1. Mɛni Yehowa Odasefohi kɛ fiɛ we kulaa?

ANƐ o na nɛ a ngma Yehowa biɛ ɔ ngɛ tsu ko he, aloo ngɛ níhi a nɔ ngɛ blema níhi a to he ko hyɛ lo? Ke o na biɛ nɛ ɔ ngɛ hehi kaa kikɛ ɔ, atsinyɛ jemi ko be he kaa lɔ ɔ ha nɛ o bua jɔ. Ngɛ anɔkuale mi ɔ, akɛnɛ wa ji Yehowa Odasefohi he je ɔ, wa fiɛ we Mawu biɛ ɔ he kulaa! A kɛ Mawu biɛ ɔ tsɛ we nɔ ko nɔ ko kaa wɔ pɛ. Se e biɔ nɛ waa pee babauu pe Mawu biɛ ɔ nɛ waa kɛ ma tsu ní kɛkɛ.

2. Mɛni Mawu biɛ ɔ nɛ a kɛ tsɛɛ wɔ ɔ biɔ nɛ waa pee?

² Pi Yehowa biɛ ɔ nɛ a kɛ ma tsɛ wɔ ɔ nɛ ma ha nɛ wa maa sa e hɛ mi. E sa nɛ waa kɛ e sisi tomi mlaahi hu nɛ tsu ní. Enɛ ɔ he ɔ, Baiblo ɔ kaiɔ wɔ kaa e sa nɛ Yehowa we bi nɛ “jɔɔ yayami peemi.” (La 34:14) Bɔfo Paulo tu sisi tomi mlaa nɛ ɔ he munyu. E ngma ke: “Nɔ tsuaa nɔ nɛ deɔ ke Mawu nɔ́ ji lɛ ɔ, é kpa yayami peemi.” (Kane 2 Timoteo 2:19.) Akɛnɛ Yehowa we Odasefohi ji wɔ he je ɔ, nihi le wɔ kaa waa kɛ e biɛ ɔ tsuɔ ní. Se mɛni blɔ nɔ wa maa gu kɛ yu wa he ngɛ yayami peemi he?

3, 4. Kɛ je blema a, mɛni ngmami nɛ Baiblo he ní leli nui sisi, nɛ mɛni he je?

³ Mo susu níhi nɛ Paulo tu a he munyu loko e ngma munyu nɛ ngɛ 2 Timoteo 2:19 ɔ he nɛ o hyɛ. Ngmami ɔ tu “sisi tomi tɛ nɛ Mawu ngɔ kɛ ma si ha hemi kɛ yemi” he munyu. A ngma munyu enyɔ ngɛ sisi tomi tɛ nɛ ɔ nɔ. Kekleekle munyu ɔ ji, ‘Yehowa le lɛ nitsɛ e nihi.’ E ngɛ heii kaa Paulo tsɛ munyu nɛ ɔ se kɛ je 4 Mose 16:5 ɔ. (Hyɛ munyu nɛ wa kase kɛ sɛ hlami ɔ.) Munyu enyɔne ɔ ji, “Nɔ tsuaa nɔ nɛ deɔ ke Mawu nɔ́ ji lɛ ɔ, é kpa yayami peemi.” Baiblo he ní leli nui jamɛ a munyu ɔ sisi. Mɛni he je?

⁴ Bɔ nɛ Paulo tu munyu ɔ ha a tsɔɔ kaa e tsɛ e munyu ɔ se kɛ je he ko. Se ngmami ko be Hebri Ngmami ɔ mi nɛ kɛ Paulo munyu ɔ kɔ. Ke jã a, lɛɛ mɛni he munyu Paulo ngɛ tue benɛ e de ke: “Nɔ tsuaa nɔ nɛ deɔ ke Mawu nɔ́ ji lɛ ɔ, é kpa yayami peemi” ɔ? Paulo tsɛ munyu nɛ e ngma loko e ngma ke “nɔ tsuaa nɔ nɛ deɔ ke Mawu nɔ́ ji lɛ ɔ, é kpa yayami peemi” ɔ se kɛ je 4 Mose yi 16. Jamɛ a munyu ɔ kɔɔ atua nɛ Kora tsɔ ɔ he. Anɛ munyu enyɔne ɔ hu ma nyɛ ma kɔ jamɛ a atua tsɔmi ɔ nɔuu he lo?

5-7. Mɛni ya nɔ ngɛ Mose be ɔ mi nɛ Paulo tsɛ se ngɛ 2 Timoteo 2:19 ɔ? (Moo hyɛ foni nɛ ngɛ ni kasemi ɔ sisije ɔ.)

⁵ Baiblo ɔ tsɔɔ kaa Eliab binyumuhi nɛ ji Datan kɛ Abiram ya piɛɛ Kora he, nɛ a tsɔ Mose kɛ Aaron a hɛ mi atua. (4 Mose 16:1-5) A bui Mose, nɛ a tu munyu kɛ si he blɔ nɛ Mawu kɛ ha lɛ ɔ. Atua tsɔli nɛ ɔmɛ ya nɔ nɛ a hi Yehowa we bi a kpɛti. Enɛ ɔ he ɔ, e biɔ nɛ Yehowa we bi anɔkualetsɛmɛ ɔmɛ nɛ a hyɛ a he saminya ngɛ atua tsɔli nɛ ɔmɛ a he. Benɛ e su be nɛ Yehowa maa tsɔɔ slɔɔto nɛ ngɛ nihi nɛ a ngɛ lɛ jae kɛ a tsui tsuo, kɛ atua tsɔli ɔmɛ a kpɛti ɔ, Yehowa kɛ fami nɛ mi tɛ̃ ha.

⁶ Ngmami ɔ de ke: ‘Yehowa de Mose ke, “De ma a ke a hɛ mɛ kɛ je Kora, kɛ Datan, kɛ Abiram a bo tsu ɔmɛ a he.” Kɛkɛ nɛ Mose te si, nɛ e kɛ Israel ma nimeli ɔmɛ pue nɔ kɛ ho Datan, kɛ Abiram a ngɔ ya. E de ma a ke, “Nyɛɛ hɛ nyɛ kɛ je nimli yiwutsotsɛmɛ nɛ ɔmɛ a bo tsu ɔmɛ a he. Ke pi jã a, a ma kpata nyɛɛ kɛ mɛ tsuo nyɛ hɛ mi ngɛ a he yayami ɔmɛ a he.” Lɔ ɔ he ɔ, a hɛ mɛ kɛ je Kora, kɛ Datan, kɛ Abiram a bo tsu ɔmɛ a he.’ (4 Mose 16:23-27) Lɔ ɔ se ɔ, Yehowa kpata atua tsɔli ɔmɛ tsuo a hɛ mi. Se e baa nihi nɛ a jaa lɛ kɛ a tsui tsuo, nɛ a yu a he ngɛ yayami peemi he ɔ a yi.

⁷ Yehowa le adesa tsui mi! E le nihi nɛ a jaa lɛ kɛ a tsui tsuo. Se e sa nɛ nihi nɛ a jaa lɛ kɛ a tsui tsuo ɔ nɛ a yu a he ngɛ nimli yayamihi a he. Ke jã a, lɛɛ e ma nyɛ maa ba kaa Paulo tsɛ e munyu nɛ ji: “Nɔ tsuaa nɔ nɛ deɔ ke Mawu nɔ́ ji lɛ ɔ, é kpa yayami peemi ɔ” se kɛ je 4 Mose 16:5, 23-27 ɔ. Enɛ ɔ kɛ Paulo munyu nɛ nyɛɛ se nɛ ɔ kɔ. E de ke: ‘Yehowa le lɛ nitsɛ e nihi.’—2 Tim. 2:19.

8. Mɛni he je nɛ Yehowa biɛ ɔ nɛ wa ma tsɛ kɛ asafo ɔ mi nɛ wa maa hi kɛkɛ ɔ pi ɔ?

⁸ Ní nɛ ɔmɛ nɛ ya nɔ ngɛ Mose be ɔ mi nɛ Paulo tsɛ se ɔ tsɔɔ kaa Paulo ngɛ Timoteo kaie konɛ e ko ha nɛ nɔ́ ko nɛ puɛ huɛ bɔmi nɛ ngɛ e kɛ Yehowa a kpɛti ɔ kɔkɔɔkɔ. Asafo ɔ mi nɛ wa maa hi kɛkɛ ɔ pi, kaa bɔ nɛ Yehowa biɛ ɔ kɛkɛ nɛ nihi tsɛ ngɛ Mose be ɔ mi ɔ hu pi ɔ. E sa nɛ nihi nɛ a yeɔ Yehowa anɔkuale ɔ nɛ a kpa yayami peemi. Mɛni Timoteo kase ngɛ munyu nɛ ɔ mi? Nɛ mɛni Yehowa we bi nɛ a ngɛ mwɔnɛ ɔ hu ma nyɛ maa kase ngɛ bɔfo Paulo ga womi nɛ ɔ mi?

9. Ngɛ kaseli ɔmɛ a be ɔ mi ɔ, mɛni blɔ nɔ “kuasiahi a nɔ́ jemi nɛ a kase we nɔ́ kpakpa ko kɛ ji mi ɔ” hao Kristofohi asafo ɔ ngɛ?

 ⁹ Mawu Munyu ɔ kɛ ga womi pɔtɛɛ ha wɔ ngɛ ní yayamihi nɛ e sa kaa Kristofohi nɛ a yu a he ngɛ he ɔ he. Kaa nɔ hyɛmi nɔ́ ɔ, loko Paulo maa ngma munyu nɛ ngɛ 2 Timoteo 2:19 ɔ, e sɛ hlami de Timoteo kaa e “ko pɛ ngɛ munyuhi a he.” E de lɛ hu kaa e ‘yu e he ngɛ kuasiahi a nɔ́ jemi nɛ a kase we nɔ́ kpakpa ko kɛ ji mi ɔ he.’ (Kane 2 Timoteo 2:14, 16, 23.) Asafo ɔ mi ni komɛ ngɛ hemi kɛ yemi kuali a tsɔɔmihi gbɛe kɛ ngɛ fĩae. E ngɛ kaa nɔ́ nɛ ni komɛ hu tsɔɔ tsɔɔmihi nɛ tleɔ atsinyɛ jemi si. Ke Ngmami ɔ de we nɔ́ ko ngɛ jamɛ a tsɔɔmi ɔmɛ a he po ɔ, jamɛ a tsɔɔmi ɔmɛ ngɔ mi gbami kɛ ba asafo ɔ mi. Jamɛ a tsɔɔmi ɔmɛ ha nɛ nihi je atsinyɛ ngɛ munyuhi a he. Enɛ ɔ ha we nɛ tue mi jɔmi nɛ hi asafo ɔ mi. Lɔ ɔ he ɔ, Paulo ma nɔ mi kaa e he hia nɛ Timoteo nɛ ‘tu kuasiahi a nɔ́ jemi nɛ a kase we nɔ́ kpakpa ko kɛ ji mi ɔ nya fo.’

10. Kɛ e sa kaa waa pee wa ní ngɛ hemi kɛ yemi kuali a he ha kɛɛ?

¹⁰ Mwɔnɛ ɔ, Yehowa we bi pɔɛ hemi kɛ yemi kuali nami ngɛ asafo ɔ mi. Se ke nɔ saisaa ko tsɔɔ tsɔɔmi ko nɛ Ngmami ɔ kplɛɛ we nɔ ɔ, e sa nɛ waa yu wa he ngɛ jamɛatsɛ ɔ he amlɔ nɔuu. Nile be mi kaa waa kɛ hemi kɛ yemi kuali maa je atsinyɛ. E sɛ nɛ wa ha a munyuhi a heto ngɛ Intanɛti ɔ nɔ, aloo ngɛ blɔ kpa ko nɔ. E sɛ nɛ waa pee wa juɛmi kaa wa maa ye bua jamɛatsɛ ɔmɛ, nɛ e sɛ nɛ waa kɛ mɛ nɛ sɛɛ ní ngɛ blɔ ko blɔ ko nɔ hulɔ. Ke waa kɛ hemi kɛ yemi kuali sɛɛɔ ní ɔ, lɔ ɔ tsɔɔ kaa waa kɛ Ngmami ɔ mi ga womi nɛ wa susu he ɔ tsu we ní. Akɛnɛ wa ji Yehowa we bi he je ɔ, e sa nɛ waa yu wa he ngɛ hemi kɛ yemi kuali a he kulaa.

11. Mɛni ma nyɛ ma ha nɛ nihi maa ngɔ a he kɛ wo “kuasiahi a nɔ́ jemi mi”? Kɛ asafo mi nikɔtɔmahi ma plɛ kɛ pee nɔ hyɛmi nɔ́ kpakpa ngɛ enɛ ɔ blɔ fa mi kɛɛ?

¹¹ Ní kpa komɛ hu ngɛ nɛ ma nyɛ ma ha nɛ tue mi jɔmi be asafo ɔ mi hie. Kaa nɔ hyɛmi nɔ́ ɔ, wa ma nyɛ maa hɛɛ juɛmi ekpaekpa ngɛ hɛja jemi he. Enɛ ɔ ma nyɛ ma ha nɛ waa kɛ wa he maa wo “kuasiahi a nɔ́ jemi nɛ a kase we nɔ́ kpakpa ko kɛ ji mi ɔ” mi. Ngɛ anɔkuale mi ɔ, ke nɔ ko ngɛ nihi he wami woe kaa a kɛ a he nɛ wo hɛja jemi yayahi a mi ɔ, e sɛ nɛ asafo mi nikɔtɔma amɛ nɛ a de ke, ke a tu he munyu ɔ, lɔ ɔ maa ngɔ pɛ kɛ ba, lɔ ɔ he ɔ, a be he munyu tue. (La 11:5; Efe. 5:3-5) Se e sa nɛ asafo mi nikɔtɔmahi nɛ a hyɛ nɛ hi konɛ a ko ngɔ mɛ nitsɛmɛ a susumi kɛ nyɛ nihi a nɔ. E sa nɛ a bu Ngmami ɔ mi ga womi nɛ nyɛɛ se nɛ ɔ tue: ‘Mawu asafo ɔ nɛ e ngɔ ha nyɛ ɔ, nyɛɛ hyɛ nɔ saminya. Nyɛ ko ye a nɔ; se mohu nyɛɛ ngɔ nyɛ he ngɔ pee nɔ hyɛmi nɔ́ ha Mawu asafo ɔ.’—1 Pet. 5:2, 3; kane 2 Korinto Bi 1:24.

12, 13. (a) Kɛ Yehowa Odasefohi peeɔ a ní ngɛ hɛja jemi he ha kɛɛ, nɛ mɛni Baiblo sisi tomi mlaahi a kɛ tsuɔ ní? (b) Sisi tomi mlaahi nɛ wa susu a he ngɛ kuku 12 ɔ kɔɔ mɛni níhi hu a he?

¹² Yehowa asafo ɔ tsɔɔ we wɔ sinihi nɛ e sa kaa waa hyɛ, womihi nɛ e sa kaa waa kane, lahi nɛ e sa kaa waa bu tue, kɛ video nɔ fiɛmihi nɛ e sa kaa wa kɛ je wa hɛja. Mɛni he je? Baiblo ɔ woɔ wa ti nɔ tsuaa nɔ he wami kaa e ‘tsɔse e juɛmi, nɛ e le slɔɔto nɛ ngɛ kpakpa kɛ yayami a kpɛti.’ (Heb. 5:14) Ngmami ɔ tsɔɔ wɔ níhi nɛ wa ma nyɛ maa da nɔ kɛ le hɛja jemi nɛ sa. Oti nɛ e sa kaa wa kɛ ma wa hɛ mi ngɛ nɔ́ tsuaa nɔ́ nɛ wa peeɔ ɔ mi ji, nɛ ‘wa maa bɔ mɔde nɛ wa maa kase Nyɔmtsɛ ɔ suɔmi nya ní.’ (Efe. 5:10) Baiblo ɔ tsɔɔ kaa wekuyihi a blɔ nya ní tsumi ji kaa a maa tsɔɔ a  weku mi bimɛ ɔmɛ hɛja jemihi nɛ sa, kɛ ní nɛmɛ nɛ sɛ. *—1 Kor. 11:3; Efe. 6:1-4.

¹³ Baiblo sisi tomi mlaahi nɛ wa susu a he kɛ sɛ hlami ɔ kɔ we hɛja jemi pɛ he. E kɔɔ tade womi kɛ he dlami, nɔmlɔ tso mi he wami nami, niye ní kpakpa yemi, kɛ ní kpahi a he. Ke Ngmami ɔ mi sisi tomi mlaahi de we nɔ́ ko ngɛ hɛja jemi ko he ɔ, e sɛ nɛ Yehowa we bi nɛ a je lɔ ɔ he atsinyɛ. Ngmami ɔ tsɔɔ kaa “Nyɔmtsɛ ɔ sɔmɔlɔ ɔ, e sɛ́ kaa e pɛɔ; mohu ɔ, e mi nɛ jɔ ha nɔ tsuaa nɔ.”—2 Tim. 2:24.

14. Mɛni nɔ́ hetomi nɔ́ nɛ Paulo kɛ tsu ní kɛ tsɔɔ kaa e he hia nɛ waa yu wa he ngɛ huɛ yaya bɔmi he?

¹⁴ Mɛni blɔ kpahi hu a nɔ nɛ e sa kaa “nɔ tsuaa nɔ nɛ deɔ ke Mawu nɔ́ ji lɛ ɔ, é kpa yayami peemi” ngɛ? E sa nɛ nihi kaa jã a nɛ a yu a he ngɛ nihi nɛ a peeɔ nɔ́ yaya a, a he. Benɛ Paulo tu “sisi tomi tɛ nɛ Mawu ngɔ kɛ ma si ha hemi kɛ yemi ɔ” he munyu ta a, e kɛ nɔ́ hetomi nɔ́ ko tsu ní. E tu ‘we ngua ko kɛ mi níhi nɛ a gbɔ, kɛ ekomɛ hu nɛ a puɛ’ a he munyu. E tsɔɔ kaa “a kɛ ekomɛ tsuɔ ní pɔtɛɛ komɛ nɛ a buu, nɛ ekpa komɛ lɛɛ a kɛ tsuɔ ní be saisaa.” (2 Tim. 2:20, 21) Lɔ ɔ se ɔ, e wo Kristofohi ga kaa ‘a tsu a he,’ aloo a yu a he ngɛ níhi nɛ a kɛ “tsuɔ ní be saisaa” a, a he.

15, 16. Mɛni wa ma nyɛ maa kase ngɛ nɔ́ hetomi nɔ́ nɛ kɔɔ “we ngua” a he ɔ mi?

¹⁵ Mɛni ji nɔ́ hetomi nɔ́ nɛ ɔ sisi? Paulo ngɔ Kristofohi asafo ɔ kɛ to “we ngua” ko he. E ngɔ nihi nɛ a ngɛ asafo ɔ mi ɔ kɛ to “níhi” nɛ a ngɛ we ɔ mi ɔ a he. Ní komɛ hii we mi nɛ e sɛ nɛ a ye ní aloo a nu nyu ngɛ mi. A ngɔɛ jamɛ a ní ɔmɛ kɛ futuu we ní hoomi níhi.

¹⁶ Jã kɛ̃ nɛ mwɔnɛ ɔ, Yehowa we bi bɔɔ mɔde kaa a ma ha nɛ a je mi bami he nɛ tsɔ. A kɛ nihi nɛ a yi Yehowa sisi  tomi mlaahi a nɔ ɔ bɔɛ. (Kane 1 Korinto Bi 15:33.) Ke e sɛ kaa waa kɛ ni komɛ ngɛ asafo ɔ mi ɔ nɛ bɔ ɔ, lɛɛ e sa kaa waa ‘tsu wa he’ aloo waa yu wa he kulaa ngɛ nihi nɛ a be asafo ɔ mi ɔ a he. Jamɛatsɛmɛ ɔmɛ a ti nihi fuu ji, ‘sika suɔli, nihi nɛ bui a fɔli, nihi nɛ mɔbɔ nami ko be a mi, nihi a biɛ puɛli, awi yeli, nihi nɛ sume nɔ́ kpakpa, nɔ se blɔ tsɔɔli, kɛ nihi nɛ suɔ je mi akɔnɔ pe bɔ nɛ a suɔ Mawu’!—2 Tim. 3:1-5.

17. Mɛni Israel bi anɔkualetsɛmɛ ɔmɛ pee kɛ tsɔɔ kaa a sume nɔ́ yaya?

¹⁷ Baiblo ɔ tsɔɔ bɔ nɛ Israel bi ɔmɛ pee a ní ha benɛ a de mɛ kaa “a hɛ mɛ kɛ je Kora, kɛ Datan, kɛ Abiram a bo tsu ɔmɛ a he” ɔ. Baiblo ɔ tsɔɔ kaa “[amlɔ nɔuu ɔ, NW] a hɛ mɛ kɛ je Kora, kɛ Datan, kɛ Abiram a bo tsu ɔmɛ a he.” (4 Mose 16:24, 27) A tui tsle kulaa. Ngmami ɔ tsɔɔ kaa ‘a hɛ mɛ kɛ je atua tsɔli ɔmɛ a bo tsu ɔ he.’ Anɔkualetsɛmɛ ɔmɛ sume kaa nɔ́ nɛ maa ba Koramɛ a nɔ ɔ, eko nɛ sa a he. A je a tsui mi nɛ a pee tue bumi. A fĩ Yehowa se, nɛ a te si kɛ wo nimli yayami ɔmɛ. Mɛni wa ma nyɛ maa kase ngɛ nɔ hyɛmi nɔ́ nɛ a pee ɔ mi?

18. Benɛ Paulo wo Timoteo ga kaa e yu e he ngɛ “nihewi a we akɔnɔ yaya” he ɔ, mɛni e ngɛ tsɔɔe?

¹⁸ Huɛ bɔmi nɛ ngɛ waa kɛ Yehowa wa kpɛti ɔ he jua wa ha wɔ wawɛɛ. Enɛ ɔ he ɔ, e sa nɛ waa kɛ oya yemi nɛ po he piɛ. Lɔ ɔ nɛ Paulo ngɛ tsɔɔe benɛ e wo Timoteo ga kaa ‘e yu e he kɛ je nihewi a we akɔnɔ yaya a’ he ɔ nɛ. (2 Tim. 2:22) Jamɛ a be ɔ mi ɔ, Timoteo wa momo. Eko ɔ, e ye jeha 30 kɛ se. Se pi be tsuaa be nɛ nihewi kɛ yihewi pɛ nɛ “nihewi a we akɔnɔ yaya” náa a nɔ he wami. Ke Timoteo kɛ akɔnɔ ko kaa jã kpe ɔ, e sa nɛ e “yu” e he ngɛ he. Ngɛ blɔ ko nɔ ɔ, e sa nɛ Timoteo nɛ “kpa yayami peemi.” Yesu hu de nɔ́ ko kaa jã. E de ke: “Ke o hɛngmɛ haa nɛ o peeɔ yayami ɔ, hiaa nɛ o sake ngɔ fɔ he!” (Mat. 18:9) Mwɔnɛ ɔ, Kristofohi nɛ a kɛ ga womi nɛ ɔ tsuɔ ní ɔ kɛ oya yemi poɔ huɛ bɔmi nɛ ngɛ a kɛ Yehowa a kpɛti ɔ he piɛ.

19. Mɛni blɔ nɔ ni komɛ gu kɛ po huɛ bɔmi nɛ ngɛ a kɛ Yehowa a kpɛti ɔ he piɛ?

¹⁹ Mɛni blɔ nɔ Odasefo bi komɛ po huɛ bɔmi nɛ ngɛ a kɛ Yehowa a kpɛti ɔ he piɛ ngɛ? A ti ni komɛ nɛ be ko nɛ be ɔ a deɔ dã a, kpa dã demi kulaa. A ti ni komɛ hu yu a he ngɛ hɛja jemi komɛ nɛ tɔmi ko be a he, se a ma nyɛ ma ha nɛ a ná akɔnɔ yaya a a he. (La 101:3) Kaa nɔ hyɛmi nɔ́ ɔ, loko nyɛminyumu ko ma ba pee Odasefo no ɔ, e yaa hehi nɛ nihi doɔ nɛ a baa a je mi basabasa ngɛ. Se benɛ e ba kase anɔkuale ɔ, ke e ya Odasefohi a he nya buamihi a sisi po ɔ, e dui, konɛ e ko ba ná akɔnɔ yaya aloo susumi yaya nɛ hao lɛ be ko nɛ be ɔ ekohu. Enɛ ɔ tsɔɔ we kaa e sɛ nɛ Kristofohi nɛ a nu dã, a do, aloo a pee ní kpahi nɛ tɔmi ko be a he. Se e sa nɛ wɔ tsuo waa bɔ mɔde nɛ waa yu wa he ngɛ níhi nɛ ma nyɛ ma puɛ waa kɛ Mawu wa kpɛti ɔ a he.

20. E ngɛ mi kaa pi be tsuaa be nɛ e ngɛ gbɔjɔɔ kaa wa ma “kpa yayami peemi” mohu lɛɛ, se mɛni haa wɔ bua jɔmi?

²⁰ E ji he blɔ nɛ wa ná kaa a kɛ Mawu biɛ ɔ tsɛɛ wɔ. Se e biɔ nɛ wa tsu nya ní. E sa nɛ wa “kpa yayami peemi,” aloo waa “jɔɔ yayami peemi.” (La 34:14) Ngɛ anɔkuale mi ɔ, pi be tsuaa be nɛ enɛ ɔ peemi ngɛ gbɔjɔɔ. Hyɛ bɔ nɛ wa bua jɔ ha kaa Yehowa suɔ “lɛ nitsɛ e nihi” nɛ a peeɔ e suɔmi nya ní be tsuaa be ɔ.—2 Tim. 2:19; kane 2 Kronika 16:9a.