HƐ MI MUNYU | ANƐ MAWU SUSUƆ O HE LO?
Mawu Ma Nyɛ Maa Wo O Bua
“Mawu, nɔ nɛ woɔ nihi nɛ a nine mi jɔ̃ he wami ɔ ha nɛ wa nɔ gbagba te.”
“Mawu Bi ɔ suɔ mi, nɛ e ngɔ e wami ngɔ ha ngɛ ye he.”
NƆ́ HE JE NƐ NI KOMƐ HE WE YI: Ni komɛ ngɛ nɛ bua womi he hia mɛ wawɛɛ, se a susuɔ kaa ke a bi Mawu konɛ e ye bua mɛ nɛ a nyɛ nɛ a da haomihi nɛ a kɛ kpeɔ ɔ a nya a, lɔ ɔ tsɔɔ kaa a ngɛ mɛ pɛ a nɔ́ mi foe. Yo ko nɛ a tsɛɛ lɛ ke Raquel ɔ de ke, “Ke i ngɔ ye haomi ɔ kɛ to haomi nguanguahi nɛ nihi babauu kɛ ngɛ kpee ngɛ je ɔ mi ɔ he ɔ, i naa kaa ye haomi ɔ klee we kulaa, lɔ ɔ he ɔ, e sɛ nɛ ma bi yemi kɛ buami kɛ je Mawu ngɔ.”
NƆ́ NƐ BAIBLO Ɔ TSƆƆ: Mawu ngɛ adesahi ye buae, nɛ e ngɛ a bua woe. Adesahi tsuo peeɔ yayami, enɛ ɔ he ɔ, wa nyɛ we nɛ waa pee Mawu suɔmi nya ní kɛ pi si. Se Mawu “suɔ wɔ. Enɛ ɔ he je ɔ, e tsɔ e Bi ɔ kɛ ba, konɛ e ba dla waa kɛ Mawu wa kpɛti, nɛ a ngɔ wa he yayami ɔmɛ ngɔ pa wɔ.” (1 Yohane 4:10) Kɛ gu Yesu afɔle sami ɔ nɔ ɔ, Mawu ma nyɛ maa ngɔ wa he yayamihi kɛ pa wɔ, nɛ́ wa ná he nile kpakpa. Wa ma nyɛ ma ná hɛ nɔ kami hu kaa wa maa hi si ngɛ tue mi jɔmi mi ngɛ je ehe ɔ mi. * Se anɛ adesahi tsuo a he je nɛ Yesu ba pee jã ngɛ, aloo akɛnɛ Mawu susuɔ o he ɔ he je?
Mo susu bɔfo Paulo he nɛ o hyɛ. E bua jɔ Yesu afɔle sami ɔ he. Enɛ ɔ he ɔ, e ngma ke: ‘Mawu Bi ɔ suɔ mi, nɛ e ngɔ e wami ngɔ ha ngɛ ye he; nɛ imi hu i he lɛ ye.’ (Galatia Bi 2:20) Ngɛ anɔkuale mi ɔ, e ngɛ mi kaa Yesu gbo loko Paulo ba pee Kristofo no mohu lɛɛ, se Paulo na Yesu afɔle sami ɔ kaa nike ní ko nɛ a kɛ ha lɛ.
Mo hu o ma nyɛ ma ná Mawu nike ní nɛ ji Yesu wami nɛ e kɛ sã afɔle ɔ he se. Enɛ ɔ po tsɔɔ kaa o he jua wa ha Mawu. E ma nyɛ ma ha mo “hɛ kɛ nɔ fɔmi,” nɛ lɔ ɔ ma ha ‘mo he wami nɛ o kɛ tsu ní kpakpa, nɛ o tu munyu kpakpa daa.’
Yesu ngɔ e he kɛ sã afɔle maa pee jeha 2,000 sɔuu ji nɛ ɔ nɛ. Mɛni tsɔɔ kaa mwɔnɛ ɔ, Mawu ngɛ mo gblae kɛ ba e ngɔ?
^ kk. 5 Ke o ngɛ hlae nɛ o le babauu ngɛ Yesu afɔle sami ɔ he ɔ, moo hyɛ womi nɛ ji, Mɛni Tutuutu Ji Baiblo ɔ Tsɔɔmi? nɛ Yehowa Odasefohi pee ɔ, yi 5.
