Anɛ o kplɛɛ we nɔ kaa ke nihi yi anɔkuale ɔ, nɔ yemi saisaa nɛ ma ba ye ma a nɔ ɔ hu be anɔkuale yee lo? Ke jã ji sane ɔ, lɛɛ nɔ yemi nɛ maa ye anɔkuale ɔ maa pee nɔ yemi nɛ pi adesahi nɛ a to sisi. Baiblo ɔ tu nɔ yemi nɛ yeɔ anɔkuale he munyu. Lɔ ɔ ji Mawu Matsɛ Yemi ɔ nɛ Yesu tsɔɔ e kaseli ɔmɛ kaa a sɔle ngɛ he ɔ nɛ.—Mateo 6:9, 10.

Mawu Matsɛ Yemi ɔ ji nɔ yemi nitsɛ nɛ ngɛ hiɔwe, nɛ e maa ye zugba a tsuo nɔ. E ma ba to adesahi a nɔ yemihi a nane mi. (La 2:8, 9; Kpojemi 16:14; 19:19-21) Jɔɔmihi nɛ Mawu Matsɛ Yemi ɔ kɛ maa ba a eko ji, e ma je anɔkuale nɛ a yi ngɛ nɔ yemi mi ɔ kɛ je. Mo susu níhi ekpa nɛ kɔɔ Mawu Matsɛ Yemi ɔ he nɛ tsɔɔ jã a he nɛ o hyɛ.

NYAGBA A: Ngɛ adesahi a nɔ yemi mi ɔ, a ngɔɔ tó ngɛ ma bi a dɛ loko a nyɛɔ hyɛɛ ma a nɔ. Sika nɛ ɔ ha nɛ ma nikɔtɔma komɛ juɔ, nɛ ekomɛ hu ngɔɔ nyɔ mi ní kɛ jee nihi a dɛ konɛ ni ɔmɛ ko wo tó nɛ e sa kaa a wo, aloo ní kpahi nɛ e sa kaa a wo he tó kɛ ha amlaalo ɔ. Nɔ́ nɛ ɔ ha we nɛ amlaalo ɔ nɛ ná sika bɔ nɛ sa, lɔ ɔ he ɔ, amlaalo ɔ fɔɔ tó ɔ nɔ, nɛ enɛ ɔ haa nihi yi anɔkuale kulaa. Ngɛ si himi kaa jã mi ɔ, nihi nɛ a yeɔ anɔkuale ɔ nɛ a naa nɔ́ wawɛɛ.

TSA BA: Mawu Matsɛ Yemi ɔ náa he wami kɛ jee Yehowa Mawu ope ɔ ngɔ. * (Kpojemi 11:15) E hia we  nɛ a wo tó ha Mawu Matsɛ Yemi ɔ konɛ e kɛ tsu Matsɛ Yemi ɔ he ní. Mohu ɔ, Mawu “he wami kɛ nyɛmi kpetekpleenyɛ” ɔ kɛ e mi mi himi ɔ ma ha nɛ Matsɛ Yemi ɔ ma tsu e sisi bimɛ a hiami níhi tsuo a he ní ha mɛ.—Yesaya 40:26; La 145:16.

NYAGBA A: Susan Rose-Ackerman nɛ wa tu e he munyu kɛ sɛ hlami ɔ de ngɛ mɔde nɛ a ngɛ bɔe kaa a ma ha nɛ anɔkuale nɛ a yi ɔ se nɛ po ɔ he ke, “e sa nɛ e je sisi kɛ je nɔ yeli ɔmɛ a nɔ”. Ke nɔ yemihi ngɛ mɔde bɔe kaa a ma je nihi nɛ a yi anɔkuale kɛ je amlaalo ní tsumi he nɛ a hyɛɛ konɛ nihi nɛ a wo tó ngɛ níhi nɛ a kɛ yaa ma se, kɛ níhi nɛ a kɛ baa ma a mi ɔ nɔ, kɛ polisihi a kpɛti, se a ngmɛɛ ma nikɔtɔmahi nɛ a yi anɔkuale ɔ blɔ kaa a ya nɔ nɛ a sɔmɔ kaa ma nikɔtɔmahi ɔ, nihi be nyɛe maa ngɔ a hɛ kɛ fɔ a nɔ. Adesa nɔ yelɔ nɛ yeɔ anɔkuale wawɛɛ ɔ po yi mluku. Kaa bɔ nɛ Baiblo ɔ de ɔ, ‘dalɔ ko be zugba nɛ ɔ nɔ nɛ peeɔ kpakpa daa.’—Fiɛlɔ 7:20.

TSA BA: Akɛnɛ Yesu Kristo, nɔ nɛ Mawu hla lɛ kaa Nɔ Yelɔ ngɛ Matsɛ Yemi ɔ mi ɔ be kaa adesahi nɛ a yi mluku he je ɔ, nɔ ko nɔ ko be nɛ ma nyɛ ma ha nɛ e pee nɔ́ nɛ dɛ. Yesu pee enɛ ɔ he nɔ hyɛmi nɔ́. Benɛ a ngɔ nyɔ mi ní nɛ pe kulaa nɛ ji, “matsɛ yemihi tsuo nɛ ngɛ je ɔ mi, kɛ bɔ nɛ a hɛ mi ngɛ nyami ha” a kɛ ka lɛ ɔ, e kua. Abosiami nɛ ji je nɛ ɔ nɔ yelɔ ɔ wo Yesu si kaa e kɛ enɛ ɔmɛ ma ha lɛ ke e kpla si nɛ e ja lɛ. (Mateo 4:8-10; Yohane 14:30) Benɛ Yesu ngɛ nɔ́ nae nɛ e piɛ bɔɔ nɛ e ma gbo po ɔ, e fia e pɛɛ si kaa e maa ye anɔkuale, enɛ ɔ he ɔ, e kua kaa e maa nu tsopa nɛ ma ha nɛ e be nɔ́ nami ɔ he nue, nɛ jinɛ lɔ ɔ ko ha we nɛ e ye e he nɔ ɔ. (Mateo 27:34) Amlɔ nɛ ɔ, Mawu tle Yesu si kɛ ho hiɔwe ya. Yesu ngɔ e ní peepee kɛ tsɔɔ kaa e sa nɛ e pee Mawu Matsɛ Yemi ɔ nya Matsɛ.—Filipi Bi 2:8-11.

NYAGBA A: Mahi fuu pɔɔ sɔ fɔmi, nɛ lɔ ɔ haa nɛ nihi náa he blɔ kɛ tsakeɔ ma nikɔtɔmahi nɛ a yi anɔkuale ɔ. Anɔkuale sane ji kaa, ngɛ mahi nɛ a ke a ya hɛ mi po a mi ɔ, nihi yi anɔkuale ngɛ sɔ fɔmi kɛ e he gɔgɔ fiami mi. Akɛnɛ sikatsɛmɛ ngɔɔ a sika kɛ woɔ sɔ fɔmi he gɔgɔ fiami kɛ e he blɔ nya tomi kpahi a mi he je ɔ, a náa ma nikɔtɔmahi nɛ a ngɛ nɔ yee kɛ ni nɛmɛ nɛ maa ba pee se ɔ a nɔ he wami ngɛ blɔ nɛ dɛ nɔ.

Kojolɔ John Paul Stevens nɛ ngɛ Kojomi He Ngua Nɛ Pe Kulaa ngɛ U.S. ɔ ngma ke, “he wami nɛ sikatsɛmɛ náa ngɛ ma nikɔtɔmahi a nɔ ɔ ha we nɛ nihi nɛ a ná Nɔ Yemi nɛ da, nɛ e ha we nɛ nihi nɛ a ná hemi kɛ yemi ngɛ nɔ yemi ɔ mi.” Enɛ ɔ he ɔ, e be nyakpɛ kaa ngɛ je kɛ wɛ ɔ, nihi babauu hɛɛ susumi kaa ma kudɔmi kuuhi a mi nɛ a yi anɔkuale kulaa.

TSA BA: Mawu Matsɛ Yemi ɔ maa ye nɔ kɛ ya neneene, lɔ ɔ he ɔ, nɔ ko be sɔ fɔmi he gɔgɔ fiae loo a be sɔ fɔe nɛ a ju. (Daniel 7:13, 14) Akɛnɛ Mawu nɛ hla Matsɛ Yemi ɔ Nɔ Yelɔ ɔ he je ɔ, pi sɔ fɔmi nɛ ma ha  nɛ e ba ye nɔ loo a kɛ ma tsake lɛ. E maa hi si kɛ maa ya neneene, lɔ ɔ he ɔ, níhi nɛ e maa pee ɔ maa hi kɛ ha nihi nɛ a maa hi e nɔ yemi ɔ sisi ɔ be tsuaa be.

NYAGBA A: Sisije ɔ, eko ɔ, o ma susu kaa ke a wo mlaa he ɔ, níhi ma tsake. Se ní leli yɔse kaa ke a wo mlaahi babauu ɔ, behi fuu ɔ, e haa nihi yi anɔkuale. Jehanɛ hu, a puɛɔ sika babauu konɛ a kɛ ba anɔkuale nɛ nihi yi ɔ si, se manye yemi nyafii pɛ nɛ e jeɔ mi kɛ baa.

TSA BA: Mawu Matsɛ Yemi ɔ he mlaahi nɔ kuɔ kulaa pe mlaahi nɛ adesa nɔ yemihi wo. Kaa nɔ hyɛmi nɔ́ ɔ, Yesu tsɔɔ we ní kakaaka nɛ e sa kaa waa pee loo wa ko pee, mohu ɔ, e tsɔɔ nɔ́ nɛ a pɔɔ lɛ tsɛmi ke Mlaa Kpakpa a. E de ke: “Lɔ ɔ he ɔ, nɔ́ tsuaa nɔ́ nɛ nyɛ hlaa kaa nihi nɛ pee ha nyɛ ɔ, nyɛ hu nyɛɛ pee ja nɔuu ngɔ ha mɛ.” (Mateo 7:12) Nɔ́ nɛ sa kadimi ji kaa, Matsɛ Yemi ɔ he mlaa a kɔɔ susumihi kɛ ní peepeehi tsuo he. Yesu de ke, “Suɔ o nyɛmi nɔmlɔ kaa bɔ nɛ o suɔ mo nitsɛ o he.” (Mateo 22:39) Ngɛ anɔkuale mi ɔ, Mawu nɛ hyɛɛ tsui mi ɔ nɛ ma nyɛ maa wo mlaa nɛ ɔ.—1 Samuel 16:7.

NYAGBA A: Nɔ́ nɛ ha nɛ anɔkuale nɛ a yi ngɛ nɔ yae titli ji hɛkɔ kɛ nɔ pɛ e nɔ́ mi fomi. Behi fuu ɔ, ma nikɔtɔmahi kɛ ma bi jeɔ su yaya nɛ ɔmɛ kpo. Ngɛ tsuapo nɛ e hule ngɛ Seoul nɛ wa tu he munyu kɛ sɛ hlami ɔ mi ɔ, ma nikɔtɔmahi ngɔ nyɔ mi ní ngɛ nihi nɛ a ma tsuapo ɔ dɛ. Nihi nɛ a ma tsuapo ɔ le kaa ke a ha nyɔ mi ní ɔ, a be sika fuu puɛe kɛ he ní kpakpahi nɛ a kɛ ma tsu ɔ.

Loko anɔkuale nɛ a yi se ma nyɛ maa po ɔ, e sa nɛ a tsɔɔ nihi bɔ nɛ a ma je a he kɛ je su yaya kaa hɛkɔ kɛ nɔ pɛ e nɔ́ mi fomi he. Se adesahi a nɔ yemihi be suɔmi kɛ nyɛmi nɛ a kɛ ma tsu tsɔsemi ní tsumi nɛ ɔ.

TSA BA: Mawu Matsɛ Yemi ɔ tsɔɔ nihi bɔ nɛ a maa pee ha kɛ je a he kɛ je su yaya nɛ haa nɔ yi anɔkuale ɔ he. * Tsɔsemi nɛ ɔ yeɔ bua nihi konɛ ‘bɔ nɛ a  susuu a yi mi ɔ nɛ pee nɔ́ he kulaa.’ (Efeso Bi 4:23) A kase bɔ nɛ a maa pee ha nɛ a bua maa jɔ níhi nɛ a ngɛ ɔ a he konɛ a susu ni kpahi a he mohu pe nɛ a hɛ maa kɔ̃, nɛ a ma fo mɛ pɛ a nɔ́ mi.—Filipi Bi 2:4; 1 Timoteo 6:6.

NYAGBA A: Ngɛ si himi he blɔ nya tomi kpakpa, kɛ tsɔsemi kpakpa nɛ a kɛ haa nihi konɛ a ba a je mi saminya a tsuo se ɔ, ni komɛ maa hla kaa a maa pee níhi nɛ dɛ, nɛ a be anɔkuale yee. Ní leli komɛ tsɔɔ mi kaa enɛ ɔ he je nɛ adesahi a nɔ yemihi nyɛ we nɛ a po anɔkuale nɛ a yi se ɔ nɛ. Nɔ yemihi hyɛɛ blɔ kaa anɔkuale nɛ a yi ɔ maa ba si konɛ e ko puɛ ní tsɔ.

TSA BA: Je Ma Amɛ A Kake Peemi Kuu ɔ fã nɛ hyɛɛ sanehi nɛ kɔɔ anɔkuale nɛ a yi he ɔ tsɔɔ kaa, loko nɔ yemihi ma nyɛ maa po anɔkuale nɛ a yi se ɔ, ja a wo nihi he wami kaa “a ba a je mi saminya, a ye anɔkuale, nɛ a tsu ní tsumihi nɛ a kɛ wo a dɛ ɔ saminya.” E ngɛ mi kaa susumi nɛ ɔ hi mohu lɛɛ, se Mawu Matsɛ Yemi ɔ peeɔ babauu pe nɛ e maa wo nihi he wami nɛ a je su nɛ ɔmɛ kpo kɛkɛ—e biɔ nɛ nihi nɛ a je su nɛ ɔmɛ kpo loko a ma nyɛ maa pee Mawu Matsɛ Yemi ɔ sisi bimɛ. Baiblo ɔ deɔ ke, “hɛ tsuli” kɛ “lakpatsɛmɛ” a nine be Mawu Matsɛ Yemi ɔ nɔ sue.—1 Korinto Bi 6:9-11; Kpojemi 21:8.

Bɔ nɛ kekle Kristofo ɔmɛ hi si ha a tsɔɔ kaa nihi ma nyɛ maa kase je mi bami he mlaahi nɛ a nɔ kuɔ nɛ ɔmɛ, nɛ a kɛ tsu ní. Kaa nɔ hyɛmi nɔ́ ɔ, benɛ kaselɔ ko nɛ a tsɛɛ lɛ ke Simon bɔ mɔde kaa e kɛ sika ma he mumi klɔuklɔu ɔ ngɛ Yesu bɔfo ɔmɛ a dɛ ɔ, a kua sika a, nɛ a de lɛ ke: “Pia o he mohu ngɛ nɔ́ yayami nɛ o susu ɔ he.” Benɛ Simon na oslaa nɛ ngɛ e susumi yaya a he ɔ, e de bɔfo ɔmɛ ke a sɔle kɛ ha lɛ konɛ e ko ná jamɛ a susumi ɔ hu.—Bɔfo Ɔmɛ A Ní Tsumi 8:18-24.

Ngɛ ma nɛ o je mi ɔ tsuo se ɔ, o ma nyɛ maa pee Mawu Matsɛ Yemi ɔ sisi bi. (Bɔfo Ɔmɛ A Ní Tsumi 10:34, 35) Tsɔsemi nɛ Matsɛ Yemi ɔ kɛ haa ngɛ je ɔ mi tsuo mwɔnɛ ɔ maa tsɔɔ mo blɔ nɛ o maa gu nɔ kɛ pee Matsɛ Yemi ɔ sisi bi. Yehowa Odasefohi a bua maa jɔ kaa a maa tsɔɔ mo bɔ nɛ a kɛ nihi kaseɔ Baiblo ɔ ha, nɛ ní kasemi ɔ ma nyɛ maa ye kaa hɛngmɛfia nyɔngma pɛ daa otsi. Níhi nɛ o ma nyɛ maa kase ɔ ekomɛ kɔɔ “Mawu Matsɛ Yemi ɔ he sane kpakpa a,” kɛ bɔ nɛ e ma je nɔ yemihi nɛ a yi anɔkuale ɔ kɛ je ɔ he. (Luka 4:43) Wa ngɛ mo he wami woe nɛ o hla Odasefohi nɛ a ngɛ o kpɔ ɔ mi ɔ a se blɔ aloo yaa wa Intanɛti ní tsumi he nɛ ji, jw.org ɔ nɔ.