1, 2. Mɛni Mawu Matsɛ Yemi ɔ maa pee? Mɛni heje nɛ wa ma nyɛ ma ná nɔ mi mami kaa Mawu Matsɛ Yemi ɔ maa ba a?

NGƐ gbiɛ be mi ngɛ jeha 31 M.B. ɔ mi ɔ, Yesu tsɔɔ e kaseli ɔmɛ ngɛ Yoku ko nɛ e kɛ Kapernaum ma a he kɛ we ɔ nɔ kaa a sɔle ke: “O Matsɛ Yemi ɔ nɛ ba.” (Mat. 6:10) Mwɔnɛ ɔ, nihi fuu he we yi kaa Matsɛ Yemi nɛ ɔ maa ba. Se kɛ̃ ɔ, wa ngɛ nɔ mi mami kaa Yehowa ma ha sɔlemi nɛ wa jeɔ wa tsui mi kɛ sɔleɔ konɛ Mawu Matsɛ Yemi ɔ nɛ ba a heto.

² Yehowa maa gu e Matsɛ Yemi ɔ nɔ kɛ pee e weku nɛ ngɛ hiɔwe kɛ zugba a nɔ ɔ tsuo kake. Yehowa yi mi tomi nɛ ɔ maa ba mi. (Yes. 55:10, 11) Ngɛ anɔkuale mi ɔ, Yehowa bɔni Matsɛ yemi momo ngɛ wa be nɛ ɔ mi! Nyakpɛ níhi nɛ ya nɔ ngɛ jeha 100 nɛ be ɔ mi ɔ yeɔ enɛ ɔ he odase. Mawu ngɛ ní nguahi kɛ nyakpɛ níhi fuu pee kɛ ngɛ e sɔmɔli ayɔhi abɔ nɛ a yeɔ lɛ anɔkuale ɔ hae. (Zak. 14:9; Kpoj. 15:3) Se kɛ̃ ɔ, e slo Matsɛ nɛ Yehowa bɔni yemi ɔ ngɛ Mawu Matsɛ Yemi ɔ nɛ Yesu de wɔ ke waa sɔle konɛ e ba a he. Ngɛ mɛni blɔ nɔ nɛ e slo Matsɛ nɛ Yehowa bɔni yemi ɔ ngɛ Mawu Matsɛ Yemi ɔ nɛ maa ba a he? Mɛni blɔ nɔ wa ma ná Mawu Matsɛ Yemi ɔ he se ngɛ?

3. (a) Mɛni be nɛ a wo Yesu Matsɛ, nɛ jije a wo lɛ Matsɛ ɔ ngɛ? (b) Mɛni blɔ nɔ o maa gu kɛ tsɔɔ nɔ ko kaa Matsɛ Yemi ɔ je sisi ngɛ jeha 1914 ɔ mi? (Hyɛ sisi ningma.)

³ Maa pee jeha 1880 ɔ mi ɔ, Mawu sɔmɔli nu gbami ko nɛ  Daniel gba fɔ si pe jeha 2,500 ji nɛ ɔ sisi. Daniel gba ke: “Matsɛmɛ nɛ ɔmɛ a yi nɔ ɔ, Mawu nɛ ngɛ hiɔwe ɔ maa to matsɛ yemi ko sisi, nɛ e se be poe gblegbleegble. Matsɛ yemi nɛ ɔ, nɔ ko nɔ ko be nyɛe maa ye e nɔ.” (Dan. 2:44) Baiblo Kaseli ɔmɛ kɛ je nyɔngmahi abɔ tsɔɔ kaa níhi nɛ sa kadimi maa ya nɔ ngɛ jeha 1914 ɔ mi. Nihi fuu nɛ a hi si ngɛ jamɛ a be ɔ mi ɔ hyɛ ní kpakpahi blɔ. Womi ngmalɔ ko de ke: “Nihi fuu hyɛ blɔ kaa ní kpakpahi maa ba ngɛ jeha 1914 ɔ mi.” Se ngɛ jamɛ a jeha a nyagbe ɔ, Je Mi Ta Kekleekle ɔ fɛ. Enɛ ɔ ha nɛ Baiblo gbami ba mi. Hwɔ, zugba mimiɛmi, gbenɔ hiɔhi, kɛ Baiblo gbami kpahi nɛ ba mi ɔ ma nɔ mi kaa Yesu Kristo bɔni nɔ yemi ngɛ hiɔwe kaa Mawu Matsɛ Yemi ɔ nya Matsɛ ngɛ jeha 1914 ɔ mi. * Yehowa bɔni Matsɛ yemi ngɛ blɔ kpa ko nɔ kɛ gu e Bi ɔ nɛ e kɛ lɛ hi matsɛ sɛ nɔ kaa Mesia Matsɛ ɔ nɔ!

4. Mɛni ji kekleekle nɔ́ nɛ Yesu pee benɛ a wo lɛ Matsɛ ɔ, nɛ mɛni e pee ngɛ lɔɔ se?

⁴ Benɛ Mawu wo Yesu Matsɛ ɔ, kekleekle nɔ́ nɛ Yesu pee ji kaa e kɛ e Tsɛ ɔ He Nyɛlɔ kpanaku, nɛ ji Satan ɔ hwu ta. Yesu kɛ e bɔfo ɔmɛ fiee Satan kɛ e daimonio ɔmɛ kɛ je hiɔwe. Enɛ ɔ ha nɛ nihi nɛ a ngɛ hiɔwe ɔ ná bua jɔmi wawɛɛ, se nihi nɛ a ngɛ zugba a nɔ ɔ lɛɛ, haomi nɛ nya wa ji nɔ́ nɛ a kɛ kpe. (Kane Kpojemi 12:7-9, 12.) Lɔɔ se ɔ, Matsɛ ɔ bɔni e webi nɛ a ngɛ zugba a nɔ ɔ a he tsumi, e bɔni mɛ ní tsɔɔmi, nɛ e bɔni a he blɔ nya tomi konɛ a pee Mawu suɔmi nya ní. E webi ɔmɛ pee tue bumi kɛ ha lɛ. Nyɛ ha wa susu nɔ nɛ wa ma nyɛ maa kase ngɛ tue bumi nɛ a pee ha lɛ ɔ mi ɔ he nɛ waa hyɛ.

5. Mɛni he tsumi nɛ ya nɔ ngɛ jeha 1914 kɛ jeha 1919 ɔ sisije ɔ a kpɛ mi?

⁵ Benɛ Yesu fiee Satan kɛ e daimonio ɔmɛ kɛ je hiɔwe ɔ, Yehowa ha nɛ e ya slaa e se nyɛɛli nɛ a ngɛ zugba a nɔ ɔ, nɛ e tsu a he. Gbalɔ Malaki tu nɔ́ nɛ Yesu ba pee ɔ he munyu kaa e ji he tsumi. (Mal. 3:1-3) Yinɔ sane tsɔɔ kaa nɔ́ nɛ ɔ ya nɔ ngɛ jeha 1914 kɛ jeha 1919 ɔ sisije ɔ a kpɛ mi. * Loko wa maa piɛɛ Yehowa weku nɛ ngɛ je kɛ wɛ ɔ he ɔ, e sa nɛ wa he nɛ tsɔ nɛ waa pee wa he klɔuklɔu. (1 Pet. 1:15, 16) E sɛ nɛ waa ngɔ lakpa jami kɛ wo jami nɛ waa kɛ ngɛ Mawu hae ɔ he mu, nɛ jã kɛ̃ nɛ e sɛ nɛ waa kɛ wa he nɛ wo ma kudɔmi ní peepeehi hu a mi.

6. Mɛnɔmɛ haa wɔ mumi mi niye ní, nɛ mɛni heje nɛ mumi mi niye ní ɔ he hia a?

⁶ Lɔɔ se ɔ, Matsɛ Yesu hla “tsɔlɔ anɔkualetsɛ kɛ ní lelɔ” ko. Tsɔlɔ nɛ ɔ ma ha Yesu se nyɛɛli ɔmɛ mumi niye ní kpakpahi be tsuaa be. Yesu se nyɛɛli ɔmɛ tsuo a ji “kuu kake” ngɛ e sisi. (Mat. 24:45-47; Yoh. 10:16) Kɛ je jeha 1919 kɛ ma nɛ ɔ, nyɛmimɛ nyumuhi nɛ a pɔ mɛ nu ɔ a kpɛti nihi bɔɔ ko kɛ anɔkuale yemi ngɛ “tsɔli kpa amɛ” mumi niye ní hae. Mumi niye ní babauu nɛ tsɔlɔ anɔkualetsɛ kɛ ní lelɔ ɔ kɛ haa wɔ ɔ yeɔ bua wɔ nɛ wa hemi kɛ yemi ɔ mi waa. E yeɔ bua wɔ nɛ wa bɔɔ mɔde wawɛɛ kaa wa be hae nɛ nɔ́ ko nɛ wo jami nɛ waa kɛ haa Mawu ɔ he mu. Jã kɛ̃ nɛ e yeɔ bua wɔ nɛ wa je mi bami, wa susumi, wa juɛmi, kɛ wa nɔmlɔtso ɔ hu he tsɔɔ. Kɛ gu mumi mi niye ní nɛ ɔ nɔ ɔ, a tsɔɔ wɔ bɔnɛ wa ma plɛ kɛ tsu nítsumi nɛ he hia pe kulaa nɛ ji, fiɛɛmi nítsumi ɔ ha. Anɛ o yeɔ mumi mi niye ní nɛ ɔ daa lo?

7. Benɛ Yesu ngɛ zugba a nɔ ɔ, mɛni nítsumi nɛ he hia sisi nɛ e je, nɛ mɛni be a ma tsu nítsumi nɛ ɔ kɛ ya si?

⁷ Benɛ Yesu je e sɔmɔmi nítsumi ɔ sisi ngɛ zugba a nɔ ɔ, e de ke: “E hia kaa ma ya fiɛɛ Mawu Matsɛ Yemi ɔ he sane kpakpa a ngɛ ma kpa amɛ a mi hulɔ, ejakaa  lɔɔ nɛ Mawu tsɔ mi ke ma ba tsu.” (Luka 4:43) Yesu ngɔ jeha etɛ kɛ fã kɛ tsu fiɛɛmi nítsumi nɛ ɔ wawɛɛ nitsɛ. E fã e kaseli ɔmɛ ke: “Nyɛ ya fiɛɛ ke, ‘Hiɔwe Matsɛ Yemi ɔ su si ta!’” (Mat. 10:7) Benɛ Yesu gbo nɛ a tle lɛ si se ɔ, e gba kɛ fɔ si kaa e se nyɛɛli ɔmɛ maa fiɛɛ sane kpakpa a “kɛ ya su je ɔ nyagbe he tɔɔ.” (Níts. 1:8) E wo mɛ si kaa lɛ nitsɛ e maa piɛɛ a he kɛ tsu nítsumi nɛ he hia nɛ ɔ kɛ ya si je nɛ ɔ nyagbe.—Mat. 28:19, 20.

8. Ngɛ mɛni blɔ nɔ nɛ Matsɛ ɔ wo e se nyɛɛli nɛ a ngɛ zugba a nɔ ɔ he wami konɛ a fiɛɛ?

⁸ Benɛ jeha 1919 ke e suu ɔ, fiɛɛmi nítsumi ɔ hɛ mi tsake. (Mat. 24:14) Matsɛ ɔ ngɛ nɔ yee ngɛ hiɔwe nɛ e bua e webi bɔɔ ko nɛ a tsu a he ɔ a nya ngɛ zugba a nɔ. Kuu nɛ ɔ bu Yesu fami nɛ ngɛ heii kaa a fiɛɛ kaa Mawu Matsɛ Yemi ɔ ngɛ nɔ yee ngɛ hiɔwe ɔ tue! (Níts. 10:42) Kaa nɔ hyɛmi nɔ ɔ, ngɛ September jeha 1922 ɔ mi ɔ, a pee mahi a kpɛti kpe ko ngɛ Cedar Point, Ohio, ngɛ U.S.A. Nihi maa pee 20,000 nɛ a fĩ Matsɛ Yemi ɔ se ɔ ya kpe nɛ ɔ eko. Ngɛ jamɛ a kpe ɔ sisi ɔ, Nyɛminyumu Rutherford tu munyu ko nɛ e yi ji, “Matsɛ Yemi ɔ.” E de ke: “Nyɛɛ hyɛ, Matsɛ ɔ ngɛ nɔ yee! Nyɛ ji e gɔgɔ fiali. Enɛ ɔ he ɔ, nyɛɛ fia, nyɛɛ fia, nyɛɛ fia Matsɛ ɔ kɛ e matsɛ yemi ɔ he gɔgɔ!” Nyɛmimɛ ɔmɛ a bua jɔ wawɛɛ nitsɛ! E nɔ jena a, nihi nɛ a ya kpe ɔ a kpɛti nihi akpe enyɔ kɛ a he wo fiɛɛmi nítsumi ɔ mi. A ti ni komɛ je he nɛ a pee kpe ɔ ngɛ ɔ kɛ ho hehi nɛ kɛ pe si tomi 45 nɛ a ya fiɛɛ kɛ tsɔɔ nihi. Nyɛmiyo ko de ke: “Ye hɛ be munyu nɛ a tu kaa wa ya fia matsɛ yemi ɔ he gɔgɔ ɔ nɔ jee. Ye hɛ hu be kã nɛ nyɛmimɛ je kpo ɔ nɔ jee!” Ni kpahi nɛ a ya kpe ɔ hu nu he jã.

9, 10. (a) Mɛni sukuuhi a he blɔ nya a to konɛ a kɛ tsɔse wɔ kɛ ha fiɛɛmi nítsumi ɔ? (b) Mɛni blɔ nɔ o ná tsɔsemi nɛ ɔ he se ngɛ?

⁹ Benɛ jeha 1922 ke e suu ɔ, fiɛɛli nɛ a he hiɛ pe 17,000 kɛ kã ngɛ fiɛɛmi nítsumi ɔ tsue ngɛ mahi 58 a nɔ momo ngɛ je ɔ mi tsuo. Se e he hia nɛ a tsɔse mɛ. Ngɛ kaseli ɔmɛ a be ɔ mi ɔ, Matsɛ nɛ Mawu hla a kɛ blɔ tsɔɔmi nɛ mi tɛ̃ ha e kaseli ɔmɛ. E tsɔɔ mɛ munyu nɛ e sa kaa a ya fiɛɛ, hehi nɛ e sa kaa a ya fiɛɛ ngɛ, kɛ bɔnɛ e sa kaa a fiɛɛ ha. (Mat. 10:5-7; Luka 9:1-6; 10:1-11) Mwɔnɛ ɔ hu ɔ, Yesu ngɔɔ blɔ tsɔɔmi kɛ haa e se nyɛɛli, nɛ e haa mɛ níhi nɛ maa ye bua mɛ konɛ a nyɛ nɛ a fiɛɛ, nɛ a pee tsɔɔli kpakpahi. (2 Tim. 3:17) Yesu gu Kristofoli asafo ɔ nɔ kɛ ngɛ e se nyɛɛli tsɔsee konɛ a nyɛ nɛ a tsu fiɛɛmi nítsumi ɔ. E guu Teokrase Sɔmɔmi Sukuu ɔ nɔ kɛ tsɔseɔ mɛ. A peeɔ sukuu nɛ ɔ ngɛ asafohi nɛ hiɛ pe 111,000 nɛ a ngɛ je kɛ wɛ ɔ a mi. Sukuu nɛ ɔ ye bua fiɛɛli nɛ́ a hiɛ pe ayɔ kpaago nɛ a nyɛɔ fiɛɛ kɛ haa ‘nihi tsuo,’ nɛ a tsɔɔ mɛ ní.—Kane 1 Korintobi 9:20-23.

¹⁰ Jehanɛ se hu ɔ, a to Baiblo sukuu kpahi a he blɔ nya konɛ a kɛ tsɔse asafo mi nikɔtɔmahi, blɔ gbali, nyumuhi nɛ a ngɔɛ yihi, Kristofoli nɛ a sɛ gba si himi mi, Asafo  ɔ Nítsumi He Ajla Toli kɛ a yihi, kpokpa nɔ hyɛli kɛ a yihi, kɛ ma se sane kpakpa fiɛɛli. * Ni komɛ nɛ a ya Baiblo Sukuu Kɛ Ha Nihi Nɛ A Sɛ Gba Si Himi Mi ɔ eko ɔ kɛ bua jɔmi de ke: “Tsɔsemi klɛdɛɛ nɛ wa nine su nɔ ɔ ha nɛ suɔmi nɛ wa ngɛ kɛ ha Yehowa a mi wa wawɛɛ, nɛ e dla wɔ saminya konɛ waa ye bua ni kpahi.”

11. Kɛ Matsɛ Yemi fiɛɛli ɔmɛ plɛ kɛ da yi wami nya nɛ a nyɛ ngɛ fiɛɛe ha kɛɛ?

¹¹ Satan nɛ ji wa he nyɛlɔ ɔ le kaa wa ngɛ mɔde bɔe wawɛɛ kaa wa maa fiɛɛ sane kpakpa a kɛ ha nihi konɛ waa tsɔɔ mɛ ní. Enɛ ɔ he ɔ, be komɛ ɔ, e tuaa wɔ tɛ̃ɛ, nɛ be komɛ hu ɔ, e guu blɔhi nɛ a yɔsemi yee ɔ a nɔ kɛ tuaa wɔ konɛ wa kpa Matsɛ Yemi sɛ gbi ɔ fiɛɛmi. Se Satan be manye yee. He blɔ nɛ Yehowa kɛ ha e Bi ɔ ‘nɔ kuɔ kulaa pe nɔkɔtɔma yemi, kɛ he blɔ, kɛ he wami, kɛ nɔ yemi tsuo.’ (Efe. 1:20-22) Akɛnɛ Yesu ji Matsɛ heje ɔ, e kɛ he blɔ nɛ e ngɛ ɔ maa bu e kaseli ɔmɛ a he, nɛ e ma kudɔ mɛ konɛ a nyɛ nɛ a pee e Tsɛ ɔ suɔmi nya ní. * A ngɛ sane kpakpa a fiɛɛe nɛ a ngɛ nimli ayɔhi abɔ nɛ a hɛɛ tsui kpakpa a ní tsɔɔe konɛ a ja Yehowa. E ji he blɔ ngua nitsɛ nɛ wa ná kaa wa piɛɛ nihi nɛ a ngɛ nítsumi ngua nɛ ɔ tsue ɔ a he!

12. Kɛ je jeha 1914 kɛ ma nɛ ɔ, mɛni blɔ nɔ Yesu to Mawu sɔmɔli a he blɔ nya ngɛ blɔ kpakpa nɔ ngɛ?

¹² Kɛ je benɛ a wo Yesu matsɛ ngɛ jeha 1914 ɔ mi kɛ ma nɛ ɔ, Yesu to Mawu sɔmɔli a he blɔ nya ngɛ blɔ kpa ko nɔ, konɛ a nyɛ nɛ a pee e Tsɛ ɔ suɔmi nya ní. (Kane Yesaya 60:17.) Ngɛ jeha 1919 ɔ mi ɔ, a hlaa sɔmɔmi blɔ tsɔɔlɔ ngɛ asafo tsuaa asafo mi, nɛ e hyɛɛ fiɛɛmi nítsumi ɔ nɔ. Ngɛ jeha 1927 ɔ mi ɔ, asafohi bɔni fiɛɛmi ngɛ wehi a mi daa Hɔgba. Ngɛ jeha 1931 ɔ mi ɔ, Yehowa sɔmɔli ngɔ biɛ nɛ ji Yehowa Odasefoli ɔ kɛ fɔ a nɔ. Enɛ ɔ wo mɛ he wami nɛ a tsu Matsɛ Yemi nítsumi ɔ kɛ kã pe be ko nɛ be ɔ. (Yes. 43:10-12) Loko e maa su jeha 1938 ɔ, a fɔɔ sɔ kɛ hlaa asafo mi nikɔtɔmahi. Se ngɛ jamɛ a jeha a mi ɔ, a kpa jã peemi. Mohu ɔ, a daa níhi nɛ Ngmami ɔ tsɔɔ kaa e sa nɛ nɔ ko nɛ e su he loko e sɔmɔ ɔ nɔ kɛ hlaa mɛ. Ngɛ jeha 1972 ɔ mi ɔ, a ha we nɛ nyɛminyumu kake ko pɛ nɛ e hyɛ asafo ɔ nɔ hu, se mohu nikɔtɔmahi a kuu nɛ hyɛɔ asafo ɔ nɔ. A wo nyumuhi tsuo nɛ a he su kɛ ha sɔmɔmi kaa asafo mi nikɔtɔmahi aloo sɔmɔli ɔ he wami konɛ a ye bua kɛ ‘hyɛ asafo ɔ nɔ.’ (1 Pet. 5:2) Ngɛ jeha 1976 mi ɔ, a to ajla toli a kuu kakaaka ekpa he blɔ nya konɛ a hyɛ Matsɛ Yemi nítsumi ɔ nɔ ngɛ je kɛ wɛ. Blɔ Tsɔɔmi Ajla Toli Ɔmɛ nɛ a hyɛɛ ajla toli a kuu nɛ ɔmɛ a nɔ. Kɛ je jamɛ a  be ɔ mi kɛ ma nɛ ɔ, Yesu ya nɔ nɛ e ngɛ e se nyɛɛli ɔmɛ a he blɔ nya toe bɔɔbɔɔbɔɔ konɛ a pee níhi ngɛ Mawu blɔ tsɔɔmi nya.

13. Ke o hyɛ níhi nɛ Mesia Matsɛ ɔ tsu ngɛ e jeha 100 nɔ yemi ɔ mi ɔ, kɛ e peeɔ mo kɛɛ?

¹³ Mo susu níhi nɛ Mesia Matsɛ ɔ pee ngɛ e jeha 100 nɔ yemi ɔ mi ɔ he nɛ o hyɛ. E ngɛ ni komɛ a he tsue konɛ a nyɛ nɛ a da Yehowa nane mi. E kudɔɔ Matsɛ Yemi sane kpakpa fiɛɛmi nítsumi ɔ ngɛ mahi 239 a nɔ, nɛ e tsɔse nimli ayɔhi abɔ nɛ a ngɛ Yehowa jae. E ha nɛ kake peemi ngɛ e se nyɛɛli anɔkualetsɛmɛ nɛ a hiɛ pe ayɔ kpaago ɔ a kpɛti. Nimli nɛ ɔmɛ je a tsui mi nɛ a ngɛ e Tsɛ ɔ suɔmi nya ní pee. (La 110:3) Ngɛ anɔkuale mi ɔ, Yehowa gu Mesia Matsɛ Yemi ɔ nɔ kɛ ngɛ ní nguanguahi nɛ a ngɛ nyakpɛ pee. E maa pee ní nguanguahi po pe jã hwɔɔ se!

14. (a) Ke wa sɔle ke ‘Mawu Matsɛ Yemi ɔ nɛ ba’ a, mɛni wa ngɛ bie ɔ? (b) Mɛni ji wa jeha 2014 jeha ngmami ɔ, nɛ mɛni heje nɛ ngmami nɛ ɔ sa saminya a?

¹⁴ E ngɛ mi kaa Yehowa ngɔ e Bi Yesu Kristo kɛ hi matsɛ sɛ ɔ nɔ ngɛ jeha 1914 ɔ mi kaa Mesia Matsɛ mohu lɛɛ, se lɔɔ tsɔɔ we kaa ‘Matsɛ Yemi ɔ ba.’ (Mat. 6:10) Baiblo ɔ gba kɛ fɔ si kaa Yesu maa ‘ye e he nyɛli a nɔ.’ (La 110:2) Loloolo ɔ, adesahi ngɛ si tee kɛ ngɛ Mawu Matsɛ Yemi ɔ woe. Ke wa sɔle kaa Mawu Matsɛ Yemi ɔ nɛ ba a, nɔ́ nɛ wa ngɛ bie ji, Mesia Matsɛ ɔ, kɛ nihi nɛ a maa piɛɛ e he kɛ ye Matsɛ ɔ nɛ ba kpata adesa nɔ yemihi kɛ nihi nɛ teɔ si kɛ woɔ Matsɛ Yemi ɔ a hɛ mi ngɛ zugba a nɔ. Enɛ ɔ ma ha nɛ gbami nɛ ngɛ gbami Daniel 2:44 ɔ maa ba mi. ‘Mawu Matsɛ Yemi ɔ ma kpata matsɛ yemi kpa amɛ tsuo a hɛ mi.’ E ma kpata adesahi a nɔ yemihi tsuo nɛ teɔ si kɛ woɔ Mawu Matsɛ Yemi ɔ a hɛ mi. (Kpoj. 6:1, 2; 13:1-18; 19:11-21) E be kɛe kulaa nɛ ní nɛ ɔ maa ba mi. Enɛ ɔ he ɔ, e da blɔ kaa wa je jeha 2014 jeha ngmami ɔ kɛ je Mateo 6:10. Ngmami ɔ ji: “O Matsɛ Yemi ɔ nɛ ba.” Amlɔ nɛ ɔ Yesu Kristo nɔ yemi ɔ ná jeha 100!

15, 16. (a) Mɛni bua jɔmi níhi maa ya nɔ ngɛ Kristo Jeha Akpe Nɔ Yemi ɔ sisi? (b) Mɛni ji nyagbe nɔ́ nɛ Yesu nɛ ji Mesia Matsɛ ɔ maa pee, nɛ kɛ lɔɔ maa sa Yehowa yi mi tomi ɔ he ha kɛɛ?

¹⁵ Ke Mesia Matsɛ ɔ kpata Mawu he nyɛɛli ɔmɛ a hɛ mi ɔ, e ma sake Satan kɛ e daimonio ɔmɛ ngɔ wo muɔ voo ɔ mi jeha akpe. (Kpoj. 20:1-3) Ke Satan kɛ e daimonio ɔmɛ be hu ɔ, Matsɛ Yemi ɔ kɛ oya yemi maa ye bua nihi konɛ a ná Yesu kpɔmi afɔle sami ɔ he se. E ma je níhi tsuo nɛ Adam yayami ɔ ngɔ kɛ ba a kɛ je. Matsɛ ɔ ma tle nimli ayɔhi abɔ nɛ a gbo ɔ si kɛ ba wami mi ekohu, nɛ e maa to blɔ nya konɛ a tsɔɔ mɛ Yehowa he ní ngɛ je kɛ wɛ. (Kpoj. 20:12, 13) Zugba a tsuo maa pee paradeiso ekohu kaa Eden abɔɔ ɔ. Adesahi nɛ a yeɔ anɔkuale ɔ maa ye mluku ekohu.

¹⁶ Ngɛ Kristo Jeha Akpe Nɔ Yemi ɔ nyagbe ɔ, Mesia Matsɛ Yemi ɔ ma ha nɛ yi mi tomi nɛ Yehowa kɛ bɔ zugba a maa ba mi. Lɔɔ se ɔ Yesu maa ngɔ Matsɛ Yemi ɔ kɛ ha e Tsɛ ɔ ekohu. (Kane 1 Korinto Bi 15:24-28.) Kɛ je jamɛ a be ɔ mi kɛ yaa a, e he be hiae nɛ nɔ ko nɛ e pee mi dalɔ ngɛ Mawu bimɛ nɛ a ngɛ zugba a nɔ ɔ kɛ Yehowa a kpɛti hu. Mawu bimɛ nɛ a ngɛ hiɔwe kɛ ni nɛmɛ nɛ a ngɛ zugba a nɔ tsuo maa pee kake ngɛ a hiɔwe Tsɛ ɔ sisi.

17. Mɛni o mwɔ o yi mi kpɔ kaa o maa pee kɛ fĩ Matsɛ Yemi ɔ se?

¹⁷ Bua jɔmi níhi nɛ ya nɔ ngɛ Kristo jeha 100 nɔ yemi ɔ mi ɔ tsɔɔ kaa Yehowa ngɛ níhi kudɔe, nɛ e yi mi tomi kɛ ha zugba a maa ba mi. Nyɛ ha nɛ waa ya nɔ nɛ waa kɛ anɔkuale yemi nɛ sɔmɔ lɛ, konɛ waa fia Matsɛ ɔ kɛ e Matsɛ Yemi ɔ he gɔgɔ. Wa ngɛ nɔ mi mami kaa e be kɛe kulaa nɛ Yehowa ma ha wa sɔlemi nɛ nyɛɛ se nɛ ɔ heto: “O Matsɛ Yemi ɔ nɛ e ba”!