Mawu wo anɔkualetsɛ Abraham si kaa “nina” nɛ a gba e he sane kɛ fɔ si ɔ maa je e weku ɔ mi. Kɛ gu nina nɛ ɔ nɔ ɔ, nihi nɛ a ‘je mahi tsuo’ a mi ɔ ma ná jɔɔmi. (1 Mose 22:18) Pee se ɔ, Abraham bibi Yakob hia kɛ ho Egipt ya. Yakob weku ɔ yi ya bli ngɛ Egipt nɛ e ba pee blema Israel ma a.

Benɛ Israelbi ɔmɛ ngɛ Egipt ɔ, Farao yiwutsotsɛ ko ha nɛ a sɔmɔ kaa nyɔguɛhi hluu kɛ ya si benɛ Mawu pee Mose gbalɔ. Mose nyɛɛ Israelbi ɔmɛ a hɛ mi kɛ je Egipt. Mawu ha nɛ Wo Tsu ɔ mi gba nɛ Israelbi ɔmɛ nyɛɛ mi kɛ po. Lɔɔ se ɔ, Mawu wo Israelbi ɔmɛ mlaahi nɛ e ha mɛ Kita Nyɔngma amɛ konɛ e kudɔ mɛ nɛ e po a he piɛ. Mlaa nɛ ɔmɛ tsɔɔ kaa e sa nɛ adesahi nɛ a sã afɔle konɛ a ngɔ a he yayamihi kɛ pa mɛ. Mawu ha nɛ Mose de Israelbi ɔmɛ kaa e maa tsɔ e gbalɔ kpa ko kɛ ba a ngɔ. Jamɛ a gbalɔ ɔ maa pee “nina” nɛ a wo e he si ɔ.

Maa pee jeha lafa 400 kɛ se ɔ, Mawu wo Matsɛ David si kaa “nina” nɛ a gba e he sane kɛ fɔ si ngɛ Eden abɔɔ ɔ mi ɔ, maa da matsɛ yemi ko nɛ maa hi si kɛ ya neneene ɔ nya. Nina nɛ ɔ ji Mesia a nɛ. Lɛ ji Kpɔlɔ nɛ Mawu hla konɛ e ba he adesahi a yi wami nɛ e tsake zugba a kɛ pee Paradeiso ekohu ɔ nɛ.

Mawu gu David kɛ gbali kpahi a nɔ nɛ e je Mesia a he sanehi kpo bɔɔbɔɔbɔɔ. A gba kɛ fɔ si kaa e maa ba e he si, e ma je mi mi jɔmi kpo, nɛ ngɛ e nɔ yemi ɔ sisi ɔ, hwɔ, dami sane nɛ a yi, kɛ ta hwumi se maa po. Tue mi jɔmi maa hi adesahi tsuo a kpɛti, nɛ tue mi jɔmi hu maa hi adesahi kɛ lohwehi a kpɛti. Hiɔ, nɔ́ nami, kɛ gbenɔ se maa po. Ní nɛ ɔmɛ piɛɛ we Mawu sisije yi mi tomi ɔ he. Nihi nɛ a gbo ɔ maa kpale kɛ ba wami mi ngɛ zugba a nɔ.

Mawu gu gbalɔ Mika nɔ kɛ gba kɛ fɔ si kaa a ma fɔ Mesia a ngɛ Betlehem. Mawu gu gbalɔ Daniel hu nɔ kɛ de to kaa pee se ɔ, a maa gbe Mesia a. Se Mawu ma tle Mesia a si kɛ je gbeje nɛ e maa wo lɛ Matsɛ ngɛ hiɔwe. Jehanɛ se hu ɔ, Daniel na ngɛ nina mi kaa nyagbenyagbe ɔ, Mesia Matsɛ Yemi ɔ ma kpata nɔ yemi kpahi tsuo a hɛ mi, nɛ e Matsɛ Yemi ɔ maa hi si kɛ ya neneene. Anɛ Mesia a ba kaa bɔnɛ a gba kɛ fɔ si ngɛ e he ɔ lo?

​—A kɛ da ngmamihi nɛ a nyɛɛ se nɛ ɔ a nɔ: 1 Mose yi 22-50, 2 Mose, 5 Mose, 2 Samuel, La, Yesaya, Daniel, Mika, Zakaria 9:9.