NOA te si nɛ e kpã e mi bɔɔ, ejakaa e tsu ní nɛ pɔ tɔ e he. Moo po Noa he foni ngɛ o juɛmi mi kaa e hii si ngɛ tso ngua ko nɔ ngɛ e he jɔɔe, nɛ e ngɛ daka agbo nɛ e kɛ e weku ɔ ngɛ kpɛe ɔ hyɛe. Amã nɛ dɔ la he fu ngɛ kɔɔhiɔ ɔ mi; níhi ngɛ pɛe nɛ tsɔɔ kaa nihi kɛ nítsumi dadehi ngɛ ní tsue. E ngɛ e binyumu ɔmɛ hyɛe nɛ a kɛ hɛdɔ ngɛ tsohi kae. E kɛ e yo nɛ e suɔ lɛ wawɛɛ ɔ, kɛ e binyumu ɔmɛ, kɛ mɛ hu a yi ɔmɛ tsuo ngɛ daka nɛ ɔ he ní tsue jeha nyɔngmahi abɔ ji nɛ ɔ. A kpɛ daka a kɛ su tsitsaa mohu lɛɛ, se loloolo ɔ, níhi fuu ngɛ nɛ e sa kaa a tsu ngɛ he!

Nihi nɛ a kɛ mɛ ngɛ kpɔ ɔ mi ɔ susu kaa a li nɔ́. Benɛ Noa kɛ e weku ɔ ngɛ daka a kpɛ ɔ, ni ɔmɛ ngɛ mɛ muɔe kaa a ngɛ dee ke nyu afua ko ma ba kpata zugba a tsuo hɛ mi. Noa bɔ mɛ kɔkɔ kaa hɛ mi kpatami ko ma, se a he we yi nɛ a susu kaa juɛmi be nɔ́ nɛ e ngɛ dee ɔ mi! A nui sisi kaa nɔ ko ma pue e kɛ e weku mi bimɛ a be kɛ tsu nítsumi nɛ se nami be he. Se Noa Mawu ɔ nɛ ji Yehowa a lɛɛ, e nɛ lɛ jã.

Mawu Munyu ɔ de ke: “Noa peeɔ Mawu suɔmi nya ní.” (1 Mose 6:9) Mɛni lɔɔ tsɔɔ? Lɔɔ tsɔɔ kaa Noa buɔ Yehowa tue saminya, e peeɔ níhi nɛ sa Yehowa hɛ mi, nɛ e suɔ Yehowa wawɛɛ kaa bɔnɛ huɛmɛ suɔ a he ɔ. Jeha akpe komɛ a se ɔ, Baiblo ɔ de ngɛ Noa he ke: ‘Kɛ gu Noa hemi kɛ yemi ɔ nɔ ɔ, e bu je ɔ fɔ.’ (Hebribi 11:7) Mɛni blɔ nɔ Noa gu kɛ pee jã? Mɛni wa ma nyɛ maa kase ngɛ Noa hemi kɛ yemi ɔ he mwɔnɛ ɔ?

A lɛ Noa ngɛ je ko nɛ nihi a je mi bami puɛ wawɛɛ ɔ mi. Je ɔ puɛ ngɛ Noa nɛnɛ Enok yinɔ. Enok hu ji dalɔ nɛ e pee Mawu suɔmi nya ní. Enok gba kɛ fɔ si kaa Mawu ma ba kojo nihi nɛ a pee we Mawu suɔmi nya ní ɔ. Amlɔ nɛ ɔ ngɛ Noa be ɔ mi ɔ, nihi a je mi bami puɛ kulaa. Ngɛ anɔkuale mi ɔ, Yehowa na kaa zugba a nɔ puɛ, ejakaa basabasa peemi hyi zugba a nɔ tɔ. (1 Mose 5:22; 6:11; Yuda 14, 15) Mɛni ha nɛ níhi puɛ kulaa jã a?

Haomi ngua ko te si ngɛ Mawu bɔfo ɔmɛ a kpɛti. A ti nɔ kake tsɔ Yehowa hɛ mi atua momo, nɛ e ba pee e he Satan Abosiami. E pee enɛ ɔ kɛ gu Mawu nya nɛ e po nɛ e sisi Adam kɛ Hawa nɛ a pee yayami ɔ nɔ. Ngɛ Noa be ɔ mi ɔ, bɔfo kpahi hu tsɔ Yehowa hɛ mi atua. A je nítsumi nɛ Mawu ha mɛ ngɛ hiɔwe ɔ he kɛ ba zugba a nɔ, nɛ a tsake a he kɛ pee adesahi, nɛ a kɛ yihi nɛ a he ngɛ fɛu ɔ ba hi si. Bɔfo he nɔ woli nɛ a foɔ mɛ pɛ a nɔ́ mi ɔ ngɔ haomi kɛ ba adesahi a nɔ.—1 Mose 3:1-5; 6:1, 2; Yuda 6, 7.

Jehanɛ hu ɔ, a bɔɛ hiɔwe bɔfohi kaa a sɛ gba si himi, enɛ ɔ he ɔ, akɛnɛ bɔfo nɛ ɔmɛ tsake a he kɛ pee adesahi nɛ a kɛ yihi ba fɔ heje ɔ, bimɛ nɛ a fɔ ɔ je oblai, a yi mi wa, nɛ a ngɛ he wami hulɔ. Baiblo ɔ tsɛɔ bimɛ nɛ a fɔ ɔ ke Nephilim, nɛ e sisi ji, “nihi nɛ a tsitsɛɛɔ nɔ kɛ fɔɔ si.” Nephilim nɛ ɔmɛ nɛ a sisiɔ nɔ, nɛ a yi mi wa a ha nɛ awi yemi hyi zugba a nɔ tɔ. Enɛ ɔ he ɔ, Bɔlɔ ɔ na kaa “nimli a yi mi wa, nɛ nɔ́ yaya pɛ a  susuɔ daa nɛ ɔ.” Yehowa ha e he jeha 120 nɛ e kɛ ma kpata jamɛ a je yaya a hɛ mi.—1 Mose 6:3-5.

Moo hyɛ bɔnɛ e maa ye kaa nɔ ko ma tsɔse e bimɛ ngɛ je ko kaa jã a mi ha! Se kɛ̃ ɔ, Noa nyɛ pee jã. E ná yo kpakpa. Benɛ Noa ye jeha  500 se ɔ, e yo ɔ fɔ binyumuhi etɛ ha lɛ—Shem, Ham, kɛ Yafet. * E sa nɛ Noa kɛ e yo ɔ nɛ a pee kake kɛ bu a binyumuwi nɛ ɔmɛ a he ngɛ yiwutso ní peepeehi nɛ ngɛ nɔ yae ɔ he. Ke jokuɛwi na “nihi nɛ a je oblai” kɛ “nihi nɛ a he biɛ” ɔ, e peeɔ mɛ nyakpɛ, enɛ ɔ he ɔ, eko ɔ, Noa binyumuwi ɔmɛ a bua maa jɔ Nephilim ɔmɛ a he. Noa kɛ e yoɔ be nyɛe maa tsi a bimɛ ɔmɛ a nya konɛ a ko nu níhi nɛ nihi deɔ ngɛ oblai ɔmɛ a he ɔ. Mohu ɔ, nɔ́ nɛ a nyɛ pee ji kaa a tsɔɔ a bimɛ ɔmɛ anɔkuale nɛ kɔɔ Yehowa, nɔ nɛ sume awi yemi ɔ he. A ye bua a bimɛ ɔmɛ nɛ a na kaa e dɔ Yehowa kaa basabasa peemi kɛ atua tsɔmi ngɛ nɔ yae ngɛ je ɔ mi.—1 Mose 6:6.

Eko ɔ, Noa kɛ e yo ɔ a he mɔbɔ maa pee fɔli nɛ a ngɛ mwɔnɛ ɔ. Basabasa peemi kɛ atua tsɔmi hyi je ɔ nɛ wa ngɛ mi mwɔnɛ ɔ tɔ. Hɛja jemi níhi nɛ a pee kɛ ha jokuɛwi po ɔ hyi tɔ kɛ basabasa peemi kɛ atua tsɔmi. Fɔli nɛ a kɛ nile tsuɔ ní ɔ bɔɔ mɔde wawɛɛ nɛ a tsɔɔ a bimɛ ɔmɛ Yehowa nɛ ji tue mi jɔmi Mawu ɔ he ní konɛ ní nɛ ɔmɛ nɛ ko ná a bimɛ ɔ a nɔ he wami. A tsɔɔ a bimɛ ɔmɛ kaa be ko maa su nɛ Mawu maa po basabasa peemi se. (La 11:5; 37:10, 11) Fɔli ma nyɛ maa ye manye ngɛ enɛ ɔ peemi mi! Noa kɛ e yo ɔ ye manye. A binyumu ɔmɛ wa ba pee nimli kpakpahi, nɛ a ngɔ yihi nɛ mɛ hu a suɔ kaa a kɛ Yehowa nɛ ji anɔkuale Mawu ɔ sɔmɔmi nɛ pee nɔ́ titli ngɛ a si himi mi.

Ligbi ko ɔ, Noa si himi tsake kulaa. Yehowa kɛ Noa tu munyu nɛ e de lɛ kaa lɛ Yehowa a to e yi mi kaa e ma kpata jamɛ a je ɔ hɛ mi. Mawu fã Noa ke: ‘Ngɔɔ tso kpakpa nɛ o kɛ kpɛ daka.’—1 Mose 6:14.

Daka nɛ ɔ pi lɛ kaa bɔnɛ ni komɛ susu ɔ. Daka nɛ ɔ be kaa bɔnɛ lɛ ngɛ ɔ. E ji daka ngua. Yehowa tsɔɔ Noa daka a klemi, bɔnɛ daka a maa hi ha, kɛ bɔnɛ e kɛ amã ma kpa e mi ɔ ha. E de Noa nɔ́ heje nɛ e sa kaa e pee jã. E de lɛ ke: “Ma ha nɛ nyu kpekpemi maa ba je ɔ mi nɛ e ma kpata nɔ́ tsuaa nɔ́ nɛ wami ngɛ e mi ɔ hɛ mi. Nɔ́ tsuaa nɔ́ nɛ ngɛ je ɔ mi ɔ hɛ mi ma kpata.” Se Yehowa kɛ blɔ tsɔɔmi nɛ nyɛɛ se nɛ ɔ ha Noa: ‘O kɛ o yo, kɛ o binyumu ɔmɛ, kɛ a yi ɔmɛ nɛ ba sɛ daka a mi.’ Yehowa de Noa hu ke e ngɔ lohwe tsuaa lohwe eku kɛ eyo kɛ wo daka a mi. Nihi nɛ a maa sɛ daka a mi ɔ pɛ nɛ Nyu Afua a be a hɛ mi kpatae!—1 Mose 6:17-20.

Nítsumi nɛ a kɛ wo Noa dɛ ɔ kle. E sa nɛ daka a nɛ e maa kpɛ ɔ nɛ kle wawɛɛ. E kami ji nanewɛɛ 437, e blimi ji nanewɛɛ 73, nɛ e mi kuɔmi ji nanewɛɛ 44. Daka a kle pe mele nguanguahi nɛ a kɛ tso peeɔ mwɔnɛ ɔ po. Anɛ Noa de ke e be nyɛe ma tsu nítsumi nɛ a kɛ wo e dɛ ɔ, aloo e tu nyagbahi nɛ e kɛ maa kpe ɔ he munyu, aloo e ma e hɛ kɛ fɔ blɔ tsɔɔmi ɔ ekomɛ a nɔ konɛ pɔ nɛ ko tɔ e he lo? Baiblo ɔ ha heto ke: “Noa pee nɔ́ tsuaa nɔ́ nɛ Mawu fã lɛ ke e pee ɔ.”—1 Mose 6:22.

Noa ngɔ maa pee jeha 40 loo 50 kɛ kpɛ daka a. E ma bi nɛ a hɛ tsohi, nɛ a mwɔɔ, nɛ a gba, nɛ a dla  he, nɛ a kpe nya. E sa nɛ daka a nɛ pee hiɔwe tsu siaudo etɛ, nɛ a pee tsuhi ngɛ mi, nɛ a je sinya ngɛ kasa nya. Eko ɔ, a je saflɛhi ngɛ daka a yinɔ je, nɛ a bu daka a yi konɛ ke hiɔmi nɛ ɔ, nyu ɔ nɛ pue si.—1 Mose 6:14-16.

Benɛ jehahi ba pue mi nɛ a maa ho daka a nya gbemi ya a, Noa bua maa jɔ wawɛɛ kaa e weku mi bimɛ ɔmɛ fĩ e se! Nítsumi nɛ a kɛ wo Noa dɛ ɔ e fã ko ngɛ nɛ eko ɔ, e tsumi maa ye ha lɛ po pe daka a kpɛmi. Baiblo ɔ de wɔ ke Noa “fiɛɛ ke a pee nɔ́ nɛ da.” (2 Petro 2:5) Enɛ ɔ he ɔ, e kɛ kã bɔ nihi nɛ a peeɔ ní yayamihi nɛ a pee we Mawu suɔmi nya ní ɔ kɔkɔ kaa Mawu ma ba kpata a hɛ mi. Kɛ ni ɔmɛ pee a ní ha kɛɛ? Pee se ɔ, Yesu Kristo kai nɔ́ nɛ ya nɔ jamɛ a be ɔ mi ɔ nɛ e tsɔɔ kaa ni ɔmɛ a “hɛ be a he nɔ.” E tsɔɔ kaa ni ɔmɛ ngɔ a juɛmi kɛ ma níhi nɛ a peeɔ daa ligbi ɔ a nɔ. A ngɛ ní yee, nɛ a ngɛ ní nue, nyumuhi ngɛ yihi ngɔe, nɛ yihi hu ngɛ gbae. Enɛ ɔ he ɔ a bui Noa kɔkɔ bɔmi ɔ tue. (Mateo 24:37-39) Atsinyɛ jemi ko be he kaa nihi babauu ye Noa kɛ e weku ɔ a he fɛu; eko ɔ, ni komɛ wo e he gbeye, nɛ a te si kɛ wo lɛ wawɛɛ.

Se kɛ̃ ɔ, Noa kɛ e weku ɔ ya nɔ nɛ a fiɛɛ. E ngɛ mi kaa nihi nɛ a bɔle mɛ ɔ susu kaa nile be mi, nɛ se nami hu be he kaa a maa kpɛ daka, se a ya nɔ nɛ a kpɛ daka a. Níhi fuu ngɛ nɛ Kristofoli a wekuhi ma nyɛ maa kase kɛ je hemi kɛ yemi nɛ Noa kɛ e weku ɔ je kpo ɔ mi. Nɔ́ heje ji kaa Baiblo ɔ tsɛɔ be nɛ wa ngɛ mi ɔ ke “nyagbe ligbi ɔmɛ.” (2 Timoteo 3:1) Yesu tsɔɔ kaa nihi maa pee a ní ngɛ wa be nɛ ɔ mi kaa bɔnɛ nihi pee a ní be nɛ Noa ngɛ daka a kpɛe ɔ. Ke nihi bui sɛ gbi nɛ Kristofoli ngɛ fiɛɛe kɛ kɔ Matsɛ Yemi ɔ he ɔ tue, loo a ye a he fɛu, aloo a wa mɛ yi mi po ɔ, e sa nɛ a kai Noa. Tsa pi mɛ pɛ ji kekleekle nihi nɛ a kɛ haomihi kaa jã a ngɛ kpee.

Jeha nyɔngmahi abɔ ba pue mi, nɛ bɔɔbɔɔbɔɔ ɔ, a gbe daka a kpɛmi nya. Benɛ e piɛɛ bɔɔ nɛ Noa maa ye jeha 600, e suɔli komɛ gbo. E tsɛ Lamek gbo. * Jeha enuɔ se ɔ, Lamek papaa, nɛ ji Noa nɛ Metusela gbo benɛ e ye jeha 969. Baiblo ɔ tsɔɔ kaa lɛ ji nɔ nɛ hi si be kɛkɛɛ pe adesahi tsuo. (1 Mose 5:27) Metusela kɛ Lamek tsuo ba ná kekleekle nɔmlɔ nɛ Mawu bɔ nɛ ji Adam.

Ngɛ jamɛ a jeha a nɔuu mi ɔ, Noa nɛ ji anɔkualetsɛ nɛ hi si blema a nine su sɛ gbi ehe nɔ kɛ je Yehowa Mawu ngɔ. Yehowa de lɛ ke: ‘Yaa sɛ daka a mi; mo, kɛ nihi nɛ ngɛ o we ɔ mi ɔ tsuo.’ Jehanɛ se hu ɔ, Mawu de Noa ke e ngɔ lohwe tsuaa lohwe eku kɛ eyo kɛ wo daka a mi. Ní nɛmɛ nɛ a he tsɔ nɛ a kɛ ma nyɛ maa sã afɔle ɔ, eku kpaago kɛ eyo kpaago, kɛ ekpahi nɛ piɛ ɔ enyɔɔnyɔ.—1 Mose 7:1-3.

Noa hɛ be nɔ́ nɛ ɔ nɔ jee kɔkɔɔkɔ. Lohwehi akpehi abɔ je tsitsatsitsa ba sɛ daka a mi. Ekomɛ nyɛɛ kɛ ba daka a mi, ekomɛ hu te kɛ ba daka a mi, ekomɛ hu waa kɛ ba daka a mi, nɛ ekomɛ hu sã si kɛ ba daka a mi. Lohwe nguahi kɛ wawi nɛ́ ekomɛ a hɛ mi jɔ nɛ ekomɛ hu a hɛ mi jɔɛ slɔɔtoslɔɔtohi tsuo ba sɛ daka a mi. Eko ɔ, Noa gu blɔ slɔɔtohi a nɔ kɛ kpaka lohwehi nɛ a hɛ mi jɔɛ ɔ kɛ wo daka a mi. Baiblo ɔ tsɔɔ kaa ‘lohwe ɔmɛ ya sɛ daka a mi kɛ piɛɛ Noa he.’—1 Mose 7:9.

Eko ɔ, nihi nɛ a jeɔ atsinyɛ ɔ ma bi ke: ‘Kɛ nɔ́ ko kaa jã ma plɛ kɛ ba mi kɛɛ? Nɛ kɛ lohwe nɛ ɔmɛ tsuo ma plɛ kɛ hi he kake ngɛ tue mi jɔmi mi ha kɛɛ?’ Mo susu nɔ nɛ ɔ he nɛ o hyɛ: Anɛ nɔ nɛ Bɔ je ɔ be he wami nɛ e ma nyɛ ma kudɔ lohwehi nɛ e bɔ ɔ konɛ a ko ye awi, nɛ a hɛ mi nɛ jɔ, ke e he hia kaa e pee jã lo? Mo kai kaa Yehowa ji Mawu nɛ  gba Wo Tsu ɔ mi enyɔ nɛ e ha nɛ pu ɔ da si ɔ nɛ. Anɛ e be nyɛe ma ha nɛ níhi tsuo nɛ a bɔ he amaniɛ ngɛ Noa be ɔ mi ɔ nɛ ba mi lo? E ma nyɛ, nɛ e pee jã hulɔ!

Ngɛ anɔkuale mi ɔ, Mawu ma nyɛ maa gu blɔ kpa ko nɔ kɛ he lohwe ɔmɛ a yi wami. Se nile nɛ e ngɛ ɔ heje ɔ, e gu blɔ nɛ ɔ nɔ konɛ wa kai kaa e ngɛ hɛ kɛ nɔ fɔmi ngɛ adesahi a mi kaa a ma nyɛ maa hyɛ níhi tsuo nɛ wami ngɛ a mi ngɛ zugba a nɔ ɔ a nɔ. (1 Mose 1:28) Mwɔnɛ ɔ, fɔli babauu kɛ Noa sane ɔ tsɔɔ a bimɛ ní kaa nimli kɛ lohwehi tsuo nɛ Yehowa bɔ ɔ, a he ngɛ se nami.

Yehowa de Noa kaa e piɛ otsi nɛ Nyu Afua a maa ba. Eko ɔ, weku ɔ be deka náe kulaa ngɛ be nɛ ɔ mi. Moo po he foni ngɛ o juɛmi nɛ o hyɛ. E ma bi nɛ a bua lohwehi tsuo a nya kɛ wo daka a mi, nɛ a bua niye ní nya, nɛ a to weku ɔ níhi kɛ wo daka a mi. Eko ɔ, Noa yo ɔ, kɛ Shem, Ham, kɛ Yafet a yi ɔmɛ ma susu bɔnɛ a maa pee ha nɛ ke a ngɛ daka a mi ɔ, a tsui maa nɔ a mi kaa nɔ́ nɛ we mi a ngɛ ɔ he.

Nɛ nihi nɛ bɔle mɛ ɔ hu nɛɛ? A na odase yemi nɛ tsɔɔ kaa Yehowa ngɛ Noa jɔɔe, nɛ e ngɛ nítsumi nɛ e ha lɛ ɔ hu nɔ jɔɔe, se loloolo ɔ, a “hɛ be a he nɔ.” A na kaa lohwe ɔmɛ ba ngɛ daka a mi sɛe, se lɔɔ si we mɛ kpu. E sɛ nɛ e pee wɔ nyakpɛ kaa nɔ́ nɛ ngɛ nɔ yae ɔ si we mɛ kpu. Mwɔnɛ ɔ, odase yemi babauu ngɛ nɛ tsɔɔ kaa wa ngɛ je nɛ ɔ níhi a blɔ nya tomi ɔ nyagbe, se nihi a hɛ be a he nɔ. Kaa bɔnɛ bɔfo Petro gba kɛ fɔ si ɔ, he fɛu yeli maa ba, nɛ a maa ye nihi nɛ a buɔ kɔkɔ bɔmi nɛ Mawu kɛ ngɛ hae ɔ tue ɔ a he fɛu. (2 Petro 3:3-6) Jã kɛ̃ nɛ nihi ye Noa kɛ e weku ɔ a he fɛu.

Mɛni be nɛ he fɛu yemi ɔ se po? Baiblo ɔ tsɔɔ kaa benɛ Noa, kɛ e weku ɔ, kɛ lohwe ɔmɛ sɛ daka a mi ɔ, ‘kɛkɛ nɛ Yehowa nga sinya a.’ Atsinyɛ jemi ko be he kaa ke he fɛu yeli ɔmɛ a ti ni komɛ ngɛ lejɛ ɔ nɛ a na kaa Mawu nga sinya a, a maa pee kɔ̃. Ke lɔɔ ha we nɛ a pee kɔ̃ po ɔ, atsinyɛ jemi ko be he kaa hiɔmi ɔ ha nɛ a pee kɔ̃, ejakaa hiɔmi ɔ nɛ! Hiɔmi ɔ nɛ hluu kɛ ya si be nɛ nyu ha zugba a nɔ tsuo kaa bɔnɛ Yehowa de ɔ.—1 Mose 7:16-21.

Anɛ Yehowa bua jɔ yayami peeli ɔmɛ a gbenɔ ɔ he lo? Dɛbi! (Ezekiel 33:11) Mohu ɔ, e ha mɛ he blɔ konɛ a kpa ní yayami peemi nɛ a pee nɔ́ nɛ da. Anɛ a ko nyɛ pee jã lo? Bɔnɛ Noa ba e je mi ha a ha sane bimi nɛ ɔ heto. Noa pee Mawu suɔmi nya ní, nɛ e bu Mawu tue ngɛ nɔ́ tsuaa nɔ́ mi, kɛ tsɔɔ kaa ni ɔmɛ a ko nyɛ ná yi baami. Enɛ ɔ tsɔɔ kaa Noa kɛ e hemi kɛ yemi ɔ bu je ɔ nɛ hi si ngɛ e be ɔ mi ɔ fɔ; e ha nɛ e pee heii kaa ni ɔmɛ nɛ a hi si ngɛ e be ɔ mi ɔ kplii a tsui. E hemi kɛ yemi ɔ ha nɛ Mawu baa e kɛ e weku ɔ a yi. Ke o kase Noa hemi kɛ yemi ɔ, mohu o ma he mo nitsɛ kɛ nihi nɛ o suɔ mɛ ɔ a yi wami. Kaa bɔnɛ Noa pee ɔ, mo hu o kɛ Yehowa Mawu ma nyɛ maa nyɛɛ kaa nɔ kɛ e huɛ. Nyɛ huɛ bɔmi ɔ maa si kɛ ya neneene!