KƐ JE blema lokoo nɛ a kɛ munyu nɛ ji antichrist loo “Kristo he nyɛlɔ” ɔ ngɛ ní tsue. A kɛ biɛ nɛ ɔ tsɛɛɔ nɔ yeli komɛ kɛ sini slɔɔtohi hulɔ, lɛɛ wa ma bi ke, Mɛnɔ ji Kristo he nyɛlɔ? Anɛ munyu nɛ ɔ kɔ wa he mwɔnɛ ɔ lo? Ngɛ anɔkuale mi ɔ, ke wa ngɛ hlae nɛ waa na nɔ nɛ ji Kristo he nyɛlɔ ɔ, e maa hi kaa wa maa hyɛ Baiblo ɔ mi, ejakaa biɛ ɔ je kpo si enuɔ sɔuu ngɛ mi.

Bɔfo Yohane pɛ ji Baiblo ngmalɔ nɛ e kɛ munyu nɛ ji “Kristo he nyɛlɔ” ɔ tsu ní. Kɛ e kale Kristo he nyɛlɔ ɔ ha kɛɛ? Kadi munyu nɛ e tu ngɛ e kekle womi nɛ e ngma a mi. E de ke: ‘Ye bimɛ tsɔwi, nyagbe ngmlɛfia a ji nɛ ɔ nɛ! A de nyɛ ke Kristo he nyɛlɔ ɔ ma; se amlɔ nɛ ɔ, Kristo he nyɛli fuu ba momo. Enɛ ɔ he ɔ, wa le kaa nyagbe ngmlɛfia a ji nɛ ɔ nɛ. Wa kpɛti a je kɛ ho, se kɛ̃ ɔ, pi wa ti ni komɛ ji mɛ; nɛ lɔ ɔ he je nɛ a si wɔ ɔ nɛ. Lɛɛ mɛnɔ ji lakpatsɛ? Ee, nɔ tsuaa nɔ nɛ deɔ ke pi Yesu ji Kristo ɔ, lɛ ji lakpatsɛ ɔ nɛ. Kikɛmɛ a nɔmlɔ nɛ ɔ ji Kristo he nyɛlɔ ɔ nɛ; e kua Tsɛ ɔ, kɛ Bi ɔ tsuo.’—1 Yohane 2:18, 19, 22.

Mɛni wa kaseɔ ngɛ munyu nɛ ɔ mi? Yohane tu “Kristo he nyɛli fuu” a he munyu. E nɛ ɔ tsɔɔ kaa “Kristo he nyɛlɔ” ɔ, pi nɔ kake, se mohu a ji kuu. Nihi loo kuu nɛ peeɔ Kristo he nyɛlɔ ɔ gbɛɛ lakpa munyuhi kɛ fĩaa, nɛ a deɔ ke pi Yesu ji Kristo ɔ loo Mesia a. Jehanɛ hu, a ha we nɛ nihi nɛ a na slɔɔto nɛ ngɛ Mawu kɛ E Bi Yesu Kristo a kpɛti. Nihi nɛ a ji Kristo he nyɛli ɔ deɔ ke mɛ ji Kristo ɔ loo Kristo nane mi dali, se akɛnɛ ‘wa kpɛti a je kɛ ho’ he je ɔ, a gba kɛ je anɔkuale tsɔɔmi nɛ ngɛ Baiblo ɔ mi ɔ he. Jehanɛ hu, be nɛ Yohane ngma e womi ɔ ngɛ “nyagbe ngmlɛfia” a mi ɔ, kuu nɛ ɔ ngɛ, eko ɔ, kɛ ma kaseli ɔmɛ a nyagbe be ɔ mi.

Mɛni ekohu Yohane ngma kɛ kɔ Kristo he nyɛlɔ ɔ he? Benɛ e ngɛ lakpa gbali ɔmɛ a he munyu tue ɔ, e de ke: “Nɔ tsuaa nɔ nɛ maa jaje kaa Mawu Bi ɔ ba je ɔ mi kaa adesa a, mumi nɛ je Mawu ngɔ ɔ ngɛ e mi. Se nɔ nɛ jajeɔ kaa nɔ́ nɛ a de ngɛ Yesu he nɛ ɔ be mi ɔ, e mumi ɔ ji Mawu ngɔ. Mumi nɛ ngɛ e mi ɔ je Kristo he nyɛlɔ ɔ ngɔ. Nyɛ nu kaa e ma, pi jã? Ee, amlɔ nɛ ɔ, e ná ba je ɔ mi momo.” (1 Yohane 4:2, 3) Jehanɛ hu, ngɛ Yohane womi nɛ ji enyɔ ɔ mi ɔ, e kpale tu nɔ́ nɛ ɔ he munyu ke: “Sisili fuu ngɛ je ɔ mi he tsuaa he. Mɛ ji nihi nɛ kplɛɛ we kaa Yesu Kristo ba je ɔ mi kaa adesa. Nimli kaa kikɛ nɛ ɔ ji sisili, kɛ Kristo he nyɛli ɔ nɛ.” (2 Yohane 7) Yohane ha nɛ e pee heii kaa Kristo he nyɛli ji nihi nɛ a jeɔ blɔ gbɛɔ Yesu Kristo kɛ e tsɔɔmi ɔmɛ a he lakpa munyuhi kɛ fĩaa.

Loko Yohane maa ngma sisili nɛ ɔmɛ a he munyu ɔ, Yesu sɛ hlami wo e kaseli ɔmɛ ga ke: “Nyɛɛ hyɛ saminya ngɛ lakpa gbali a he. Ke a ba nyɛ ngɔ ɔ, a naa mɛ kaa jijɔ, se anɔkuale mi ɔ, a ngɛ  kaa ogbeteehi.” (Mateo 7:15) Bɔfo Paulo hu bɔ Kristofohi nɛ a ngɛ Tesalonika a kɔkɔ ke: “Nyɛ ko ha nɛ nɔ ko nɛ sisi nyɛ ngɛ blɔ ko blɔ ko nɔ. Ja nyagbe atua tsɔmi ɔ ba kekle loko [Yehowa] ligbi ɔ maa ba. Dikalɔ ɔ nɛ hɛ mi ma kpata a maa je kpo.”—2 Tesalonika Bi 2:3.

Lɔ ɔ he ɔ, ngɛ kekle Kristofo ɔmɛ a be ɔ mi ɔ, lakpa gbali kɛ atuã tsɔli loo hemi kɛ yemi kuali ngɛ, nɛ a bɔ mɔde kaa a maa gu Kristofohi asafo ɔ. Munyu nɛ ji, “Kristo he nyɛli” nɛ Yohane kɛ tsu ní ɔ kɔɔ nihi nɛ a gbɛɔ Yesu Kristo kɛ e tsɔɔmi ɔmɛ a he lakpa munyuhi kɛ fĩaa a tsuo a he. Paulo tu a he munyu ke nihi nɛ a “hɛ mi ma kpata” kɛ tsɔɔ bɔ nɛ Yehowa naa mɛ ha.

Mwɔnɛ hu nɛɛ? Loloolo ɔ, nihi kɛ kuuhi nɛ a ji Kristo he nyɛli ɔ teɔ si kɛ woɔ Kristo kɛ e tsɔɔmi ɔmɛ. A jeɔ blɔ gbɛɔ Yesu Kristo kɛ e tsɔɔmi ɔmɛ a he lakpa munyuhi kɛ fĩaa, nɛ a yi mi tomi ji kaa a be hae nɛ nihi nɛ a le anɔkualehi nɛ kɔɔ Tsɛ ɔ, nɛ ji, Yehowa Mawu kɛ E Bi, Yesu Kristo he ɔ. Wa ngɛ yi mi tomi kpakpa he je nɛ e sa kaa waa hyɛ wa he nɛ hi ngɛ lakpa tsɔɔmihi a he. Ha nɛ wa susu nɔ hyɛmi níhi enyɔ komɛ a he.

Sɔlemi ɔmɛ kɛ jeha lafahi abɔ tsɔɔ Triniti tsɔɔmi ɔ. A tsɔɔ kaa Tsɛ ɔ kɛ Bi ɔ ji nimli kake. Kristo he nyɛlɔ ɔ ha we nɛ nihi nɛ a le nihi tutuutu nɛ Yehowa kɛ Yesu Kristo ji. Enɛ ɔ ha we nɛ nihi nɛ a kase Yesu Kristo, nɛ a hɛ kɛ su Mawu he kaa bɔ nɛ Baiblo ɔ woɔ mɛ he wami kaa a pee ɔ.—1 Korinto Bi 11:1; Yakobo 4:8.

Nɔ́ nɛ puɛ sane ɔ kulaa ji, sɔlemi ɔmɛ woɔ nihi he wami nɛ a ngɔ Baiblo sisi tsɔɔmihi nɛ a je Mawu biɛ Yehowa a kɛ je mi ɔ kɛ tsu ní. Mawu biɛ Yehowa a je kpo si 7,000 sɔuu ngɛ blema Baiblo ngmami ɔ mi. Se ngɛ lɔ ɔ tsuo se ɔ, a woɔ nihi he wami nɛ a ngɔ Baiblo sisi tsɔɔmihi nɛ a je Mawu biɛ ɔ kɛ je mi ɔ kɛ tsu ní. Mɛni je mi kɛ ba? E ha nɛ nihi li níhi nɛ kɔɔ anɔkuale Mawu ɔ he kulaa.

Se kɛ̃ ɔ, Mawu biɛ Yehowa a nɛ nihi nɛ a hɛɛ tsui kpakpa a ba le ɔ ye bua mɛ nɛ a hɛ mɛ kɛ su Mawu he. Nyumu ko nɛ a tsɛɛ lɛ Richard ɔ kai be nɛ e kɛ Yehowa Odasefohi enyɔ komɛ sɛɛ ní ɔ. E de ke, “A tsɔɔ mi ngɛ Baiblo ɔ mi kaa anɔkuale Mawu ɔ biɛ ji Yehowa. Ye bua jɔ kaa i ba le kaa Mawu ngɛ biɛ nitsɛ, ejakaa jinɛ i li gblee kaa Mawu ngɛ biɛ.” Kɛ je jamɛ a be ɔ mi ɔ, e pee tsakemihi konɛ e ba e je mi saminya kaa bɔ nɛ Baiblo ɔ tsɔɔ ɔ, bɔ nɛ pee nɛ e sa Yehowa hɛ mi. E de hu ke, “Mawu biɛ ɔ nɛ i ba le ɔ ye bua mi nɛ huɛ bɔmi kpakpa ngɛ i kɛ lɛ wa kpɛti.”

Jeha lafahi abɔ ji nɛ ɔ nɛ Kristo he nyɛli ha we nɛ nihi nɛ a pee Mawu suɔmi nya ní. Se ke wa kase Mawu Munyu nɛ ji Baiblo ɔ, wa nyɛɔ nɛ wa leɔ Kristo he nyɛli ɔmɛ a mi tso, nɛ wa yuɔ wa he ngɛ Kristo he nyɛli ɔmɛ a lakpa tsɔɔmihi nɛ a kɛ sisiɔ nihi ɔ a he.—Yohane 17:17.