NƆ́ HE JE NƐ NI KOMƐ HE WE YI: Níhi a mi hlami ko nɛ a pee lingmi nɛ ɔ tsɔɔ kaa ke e hí kulaa a, si bɔlemi dodoehi ayɔ akpe 100 nɛ ngɛ dodoe kuu nɛ wa zugba a hu ngɛ mi ɔ mi. Ke nihi fuu hyɛ bɔ nɛ je ɔ kle ha a, a biɔ ke, ‘Mɛni he je nɛ e sa kaa Bɔlɔ ope ɔ nɛ susu adesahi nɛ a pi nɔ́ ko, nɛ a ngɛ si bɔlemi dodoe nyafii nɛ ɔ nɔ ɔ a he?’

NƆ́ NƐ BAIBLO Ɔ TSƆƆ: Mawu susuɔ wa he, enɛ ɔ he ɔ, e ha nɛ a ngma Baiblo ɔ kɛ ha wɔ. Yehowa * ma nɔ mi kɛ ha wɔ ke: “Ma tsɔɔ mo blɔ nɛ o nyɛɛ nɔ. Ma tsɔɔ mo ní, nɛ ma wo mo ga.”—La 32:8.

Mo susu Hagar, nɛ e ji Egipt no, nɛ e hi si maa pee jeha 2000 loko a fɔ Kristo ɔ he nɛ o hyɛ. Hagar bui e nyɛ Sarai. Enɛ ɔ he ɔ, Sarai doo Hagar nya wawɛɛ nitsɛ, nɛ Hagar tu fo kɛ sɛ nga. E ngɛ mi kaa Hagar tɔ̃ mohu lɛɛ, se anɛ Mawu je e nine ngɛ e he lo? Baiblo ɔ de ke: ‘Yehowa bɔfo ko na lɛ.’ Bɔfo ɔ ma nɔ mi kɛ ha lɛ ke: ‘Yehowa nu o we amanehlu kue fami ɔ.’ Lɔ ɔ se ɔ, Hagar de Yehowa ke: ‘O ji Mawu nɛ hyɛɛ nɔ́.’—1 Mose 16:4-13.

“Mawu nɛ hyɛɛ nɔ́” ɔ hɛngmɛ ngɛ o he. Kaa nɔ hyɛmi nɔ́ ɔ, ke binyɛ ko ngɛ bimɛ tsɔwi ɔ, e hɛngmɛ hiɔ a he, ejakaa e le kaa a wɛ, nɛ a hia yemi kɛ buami. Jã kɛ̃ nɛ Mawu hɛngmɛ hiɔ wa he, titli ɔ, ke e na kaa wa gbɔjɔ, nɛ wa hia yemi kɛ buami. Yehowa de ke: “I hii he klɔuklɔu ngɛ hiɔwe lokoo; se nɔ nɛ baa e he si ngɛ e mumi mi, nɛ e tsui mi tsɔ ɔ, i kɛ lɛ hiɔ si; i woɔ e mumi kã.”—Yesaya 57:15.

Se eko ɔ, o ma bi ke: ‘Mɛni Mawu hɛngmɛ nɛ ngɛ ye he ɔ tsɔɔ? Anɛ e daa bɔ nɛ i ngɛ ha a nɔ kɛ kojoɔ mi, aloo e hyɛɔ ye tsui mi saminya nɛ e nuɔ mi sisi lo?’