Ke jami ko ha nɛ o kɔni mi jɔ hyɛ ɔ, eko ɔ, e maa ye ha mo kaa o ma he jami kpa ko maa ye. Se mo ná nɔ mi mami kaa jami ko ngɛ nɛ o ma nyɛ ma ná hɛ kɛ nɔ fɔmi ngɛ e mi. Benɛ Yesu ngɛ zugba a nɔ ɔ, e bua e se nyɛɛli anɔkualetsɛmɛ ɔmɛ a nya nɛ e de mɛ kaa a kɛ Mawu mlaahi nɛ tsu ní ngɛ a si himi mi. Loloolo ɔ, Kristo se nyɛɛli anɔkualetsɛmɛ komɛ ngɛ nɛ a bɔɔ mɔde nɛ a kɛ Kristofoli a mlaahi tsuɔ ní ngɛ a si himi mi. Jije o maa na mɛ ngɛ?

Estelle nɛ wa wo e ta ngɛ munyu nɛ sɛ hlami ɔ mi ɔ de ke: “Nyagbe ɔ, i kɛ Yehowa Odasefoli bɔni Baiblo ɔ kasemi. E sui be ko kulaa nɛ i ba nu munyu nɛ ngɛ Yohane 8:32 ɔ sisi. ‘Nyɛ maa le anɔkuale ɔ; nɛ anɔkuale ɔ ma ha nyɛ maa ye nyɛ he.’”

Ray nɛ lɛ hu wa wo e ta ngɛ munyu nɛ sɛ hlami ɔ mi ɔ de ke: “Benɛ i kɛ Yehowa Odasefoli kase Baiblo ɔ, i ba na kaa pi Mawu nɛ ha nɛ adesahi ngɛ nɔ́ nae. Ye bua jɔ kaa i ba kase kaa Mawu le nɔ́ heje nɛ e ngmɛ blɔ nɛ adesahi ngɛ nɔ nae ɔ, nɛ e wo si hu kaa e be kɛe nɛ e maa po nɔ́ nami tsuo se.”

E ngɛ heii kaa e yee kaa nɔ ko maa pee nɔ́ nɛ da ngɛ je nɛ nihi fuu a je mi bami puɛ ngɛ mi nɛ ɔ mi. Se wa ma nyɛ maa pee nɔ́ nɛ da. Nihi fuu suɔ nɛ a ye bua mɛ konɛ a nu Baiblo ɔ mi tsɔɔmi ɔmɛ a sisi nɛ a kɛ tsu ní. Enɛ ɔ heje nɛ Yehowa Odasefoli kɛ nimli ayɔhi abɔ kaseɔ Baiblo ɔ ngɛ je kɛ wɛ nɛ a he we mɛ nɔ́ ko ɔ nɛ. Daa otsi ɔ, nihi babauu kaseɔ nɔ́ tutuutu nɛ Baiblo ɔ tsɔɔ ɔ. Enɛ ɔ ha nɛ huɛ bɔmi gbagbanii ngɛ a kɛ a Bɔlɔ ɔ a kpɛti bae, nɛ a si himi hu ngɛ kpakpa pee. *

Be kpa ke o kɛ Yehowa Odasefoli kpe ɔ, mo bi mɛ nɔ́ heje nɛ a he a jami ɔ ye ɔ. Mo susu a tsɔɔmi ɔmɛ a he nɛ o hyɛ bɔnɛ a baa a je mi ha a hulɔ. Lɔɔ se ɔ, mo nitsɛ moo hyɛ kaa jami ko ngɛ nɛ o ma nyɛ ma ná hɛ kɛ nɔ fɔmi ngɛ mi lo.