1, 2. Mɛni si himi slɔɔtohi a mi nɛ wa ti nɔ tsuaa nɔ ngɛ ngɛ wa wekuhi a mi? Mɛni blɔ slɔɔtohi a nɔ wa ti nɔ tsuaa nɔ gu kɛ kase anɔkuale ɔ?

YEHOWA ji nɔ nɛ to weku ɔ sisi. (Efe. 3:14, 15) Eko ɔ, ke wa je weku kake mi po ɔ, wa ngɛ su slɔɔtoslɔɔtohi, nɛ e slo si himi mi nɛ wa ti nɔ tsuaa nɔ ngɛ. Eko ɔ, o kɛ o fɔli hi si kɛ je o jokuɛ mi kɛ ba si benɛ o wa. Ni komɛ ngɛ nɛ eko ɔ, hiɔ aloo oslaa ko ha nɛ a fɔli gbo si mɛ. Nɛ ni komɛ po lɛɛ a li a fɔli kulaa.

² Ngɛ Yehowa weku ɔ mi bimɛ ɔmɛ a kpɛti ɔ, e slo blɔ nɛ a ti nɔ tsuaa nɔ gu nɔ kɛ ba le anɔkuale ɔ. Eko ɔ, a kɛ anɔkuale ɔ tsɔse mo, nɛ o fɔli du Mawu jami mi sisi tomi mlaahi kɛ wo o tsui mi. (5 Mose 6:6, 7) Aloo eko ɔ, o piɛɛ nihi akpehi abɔ nɛ Yehowa sɔmɔli fiɛɛ kɛ ha mɛ nɛ a ba na anɔkuale ɔ a he.—Rom. 10:13-15; 1 Tim. 2:3, 4.

3. Mɛni ji ní komɛ nɛ saa wɔ tsuo wa he?

³ Ngɛ níhi nɛ wa wo ta a tsuo se ɔ, ní komɛ ngɛ nɛ saa wɔ tsuo wa he. Adam tue gbomi ɔ heje ɔ, wɔ tsuo wa yi mluku, wa peeɔ yayami, nɛ wa gboɔ. (Rom. 5:12) Se ngɛ enɛ ɔ tsuo se ɔ, wɔ nɛ wa sɔmɔɔ Yehowa nɛ wa yeɔ lɛ anɔkuale ɔ ma nyɛ ma tsɛ Yehowa ke, “wa Tsɛ.” Ngɛ Yesaya 64:8 ɔ, Israelbi ɔmɛ de ke: ‘Yehowa, mo ji wa Tsɛ.’ Yesu hu je e sɔlemi he nɔ hyɛmi nɔ́ ɔ sisi ke: “Wa Tsɛ nɛ ngɛ hiɔwe; O biɛ ɔ he nɛ tsɔ.”—Mat. 6:9.

4, 5. Ke wa suɔ kaa suɔmi nɛ wa ngɛ ha wa hiɔwe Tsɛ nɛ ji Yehowa a mi nɛ wa a, e maa hi wawɛɛ kaa wa susu mɛni níhi a he?

 ⁴ Akɛnɛ wa sɔmɔɔ Yehowa nɛ ji wa hiɔwe Tsɛ ɔ ngɛ anɔkuale mi heje ɔ, e haa wɔ wa hiami níhi, nɛ e buɔ wa he. La polɔ ɔ tsɔɔ kaa Yehowa de ke: ‘Nɔ nɛ suɔ mi, nɛ e le ye biɛ Yehowa a, ma he e yi wami, nɛ ma bu e he.’ (La 91:14) Niinɛ, Yehowa jeɔ suɔmi mi nɛ e buɔ wa he konɛ wa he nyɛli nɛ a ko kpata wa hɛ mi pɛsɛpɛsɛ.

⁵ Bɔnɛ pee nɛ suɔmi nɛ wa ngɛ kɛ ha wa hiɔwe Tsɛ ɔ mi nɛ wa a, nyɛ ha nɛ wa susu níhi etɛ nɛ a he hia nɛ nyɛɛ se nɛ ɔ a he: (1) Wa Tsɛ ɔ ji wa Nɔ́ Halɔ. (2) Yehowa ji wa He Bulɔ. (3) Nɛ Mawu ji wa Huɛ nɛ pe kulaa. Ke wa ngɛ ní nɛ ɔmɛ a he susue ɔ, e maa hi wawɛɛ kaa wa ma susu huɛ bɔmi nɛ ngɛ waa kɛ Mawu wa kpɛti ɔ he, kɛ bɔnɛ wa ma plɛ kɛ wo e hɛ mi nyami ha kaa wa Tsɛ ɔ hu he. E maa hi wawɛɛ hu kaa wa ma susu jɔɔmihi nɛ Yehowa kɛ haa nihi nɛ a hɛɛ mɛ kɛ suu e he ɔ he.—Yak. 4:8.

6. Mɛni ji blɔ kake nɔ nɛ Yehowa guu kɛ tsɔɔ kaa lɛ ji ‘nike ní kpakpahi tsuo’ a Halɔ?

⁶ Kaselɔ Yakobo ngma ke: “Nike ní kpakpa, kɛ níhi nɛ hi kɛ pi si nɛ wa naa yaka a, lɛ tsuo Mawu lɛ haa wɔ.” (Yak. 1:17) Wami nɛ Yehowa ke wɔ ɔ po ji nike ní nɛ se be. (La 36:9) Ke wa pee Yehowa suɔmi nya ní ɔ, wa ma ná jɔɔmihi fuu amlɔ nɛ ɔ, nɛ wa ma ná neneene wami hu ngɛ je ehe ɔ mi. (Abɛ 10:22; 2 Pet. 3:13) Se ngɛ haomihi nɛ Adam tue gbomi ɔ kɛ ba a tsuo se ɔ, mɛni blɔ nɔ wa maa gu kɛ ná neneene wami?

7. Mɛni Mawu pee konɛ huɛ bɔmi gbagbanii nɛ hi waa kɛ lɛ wa kpɛti?

⁷ Ngɛ anɔkuale mi ɔ, Yehowa ji Nɔ́ Halɔ Ngua ngɛ blɔhi fuu a nɔ. Kaa nɔ hyɛmi nɔ́ ɔ, e naa nɔ mɔbɔ, enɛ ɔ he ɔ, e jeɔ wɔ kɛ jeɔ haomihi a mi. Niinɛ, Adam yayami ɔ heje ɔ, wɔ tsuo wa ji yayami peeli nɛ wa yi mluku. (Rom. 3:23) Se akɛnɛ Yehowa ngɛ suɔmi heje ɔ, e sɛ hlami nɛ e to blɔ nya konɛ huɛ bɔmi gbagbanii nɛ hi waa kɛ lɛ wa kpɛti. Bɔfo Yohane ngma ke: “Blɔ nɔ nɛ Mawu gu kɛ je e suɔmi ɔ kpo kɛ tsɔɔ wɔ ji nɛ ɔ nɛ; e tsɔ e Bi kake too ɔ kɛ ba je ɔ mi, konɛ kɛ gu e Bi ɔ nɔ ɔ, wa ná wami. Bɔnɛ suɔmi ngɛ ji nɛ ɔ nɛ; pi wɔ nɛ wa sɛ hlami kɛ suɔ Mawu; Mawu mohu lɛ suɔ wɔ. Enɛ ɔ heje ɔ, e tsɔ e Bi ɔ kɛ ba, konɛ e ba dla waa kɛ Mawu wa kpɛti, nɛ a ngɔ wa he yayami ɔmɛ ngɔ pa wɔ.”—1 Yoh. 4:9, 10.

8, 9. Mɛni blɔ nɔ Yehowa gu kɛ tsɔɔ kaa e ji Nɔ́ Halɔ Ngua ngɛ Abraham kɛ Isak be ɔ mi? (Moo hyɛ foni nɛ ngɛ nikasemi ɔ sisije ɔ.)

⁸ Maa pee jeha 1,900 loko a fɔ Yesu ɔ, nɔ́ ko ya nɔ ngɛ Abraham si himi mi. Nɔ́ nɛ ya nɔ ɔ tsɔɔ nɔ́ nɛ Yehowa maa je suɔmi mi maa pee konɛ adesahi tsuo nɛ a peeɔ tue bumi kɛ haa lɛ ɔ, nɛ a ná neneene wami. Hebribi 11:17-19 ɔ de ke: “Hemi kɛ yemi lɛ ha nɛ Abraham ngɔ e bi Isak kɛ ha Mawu, benɛ Mawu ka lɛ hyɛ ɔ. E ngɛ mi kaa bi nɛ ɔ he si nɛ a wo Abraham lɛɛ, se kɛ̃ e pee klaalo kaa e maa ngɔ e bi kake too ɔ kɛ sã bɔ ha Mawu. Mawu de Abraham ke, ‘O bi Isak lɛ ma ba wo nina ha mo.’ Abraham he ye kaa Mawu ngɛ he wami nɛ e kɛ ma tle Isak si kɛ je gbeje tete. Nɛ ke a ma de ngɛ blɔ ko nɔ ɔ, Mawu tle lɛ si kɛ je gbeje ha Abraham niinɛ.” Kaa bɔnɛ Abraham suɔ kaa e maa ngɔ e bi Isak kɛ sã afɔle ha Yehowa a, jã kɛ̃ nɛ Yehowa je suɔmi mi nɛ e ngɔ e Bi Yesu Kristo kɛ sã afɔle konɛ e kɛ he adesahi a yi wami.—Kane Yohane 3:16, 36.

⁹ Isak bua maa jɔ wawɛɛ nitsɛ benɛ a kɛ lɛ sɛ̃ afɔle ɔ! Atsinyɛ jemi ko be he kaa benɛ Yehowa tsɔɔ Abraham agbosu  ko ngɛ e se konɛ e ngɔ lɔɔ mohu kɛ sã afɔle ɔ, Isak bua jɔ wawɛɛ. (1 Mose 22:10-13) Abraham wo lejɛ ɔ biɛ ke Yehowa-yire. Biɛ nɛ ɔ sisi ji, ‘Yehowa ha.’—1 Mose 22:14.

10, 11. Mɛnɔmɛ nɛ ngɛ ‘nítsumi nɛ haa nɛ nihi dlaa a kɛ Mawu a kpɛti’ ɔ hɛ mi nyɛɛe, nɛ mɛni blɔ nɔ a guu kɛ peeɔ jã?

¹⁰ Ke wa ngɛ nɔ́ nɛ Yehowa peeɔ kɛ tsɔɔ kaa e ji Nɔ́ Halɔ Ngua a he susue ɔ, e sa nɛ waa le nɔ́ nɛ Yesu Kristo hu pee kɛ ha wɔ konɛ waa na lɛ si. Paulo pee jã, enɛ ɔ he ɔ, e ngma ke: “Suɔmi nɛ Kristo ngɛ kɛ ha wɔ ɔ, woɔ wɔ he wami. Kristo gbo ha wɔ tsuo. Nɛ wa heɔ yeɔ kaa gbenɔ nɛ nɔ kake gbo ha nihi tsuo nɛ ɔ tsɔɔ kaa ni ɔmɛ tsuo gbo. Kristo gbo ha nihi tsuo, konɛ nihi nɛ a hɛ ngɛ ɔ, a ko pee mɛ nitsɛmɛ suɔmi nya ní hu; se mohu a pee Kristo suɔmi nya ní. Ejakaa Kristo gbo, nɛ Mawu tle lɛ si kɛ ba wami mi ekohu ngɛ mɛɛ a he.”—2 Kor. 5:14, 15.

¹¹ Kristofoli nɛ a hi si ngɛ kaseli ɔmɛ a be ɔ mi ɔ suɔ Mawu, nɛ a bua jɔ he blɔ nɛ a ná kɛ sɔmɔ lɛ ɔ he. Enɛ ɔ he ɔ, a kɛ bua jɔmi tsu ‘nítsumi nɛ haa nɛ nihi dlaa a kɛ Mawu a kpɛti ɔ.’ Nítsumi nɛ ɔ ji fiɛɛmi nítsumi ɔ nɛ. Fiɛɛmi nítsumi ɔ ha nɛ nihi nɛ a hɛɛ tsui kpakpa a dla a kɛ Mawu a kpɛti, nɛ a ba pee Mawu huɛmɛ, nɛ nyagbenyagbe ɔ, a ma plɛ Mawu bimɛ ngɛ hiɔwe. Mwɔnɛ ɔ, Yehowa sɔmɔli nɛ a pɔ mɛ nu ɔ hu ngɛ fiɛɛmi nítsumi nɛ ɔ tsue. A ngɛ sɔmɔe kaa bɔfohi ngɛ Mawu kɛ Kristo a biɛmi. Fiɛɛmi nítsumi nɛ a ngɛ tsue ɔ ha nɛ nihi nɛ a hɛɛ tsui kpakpa nɛ a baa a he si ɔ ngɛ mɛ hɛe kɛ ngɛ Yehowa he sue, nɛ a ba ngɛ e sɔmɔli pee.—Kane 2 Korintobi 5:18-20; Yoh. 6:44; Níts. 13:48.

12, 13. Mɛni wa maa pee kɛ tsɔɔ kaa wa bua jɔ níhi tsuo nɛ Yehowa peeɔ kɛ haa wɔ ɔ he?

¹² Kristofoli nɛ a ngɛ hɛ kɛ nɔ fɔmi kaa a maa hi zugba a nɔ ɔ a bua jɔ níhi nɛ Nɔ́ Halɔ Ngua a peeɔ haa mɛ ɔ he. Enɛ ɔ he ɔ, a piɛɛ nihi nɛ a pɔ mɛ nu ɔ a he kɛ ngɛ Matsɛ Yemi fiɛɛmi nítsumi ɔ tsue. Waa kɛ Baiblo ɔ tsuɔ ní ngɛ fiɛɛmi nítsumi ɔ mi. Baiblo ɔ hu ji nike ní ko nɛ se be nɛ Mawu ha wɔ. (2 Tim. 3:16, 17) Ke waa kɛ tsu ní saminya ngɛ wa fiɛɛmi nítsumi ɔ mi ɔ, wa ma nyɛ maa ye bua nihi konɛ a ná neneene wami. Wa ti nɔ tsuaa nɔ ngɔɔ e hɛ kɛ fɔɔ nike ní kpa ko hu nɔ konɛ wa nyɛ nɛ waa fiɛɛ saminya. Nike ní nɛ ɔ ji mumi klɔuklɔu ɔ. (Zak. 4:6; Luka 11:13) Yearbook of Jehovah’s Witnesses womi ɔ eko tsuaa eko nɛ baa a haa nɛ wa naa kaa fiɛɛmi nítsumi ɔ ngɛ yiblii woe wawɛɛ. Hyɛ he blɔ ngua nɛ wa ná kaa wɔ hu wa ngɛ nítsumi nɛ ɔ eko tsue konɛ wa kɛ je wa Tsɛ kɛ wa Nɔ́ Halɔ ɔ yi!

¹³ Ke wa susu níhi tsuo nɛ Mawu haa wɔ ɔ he ɔ, e sa nɛ wa bi wa he ke: ‘Anɛ i fiɛɛɔ kɛ kã kɛ tsɔɔ kaa ye bua jɔ níhi nɛ Yehowa peeɔ haa mi ɔ he lo? Mɛni ma pee konɛ ma nyɛ ma pee sane kpakpa fiɛɛlɔ nɛ he be?’ Ke wa bua jɔ níhi nɛ Mawu peeɔ kɛ haa wɔ ɔ a he ɔ, lɔɔ ma ha nɛ waa kɛ Matsɛ Yemi ɔ maa pee nɔ́ titli ngɛ wa si himi mi. Ke wa peeɔ jã a, Yehowa ma ha wɔ níhi nɛ hia wɔ ɔ be tsuaa be. (Mat. 6:25-33) Akɛnɛ Mawu suɔ wɔ heje ɔ, wa bɔɔ mɔde kaa wa maa pee e suɔmi nya ní, konɛ e bua nɛ jɔ.—Abɛ 27:11.

14. Mɛni blɔ nɔ Yehowa guu kɛ peeɔ e webi a Kpɔlɔ?

¹⁴ La polɔ David la ke: “E fi mi, nɛ ye ní ngɛ mɔbɔ; se Nyɔmtsɛ ɔ hɛ ngɛ ye nɔ. Ye Mawu, mo ji ye he piɛɛlɔ; mo ji ye kpɔlɔ.” (La 40:17) Yehowa tsɔɔ si abɔ kaa lɛ ji Kpɔlɔ kɛ ha e webi, titli ɔ, ke a he nyɛli ngɛ mɛ yi mi wae aloo a ngɛ hlae nɛ a kpata a hɛ mi. Wa bua jɔ kaa ngɛ behi kaa jã mi ɔ, Yehowa yeɔ bua wɔ konɛ waa ya nɔ nɛ waa ye lɛ anɔkuale!

15. Moo tsɔɔ bɔnɛ tsɛ ko nɛ e ngɛ suɔmi bu e bi ko he ha.

¹⁵ Tsɛ nɛ ngɛ suɔmi haa e bimɛ nɔ́, nɛ e buɔ a he. Ke e na kaa oslaa ko ba a nɔ ɔ, e kɛ oya yemi jeɔ mɛ. Nyɛminyumu ko kai haomi ko nɛ ba e nɔ benɛ e ji jokuɛ ɔ. Ligbi ko ɔ, e kɛ e papaa ya fiɛɛmi. Benɛ a kpa nɛ a ma we mi ɔ, he nɛ a gu ɔ, e biɔ nɛ a po pa. Hiɔmi ngua ko nɛ jamɛ a ligbi ɔ mɔtu ɔ, enɛ ɔ he ɔ, pa a hyi. Ja a tuu kɛ ma tɛ ngua komɛ nɛ a ngɛ pa a mi ɔ a nɔ loko a ma nyɛ maa po. E sɛ hlami nɛ e tu kɛ ma tɛ ngua a eko nɔ nɛ e sane kɛ nɔ pa a mi. E mu kɛ ya nyu ɔ sisi si enyɔ. E bua jɔ kaa e papaa kɛ oya yemi pɛtɛ e he wawɛɛ nɛ e je lɛ kɛ je pa a mi! Jã nɔuu kɛ̃ nɛ wa hiɔwe Tsɛ ɔ hu kpɔ̃ɔ wɔ kɛ jeɔ je yaya nɛ ɔ kɛ e nɔ yelɔ nɛ ji Satan ɔ dɛ mi. Ngɛ anɔkuale mi ɔ, Yehowa pɛ ji wa He Bulɔ nɛ e nɔ be.—Mat. 6:13; 1 Yoh. 5:19.

16, 17. Mɛni blɔ nɔ Yehowa gu kɛ ye bua Israelbi ɔmɛ nɛ e bu a he benɛ a kɛ Amalekbi ɔmɛ hwu ta a?

¹⁶ Ngɛ jeha 1513 L.M.B. ɔ mi ɔ, Yehowa je suɔmi mi nɛ e bu e webi a he. E kpɔ Israelbi ɔmɛ kɛ je nyɔguɛ yemi mi ngɛ Egipt, nɛ e bu a he kɛ po Wo Tsu ɔ. Benɛ Israelbi ɔmɛ nyɛɛ nga a nɔ nɛ e piɛ bɔɔ nɛ a maa su Sinai Yoku ɔ he ɔ, a ya je kpo ngɛ Refidim.

¹⁷ Ngɛ gbami nɛ ngɛ 5 Mose 3:15 ɔ nya a, eko ɔ, Satan susu kaa Israelbi ɔmɛ be he bumi ko, enɛ ɔ he ɔ, e bɔ mɔde kaa e ma tua mɛ. Satan gu Amalekbi ɔmɛ a nɔ kɛ pee enɛ ɔ. Amalekbi ɔmɛ ji Israelbi ɔmɛ a he nyɛli. (4 Mose 24:20) Mo susu nɔ́ nɛ Yehowa pee kɛ gu nyumu anɔkualetsɛmɛ nɛ ji Yoshua, Mose, Aaron, kɛ Hur nɔ ɔ he nɛ o hyɛ. Be mi nɛ Yoshua kɛ Amalekbi ɔmɛ ngɛ ta hwue ɔ, Mose, Aaron, kɛ Hur hu ngɛ yoku ko nɔ ngɛ  he nɛ a ngɛ ta a hwue ngɛ ɔ kasa nya. Ke Mose wo e nine nɔ pɛ kɛkɛ Israelbi ɔmɛ bɔni a he nyɛli ɔmɛ a nɔ kunimi yemi. Benɛ e kɔni gbo ɔ, Aaron kɛ Hur hɛɛ e kɔni ɔmɛ a mi ngɛ hiɔwe. Nyagbenyagbe ɔ, Yehowa ye bua ‘Yoshua nɛ e ye Amalekbi ɔmɛ a nɔ butuu.’ (2 Mose 17:8-13) Mose ma afɔle sami la tɛ ko ngɛ lejɛ ɔ, nɛ e wo lejɛ ɔ biɛ ke Yehowa-nisi. E sisi ji ‘Yehowa ji ye we aflangaa.’—Kane 2 Mose 17:14, 15.

18, 19. Ngɛ wa be nɛ ɔ mi ɔ, mɛni níhi a he Mawu bu wa he ngɛ?

¹⁸ Yehowa buɔ nihi nɛ a suɔ lɛ nɛ a peeɔ tue bumi kɛ haa lɛ ɔ a he. Kaa bɔnɛ Yehowa bu Israelbi ɔmɛ a he ngɛ Refidim ɔ, jã kɛ̃ nɛ e buɔ wa he kɛ jeɔ wa he nyɛli a dɛ mi. Yehowa buu e webi a he konɛ Abosiami nine nɛ ko su a nɔ. Kaa nɔ hyɛmi nɔ́ ɔ, Mawu bu e webi nɛ a kɛ a he wui ma kudɔmi sanehi a mi ɔ a he. Yehowa bu e webi a he ngɛ Germany kɛ ma kpahi a nɔ ngɛ jeha 1930 kɛ jeha 1940 ɔmɛ a mi ngɛ Nazi nɔ yemi ɔ sisi. A ngma bɔnɛ Yehowa bu e webi a he ngɛ haomi behi kaa kikɛ ɔ a mi ɔ ngɛ wa womi tɛtlɛɛ ɔmɛ kɛ Yearbook ɔmɛ a mi. Ke wa kaneɔ munyu nɛ ɔmɛ nɛ wa susuɔ a he ɔ, lɔɔ haa nɛ hɛ kɛ nɔ fɔmi nɛ wa ngɛ ngɛ Yehowa mi kaa lɛ ji wa Wesa He ɔ mi waa.—La 91:2.

¹⁹ Yehowa jee suɔmi mi nɛ e guu e we asafo ɔ kɛ womihi a nɔ kɛ haa wɔ blɔ tsɔɔmihi nɛ poɔ wa he piɛ. Mo susu ga womihi nɛ a kɛ ha wɔ lingmi nɛ ɔ nɛ wa ngɛ he se náe ɔ he nɛ o hyɛ. Ajuama bɔmi, dã demi, kɛ ajuama bɔmi he womihi, fonihi, kɛ lahi hyi je ɔ tɔ. Se Yehowa kaiɔ wɔ konɛ waa yu wa he kɛ je níhi nɛ ma nyɛ ma puɛ huɛ bɔmi nɛ ngɛ waa kɛ lɛ wa kpɛti ɔ a he. Kaa nɔ hyɛmi nɔ́ ɔ, lingmi nɛ ɔ, a je suɔmi mi nɛ a wo wɔ ga kaa waa yu wa he ngɛ huɛ yaya bɔmi he, konɛ waa hyɛ wa he nɛ hi ngɛ huɛ bɔmi hehi nɛ ngɛ Internet ɔ nɔ ɔ he. *—1 Kor. 15:33.

20. Mɛni he bumi kɛ blɔ tsɔɔmi nɔ wa nine suɔ ngɛ asafo ɔ mi?

²⁰ Mɛni wa maa pee kɛ tsɔɔ kaa Yehowa ngɛ wɔ ‘ní tsɔe’? E sa nɛ waa ye e mlaa amɛ a nɔ. (Yes. 54:13) Yehowa guɔ wa asafo ɔmɛ a nɔ kɛ tsɔɔ wɔ blɔ nɛ e buɔ wa he. Asafo mi nikɔtɔma amɛ daa Ngmami ɔ nɔ kɛ yeɔ bua wɔ nɛ a woɔ wɔ ga. (Gal. 6:1) Yehowa gu nimli a kpɛti ‘nike ní’ nɛ ɔmɛ a nɔ kɛ ngɛ wa nɔ hyɛe ngɛ suɔmi mi. (Efe. 4:7, 8) Ke nikɔtɔma amɛ wo wɔ ga a, kɛ e sa kaa wa pee wa ní ngɛ he ha kɛɛ? E sa nɛ waa je wa tsui mi nɛ waa bu mɛ tue konɛ Yehowa nɛ jɔɔ wɔ.—Heb. 13:17.

21. (a) Mɛni e sa kaa wa mwɔ wa yi mi kpɔ kaa wa maa pee? (b) Mɛni he lɛ wa ma susu ngɛ munyu nɛ nyɛɛ se ɔ mi?

²¹ E sa nɛ waa mwɔ wa yi mi kpɔ kaa wa ma ha nɛ mumi klɔuklɔu ɔ nɛ kudɔ wɔ konɛ waa bu wa hiɔwe Tsɛ ɔ blɔ tsɔɔmi tue. E he hia hu nɛ wa susu e Bi Yesu Kristo si himi he konɛ waa bɔ mɔde nɛ waa kase lɛ. Akɛnɛ Yesu pee tue bumi kɛ ya su gbenɔ mi heje ɔ, Yehowa jɔɔ lɛ babauu. (Filip. 2:5-11) Ke wɔ hu waa kɛ wa hɛ fɔ Yehowa nɔ kɛ wa tsui tsuo ɔ, e maa jɔɔ wɔ. (Abɛ 3:5, 6) Enɛ ɔ he ɔ, be tsuaa be ɔ, nyɛ ha nɛ waa ngɔ wa hɛ kɛ fɔ Yehowa nɔ kaa lɛ ji wa Nɔ́ Halɔ kɛ wa He Bulɔ nɛ e nɔ be. Wa bua jɔ wawɛɛ kaa wa ná he blɔ kɛ ngɛ lɛ sɔmɔe! Mɛni blɔ nɔ Yehowa ji wa Huɛ nɛ pe kulaa? Wa ma susu sane bimi nɛ ɔ he ngɛ munyu nɛ nyɛɛ se ɔ mi, nɛ enɛ ɔ ma ha suɔmi nɛ wa ngɛ kɛ ha lɛ ɔ mi maa wa.