Baiblo Mi Sane Bimihi Nɛ A Ha Heto
Mɛni heje nɛ tue mi jɔmi be je ɔ mi ɔ?
Nɔ yemi nɛ ma nyɛ ma tsake nihi a je mi bami ɔ pɛ nɛ ma nyɛ maa ngɔ tue mi jɔmi kɛ ba je ɔ mi
Baiblo ɔ tsɔɔ kaa yi mi tomi titli enyɔ heje nɛ tue mi jɔmi be je ɔ mi ɔ nɛ. Kekleekle ɔ, e ngɛ mi kaa adesahi pee ní nguahi fuu mohu lɛɛ, se a bɔɛ adesahi kaa mɛ nitsɛmɛ nɛ a kudɔ a ní peepee. Nɔ́ nɛ ji enyɔ ɔ, adesahi a blɔ nya tomihi yi manye ejakaa “je ɔ, Abosiami lɛ ngɛ nɔ yee.” Enɛ ɔ heje nɛ adesahi a mɔde bɔmi nyɛ we nɛ e ngɔ tue mi jɔmi kɛ ba a nɛ.—Kane Yeremia 10:23; 1 Yohane 5:19.
Nɔ́ kpa hu heje nɛ tue mi jɔmi be je ɔ mi ɔ ji kaa adesahi foɔ mɛ pɛ a nɔ́ mi, nɛ a suɔ nɛ a ná blɔ nya. Ja wa ná nɔ yemi nɛ maa tsɔɔ nihi kaa a pee nɔ́ nɛ da, nɛ a susu nihi a he loko tue mi jɔmi maa ba je ɔ mi.—Kane Yesaya 32:17; 48:18, 22.
Mɛnɔ ma ha nɛ tue mi jɔmi maa ba zugba a nɔ?
Mawu Ope ɔ wo si kaa e ma ha nɔ yemi kake pɛ maa ye adesahi tsuo a nɔ. Nɔ yemi nɛ ɔ ma ba da adesa nɔ yemi ɔmɛ a nane mi. (Daniel 2:44) Mawu Bi nɛ ji Yesu maa ye nɔ kaa Ganɔ Nɛ Yinɔ Jɔ. E ma je nɔ́ yayamihi tsuo kɛ je zugba a nɔ, nɛ e maa tsɔɔ nihi bɔnɛ a ma plɛ kɛ hi si ngɛ tue mi jɔmi mi ha.—Kane Yesaya 9:6, 7; 11:4, 9.
Amlɔ nɛ ɔ po ɔ, ngɛ Yesu blɔ tsɔɔmi sisi ɔ, nihi ayɔhi abɔ ngɛ́ je kɛ wɛ ɔ kɛ Mawu Munyu nɛ ji Baiblo ɔ ngɛ nihi tsɔɔe bɔnɛ a kɛ ni kpahi maa hi si ngɛ tue mi jɔmi mi ha. E be kɛe kulaa nɛ tue mi jɔmi nitsɛnitsɛ maa ba je ɔ mi tsuo.—Kane Yesaya 2:3, 4; 54:13.
