1, 2. (a) Mɛnɔ yo kpeemi ma ha nɛ bɔfohi nɛ a ngɛ hiɔwe ɔ ma ná bua jɔmi ɔ? (b) Mɛni sane bimihi a he wa ma susu?

YO KPEEMI he blɔ nya tomi heɔ be babauu. Se wa ma susu matsɛ ko yo kpeemi he. A je yo kpeemi nɛ ɔ he blɔ nya tomi sisi maa pee jeha 2,000 ji nɛ ɔ. E be kɛe kulaa nɛ yo kpeemi ligbi ɔ maa su nɛ a maa ngɔ ayɛflo ɔ ya ha e huno ɔ. Jamɛ a ligbi ɔ, a maa fia la ngɛ Matsɛ ɔ we ɔ mi, nɛ hiɔwe bɔfohi ma la ke: “A je Mawu yi! Ejakaa Nyɔmtsɛ, wa Mawu Ope ɔ ngɛ matsɛ yee! Nyɛ ha nɛ wa bua nɛ jɔ, nɛ wa nya! Nyɛ ha nɛ wa je e yi, ejakaa e kle! Ejakaa be ɔ su nɛ Tobi ɔ maa kpee yo, nɛ ayɛflo ɔ dla e he ngɔ to.”—Kpoj. 19:6, 7.

² “Tobi” nɛ a tu e he munyu kaa e maa kpee yo ɔ ji Yesu Kristo. (Yoh. 1:29) Mɛni tade e wo kɛ ha yo kpeemi ɔ? Mɛnɔ ji yo nɛ e yaa kpee ɔ? Kɛ a dla yo ɔ he ha lɛ kɛɛ? Mɛni be yo kpeemi ɔ maa ba nɔ? Yo kpeemi nɛ ɔ ma ha nɛ bɔfohi nɛ ngɛ hiɔwe ɔ ma ná bua jɔmi. Se anɛ nihi nɛ a ngɛ hɛ kɛ nɔ fɔmi kaa a maa hi zugba a nɔ kɛ ya neneene ɔ hu ma ná bua jɔmi lo? Wa suɔ nɛ wa ná sane bimi nɛ ɔmɛ a heto. Enɛ ɔ he ɔ, nyɛ ha nɛ waa ya nɔ nɛ wa susu La 45 ɔ he.

3, 4. (a) Mɛni a de kɛ kɔ Ayɛflo Huno ɔ yo kpeemi tade ɔ he, nɛ mɛni ha nɛ e ná bua jɔmi wawɛɛ ɔ? (b) Mɛnɔmɛ ji ‘matsɛmɛ a biyi ɔmɛ,’ nɛ mɛnɔ hu ji “manyɛ” ɔ nɛ e kɛ Ayɛflo Huno ɔ ná bua jɔmi ɔ?

³ Kane La 45:8, 9. Yesu Kristo nɛ ji Ayɛflo Huno ɔ wo e yo kpeemi tade saminyayoo ɔ. E tade ɔ mi ngɛ via jee liliili kɛ “tsopa kɛ e he via kpakpa.” Tsopa kɛ e he via nɛ ɔmɛ ekomɛ ji, mimɛ kɛ kasia. Ní nɛ ɔmɛ piɛɛ níhi nɛ Israelbi ɔmɛ kɛ peeɔ nu klɔuklɔu nɛ a kɛ pɔɔ nɔ ɔ he.—2 Mose 30:23-25.

⁴ La kpakpahi nɛ a ngɛ fiae ngɛ Ayɛflo Huno ɔ nɛ ji matsɛ ɔ we ɔ mi ɔ ha nɛ Ayɛflo Huno ɔ bua jɔ wawɛɛ kaa e yo kpeemi be ɔ ngɛ sue. E kɛ “manyɛ” ɔ tsuo a bua jɔ. “Manyɛ” ɔ ji Mawu blɔ nya tomi ɔ fã nɛ ngɛ hiɔwe ɔ nɛ. ‘Matsɛmɛ a biyihi’ nɛ ji, bɔfo klɔuklɔuhi piɛɛ Mawu blɔ nya tomi ɔ fã nɛ ɔ he. Hyɛ bɔnɛ nihi a bua maa jɔ ha benɛ a nu munyu nɛ nyɛɛ se nɛ ɔ: ‘Nyɛ ha nɛ wa bua nɛ jɔ, nɛ wa nya! Ejakaa be ɔ su nɛ Tobi ɔ maa kpee yo, nɛ ayɛflo ɔ dla e he ngɔ to.’

5. Mɛnɔ ji “Tobi ɔ yo ɔ”?

⁵ Kane La 45:10, 11. Wa le Ayɛflo Huno ɔ, se wa li ayɛflo ɔ? Ayɛflo ɔ daa si kɛ ha nimli a kuu ko, se pi nɔ kake. Kuu nɛ ɔ ji Kristofoli nɛ a pɔ mɛ nu nɛ a yibɔ ji 144,000 ɔ. (Kane Efesobi 5:23, 24.) A maa piɛɛ Yesu Kristo he kɛ ye matsɛ ngɛ Mesia Matsɛ Yemi ɔ mi. (Luka 12:32) Nimli 144,000 ‘nyɛɛɔ tobi ɔ se kɛ yaa he tsuaa he nɛ e yaa.’ (Kpoj. 14:1-4) Akɛnɛ a ba pee “Tobi ɔ yo” heje ɔ, a kɛ Tobi ɔ ma ya hi si ngɛ hiɔwe.—Kpoj. 21:9; Yoh. 14:2, 3.

6. Mɛni heje nɛ a tsɛɛ nihi nɛ a pɔ mɛ nu ɔ ke “matsɛ biyo” ɔ, nɛ mɛni heje nɛ a de mɛ ke ‘a hɛ nɛ je mɛ nitsɛmɛ a ma mi bi ɔmɛ, kɛ a wekuli ɔmɛ tsuo a nɔ’ ɔ?

⁶ A tsɛɛ ayɛflo ɔ ke “biyo,” nɛ a tsɛɛ lɛ ke “matsɛ biyo” hulɔ. (La 45:13) Mɛnɔ ji “matsɛ” nɛ ɔ? Lɛ ji Yehowa. E ngɔ Kristofoli nɛ a pɔ mɛ nu ɔ kɛ pee e “bimɛ.” (Rom. 8:15-17) Akɛnɛ a maa kpee mɛ kɛ ho hiɔwe ya heje ɔ, a de mɛ ke: “O hɛ nɛ je mo nitsɛ o ma mi bi ɔmɛ, kɛ o weku li ɔmɛ tsuo a nɔ.” E sa nɛ a ngɔ a juɛmi kɛ ma ‘níhi nɛ ngɛ hiɔwe ɔ a nɔ, se pi níhi nɛ ngɛ zugba a nɔ.’—Kol. 3:1-4.

7. (a) Mɛni blɔ nɔ Kristo gu kɛ ngɛ yo nɛ e maa kpee hwɔɔ se ɔ dlae? (b) Kɛ ayɛflo ɔ buɔ e huno nɛ e maa gba hwɔɔ se ɔ ha kɛɛ?

⁷ Jehahi babauu ji nɛ ɔ nɛ Kristo bɔni ayɛflo ɔ dlami kɛ ha yo kpeemi nɛ maa ya nɔ ngɛ hiɔwe ɔ. Bɔfo Paulo tsɔɔ nya kaa Kristo ‘suɔ asafo ɔ, nɛ e ngɔ lɛ nitsɛ e wami ngɔ ha ngɛ e he. Kristo ngɔ sane kpakpa a, nɛ e kɛ tsu asafo ɔ he kaa bɔnɛ a kɛ nyu fɔɔ nɔ́ he ɔ, nɛ e kɛ pee lɛ klɔuklɔu. E pee enɛ ɔ, konɛ e ngɔ asafo ɔ ngɔ pee lɛ nitsɛ e nɔ́. Asafo ɔ ngɛ kaa nɔ ko nɛ he ngɛ fɛu saminya; se ko be e he ɔ, e hɛ mi kuã we, nɛ nɔ́ yaya kpa ko be e he.’ (Efe. 5:25-27) Paulo de Kristofoli nɛ a pɔ mɛ nu nɛ a hi blema Korinto ɔ ke: “I suɔ nyɛ saminya kaa bɔnɛ Mawu nitsɛ suɔ nyɛ ɔ. I suɔ kaa nyɛɛ ye Kristo anɔkuale kaa bɔnɛ yomiyo yeɔ nyumu nɛ ba bi e si ɔ anɔkuale, nɛ e hyɛɛ e he nɔ saminya kɛ ya siɔ yo kpeemi ligbi ɔ.” (2 Kor. 11:2) Ayɛflo ɔ ‘he ngɛ fɛu’ ha Matsɛ Yesu Kristo nɛ ji Ayɛflo Huno ɔ. Ayɛflo ɔ hu buu e huno nɛ e maa gba hwɔɔ se ɔ kaa e “nyɔmtsɛ,” enɛ ɔ he ɔ, e ‘baa e he si ha lɛ.’

8. Mɛni heje nɛ a tu ayɛflo ɔ he munyu kaa “a wo lɛ ní saminyayoo” ɔ?

⁸ Kane La 45:13, 14a. “A wo ayɛflo ɔ ní saminyayoo” kɛ ha matsɛ ɔ yo kpeemi ɔ. Ngɛ Kpojemi 21:2 ɔ, a ngɔ ayɛflo ɔ kɛ to ma ko he. Ma nɛ ɔ ji ‘Yerusalem Ma He ɔ nɛ́ a dla e he ha lɛ kaa ayɛflo nɛ a wo lɛ ní ta nɛ a kɛ lɛ yaa ha e huno.’ Hiɔwe ma nɛ ɔ hɛɛ “Mawu hɛ nyami ɔ” nɛ  e ngɛ kpɛe “kaa tɛ nɛ he jua wa nitsɛnitsɛ, aloo yaspi tɛ; e mi hu tsɔ keikei kaa ahuhuɛ.” (Kpoj. 21:10, 11) Kpojemi womi ɔ tsɔɔ kaa Yerusalem Ma He ɔ ngɛ fɛu saminya. (Kpoj. 21:18-21) E be nyakpɛ kaa la polɔ ɔ tu ayɛflo ɔ he munyu kaa “a wo lɛ ní saminyayoo”! Jã ji bɔnɛ e sa kaa e ba, ejakaa yo kpeemi ɔ maa ya nɔ ngɛ hiɔwe.

9. Mɛnɔ a maa ngɔ ayɛflo ɔ ya ha, nɛ kɛ ayɛflo ɔ dla e he ha kɛɛ?

⁹ A maa ngɔ ayɛflo ɔ kɛ ya ha Ayɛflo Huno ɔ nɛ ji Mesia Matsɛ ɔ. Ayɛflo Huno ɔ ngɛ ayɛflo ɔ dlae. ‘E ngɔ munyu ɔ kɛ tsu ayɛflo ɔ he kaa bɔnɛ a kɛ nyu fɔɔ nɔ́ he ɔ.’ Ayɛflo ɔ ‘ngɛ klɔuklɔu, nɛ piami ko piami ko be e he.’ (Efe. 5:26, 27) E sa nɛ ayɛflo ɔ nɛ e wo tade saminyayoo kɛ ha yo kpeemi ɔ hulɔ. Jã ji bɔnɛ e maa pee! Ngɛ anɔkuale mi ɔ, “bo nɛ e bu ɔ sika tsu kpakpa a kɛ lo.” ‘Bo nɛ a lo ní saminyawiiwi kɛ wo mi nɛ e ma bu kɛ ba matsɛ ɔ ngɔ.’ “Mawu ha lɛ tade nɛ a kɛ kploba ngmingmiingmi nɛ ngɛ kpɛe klaiklai pee” konɛ e kɛ dla e he kɛ ha Tobi ɔ yo kpeemi ɔ. “Ní kpakpahi nɛ ni klɔuklɔu ɔmɛ peeɔ ɔ, lɔɔ ji kploba a nɛ.”—Kpoj. 19:8.

10. Mɛni be Tobi ɔ maa kpee yo ɔ?

¹⁰ Kane Kpojemi 19:7. Mɛni be Tobi ɔ maa kpee yo ɔ? E ngɛ mi kaa “ayɛflo ɔ dla e he ngɔ to” yo kpeemi ɔ mohu lɛɛ, se munyu nɛ nyɛɛ se ɔ kɔ we yo kpeemi ɔ he. Mohu ɔ, e tsɔɔ nɔ́ nɛ maa ba ngɛ amanehlu ngua a nyagbe fã a mi. (Kpoj. 19:11-21) Anɛ enɛ ɔ tsɔɔ kaa Matsɛ ɔ nɛ ji Ayɛflo Huno ɔ maa kpee yo loko e maa gbe e kunimi yemi ɔ nya lo? Ohoo. Nina nɛ a bɔ he amaniɛ ngɛ Kpojemi womi ɔ mi ɔ, yɛ nɔ setsɔsetsɔ. Ngɛ La 45 ɔ mi ɔ, a tsɔɔ kaa ke Matsɛ Yesu Kristo ‘ngɔ e klaate ɔ kɛ wo e fiɔ he’ nɛ e ya ye e he nyɛli ɔmɛ a nɔ kunimi ta a, loko yo kpeemi ɔ maa ba nɔ.—La 45:3, 4.

11. Mɛni Kristo maa pee loko e yo kpeemi ɔ maa ba nɔ? Moo to nya setsɔsetsɔ.

¹¹ Enɛ ɔ he ɔ, wa ma nyɛ maa ma nya si kaa kekleekle ɔ, a ma kpata “ajuama kpanaku” nɛ ji Babilon Ngua a hɛ mi. Babilon Ngua a ji je ɔ lakpa jami blɔ nya tomi. (Kpoj. 17:1, 5, 16, 17; 19:1, 2) Lɔɔ se ɔ, Kristo ma kpata Satan je ɔ hɛ mi ngɛ Harmagedon. Harmagedon ji ‘ta nɛ Mawu Ope ɔ maa hwu kɛ je ní yayamihi kɛ je je ɔ mi.’ (Kpoj. 16:14-16; 19:19-21) Nyagbe ɔ, Matsɛ Tatsɛ ɔ maa nu Satan kɛ e daimonio ɔmɛ ngɔ wo muɔ voo ɔ mi nɛ a maa pee kaa nihi nɛ a gbo. Ke Matsɛ Tatsɛ ɔ pee enɛ ɔ pɛ kɛkɛ e gbe e kunimi yemi ɔ nya.—Kpoj. 20:1-3.

12, 13. (a) Mɛni be Tobi ɔ yo kpeemi ɔ maa ya nɔ? (b) Mɛnɔmɛ ma nya Tobi ɔ yo kpeemi ɔ he ngɛ hiɔwe?

¹² Amlɔ nɛ ɔ, Kristo ba nɛ e ngɛ. Enɛ ɔ he ɔ, ke Kristofoli nɛ a pɔ mɛ nu ɔ a ti nɔ ko gbo ɔ, a tleɔ lɛ si kɛ yaa hiɔwe. Ke a kpata Babilon Ngua a hɛ mi se ɔ, Yesu ma bua nimli 144,000 ɔ a kpɛti nihi nɛ maa piɛ ngɛ zugba a nɔ ɔ a nya kɛ ho hiɔwe ya. (1 Tes. 4:16, 17) Enɛ ɔ tsɔɔ kaa loko Harmagedon ta a ma fɛ ɔ, nihi tsuo nɛ a pɔ mɛ nu nɛ ji “ayɛflo” ɔ, maa ho hiɔwe ya. Ke a gbe Harmagedon ta a nya a, Tobi ɔ yo kpeemi ɔ ma nyɛ maa ba nɔ. Yo kpeemi nɛ ɔ maa hi bua jɔmi nitsɛnitsɛ! Kpojemi 19:9 ɔ de ke: “Nihi nɛ a kpee mɛ kɛ ba Tobi ɔ yo kpeemi okplɔɔ ɔ he ɔ, a gbaa mɛ!” Niinɛ, ayɛflo kuu ɔ mi bi nɛ a yibɔ ji 144,000 ɔ ma ná bua jɔmi nitsɛnitsɛ. Nɛ Ayɛflo Huno ɔ nɛ ji Matsɛ ɔ hu bua maa jɔ wawɛɛ nitsɛnitsɛ. Ngɛ blɔ ko nɔ ɔ, e nyɛmimɛ ɔmɛ tsuo maa piɛɛ e he nɛ a kɛ lɛ maa ‘ye ní, nɛ a maa nu ní ngɛ okplɔɔ he ngɛ matsɛ yemi ɔ mi.’ (Luka 22:18, 28-30) Se pi Ayɛflo Huno ɔ kɛ ayɛflo ɔ pɛ nɛ a ma nya Tobi ɔ yo kpeemi ɔ he.

¹³ Kaa bɔnɛ wa kane kɛ sɛ hlami ɔ, hiɔwe bɔfohi maa pee kake nɛ a ma la ke:  “Nyɛ ha nɛ wa bua nɛ jɔ, nɛ wa nya! Nyɛ ha nɛ wa je [Yehowa] yi, ejakaa e kle! Ejakaa be ɔ su nɛ Tobi ɔ maa kpee yo, nɛ ayɛflo ɔ dla e he ngɔ to.” (Kpoj. 19:6, 7) Nɛ Yehowa sɔmɔli nɛ a ngɛ zugba a nɔ ɔ hu nɛɛ? Anɛ mɛ hu a ma nya lo?

14. Kaa bɔnɛ La 45 ɔ tsɔɔ ɔ, mɛnɔmɛ ji ayɛflo ɔ he “yihewi nɛ a li nyumu ɔ”?

¹⁴ ‘Tiro biyo ɔ kɛ niatsɛmɛ pe kulaa maa ngɔ nike ní kɛ ba sa o hɛ mi. A maa ngɔ manyɛ ɔ he yihewi nɛ a li nyumu ɔ ba ha mo. A maa ngɔ mɛ kɛ ba kɛ bua jɔmi kɛ nyami; A maa sɛ matsɛ we ɔ mi.’ (La 45:12, 14b, 15, NW.) Gbalɔ Zakaria gba kɛ fɔ si kaa ngɛ nyagbe be ɔ mi ɔ, nihi nɛ a ngɛ je ma amɛ tsuo a mi ɔ kɛ nihi nɛ a pɔ mɛ nu ɔ a kpɛti nihi nɛ a piɛ ɔ maa pee kake kɛ sɔmɔ Yehowa. E ngma ke: “Jamɛ a be ɔ, nibwɔhi maa je ma slɔɔtohi a mi kɛ ba Yuda; ni nyɔngma ma ba nu Yuda no kake nɛ a maa pɛtɛ e tade he, nɛ a ma de lɛ ke, ‘Waa kɛ mo maa ya, ejakaa wa nu kaa Mawu kɛ nyɛ ngɛ.’” (Zak. 8:23) La 45:12 ɔ ngɔ “Tiro biyo ɔ kɛ niatsɛmɛ pe kulaa” a kɛ da si ha okadi peemi mi “ni nyɔngma” amɛ. A kɛ nike ní ba ha nihi nɛ a pɔ mɛ nu ɔ a kpɛti nihi nɛ piɛ ɔ ‘konɛ a kɛ sa a hɛ mi,’ nɛ́ a ye bua mɛ konɛ a sɔmɔ Yehowa. Kɛ je jeha 1935 ɔ kɛ ma nɛ ɔ, nimli ayɔhi abɔ ngmɛ blɔ nɛ nihi nɛ a pɔ mɛ nu ɔ a kpɛti nihi nɛ piɛ ɔ ngɛ ‘mɛ blɔ tsɔɔe konɛ a pee nɔ́ nɛ da.’ (Dan. 12:3) Kristofoli nɛ a pɔ mɛ nu ɔ a huɛmɛ nɛ a yeɔ anɔkuale ɔ yu a he ngɛ lakpa jami mi ní peepeehi tsuo a he, enɛ ɔ he ɔ, a tsɛɛ mɛ ke “yihewi nɛ a li nyumu.” A jɔɔ a he nɔ ha Yehowa, nɛ a kɛ a ní peepee tsɔɔ kaa a yeɔ Ayɛflo Huno nɛ ji Matsɛ ɔ anɔkuale.

15. Ngɛ mɛni blɔ nɔ nɛ ayɛflo ɔ he “yihewi nɛ a li nyumu ɔ” piɛɛ ayɛflo kuu ɔ he kɛ ngɛ ní tsue?

 ¹⁵ Nihi nɛ a pɔ mɛ nu ɔ a kpɛti nihi nɛ piɛ nɛ ji ayɛflo kuu ɔ a bua jɔ a huɛmɛ nɛ ji “yihewi nɛ a li nyumu” ɔ a he wawɛɛ, ejakaa a kɛ kã ngɛ ‘sane kpakpa nɛ kɔɔ Matsɛ Yemi ɔ he ɔ fiɛɛe’ kɛ ngɛ je ɔ mi tsuo kpae. (Mat. 24:14) “Mumi ɔ, kɛ ayɛflo ɔ” ngɛ dee ke: ‘Ba!’ Nɛ nɔ tsuaa nɔ nɛ maa nu nɔ́ nɛ mumi ɔ kɛ ayɛflo ɔ ngɛ dee ɔ hu deɔ ke: “Ba!” (Kpoj. 22:17) Ngɛ anɔkuale mi ɔ, “to kpa” amɛ nu nɛ nihi nɛ a pɔ mɛ nu ɔ ngɛ dee ke “Ba!” Enɛ ɔ he ɔ, mɛ hu a ba piɛɛ a he nɛ a ngɛ nihi dee ke a “Ba!” —Yoh. 10:16.

16. Mɛni he blɔ Yehowa ha to kpa amɛ?

¹⁶ Nihi nɛ a pɔ mɛ nu ɔ a kpɛti nihi nɛ a piɛ ɔ suɔ a huɛmɛ nɛ ji to kpa amɛ. A bua jɔ kaa Yehowa ngmɛ to kpa amɛ nɛ a ngɛ zugba a nɔ ɔ blɔ konɛ mɛ hu a nya Tobi ɔ yo kpeemi ɔ he. A gba kɛ fɔ si kaa a maa ngɔ manyɛ ɔ he ‘yihewi nɛ a li nyumu ɔ kɛ ba matsɛ ɔ ngɔ kɛ bua jɔmi kɛ nyami.’ Matsɛ we ɔ ji Mawu mumi mi sɔlemi we ngua a nɛ. Ngɛ anɔkuale mi ɔ, to kpa amɛ nɛ a ngɛ hɛ kɛ nɔ fɔmi kaa a maa hi si kɛ ya neneene ɔ hu maa piɛɛ nihi nɛ a ngɛ hiɔwe ɔ a he kɛ nya Tobi ɔ yo kpeemi ɔ he. E da blɔ kaa Kpojemi womi ɔ tsɔɔ kaa “nimli asafo” ɔ “daa si ngɛ matsɛ sɛ ɔ, kɛ Tobi ɔ hɛ mi.” A ngɛ Yehowa sɔmɔe ngɛ mumi mi sɔlemi we ngua a kpo ɔ nɔ ngɛ zugba a nɔ.—Kpoj. 7:9, 15.

17, 18. Mɛni se nihi nɛ a maa hi je ehe ɔ mi ɔ ma ná ngɛ Tobi ɔ yo kpeemi ɔ he? Mɛnɔmɛ Kristo maa pee tsɛ kɛ ha ngɛ e Jeha Akpe Nɔ Yemi ɔ mi?

¹⁷ Kane La 45:16. Ke Kristo ayɛflo ɔ he “yihewi nɛ a li nyumu ɔ” na kaa yo kpeemi ɔ ngɔ jɔɔmi kɛ ngɛ je ehe ɔ mi bae ɔ, a ma ná bua jɔmi wawɛɛ nitsɛ. Ayɛflo Huno ɔ nɛ ji Matsɛ ɔ maa hyɛ nihi nɛ a ngɛ zugba a nɔ ɔ a nɔ. E ma tle e “nɛmɛ ɔmɛ” nɛ a hi zugba a nɔ ɔ si nɛ a ma ba plɛ pee e ‘bimɛ’ ngɛ zugba a nɔ. (Yoh. 5:25-29; Heb. 11:35) Ayɛflo Huno ɔ maa hla e bimɛ nɛ a ngɛ zugba a nɔ ɔ a kpɛti ni komɛ konɛ a sɔmɔ kaa ‘nikɔtɔmahi.’ Atsinyɛ jemi ko be he kaa Kristo maa hla asafo mi nikɔtɔmahi nɛ a yeɔ anɔkuale mwɔnɛ ɔ a kpɛti ni komɛ konɛ a nyɛɛ nihi a hɛ mi ngɛ je ehe ɔ mi.—Yes. 32:1.

¹⁸ Ngɛ Kristo Jeha Akpe Nɔ Yemi ɔ sisi ɔ, Kristo maa pee tsɛ kɛ ha ni kpahi hulɔ. Ngɛ anɔkuale mi ɔ, Kristo maa pee tsɛ kɛ ha nihi tsuo nɛ a maa hi zugba a nɔ nɛ a ma ná neneene wami ɔ, ejakaa a ngɛ hemi kɛ yemi ngɛ Yesu kpɔmi afɔle sami ɔ mi. (Yoh. 3:16) Yesu ma ba pee a ‘Neneene Tsɛ.’—Yes. 9:6, 7.

19, 20. Mwɔnɛ ɔ, kɛ bua jɔmi munyu nɛ a tu ngɛ La 45 ɔ saa anɔkuale Kristofoli tsuo a he ha kɛɛ?

¹⁹ Kane La 45:1, 17. Ngɛ anɔkuale mi ɔ, níhi nɛ ya nɔ nɛ a ngma ngɛ La 45 kɔɔ Kristofoli tsuo a he. Nihi nɛ a pɔ mɛ nu ɔ a kpɛti nihi nɛ piɛ ngɛ zugba a nɔ ɔ, a bua jɔ kaa a ba ná le kaa e be kɛe nɛ a ma ya piɛɛ a nyɛmimɛ ɔmɛ kɛ Ayɛflo Huno ɔ a he ngɛ hiɔwe. Enɛ ɔ woɔ to kpa amɛ he wami nɛ a yaa nɔ nɛ a baa a he si kɛ haa Matsɛ nɛ e hɛ mi ngɛ nyami ɔ. A bua hu jɔ kaa a huɛmɛ ji nihi nɛ a pɔ mɛ nu ɔ a kpɛti nihi nɛ piɛ ngɛ zugba a nɔ ɔ. Ke a gbe yo kpeemi ɔ nya a, Kristo kɛ nihi nɛ maa piɛɛ e he kɛ ye matsɛ ɔ maa jɔɔ nihi nɛ maa hi zugba a nɔ ɔ babauu.—Kpoj. 7:17; 21:1-4.

²⁰ Amlɔ nɛ ɔ, wa ngɛ “nɔ́ kpakpa” ko nɛ kɔɔ Mesia Matsɛ Yemi ɔ he ɔ blɔ hyɛe. Anɛ e sɛ nɛ enɛ ɔ nɛ wo wɔ he wami konɛ wa ha nɛ nihi nɛ ‘a le e biɛ’ ɔ lo? Nyɛ ha nɛ waa piɛɛ nihi nɛ a ma ‘je Matsɛ ɔ yi kɛ ya neneene’ ɔ a he.