngɛ mi ɔ. Ke o kplɛɛ nɔ kaa e sa nɛ o hyɛ o we okadi peemi mi tsui ɔ mi ɔ, mɛni e sa kaa o hla ngɛ mi? Nɛ mɛni blɔ nɔ o maa gu kɛ pee tsakemihi?—Yer. 4:4, NW.

¹² Yehowa be wa nɔ nyɛe nɛ waa pee tsakemi. E tu ‘ngmɔkɔ kpakpa’ amɛ a he munyu kaa e ma ha nɛ a ‘nu he ngɛ a tsui mi tɔɔ’ kaa a le lɛ. E de we ke e maa nyɛ a nɔ nɛ a pee jã. E sa nɛ mɛ nitsɛmɛ nɛ a nu he ngɛ a tsui mi tɔɔ kaa a le Mawu. Jã nɛ e sa kaa wɔ hu waa pee?

13, 14. Mɛni blɔ nɔ nɛ nɔ́ nɛ ngɛ nɔ ko tsui mi ɔ ma nyɛ maa pee oslaa kɛ ha lɛ?

¹³ Yesu de ke: “Tsui mi nɛ susumi yayami nɛ ɔmɛ jeɔ: nɔmlɔ gbemi, gba puɛmi, ajuama bɔmi, jumi, lakpa odase yemi, kɛ nɔ biɛ puɛmi.” (Mat. 15:19) Kaa nɔ hyɛmi nɔ́ ɔ, ke nɔ ko ná akɔnɔ yaya ngɛ e tsui mi ɔ, e ma nyɛ ma puɛ gba aloo e maa bɔ ajuama. Ke jamɛatsɛ ɔ tsakee we e tsui ɔ, e be Mawu hɛ mi sae gblegbleegble. Ke e pee we  yayami nɛ hɛdɔ ngɛ he po ɔ, eko ɔ, akɔnɔ yaya nɛ ngɛ e tsui mi ɔ mi maa wa. (Kane Mateo 5:27, 28.) Enɛ ɔ heje nɛ e he hia nɛ waa hyɛ wa tsui mi ɔ nɛ. Ke nyumu ji mo nɛ o hyɛ o tsui mi ɔ, anɛ o na kaa o ná yo ko he akɔnɔ yaya lo? Ke yo hu ji mo ɔ, anɛ o na kaa o ná nyumu ko he akɔnɔ yaya lo? Anɛ e he hia nɛ o tsake nɔ́ nɛ ngɛ o tsui mi ɔ lo?

¹⁴ Jã nɔuu nɛ eko ɔ, Kristofono ko mi mi ma fu e nyɛmi Kristofono ko nɛ lɔɔ ma ha nɛ e maa nyɛ lɛ ngɛ e tsui mi. (3 Mose 19:17) E he hia nɛ e bɔ mɔde wawɛɛ nɛ e je abofu ɔ kɛ je e tsui mi.—Mat. 5:21, 22.

15, 16. (a) Mɛni nɛ ke Kristofono ko pee ɔ, e maa tsɔɔ kaa e hɛɛ tsui yaya? (b) Mɛni heje nɛ o susu kaa ke nɔ ko ngɛ tsui yaya a, e be Yehowa hɛ mi sae ɔ?

¹⁵ Bua jɔmi sane ji kaa Kristofoli fuu ha we nɛ akɔnɔ yaya nɛ he si ngɛ a tsui mi. Se Yesu wo ‘susumi yayahi’ hu a ta. Susumi nɛ ɔmɛ ji suhi aloo ní peepeehi nɛ ma nyɛ ma puɛ nɔ ko. Kaa nɔ hyɛmi nɔ́ ɔ, wa ma susu kaa anɔkuale nɛ wa maa ye wa weku mi bimɛ ɔ he hia pe nɔ́ tsuaa nɔ́. Ngɛ ‘nyagbe ligbi nɛ ɔmɛ’ a mi ɔ, nihi fuu peeɔ a ní kaa “nɔ́ nɛ pi adesahi kulaa ji mɛ.” E sɛ nɛ Kristofoli nɛ a pee a ní jã, mohu ɔ, e sa nɛ a suɔ a weku mi bimɛ. (2 Tim. 3:1, 3) Se ke wa hyɛ we nɛ hi ɔ, wa maa pee níhi kɛ be nɔ. Nihi fuu deɔ ke “muɔ mi ti pe nyu.” Enɛ ɔ he ɔ, eko ɔ, ke nɔ ko pee a wekuno ko nɔ́ yaya ko ɔ, a mi mi fuɔ nɛ a fiɔ a wekuno ɔ se, ke a wekuno ɔ nɔ́ da jio, e nɔ́ dɛ jio. Mo susu nɔ́ nɛ Dina nyɛminyumu ɔmɛ pee ɔ he nɛ o hyɛ. A kpata nihi babauu a hɛ mi akɛnɛ nɔ ko pee a nyɛmiyo Dina nɔ́ nɛ sɛ ɔ heje. (1 Mose 34:13, 25-30) Mo susu nɔ́ nɛ ha nɛ Absalom hu gbe e tsɛbi Amnon ɔ he nɛ o hyɛ. (2 Sam. 13:1-30) Anɛ pi “susumi yayami” nɛ ha nɛ a pee jã a lo?

¹⁶ Ni komɛ a mi mi fuɔ wawɛɛ ke nɔ ko ye a wekuno ko sane nɛ dɛ. Eko ɔ, a ma ná nyɛminyumu ko aloo nyɛmiyo ko he abofu wawɛɛ ngɛ a tsui mi ke a susu kaa e ye a wekuno ko sane nɛ dɛ. Eko ɔ, a be nibwɔ peemi su kpo jee kɛ ha a nyɛmi Odasefono nɛ a susu kaa e ye a wekuno ko sane nɛ dɛ ɔ. (Heb. 13:1, 2) Se Kristofono nɛ ngɛ suɔmi kɛ ha e nyɛmimɛ ɔ be jã pee. Yehowa le nɔ́ nɛ ngɛ wa tsui mi. Ke e na susumi yayami ngɛ wa tsui mi ɔ, e maa na  kaa wa hɛɛ tsui yaya. (Yer. 9:25, 26) Yehowa wo wɔ he wami ke: “Nyɛ je mɔmlɔtɔ nɛ ngɛ nyɛ tsui he ɔ kɛ je.”—Yer. 4:4, NW.

17. Ke wa yeɔ Yehowa gbeye ɔ, mɛni heje nɛ e be yee ha wɔ kaa wa maa je wa tsui mi nɛ waa pee tsakemihi ɔ?

¹⁷ Ke o hyɛ o we okadi peemi mi tsui ɔ mi ɔ, anɛ o naa kaa o kɛ Yehowa ga womihi nyɛ we nítsumi mla lo? Eko ɔ, ngɛ blɔ ko nɔ ɔ, o ngɛ tsui yaya. Eko ɔ, o yeɔ nɔmlɔ hɛ mi gbeye, aloo o suɔ nɛ o he biɛ nɛ o ná sika fuu ngɛ je ɔ mi, aloo eko ɔ, o kplii o tsui, aloo o suɔ nɛ o pee o tsui nya ní. Ni komɛ hu nu he jã hyɛ. (Yer. 7:24; 11:8) Yeremia ngma kɛ kɔ Yudabi nɛ yi anɔkuale nɛ a hi si ngɛ e be ɔ mi ɔ a he kaa ‘a tsui kplii, nɛ a ji atua tsɔli.’ E de hu ke: ‘Nyɛ susuu we hyɛ kaa e sa kaa nyɛɛ wo imi Yehowa, nyɛ Mawu ɔ hɛ mi nyami: imi nɛ i haa gbo kɛ gbiɛ nyu nɛɛ haa nyɛ ngɛ be nɛ sa mi.’ (Yer. 5:23, 24) Ke wa yeɔ Yehowa gbeye ɔ, wa ma je ní yayahi kɛ je wa tsui mi. E be yee kaa wa maa je wa tsui mi nɛ waa pee tsakemi nɛ ɔmɛ, konɛ waa pee nɔ́ tsuaa nɔ́ nɛ Yehowa deɔ wɔ ɔ.

18. Mɛni si Yehowa wo nihi nɛ e kɛ mɛ so somi ehe ɔ?

¹⁸ Ke wa bɔ mɔde nɛ wa pee jã a, Yehowa ma ha nɛ waa ‘nu he ngɛ wa tsui mi tɔɔ’ kaa wa le lɛ. Ngɛ anɔkuale mi ɔ, Yehowa wo nihi nɛ a pɔ mɛ nu nɛ e kɛ mɛ so somi ehe ɔ si ke: ‘Ma ngɔ ye mlaa kɛ wo a mi, nɛ ma ngma ngɛ a tsui nɔ. Ma pee a Mawu, nɛ a maa pee ye ma. Nɔ ko pa be e nyɛmi, loo e he nɔ ko tsɔɔe ke e le Yehowa, ejakaa nɔ tsuaa nɔ maa le mi, kɛ je jokuɛyo pe kulaa nɔ kɛ yaa si nɔkɔtɔma pe kulaa nɔ. Ma ngɔ a he yayami ɔmɛ kɛ pa mɛ, nɛ a ní yayami ɔmɛ hu i be kaie hu.’—Yer. 31:31-34. *

19. Mɛni wa ma nyɛ maa hyɛ blɔ?

¹⁹ O ngɛ blɔ hyɛe kaa o ma ná somi ehe ɔ he se ngɛ hiɔwe jio, o ma ná he se ngɛ zugba a nɔ jio, e sa nɛ o le Yehowa nɛ o piɛɛ e webi a he. Ja a da Kristo kpɔmi nɔ́ ɔ nɔ nɛ a kɛ wa he yayamihi pa wɔ loko wa ma ná somi ehe ɔ he se. Akɛnɛ a ma nyɛ maa ngɔ wa he yayamihi kɛ pa wɔ heje ɔ, e sa nɛ wɔ hu waa ngɔ nihi a yayamihi kɛ pa mɛ, ke e he wa ha wɔ kaa wa maa pee jã po. E sa nɛ waa bɔ mɔde wawɛɛ nɛ wa je nihi a he abofu loo ninyɛ ngɛ wa tsui mi. Lɔɔ maa ye bua wɔ nɛ waa tsɔɔ kaa wa ngɛ Yehowa lee saminya, nɛ wa suɔ nɛ wa sɔmɔ lɛ. Wa maa pee kaa nihi nɛ Yehowa tu a he munyu ke: “Nyɛ ma hla ye se blɔ, nɛ nyɛ maa na mi. Ke nyɛ ngɔ nyɛ tsui tsuo kɛ hla ye se blɔ ɔ, nyɛ maa na mi.”—Yer. 29:13, 14.