Yesu gbenɔ ɔ he hia wawɛɛ nitsɛ, ejakaa e gbo konɛ adesahi nɛ ná neneene wami. A bɔɛ nɔmlɔ kaa e pee níhi nɛ dɛ, e nu hiɔ, aloo e gbo. (1 Mose 1:31) Se yayami ba je ɔ mi kɛ gu kekleekle nɔmlɔ nɛ ji Adam nɔ. Yesu ba gbo konɛ e kɛ kpɔ̃ wɔ kɛ je yayami kɛ gbenɔ mi.—Kane Mateo 20:28; Roma Bi 6:23.

Mawu je suɔmi nɛ se be kpo kɛ tsɔɔ wɔ kɛ gu e bi ɔ nɛ e tsɔ kɛ ba zugba a nɔ nɛ e ba gbo ha wɔ ɔ nɔ. (1 Yohane 4:9, 10) Yesu de e kaseli ɔmɛ ke a ngɔ abolo kɛ wai kɛ ye e gbenɔ ɔ he gbijlɔ nɛ a kɛ kai lɛ. Ke wa yeɔ Yesu gbenɔ ɔ he gbijlɔ ɔ daa jeha a, e maa tsɔɔ kaa wa bua jɔ suɔmi nɛ Mawu kɛ Yesu je kpo kɛ tsɔɔ wɔ ɔ he.—Kane Luka 22:19, 20.

Ngɛ kekleekle be nɛ Yesu de e kaseli ɔmɛ kaa a kai e gbenɔ ɔ, e tu somi ko he munyu. (Mateo 26:26-28) Somi nɛ ɔ ha nɛ nihi bɔɔ komɛ ná he blɔ kaa a maa pee matsɛmɛ kɛ osɔfohi ngɛ hiɔwe. E ngɛ mi kaa nihi ayɔhi abɔ nɛ a yaa kaimi nɛ ɔ sisi mohu lɛɛ, se nihi nɛ a piɛɛ somi nɛ ɔ he pɛ nɛ a ngɛ he blɔ kaa a maa ye abolo ɔ nɛ a nu wai ɔ eko.—Kane Kpojemi 5:10.

Maa pee jeha 2,000 ji nɛ ɔ nɛ Yehowa bɔni nihi nɛ a maa ye matsɛ ɔ hlami. (Luka12:32) Ke wa ngɔ nihi nɛ a maa pee mɛ matsɛmɛ ngɛ hiɔwe nɛ ɔmɛ kɛ to nihi nɛ a maa hi si kɛ ya neneene ngɛ zugba nɛ ɔ nɔ a he ɔ, a he pi kulaa.—Kane Kpojemi 7:4, 9, 17.