1. (a) Moo tu nɔ́ he tomi nɔ́ nɛ kɔɔ ngma a kɛ hu ɔ he ɔ he munyu kpiti. (b) Kɛ Yesu tsɔɔ nɔ́ he tomi nɔ́ ɔ sisi ha kɛɛ?

NGƐ nɔ́ hetomi níhi nɛ Yesu kɛ tsu ní kɛ kɔ Matsɛ Yemi ɔ he ɔ a kpɛti kake mi ɔ, e tsɔɔ kaa ngmɔtsɛ ko ya du ngma nɛ he nyɛlɔ ko hu ya du hu aloo nga kɛ futu ngma a. Hu ɔ wa nɛ e ha ngma a nɔ, se ngmɔtsɛ ɔ de e tsɔli ɔmɛ kaa ‘a ha ngma a, kɛ hu ɔ tsuo nɛ wa kɛ ya si ngma kpami be ɔ.’ Ke e su ní kpami be ɔ, a ma kpata hu ɔ hɛ mi nɛ a ma bua ngma a nya. Yesu nitsɛ tsɔɔ nɔ́ hetomi nɔ́ ɔ sisi. (Kane Mateo 13:24-30, 37-43.) Mɛni wa ma nyɛ maa kase ngɛ nɔ́ he tomi nɔ́ nɛ ɔ mi? (Hyɛ munyu nɛ e yi ji, “Ngma a Kɛ Hu ɔ.”)

2. (a) Mɛni lɛ nɔ́ hetomi nɔ́ nɛ kɔɔ ngma a kɛ hu ɔ he ɔ kɔɔ? (b) Mɛni he wa ma susu ngɛ munyu nɛ ɔ nɛ wa ngɛ kasee ɔ mi?

² Ngma a ji Kristofoli nɛ a pɔ mɛ nu nɛ a maa piɛɛ Yesu he kɛ ye matsɛ ngɛ e Matsɛ Yemi ɔ mi ɔ nɛ. Enɛ ɔ he ɔ, nɔ́ hetomi nɔ́ ɔ kɔɔ be nɛ Yesu maa hla Kristofoli nɛ a pɔ mɛ nu ɔ kɛ je adesahi a kpɛti, kɛ blɔ nɔ nɛ e maa gu kɛ pee jã a he. A je ní dumi ɔ sisi ngɛ Pentekoste 33 M.B. Ke Kristofoli nɛ a pɔ mɛ nu nɛ a maa hi wami mi ngɛ je ɔ nyagbe ɔ mi ɔ a nine su nyagbe nya sɔumi nɔ nɛ a ho hiɔwe ya pɛ kɛkɛ ngma a nya buami ɔ ba nyagbe. (Mat. 24:31; Kpoj. 7:1-4) Ke nɔ ko daa si ngɛ yoku nɔ ɔ, e ma nyɛ maa hyɛ níhi nɛ bɔle lɛ. Jã kɛ̃ nɛ nɔ́ hetomi nɔ́ nɛ kɔɔ ngma a kɛ hu ɔ he ɔ yeɔ bua wɔ nɛ wa nuɔ níhi nɛ ba ngɛ jeha 2,000 kpɛ mi ɔ sisi. Nɔ́ hetomi nɔ́ ɔ tu ní dumi be, e wami, kɛ e kpami he munyu. Wa ma susu ngma kpami be ɔ he titli ngɛ munyu nɛ ɔ nɛ wa ngɛ kasee ɔ mi. *

3. (a) Mɛni ba ngɛ kaseli ɔmɛ a gbenɔ se? (b) Kaa bɔnɛ a ngma ngɛ Mateo 13:28 ɔ, mɛni sane a bi, nɛ mɛnɔmɛ bi jamɛ a sane ɔ? (Hyɛ nyagbe ningma.)

³ “Hu ɔ yi je kpo” ngɛ kaseli ɔmɛ a gbenɔ se pɛ.  Hu ɔ ji lakpa Kristofoli ɔmɛ ɔ nɛ. (Mat. 13:26) Benɛ jeha 300 ke e suu ɔ, lakpa Kristofoli nɛ a ngɛ kaa hu ɔ puɛ babauu nɛ a ha Kristofoli nɛ a pɔ mɛ nu ɔ a nɔ. Mo kai kaa ngɛ nɔ́ hetomi nɔ́ ɔ mi ɔ, tsɔli ɔmɛ de a nyɔmtsɛ ɔ ke e ha nɛ a ya hia hu ɔ. * (Mat. 13:28) Mɛni a nyɔmtsɛ ɔ de mɛ?

4. (a) Munyu nɛ Yesu tu ɔ tsɔɔ mɛni? (b) Mɛni be nɛ wa ba yɔse Kristofoli nɛ a ji ngma a?

⁴ Benɛ Yesu ngɛ ngma a kɛ hu ɔ a he munyu tue ɔ, e de ke: “Nyɛ ha ngma a, kɛ hu ɔ tsuo nɛ wa kɛ yaa si ngma kpami be ɔ.” Nɔ́ nɛ Yesu de ɔ tsɔɔ kaa kɛ je kaseli ɔmɛ a be ɔ mi hluu kɛ ba si mwɔnɛ ɔ, be tsuaa be ko ɔ, Kristofoli nɛ a pɔ mɛ nu, nɛ mɛ ji ngma a, ngɛ zugba a nɔ. Pee se ɔ, Yesu de e kaseli ɔmɛ ke: ‘I kɛ nyɛ maa hi si daa kɛ yaa su je mi nyagbe.’ (Mat. 28:20) Enɛ ɔ he ɔ, Yesu maa bu Kristofoli nɛ a pɔ mɛ nu ɔ a he daa kɛ ya si je mi nyagbe. Se akɛnɛ hu ɔ aloo lakpa Kristofoli ɔmɛ ha ngma a nɛ ji Kristofoli nɛ a pɔ mɛ nu ɔ a nɔ heje ɔ, wa li nihi tutuutu nɛ a ji ngma a ngɛ jamɛ a be ɔ mi. Se maa pee jeha 30 loko ní kpami be ɔ su ɔ, wa ba yɔse nihi nɛ a ji ngma a. Mɛni blɔ nɔ wa gu kɛ yɔse mɛ?

5. Mɛni blɔ nɔ nɛ Malaki gbami ɔ bami ngɛ kaseli ɔmɛ a be ɔ mi ngɛ?

⁵ Loko Yesu ma ha e nɔ́ hetomi nɔ́ nɛ kɔɔ ngma kɛ hu ɔ he ɔ, Yehowa gu Malaki nɔ kɛ gba nɔ́ ko kaa jã kɛ fɔ si momoomo. (Kane Malaki 3:1-4.) Yohane Nɔ Baptisilɔ ɔ ji ‘tsɔlɔ nɛ ma dla blɔ ngɔ to’ ɔ nɛ. (Mat. 11:10, 11) Tsɔlɔ ɔ ba ngɛ jeha 29 M.B. Jamɛ a be ɔ mi ɔ, be nɛ a kɛ maa kojo Israel ma a su si ta. Yesu ji tsɔlɔ enyɔne ɔ nɛ. E dla Yerusalem sɔlemi we ɔ si enyɔ. E pee kekleekle nɔ́ ɔ benɛ e je e sɔmɔmi nítsumi ɔ sisi pɛ, nɛ e pee enyɔne ɔ benɛ e piɛ bɔɔ nɛ e maa gbe e sɔmɔmi nítsumi ɔ  nya a. (Mat. 21:12, 13; Yoh. 2:14-17) Enɛ ɔ tsɔɔ kaa sɔlemi we ɔ mi nɛ Yesu ma dla a ma he be.

6. (a) Mɛni ji Malaki gbami ɔ mi bami ngua? (b) Mɛni be Yesu ba slaa mumi sɔlemi we ɔ? (Hyɛ nyagbe ningma.)

⁶ Mɛni ji Malaki gbami ɔ mi bami ngua? Loko e maa su jeha 1914 ɔ, C. T. Russell kɛ nyumu komɛ nɛ a piɛɛ e he ɔ tsu nítsumi ko nɛ ngɛ kaa nɔ́ nɛ Yohane Nɔ Baptisilɔ ɔ tsu ɔ. A kase Baiblo ɔ konɛ a na anɔkualehi nɛ ngɛ mi ɔ. Baiblo Kaseli ɔmɛ tsɔɔ nɔ́ tutuutu nɛ Kristo kpɔmi afɔle sami ɔ tsɔɔ. A tsɔɔ hu kaa hɛl la ko be, nɛ a fiɛɛ ke Je Ma Amɛ A Be ɔ maa ba nyagbe. Se kɛ̃ ɔ, jami kuuhi fuu ngɛ nɛ mɛ hu a deɔ ke Kristo se nyɛɛli ji mɛ. Lɛɛ sane nɛ e he hia nɛ e sa kaa wa bi ji: Mɛnɔmɛ ji ngma a? Bɔnɛ pee nɛ wa ná sane bimi nɛ ɔ heto ɔ, Yesu ba slaa sɔlemi we ɔ ngɛ jeha 1914. Sɔlemi we ɔ slaami kɛ e dlami ɔ he be. E je sisi kɛ je jeha 1914 kɛ ya si jeha 1919 sisije. *

7. Benɛ Yesu ba slaa nihi nɛ a pɔ mɛ nu ɔ ngɛ jeha 1914 ɔ mi ɔ, mɛni e na?

⁷ Benɛ Yesu ba slaa nihi nɛ a pɔ mɛ nu ɔ, mɛni e na? E ba na Baiblo Kaseli nɛ a ngɛ kã, nɛ a ngɔ a he wami kɛ níhi nɛ a ngɛ ɔ kɛ ngɛ fiɛɛe wawɛɛ maa pee jeha 30 kɛ se. * Moo hyɛ bɔnɛ Yesu kɛ bɔfo ɔmɛ ma ná bua jɔmi ha benɛ a na nihi bɔɔ nɛ a ngɛ kaa ngma a nɛ Satan hu ɔ nyɛ we nɛ e gbe mɛ ɔ! Se loloolo ɔ, e he hia nɛ a ‘tsu osɔfo ɔmɛ, nɛ ji nihi nɛ a pɔ mɛ nu ɔ a he.’ (Mal. 3:2, 3; 1 Pet. 4:17) Mɛni heje?

8. Mɛni ba ngɛ jeha 1914 ɔ se?

⁸ Benɛ e piɛɛ bɔɔ nɛ jeha 1914 maa ba nyagbe ɔ, Baiblo Kaseli ɔmɛ ekomɛ a kɔni  mi jɔ ejakaa a yɛ hiɔwe. Ngɛ jeha 1915 kɛ 1916 mi ɔ, nihi te si kɛ wo asafo ɔ nɛ enɛ ɔ ha nɛ fiɛɛmi nítsumi ɔ ba si. Nɔ́ nɛ pa puɛ sane ɔ pe kulaa ji, benɛ Nyɛminyumu Russell gbo ngɛ October 1916 se ɔ, ni komɛ nɛ a ngɛ asafo ɔ mi ɔ hu te si kɛ wo nihi nɛ a nyɛɛ hɛ mi ngɛ asafo ɔ mi ɔ. Nihi kpaago nɛ a hyɛɛ Watch Tower Bible and Tract Society ɔ nɔ ɔ a kpɛti nihi eywiɛ tsɔ atua kɛ si juɛmi nya si nɛ nyɛmimɛ ɔmɛ ma kaa Nyɛminyumu Rutherford nɛ da asafo ɔ nya a. A bɔ mɔde kaa a kɛ mi gbami maa ba nyɛmimɛ ɔmɛ a kpɛti, se ngɛ August 1917 ɔ mi ɔ, a je Betel. Enɛ ɔ tsɔɔ kaa Yesu ba tsu nihi nɛ a pɔ mɛ nu ɔ a he niinɛ! Nimli a hɛ mi gbeye yemi hu ha nɛ Baiblo Kaseli ɔmɛ komɛ kpa Mawu sɔmɔmi. Se kɛ̃ ɔ, a ti nihi fuu je a tsui mi nɛ a kplɛɛ nɛ Yesu tsu a he, nɛ a pee tsakemihi nɛ he hia. Enɛ ɔ he ɔ, Yesu kplɛɛ a nɔ kaa mɛ ji anɔkuale Kristofoli aloo ngma a nɛ. E kua nihi tsuo nɛ a bua tsɛɔ a he ke Kristofoli nɛ a ngɛ asafo ɔ mi kɛ nihi tsuo nɛ a ngɛ sɔlemi slɔɔtohi a mi nɛ a deɔ ke a ji Kristo se nyɛɛli ɔ. (Mal. 3:5; 2 Tim. 2:19) Mɛni ba ngɛ lɔɔ se? Bɔnɛ pee nɛ waa le nɔ́ nɛ ba a, nyɛ ha nɛ wa susu nɔ́ hetomi nɔ́ nɛ kɔɔ ngma a kɛ hu ɔ he ɔ he ekohu nɛ waa hyɛ.

9, 10. (a) Amlɔ nɛ ɔ, mɛni he wa ma susu kɛ kɔ ngma kpami be ɔ he? (b) Mɛni maa ya nɔ kekleekle ngɛ ngma kpami be ɔ mi?

⁹ Yesu de ke: “Ngma kpami be ɔ ji je nɛ ɔ nyagbe” ɔ nɛ. (Mat. 13:39) Ngma kpami be ɔ je sisi ngɛ jeha 1914 ɔ mi. Amlɔ nɛ ɔ, wa ma susu níhi enuɔ nɛ Yesu gba kɛ fɔ si kaa e maa ya nɔ ngɛ jamɛ a be ɔ mi ɔ he.

¹⁰ Kekleekle ɔ, a ma bua hu ɔ nya. Yesu de ke: “Ke ngma kpami be ɔ su ɔ, ma de ní tsuli ɔmɛ ke a bua hu ɔ nya kekle nɛ a fi.” Ngɛ jeha 1914 ɔ se ɔ, bɔfo ɔmɛ bɔni lakpa Kristofoli nɛ a ji hu a ‘nya buami.’ A je mɛ kɛ je “matsɛ yemi ɔ mi bimɛ ɔmɛ,” nɛ ji nihi nɛ a pɔ mɛ nu ɔ a kpɛti.​—Mat. 13:30, 38, 41.

11. Kɛ ba si mwɔnɛ ɔ, mɛni ha nɛ anɔkuale Kristofoli je ekpa kulaa ngɛ lakpa Kristofoli a he?

¹¹ Benɛ níhi a nya buami ɔ ngɛ nɔ yae ɔ, nihi na slɔɔto nɛ ngɛ ngma a kɛ hu ɔ a kpɛti ɔ heii. (Kpoj. 18:1, 4) Benɛ jeha 1919 ɔ ke e suu ɔ, odase yemi tsɔɔ kaa Babilon Ngua a nɔ si. Mɛni ji nɔ́ titli nɛ ha nɛ anɔkuale Kristofoli je ekpa kulaa ngɛ lakpa Kristofoli ɔmɛ a he? Lɔɔ ji fiɛɛmi nítsumi ɔ. Nihi nɛ a nyɛɛ Baiblo Kaseli ɔmɛ a hɛ mi ɔ ma nɔ mi kaa e he hia nɛ nɔ tsuaa nɔ nɛ tsu Matsɛ Yemi fiɛɛmi nítsumi ɔ. Kaa nɔ hyɛmi nɔ́ ɔ, womiyo ko nɛ a tsɛɛ ke, To Whom the Work Is Entrusted, nɛ a pee ngɛ jeha 1919 ɔ mi ɔ, wo Kristofoli nɛ a pɔ mɛ nu ɔ tsuo he wami kaa a fiɛɛ ngɛ wehi a mi. Womiyo ɔ de ke: “E ngɛ mi kaa nítsumi ɔ he wa mohu lɛɛ, se e ji Nyɔmtsɛ ɔ nítsumi, nɛ e maa wo wɔ he wami konɛ wa nyɛ nɛ wa tsu. E ji he blɔ nɛ o ná kaa mohu o ma tsu eko.” Kɛ nyɛmimɛ ɔmɛ pee a ní ngɛ munyu nɛ ɔ he ha kɛɛ? The Watch Tower nɛ je kpo ngɛ jeha 1922 ɔ mi ɔ bɔ amaniɛ kaa kɛ je jamɛ a be ɔ mi kɛ ma a, Baiblo Kaseli ɔmɛ tsu fiɛɛmi nítsumi ɔ kɛ kã wawɛɛ nitsɛ. E kɛ we kulaa nɛ nihi ba le anɔkuale Kristofoli ɔmɛ kaa a fiɛɛɔ ngɛ wehi a mi, nɛ jã nɔuu kɛ̃ nɛ nihi le mɛ mwɔnɛ ɔ.

12. Kɛ je mɛni be nɛ a bɔni ngma a nya buami?

¹² Nɔ́ nɛ ji enyɔ ɔ, a ma bua ngma a nya. Yesu fã e bɔfo ɔmɛ ke: “A bua ngma a nya kɛ wo ye gba a mi.” (Mat. 13:30) Kɛ je jeha 1919 ɔ mi kɛ ma a, a ngɛ nihi nɛ a pɔ mɛ nu ɔ a nya buae kɛ ngɛ Kristofoli asafo nɛ a kɛ ma si ekohu ɔ mi woe. Ke Kristofoli nɛ a pɔ mɛ nu, nɛ a maa hi wami mi ngɛ je ɔ nyagbe ɔ mi ɔ a nine su hiɔwo nɛ a ma ná ngɛ hiɔwe ɔ nɔ ɔ, lɔɔ tsɔɔ kaa a nya bua mi ɔ ba nyagbe.​—Dan. 7:18, 22, 27.

13. Mɛni wa kaseɔ ngɛ Kpojemi 18:7 ɔ mi kɛ kɔ bɔnɛ jamihi nɛ a tsɛɔ a he ke Kristofoli kɛ jami kpahi nɛ piɛɛ Babilon Ngua a he ɔ he?

 ¹³ Nɔ́ nɛ ji etɛ ɔ, a maa wo yana nɛ a ma kpe a lungu nya. Benɛ bɔfo ɔmɛ fi hu ɔ se ɔ, mɛni lɛ ba? Benɛ Yesu ngɛ nɔ́ nɛ maa ba lakpa Kristofoli aloo hu ɔ nɔ ɔ tsɔɔe ɔ, e de ke: “Lejɛ ɔ a maa wo yana, nɛ a ma kpe lungu nya.” (Mat. 13:42) Anɛ a ngɛ jã pee amlɔ nɛ ɔ lo? Dɛbi. Mwɔnɛ ɔ, loloolo ɔ, jamihi nɛ a tsɛɔ a he ke Kristofoli nɛ a ji yo ajuama a fã a deɔ ke: “Manyɛ ji mi, nɛ i hii si ngɛ ye sɛ ɔ nɔ! Pi yalɔyo ji mi; i be aywilɛho yee gblegbleegble!” (Kpoj. 18:7) Niinɛ, jamihi nɛ a tsɛɔ a he ke Kristofoli ɔ tsɔɔ kaa a ngɛ he wami, nɛ a susuɔ kaa ‘manyɛ ji mɛ,’ nɛ a hii si ngɛ ma nya dali a nɔ. Piɔ ɔ, nihi nɛ a daa si kɛ ha hu ɔ ngɛ fiae, a wui yana. Se e be kɛe nɛ níhi ma tsake.

14. (a) Mɛni be lakpa Kristofoli ɔmɛ “ma kpe a lungu nya” a, nɛ mɛni heje nɛ a maa pee jã a? (b) Mɛni blɔ nɔ sisi numi ehe nɛ wa ná ngɛ Mateo 13:42 ɔ kɛ munyu nɛ ngɛ La 112:10 kɔ ngɛ? (Hyɛ nyagbe ningma.)

¹⁴ Ke a kpata lakpa jamihi tsuo a hɛ mi ngɛ amanehlu ngua a mi ɔ, nihi nɛ a kɛ a he wo jamɛ a jami ɔmɛ a mi ɔ maa suɔ kaa a maa laa a he ngɛ he ko, se a be he ko nae. (Luka 23:30; Kpoj. 6:15-17) Ke a yɔse kaa a be nyɛe maa tu hɛ mi kpatami nɛ ma a nya fo ɔ, a kɛ he hiami ma fo ya yuuyuuyuu, nɛ a kɛ abofu “ma kpe a lungu nya.” Benɛ Yesu ngɛ gbae kɛ kɔ amanehlu ngua a he ɔ, e tsɔɔ kaa nihi “maa wo yana.” *​—Mat. 24:30; Kpoj. 1:7.

15. Mɛni maa ba hu ɔ nɔ, nɛ mɛni be lɔɔ maa ba mi?

¹⁵ Nɔ́ nɛ ji eywiɛ ɔ, a ma sake mɛ kɛ fɔ flɔnɔɔ mi. Mɛni maa ba hu ɔ nɛ a fi ɔ nɔ? Bɔfo ɔmɛ “ma sake mɛ ngɔ fɔ flɔnɔɔ kɛ e mi la hɛuu ɔ mi.” (Mat. 13:42) Enɛ ɔ tsɔɔ kaa a ma kpata a hɛ mi kulaa. Enɛ ɔ he ɔ, a ma kpata nihi nɛ a kɛ a he wo lakpa jami mi ɔ a hɛ mi ngɛ amanehlu ngua a nyagbe fã nɛ ji Harmagedon ɔ mi.​—Mal. 4:1.

16, 17. (a) Mɛni ji nyagbe nɔ́ nɛ maa ya nɔ nɛ Yesu wo ta ngɛ e nɔ́ hetomi nɔ́ ɔ mi? (b) Mɛni heje nɛ wa ma nya si kaa hwɔɔ se loko jamɛ a nɔ́ ɔ maa ba mi ɔ?

¹⁶ Nɔ́ nɛ ji enuɔ ɔ, a ma kpɛ. Yesu gbe e gbami ɔ nya ke: “[Jamɛ a be ɔ mi ɔ, dali ɔmɛ, NW] ma kpɛ kaa pu ngɛ a Tsɛ ɔ hiɔwe matsɛ yemi ɔ mi.” (Mat. 13:43) Mɛni be nɛ enɛ ɔ maa ba mi, nɛ jije e maa ba mi ngɛ? Gbami nɛ ɔ maa ba mi hwɔɔ se. Tsa pi níhi nɛ ngɛ nɔ yae amlɔ nɛ ɔ ngɛ zugba a nɔ ɔ a he munyu nɛ Yesu gba kɛ fɔ si ɔ, mohu ɔ, níhi nɛ maa ba ngɛ hiɔwe hwɔɔ se. * Nyɛ ha nɛ wa susu yi mi tomi enyɔ a heje nɛ wa ma nya si jã a he nɛ waa hyɛ.

¹⁷ Kekleekle ɔ, mɛni be nɛ enɛ ɔ maa ba mi? Yesu de ke: “Jamɛ a be ɔ mi ɔ,  dali ɔmɛ ma kpɛ.” (NW) E ngɛ heii kaa munyu kpɔ nɛ ji “jamɛ a be ɔ mi ɔ” kɔɔ níhi nɛ Yesu wo ta nɛ ji hu ɔ nɛ a ‘ma sake ngɔ fɔ flɔnɔɔ kɛ e mi la hɛuu ɔ mi’ ɔ he. Enɛ ɔ ba mi ngɛ amanehlu ngua a nyagbe fã a mi. Lɔɔ he ɔ, hwɔɔ se ngɛ jamɛ a be ɔ mi loko nihi nɛ a pɔ mɛ nu ɔ hu “ma kpɛ.” Enyɔne ɔ, jije e maa ba mi ngɛ? Yesu de ke dali ɔmɛ ma ‘kpɛ ngɛ matsɛ yemi ɔ mi.’ Mɛni lɔɔ tsɔɔ? Anɔkualetsɛmɛ tsuo nɛ a pɔ mɛ nu nɛ a ngɛ zugba a nɔ loloolo ɔ ma ná nyagbe nya sɔumi ngɛ amanehlu ngua a e kekleekle fã a se. Lɔɔ se ɔ, kaa bɔnɛ Yesu tsɔɔ ngɛ gbami nɛ kɔɔ amanehlu ngua a he ɔ mi ɔ, a ma bua a nya kɛ ho hiɔwe ya. (Mat. 24:31) Ke a ho hiɔwe ɔ ya a, a ma kpɛ ‘ngɛ a Tsɛ ɔ hiɔwe matsɛ yemi ɔ mi.’ Ke Harmagedon ta a ba nyagbe pɛ ɔ, a ma ya piɛɛ Yesu ayɛflo ɔ fã nɛ ngɛ bua jɔmi ɔ he ngɛ ‘To Bi ɔ yo kpeemi’ ɔ mi.​—Kpoj. 19:6-9.

18, 19. Mɛni blɔhi a nɔ wa ná Yesu nɔ́ hetomi nɔ́ nɛ kɔɔ ngma a kɛ hu ɔ he ní nɛ wa kase ɔ he se ngɛ?

¹⁸ Mɛni se wa ná ngɛ nɔ́ hetomi nɔ́ nɛ ɔ he ní nɛ wa kase ɔ mi? Wa ná he se ngɛ blɔ etɛ nɔ. Kekleekle ɔ, e ha nɛ wa nu níhi a sisi saminya. Nɔ́ hetomi nɔ́ ɔ ha nɛ wa na nɔ́ heje nɛ Yehowa ngmɛ blɔ nɛ ní yayami ngɛ nɔ yae ɔ. E ‘to e tsui si ha nihi nɛ a woɔ e mi mi la’ a konɛ e kɛ dla “nihi nɛ́ e na mɛ mɔbɔ,” nɛ ji ngma a. * (Rom. 9:22-24) Nɔ́ nɛ ji enyɔ ɔ, e ha nɛ hɛ kɛ nɔ fɔmi nɛ wa ngɛ ɔ mi wa. Be mi nɛ nyagbe ɔ ngɛ sue ɔ, wa he nyɛli ɔmɛ maa hwu kɛ si wɔ wawɛɛ, se ‘a be wɔ nyɛe.’ (Kane Yeremia 1:18, 19.) Kaa bɔnɛ Yehowa po ngma a he piɛ jehahi babauu ɔ, jã kɛ̃ nɛ wa hiɔwe Tsɛ ɔ maa gu Yesu kɛ hiɔwe bɔfo ɔmɛ a nɔ kɛ ye bua wɔ “daa.”​—Mat. 28:20.

¹⁹ Nɔ́ nɛ ji etɛ ɔ, nɔ́ hetomi nɔ́ ɔ ha nɛ wa le nihi nɛ a ji ngma a mi tso. Mɛni heje nɛ enɛ ɔ he hia a? Ke wa le Kristofoli nɛ a ji ngma a mi tso ɔ, lɔɔ ma ha nɛ wa ma ná sane nɛ Yesu bi ngɛ e gbami nɛ kɔɔ nyagbe ligbi ɔmɛ a he ɔ heto. Yesu bi ke: “Lɛɛ mɛnɔ ji tsɔlɔ anɔkualetsɛ kɛ ní lelɔ ɔ mɔ?” (Mat. 24:45) Munyu enyɔ nɛ wa maa kase kɛ nyɛɛ enɛ ɔ se ɔ ma ha sane bimi nɛ ɔ heto nɛ wa bua maa jɔ he.