A FƆ Jonathan ngɛ Amerika, se e fɔli je Korea. Benɛ e ji jokuɛ ɔ, nihi ná e he juɛmi yaya ngɛ ma nɛ e je mi ɔ heje. Benɛ e wa a, e hla he nɛ e maa hi nɛ nihi be e he juɛmi yaya náe hu. E ba pee dɔkita ngɛ ma ko nɛ ngɛ Alaska yiti je, ngɛ U.S.A. Hiɔtsɛmɛ nɛ a baa e ngɔ nɛ e hyɛɔ mɛ ɔ a kpɛti nihi fuu nɔmlɔtso ngɛ kaa bɔnɛ e nɔmlɔtso ngɛ ɔ. E susu kaa nɔ ko be e he juɛmi yaya náe ngɛ lejɛ ɔ. E ngɛ mi kaa fĩɛ yeɔ ngɛ lejɛ ɔ wawɛɛ mohu lɛɛ, se nɔ he juɛmi yaya nami yeɔ nɔ awi wawɛɛ po pe fĩɛ.

Ligbi ko nɛ e tsa yo ko nɛ e ye jeha 25 ɔ, e na kaa loloolo ɔ, nihi hɛɛ e he juɛmi yaya. Yo ɔ hɛli nɛ benɛ e hɛ mi tsɔ ɔ, e hyɛ Jonathan hɛ mi nɛ e jɛ lɛ, ejakaa a du Koreabi a he juɛmi yaya kɛ wo e mi kɛ je e jokuɛ mi tɔɔ. E dɔ Jonathan kaa ngɛ mɔde nɛ e bɔ kaa e maa hi he ko nɛ́ nihi a bua maa jɔ e he ɔ tsuo se ɔ, loloolo ɔ, nihi hɛɛ e he juɛmi yaya.

Haomi nɛ Jonathan kɛ kpe ɔ ji nɔ́ nɛ ngɛ nɔ yae nitsɛnitsɛ. Nɔ he juɛmi yaya nami ngɛ nɔ yae ngɛ je ɔ  mi he tsuaa he. Nihi náa nɔ he juɛmi yaya ngɛ he tsuaa he nɛ adesahi ngɛ.

E ngɛ mi kaa nɔ he juɛmi yaya nami pɔhe mohu lɛɛ, se nihi babauu tuɔ munyu kɛ siɔ. Nɔ́ nɛ ɔ ngɛ nyakpɛ wawɛɛ. Ke nihi tuɔ munyu kɛ siɔ nɔ he juɛmi yaya nami ɔ, lɛɛ kɛ ba kɛɛ nɛ jamɛ a su ɔ pɔhe mɔ? E ngɛ heii kaa nihi fuu nɛ a tuɔ munyu kɛ siɔ nɔ he juɛmi yaya nami ɔ li kaa mɛ nitsɛmɛ hu a peeɔ jã. Anɛ mo hu o hɛɛ nihi a he juɛmi yaya nɛ o li lo? Kɛ o ma ha sane bimi nɛ ɔ heto ha kɛɛ?

Ke wa le kaa wa náa nihi a he juɛmi yaya jio, wa li jio, e yee kaa wa ma yɔse kaa wa ngɛ jamɛ a su ɔ ngɛ wa tsui mi. Baiblo ɔ tsɔɔ nɔ́ heje nɛ e ngɛ jã a. E de ke: ‘Tsui ɔ nɔ nɔ sisilɔ ko be.’ (Yeremia 17:9) Enɛ ɔ he ɔ, wa ma nyɛ maa sisi wa he kaa wa suɔ nimli adesahi tsuo. Aloo ke wa hɛɛ ni komɛ a he juɛmi yaya po ɔ, eko ɔ, wa ma je wa nya kaa wa ngɛ yi mi tomi kpakpa heje nɛ wa peeɔ jã ngɛ.

Bɔnɛ pee nɛ waa le kaa wa hɛɛ nihi a he juɛmi yaya loo wa hɛɛ we nihi a he juɛmi yaya a, moo po si himi nɛ nyɛɛ se nɛ ɔ he foni ngɛ o juɛmi mi nɛ o hyɛ: Ngɔɔ lɛ kaa gbɔkuɛ ko ɔ, mo nɔ kake too o ngɛ gbɛjegbɛ ko nɔ nyɛe. O na kaa nihewi enyɔ komɛ nɛ o li mɛ ma ngɛ o hɛ mi. A je oblai, nɛ e ngɛ kaa nɔ́ nɛ a ti nɔ kake hɛɛ nɔ́ ko ngɛ e dɛ mi.

Benɛ o na mɛ nɔuu ɔ, anɛ o ma susu kaa a maa ye mo awi lo? Ke o ná níhi si kpami ko kaa jã hyɛ ɔ, eko ɔ, lɔɔ ma ha nɛ o maa hyɛ o he nɔ saminya. Se anɛ o maa da lɔɔ nɔ kɛ ma o juɛmi nya si kaa nihewi enyɔ nɛ ɔmɛ maa ye mo awi lo? Sane bimi nɛ ma ha nɛ o maa le nɔ́ tutuutu nɛ ngɛ o tsui mi ji, Jije ma nɔ o susu kaa nihewi nɛ ɔmɛ je? Heto nɛ o ma ha a maa tsɔɔ nɔ́ nɛ ngɛ o tsui mi. Eko ɔ, e maa tsɔɔ kaa o hɛɛ nihi a je juɛmi yaya ngɛ o tsui mi momo.

Ke wa ma de ngɛ anɔkuale mi ɔ, wɔ tsuo wa ngɛ ni komɛ a he juɛmi yaya. Baiblo ɔ po tsɔɔ nihi a he juɛmi yaya nami ní peepee ko nɛ wa pɔɔ kpo jemi. E de ke: “Nɔmlɔ lɛɛ nɔ hɛ mi e hyɛɛ.” (1 Samuel 16:7) Akɛnɛ wɔ tsuo wa ngɛ su nɛ ɔ eko, nɛ behi fuu ɔ, e puɛɔ ní heje ɔ, anɛ hɛ kɛ nɔ fɔmi ko ngɛ kaa wa ma nyɛ maa yu wa he ngɛ su nɛ ɔ he, aloo wa ma je su nɛ ɔ kɛ je wa si himi mi lo? Anɛ be ko maa su nɛ nɔ ko be e nyɛmi he juɛmi yaya náe hu lo?