1-3. Mɛni ha nɛ fɔlɔ kake wekuhi a he ba hiɛ ɔ? Kɛ enɛ ɔ náa nihi nɛ a ngɛ wekuhi kaa jã a mi ɔ, a nɔ he wami ha kɛɛ?

 ATSƆƆ kaa ngɛ United States ɔ, fɔlɔ kake wekuhi “a he ngɛ hiɛe wawɛɛ nitsɛ.” Jã kɛ̃ nɛ e ji ngɛ ma kpahi fuu a nɔ. Gba mi pomi, fo nɛ nihi tuu kɛ jeɔ a hunomɛ aloo a yihi a he, kɛ bimɛ nɛ a fɔɔ nɛ tsɛmɛ be a he ɔ pɔ he babauu. Enɛ ɔ ha nɛ fɔli kɛ jokuɛwi ngɛ nɔ́ nae wawɛɛ nitsɛ.

² Binyɛ ko nɛ lɛ pɛ nɛ e ngɛ e bimɛ hyɛe ɔ de ke: “I ye jeha 28. Ye huno gbo kɛ je ye he. Bimɛ enyɔ ngɛ ye dɛ nɛ i ngɛ mɛ hyɛe. I haoɔ wawɛɛ, ejakaa i sume kaa ma tsɔse ye bimɛ ɔmɛ nɛ tsɛ be a he. E ngɛ kaa nɔ́ nɛ pi nɔ ko kɔmɔ ji mi. Ye bimɛ ɔmɛ naa kaa i pɔɔ ya fomi, nɛ enɛ ɔ haoɔ mɛ.” E dɔɔ fɔli fuu kaa a be he piɛɛli, a piaa a he, nɛ a hɛ hu jaa. Ngɛ haomi nɛ ɔ tsuo se ɔ, a ti nihi fuu tsuɔ we mi ní tsumihi kɛ piɛɔ a he lo nya ní tsumihi a he hulɔ. A ti nɔ kake de ke: “Ke fɔlɔ kake ji mo ɔ, o naa nɔ́ wawɛɛ. E biɔ mɔde bɔmi wawɛɛ loko o ma nyɛ ma tsu níhi fuu a he ní ngɛ be kake mi. Nɛ ke o ná gbe ní tsumi ɔmɛ a nya pɛ, kɛkɛ ekpahi hu je a he kpo!”

³ Jokuɛwi nɛ a ngɛ fɔlɔ kake wekuhi a mi ɔ hu kɛ haomihi kpeɔ. Eko ɔ, ke fɔlɔ ɔ kake je a he, aloo e gbo si mɛ ɔ, lɔ ɔ ma ha nɛ a maa hao nɛ a maa ye aywilɛho wawɛɛ. Ngɛ a ti nihi fuu a blɔ fa mi ɔ, enɛ ɔ yeɔ mɛ awi wawɛɛ.

4. Kɛ wa plɛ kɛ le kaa Yehowa susuɔ fɔlɔ kake wekuhi a he ha kɛɛ?

⁴ Ngɛ blema Israel hu ɔ, fɔlɔ kake wekuhi hi si. Ngmami ɔ tu “awusahi” kɛ “yalɔyihi” a he munyu si abɔ. (2 Mose 22:22; 5 Mose 24:19-21; Hiob 31:16-22) Yehowa  Mawu ye bua jamɛatsɛmɛ ɔmɛ wawɛɛ. La polɔ ɔ tsɛ Mawu ke, “awusahi a tsɛ, kɛ yalɔyihi a he bulɔ.” (La 68:5) Atsinyɛ jemi ko be he kaa mwɔnɛ ɔ hu ɔ, Yehowa susuɔ fɔlɔ kake wekuhi a he jã nɔuu! Ngɛ anɔkuale mi ɔ, Baiblo ɔ tsɔɔ sisi tomi mlaahi nɛ ma nyɛ maa ye bua wekuhi kaa jã a konɛ a ye manye.

5. Ke fɔlɔ ko e he piɛɛlɔ je e he aloo e gbo si lɛ kɛ we ɔ, mɛni haomihi e kɛ kpeɔ?

⁵ Mo susu ní tsumihi nɛ a tsuɔ ngɛ we mi ɔ he nɛ o hyɛ. Yo ko nɛ e huno kɛ lɛ po gba mi ɔ de ke: “Behi fuu ngɛ nɛ o ná jinɛ nyumu ngɛ o kasa mi. Be nɛ ɔ eko ji, benɛ o lɔle ngɛ o nyagbae.” Jã nɔuu kɛ̃ nɛ nyumuhi nɛ a yihi kɛ mɛ po gba mi, aloo a yihi gbo je a he kɛ we ɔ hu peeɔ basaa ngɛ we mi ní tsumihi fuu nɛ ba pueɔ a kuɛ nɔ ɔ he je. Ke níhi pee basaa ngɛ we ɔ mi ɔ, jokuɛwi ɔmɛ hu a he mi jɔɛ mɛ nɛ a tsui hu nɔɛ a mi.

6, 7. (a) Mɛni nɔ hyɛmi nɔ́ kpakpa nɛ “yo kpakpa” a nɛ a tu e he munyu ngɛ Abɛ womi ɔ mi ɔ pee? (b) Mɛni blɔ nɔ nɛ mɔde nɛ fɔli nɛ a ngɛ fɔlɔ kake wekuhi a mi ɔ bɔɔ kɛ tsuɔ we mi ní tsumihi ɔ yeɔ bua mɛ ngɛ?

⁶ Mɛni ma nyɛ maa ye bua mɛ? Mo kadi nɔ hyɛmi nɔ́ nɛ “yo kpakpa” a nɛ a tu e he munyu ngɛ Abɛ 31:10-31 ɔ pee ɔ. E tsuɔ ní tsumihi fuu. E heɔ ní, e juaa ní, e kpɛɛ ní, e hooɔ ní, e heɔ zugba, e peeɔ ngmɔ, nɛ e hyɛɛ ní tsumi nɔ. Mɛni haa nɛ e nyɛɔ tsuɔ ní tsumi nɛ ɔmɛ ɔ? E hɛ mi wa kɛ ní tsumi. E jeɔ ní tsumi sisi makɛ futɛfutɛ, nɛ e tsuɔ ní hluu kɛ ya siɔ gbɔkuɛ. E toɔ e níhi a blɔ nya saminya. E gbaa ní tsumi kɛ haa nihi, nɛ lɛ nitsɛ hu e tsuɔ ekomɛ. E be nyakpɛ kaa e huno jeɔ e yi!

⁷ Ke o ji fɔlɔ nɛ e be huno loo yo ɔ, moo fĩ halɛ kɛ wo o we mi ní tsumihi a he. O kɛ bua jɔmi nɛ tsu we mi ní tsumihi, ejakaa lɔ ɔ hu ma ha nɛ o bimɛ ɔmɛ ma ná bua jɔmi babauu. Se e he hia nɛ o to blɔ nya kpakpa. Baiblo ɔ de ke: “Nɔ nɛ bɔɔ mɔde kɛ toɔ níhi a blɔ nya saminya  a, e náa ní babauu.” (Abɛ 21:5) Tsɛ ko nɛ lɛ nɔ kake pɛ nɛ ngɛ e bimɛ tsɔsee ɔ de ke: “Ja hwɔ ngɛ mi yee loko i susuɔ niye ní he.” Se ke nɔ ko to e tsui si kɛ hoo ní ɔ, e ngɔɔ, nɛ he wami hu hii mi pe niye ní nɛ a hooɔ lɛ eko kɛ eko kɛkɛ. Eko ɔ, e he maa hia nɛ o kase bɔ nɛ a peeɔ we mi ní kpa komɛ hu ha. Binyɛmɛ komɛ nɛ a be huno ɔ ya naa a huɛmɛ nɛ a le ní komɛ peemi, kɛ nihi nɛ a le ní tsumi slɔɔtohi tsumi, nɛ a kaneɔ womihi nɛ tsɔɔ bɔ nɛ a peeɔ ní komɛ ha. Jã nɛ a peeɔ ɔ yeɔ bua mɛ nɛ a nyɛɔ dikiɔ níhi a he, a dlaa paipi, kɛ ní nyafinyafihi nɛ puɛɔ ngɛ a lɔlehi a he ɔ ngɛ mɛ nitsɛmɛ a dɛhe.

8. Mɛni bimɛ nɛ fɔlɔ kake pɛ nɛ ngɛ mɛ hyɛe ɔ maa pee kɛ ye bua ngɛ we ɔ mi?

⁸ Anɛ tɔmi ngɛ he kaa fɔlɔ ko ma ha nɛ e bimɛ nɛ a ye bua lɛ lo? Binyɛ ko nɛ e be huno ɔ de ke: “O sume kaa pɔ nɛ tɔ jokuɛwi ɔmɛ a he konɛ a hɛ nɛ ba ja ngɛ a fɔlɔ kaketsɛ ɔ he.” Eko ɔ, sisi numi ngɛ he jã mohu lɛɛ, se pi be tsuaa be nɛ lɔ ɔ yeɔ bua jokuɛwi ɔmɛ. Blema a, a ha jokuɛwi nɛ a yeɔ Mawu gbeye ɔ we mi ní tsumihi nɛ sa, nɛ a tsuɔ. (1 Mose 37:2; Lahi A Mi La 1:6) Enɛ ɔ he ɔ, e ngɛ mi kaa e sɛ nɛ o ngɔ ní tsumihi fuu kɛ fɔ a nɔ mohu lɛɛ, se lɔ ɔ tsɔɔ we kaa o ko ha mɛ ní tsumi ko kulaa. O ma nyɛ ma ha nɛ a sa tsesihi a mi, aloo a dla mɛ nitsɛmɛ a tsuhi a mi. Mɛni he je nɛ o kɛ mɛ bla we kɛ tsu we mi ní tsumi komɛ ɔ? Enɛ ɔ ma ha nɛ nyɛ ma ná bua jɔmi.

9. Mɛni he je nɛ níhi a mi pɔɔ wami ha binyɛmɛ nɛ a be hunomɛ ɔ?

⁹ E yee ha fɔli babauu nɛ a be he piɛɛli ɔ kaa a ma ná sika kɛ tsu a hiami níhi a he ní. Binyɛmɛ nɛ a wɛ nɛ a be hunomɛ ɔ lɛɛ, a nɔ́ pa hí kulaa. a Ngɛ ma komɛ  a nɔ ɔ, amlaalo ɔ yeɔ bua nihi kaa jã. Ke blɔ nya tomi nɛ ɔ eko ngɛ he nɛ o ngɛ ɔ, o ma nyɛ maa hi yemi kɛ buami ɔ ngɔe, ke e hí kulaa a, kɛ ya si benɛ a ma ná ní tsumi. Baiblo ɔ tsɔɔ kaa ke e he hia kaa Kristofo no ko nɛ ya ngɔ yemi kɛ buami ko kaa jã a, e ma nyɛ ma ya ngɔ. (Roma Bi 13:1, 6) Yalɔyihi kɛ yihi nɛ a hunomɛ kɛ mɛ po gba mi ɔ kɛ haomihi kaa kikɛ ɔ kpeɔ. He fimi ha nɛ a kpɛti nihi fuu nɛ a hi we mi hluu ɔ kpale ya hlaa ní tsumi nɛ a tsuɔ. Se behi fuu ɔ, ní tsumihi nɛ a ya náa a hiɔwo hí. A kpɛti ni komɛ kaseɔ nine nya ní tsumihi. Ni komɛ hu ngɔɔ be kpiti kɛ ya kaseɔ ní komɛ ngɛ sukuu. Enɛ ɔ nɛ a peeɔ ɔ haa nɛ a si himi peeɔ kpakpa bɔ nɛ sa.

10. Mɛni blɔ nɔ binyɛ ko nɛ e be huno maa gu kɛ ha nɛ e bimɛ nɛ a le nɔ́ he je nɛ e sa kaa e tsu ní?

¹⁰ Ke o bimɛ ɔmɛ sume nɛ o tsu ní ɔ, e ko pee mo nyakpɛ, nɛ e ko dɔ mo hulɔ. Mohu ɔ, ha nɛ a le nɔ́ he je nɛ e sa kaa o tsu ní ngɛ. Mo ha nɛ a nu sisi kaa nɔ́ nɛ Yehowa ngɛ hlae ngɛ o dɛ ji kaa o hyɛ a nɔ. (1 Timoteo 5:8) Pee se ɔ, bimɛ fuu nɛ a peeɔ a ní jã a, a juɛmi tsakeɔ. Se kɛ̃ ɔ, moo bɔ mɔde nɛ o ná deka kɛ ha mɛ. Ke o suɔ mɛ, nɛ o náa deka kɛ haa mɛ, nɛ ohia ngɛ weku ɔ yee po ɔ, a be he nue tsɔ.​​—Abɛ 15:16, 17.

11, 12. Mɛni e sɛ kaa fɔli nɛ a be he piɛɛli ɔ nɛ a pee? Mɛni blɔ nɔ a maa gu kɛ pee jã?

¹¹ E ngɛ mi kaa suɔmi nɛ mi wa hii fɔli nɛ a be he piɛɛli kɛ a bimɛ a kpɛti mohu lɛɛ, se e sa nɛ fɔli nɛ ɔmɛ nɛ a hyɛ nɛ hi konɛ a ko tsɛ̃ a blɔ nya ní tsumihi kɛ fɔ jokuɛwi ɔmɛ a nɔ. Kaa nɔ hyɛmi nɔ́ ɔ, ke binyɛ ko nɛ e be huno hyɛɛ blɔ kaa e binyumu nɛ tsu wekuyi blɔ nya ní tsumihi a he ní ngɛ we ɔ mi ɔ, lɔ ɔ kɛ haomi ngua ma nyɛ maa ba. Jã kɛ̃ nɛ ke e deɔ e biyo e yi mi munyuhi kɛ e haomihi tsuo ɔ, lɔ ɔ hu kɛ haomi ngua ma nyɛ  maa ba. E sɛ nɛ fɔlɔ ko nɛ pee jã, ejakaa lɔ ɔ ma nyɛ ma ha nɛ jokuɛ ɔ maa hao, nɛ e maa pee basaa.

¹² Moo ma nɔ mi kɛ ha o bimɛ ɔmɛ kaa mo ji a fɔlɔ, nɛ o maa hyɛ mɛ. Koo hyɛ blɔ kaa mɛɛ a hyɛ mo. (Kɛ to 2 Korinto Bi 12:14 ɔ he.) Be komɛ ngɛ nɛ eko ɔ, o maa hia ga womi aloo yemi kɛ buami. Ke e ba jã a, mo ya na asafo mi nikɔtɔma amɛ, aloo nyɛmimɛ yihi nɛ a nane pi si ɔ. Ko bi yemi kɛ buami kɛ je o bimɛ tsɔwi ɔmɛ a dɛ.​​—Tito 2:3.

13. Ke binyɛ ko nɛ e be huno ngɛ e bimɛ tsɔsee ɔ, mɛni haomi e kɛ ma nyɛ maa kpe?

¹³ Eko ɔ, e be yee kaa bimɛ maa bu tsɔsemi nɛ nyumuhi kɛ ma ha mɛ ɔ tue. Se eko ɔ, e maa ye ha bimɛ kaa a maa bu tsɔsemi nɛ yihi kɛ ma ha mɛ ɔ tue. Binyɛ ko nɛ e be huno ɔ de ke: “Ye binyumu ɔmɛ a ka, nɛ  a je oblai, nɛ a gbi hu kle. Be komɛ ngɛ nɛ ke i hyɛ mɛ ɔ, e yee ha mi kaa i kɛ ye nane maa ma si ngɛ níhi a he.” Jehanɛ se hu ɔ, eko ɔ, loloolo ɔ, o ngɛ o huno aloo o yo nɛ o suɔ lɛ nɛ e gbo si mo ɔ he aywilɛho yee, aloo eko ɔ, e ngɛ mo dɔe kaa nyɛ gba a puɛ. Ke mlaa ngmɛ blɔ kaa nyɛ ni enyɔ ɔmɛ tsuo nyɛ ma nyɛ maa hyɛ nyɛ bimɛ ɔmɛ a nɔ ɔ, eko ɔ, o maa ye gbeye kaa nyɛ bimɛ ɔmɛ maa suɔ kaa a kɛ a papaa nɛ o kɛ lɛ po gba mi ɔ mohu maa hi si. Ke e ba jã a, e he ma nyɛ maa wa ha mo kaa o kɛ tsɔsemi nɛ sa ma ha jokuɛwi ɔmɛ.

14. Mɛni blɔ nɔ fɔli nɛ a be he piɛɛli ɔ ma nyɛ maa gu konɛ a kɛ tsɔsemi nɛ sa nɛ ha a bimɛ?

¹⁴ Baiblo ɔ tsɔɔ kaa “ke a ngmɛɛ jokuɛ je mi he ha lɛ ɔ, e pueɔ e nyɛ hɛ mi si.” (Abɛ 29:15) Ke o wo o bimɛ ɔmɛ mlaa a, bɔɔ mɔde nɛ o ha nɛ a ye nɔ. Yehowa Mawu fĩ o se. Ko ha nɛ dɔmi, aloo he piami, aloo gbeye nɛ wo o kɔni mi nyu. (Abɛ 1:8) Ko ma o hɛ kɛ fɔ Baiblo sisi tomi mlaahi a nɔ kɔkɔɔkɔ. (Abɛ 13:24) Moo bɔ mɔde nɛ o nu o bimɛ ɔmɛ sisi, ke o de mɛ nɔ́ ko ɔ, ko tsake o nya, nɛ o kɛ o nane hu nɛ ma si ngɛ níhi a he. Kɛ yaa kɛ yaa a, jokuɛwi ɔmɛ a ti nihi fuu maa kplɛɛ o tsɔsemi ɔ nɔ. Se kɛ̃ ɔ, e sa nɛ o susu bɔ nɛ e peeɔ o bimɛ ɔmɛ ha a he. Bitsɛ ko nɛ e be yo ɔ de ke: “Ke i ngɛ jokuɛwi ɔmɛ tsɔsee ɔ, i kɛ juɛmi toɔ he, ejakaa a yayo gbenɔ ɔ he je ɔ, a pee basaa. He blɔ tsuaa he blɔ nɛ i náa a, i kɛ tuɔ munyu kɛ tsɔɔ mɛ. Ke wa ngɛ gbɔkuɛ ní hooe ɔ, wa jeɔ wa ‘yi mi munyuhi’ kpo, nɛ wa susuɔ he. Jamɛ a be ɔ mi nɛ a deɔ mi nɔ́ tutuutu nɛ ngɛ a tsui mi.”

15. Mɛni e sɛ kaa fɔlɔ ko nɛ e huno aloo e yo kɛ lɛ po gba mi ɔ nɛ pee ke e ngɛ e he piɛɛlɔ momo ɔ he munyu tue?

¹⁵ Ke o huno aloo o yo kɛ mo po gba mi ɔ, e he guɛ nɛ o maa gbe ɔ be nɔ́ ko tsue ha mo. Ke pɛ ngɛ huno ko kɛ e yo a kpɛti ɔ, a bimɛ ɔmɛ a tsui yee mɛ, nɛ nyagbenyagbe ɔ, enɛ ɔ haa nɛ jokuɛwi ɔmɛ bui fɔli enyɔ ɔmɛ tsuo hu. Enɛ ɔ he ɔ, ko de jokuɛ ɔ nɔ́ ko nɛ  maa dɔ lɛ kaa: “O je o tsɛ pɛ!” E ngɛ mi kaa o huno aloo o yo momo ɔ pee mo nɔ́ dɔ nɔ́ mohu lɛɛ, se mo kai kaa e kɛ mo lɛ fɔ bi ɔ nɛ. Enɛ ɔ he ɔ, e sa nɛ nyɛ fɔli enyɔ ɔmɛ tsuo nyɛɛ suɔ jokuɛ ɔ, nɛ nyɛɛ hyɛ e nɔ, nɛ nyɛ tsɔse lɛ. b

16. Mɛni e sa kaa fɔlɔ kake wekuhi nɛ a pee konɛ huɛ bɔmi kpakpa nɛ hi jokuɛwi ɔmɛ kɛ Yehowa a kpɛti?

¹⁶ Kaa bɔ nɛ wa susu he ngɛ yihi nɛ sɛ hlami ɔ a mi ɔ, pi tue gblami kɛkɛ pɛ ji tsɔsemi, mohu ɔ, ní tsɔɔmi kɛ blɔ tsɔɔmi hu piɛɛ he. Ke o toɔ blɔ nya kpakpa nɛ o kɛ o bimɛ ɔmɛ kaseɔ Baiblo ɔ, lɔ ɔ ma nyɛ ma gbɔ haomihi nɛ nyɛɛ kɛ maa kpe ɔ nɔ. (Filipi Bi 3:16) E he hia nɛ nyɛɛ ya Kristofohi a kpehi daa. (Hebri Bi 10:24, 25) Jã kɛ̃ nɛ e he hia nɛ daa otsi ɔ, nyɛɛ pee weku Mawu jami. Ngɛ anɔkuale mi ɔ, e be gbɔjɔɔ kaa nyɛ maa pee weku Mawu jami ɔ daa nɛ nyɛ be mi poe. Binyɛ ko nɛ e bɔɔ mɔde wawɛɛ ɔ de ke: “Ke i kpa ní tsumi kɛ ba we mi ɔ, i suɔ kaa ma jɔɔ ye he. Se i ma ye juɛmi nya si kaa  i kɛ ye biyo ɔ maa kase ní, ejakaa i le kaa lɔ ɔ he hia. E bua jɔɔ wa weku Mawu jami ɔ he wawɛɛ nitsɛ!”

17. Mɛni wa ma nyɛ maa kase ngɛ tsɔsemi kpakpa nɛ a kɛ ha Paulo huɛ Timoteo ɔ mi?

¹⁷ Bɔfo Paulo huɛ ji Timoteo. E ngɛ heii kaa tsa pi Timoteo papaa nɛ ngɔ Baiblo sisi tomi mlaahi kɛ tsɔse Timoteo. Mohu ɔ, e yayo kɛ e na nɛ a tsɔse lɛ. Se Timoteo ba plɛ Kristofo no nɛ e nane pi si. (Bɔfo Ɔmɛ A Ní Tsumi 16:1, 2; 2 Timoteo 1:5; 3:14, 15) Ke mo hu ‘o tsɔse o bimɛ ɔmɛ nɛ o wo mɛ ga kpakpa nɛ sa Yehowa hɛ mi ɔ,’ e ma nyɛ maa wo yiblii kpakpa.​​—Efeso Bi 6:4.

18, 19. (a) Mɛni ma nyɛ ma ha nɛ fɔlɔ ko nɛ e be he piɛɛlɔ ɔ hɛ ma ja? (b) Mɛni ga womi Baiblo ɔ kɛ ha nɛ maa ye bua wɔ konɛ wa nyɛ waa ye wa we akɔnɔhi a nɔ?

¹⁸ Fɔlɔ ko nɛ e be he piɛɛlɔ ɔ de ke: “Ke i ba we ɔ mi nɛ jokuɛwi ɔmɛ hwɔ si nɛ e piɛ imi nɔ kake ɔ, ye hɛ jaa wawɛɛ nitsɛ.” Niinɛ, hɛja ji nɔ́ titli nɛ haoɔ fɔlɔ nɛ e be he piɛɛlɔ. Tɔmi ko be he kaa nɔ ko hɛ ma ja ngɛ e he piɛɛlɔ momo nɛ be ko nɛ be ɔ, nyu bi ngɛ e kɛ lɛ a kpɛti ɔ he. Se anɛ e sa kaa nɔ ɔ nɛ bɔ mɔde kaa e ma tsu haomi nɛ ɔ he ní kokooko lo? Ngɛ bɔfo Paulo be ɔ mi ɔ, yalɔyi komɛ nɛ a wɛ ɔ ha nɛ ‘gba jlo mɛ, nɛ a ngmɛɛ  Kristo he.’ (1 Timoteo 5:11, 12) Ke nɔ ko ha nɛ níhi nɛ peeɔ he lo ɔ akɔnɔ ɔ he hia lɛ pe Mawu suɔmi nya ní peemi ɔ, lɔ ɔ ma nyɛ maa ye lɛ awi.​​—1 Timoteo 5:6.

¹⁹ Nyumu ko nɛ e ji Kristofo no ɔ de ke: “E ngɛ mi kaa bɔmi nami he akɔnɔ nya wa mohu lɛɛ, se o ma nyɛ maa ye o he nɔ. Ke akɔnɔ ɔ te si ngɛ o juɛmi mi ɔ, e sɛ nɛ o ya nɔ nɛ o susu he. E sa nɛ o je o juɛmi ngɛ nɔ amlɔ nɔuu. O bi ɔ he nɛ o ma susu ɔ hu maa ye bua mo.” Mawu Munyu ɔ de ke: ‘Je nɛ ɔ mi akɔnɔ níhi nɛ haoɔ nyɛ, yo kɛ nyumu yakayaka fiɛmi ɔ, nyɛɛ gbe.’ (Kolose Bi 3:5) Ke o sume nɛ niye ní ko nɛ jlo mo ɔ, anɛ o ma ya be ngɛ he nɛ a hooɔ jamɛ a niye ní ɔ ngɛ konɛ e he via nɛ pue o nɔ lo? Aloo o maa kane womihi nɛ jamɛ a niye ní ɔ he fonihi ngɛ mi lo? Aloo o kɛ nihi nɛ a pɔɔ jamɛ a niye ní ɔ he munyu tumi ɔ maa bɔ lo? O be jã pee kɔkɔɔkɔ! Jã kɛ̃ nɛ e ji ngɛ níhi nɛ peeɔ he lo ɔ akɔnɔ ɔ hu a blɔ fa mi.

20. (a) Ke Kristofohi kɛ nihi nɛ a pi Kristofohi ngɛ bɔe konɛ a sɛ gba si himi mi ɔ, mɛni haomi a kɛ maa kpe? (b) Ngɛ kaseli ɔmɛ a be ɔ mi kɛ mwɔnɛ ɔ tsuo ɔ, mɛni nihi peeɔ nɛ a hɛja se poɔ?

²⁰ Ni komɛ nɛ a ji Kristofohi ɔ kɛ nihi nɛ a pi Kristofohi bɔɔ konɛ a kɛ mɛ nɛ sɛ gba si himi mi. (1 Korinto Bi 7:39) Anɛ enɛ ɔ nɛ a peeɔ ɔ tsuɔ a haomi ɔ he ní haa mɛ lo? Dɛbi. Yo ko nɛ e ji Kristofo no nɛ e huno kɛ lɛ po gba mi ɔ de ke: “Afani nɛ o sɛ we gba si himi mi pe nɛ o kɛ nɔ ko kɛkɛ maa sɛ gba si himi mi!” Atsinyɛ jemi ko be he kaa yalɔyihi nɛ a hi si ngɛ kaseli ɔmɛ a be ɔ mi ɔ hɛ ja wawɛɛ mohu, se a kpɛti ni komɛ kɛ nile tsu ní. A ‘peeɔ nihi nibwɔ, a sɔmɔ ni klɔuklɔu ɔmɛ kɛ he si bami, nɛ a je nihi kɛ je haomi mi.’ (1 Timoteo 5:10) Mwɔnɛ ɔ hu ɔ, Kristofohi anɔkualetsɛmɛ fuu sɛ we gba si himi mi lolo. A kɛ jehahi fuu ngɛ mlɛe konɛ a ná nɔ ko nɛ yeɔ Mawu gbeye nɛ a kɛ lɛ nɛ hi si. Kristofo no yalɔyo ko nɛ e ye jeha 68 ɔ tsɔɔ kaa be tsuaa be nɛ hɛja maa nu lɛ ɔ, e ya slaa yalɔyi kpahi. E de ke: “Ke i tsu  ye we mi ní tsumihi, nɛ i ya slaa nihi, nɛ i tsu ye Mawu jami mi ní tsumihi ɔ, ye hɛja a se poɔ.” Mawu Matsɛ Yemi ɔ he ní nɛ wa maa tsɔɔ nihi ɔ ji nɔ́ titli nɛ yeɔ bua.​​—Mateo 28:19, 20.

21. Mɛni blɔ nɔ sɔlemi kɛ huɛ kpakpa bɔmi ma nyɛ ma ha nɛ nɔ ko hɛja se maa po ngɛ?

²¹ Ngɛ anɔkuale mi ɔ, tsopa ko be nɛ poɔ hɛja se. Se Yehowa ma nyɛ maa ye bua mo konɛ o nyɛ nɛ o da nya.  Ke Kristofo no ko “sɔlee nyɔ kɛ pia kɛ kpaa Mawu pɛɛ nɛ e ye bua lɛ” ɔ, e ma nyɛ maa da nya. (1 Timoteo 5:5) E biɔ nɛ o kɛ hɛdɔ nɛ sɔle kɛ kpa Mawu pɛɛ. Ke e maa hi ɔ, mo fo ya kɛ pue e nɔ konɛ e ye bua mo. (Kɛ to Hebri Bi 5:7 ɔ he.) O tsui mi nɛ o maa je nɛ o maa sɔle ha Yehowa “nyɔ kɛ pia” a, ma nyɛ maa ye bua mo nitsɛnitsɛ. Jehanɛ se hu ɔ, ke o kɛ nimli kpakpahi bɔ ɔ, lɔ ɔ ma nyɛ ma ha nɛ o hɛ be jae. Ke nɔ ko kɛ nimli kpakpahi bɔɔ ɔ, lɔ ɔ ma ha nɛ e nu “munyu kpakpa” nɛ woɔ nɔ he wami kaa bɔ nɛ a ngma ngɛ Abɛ 12:25 ɔ.

22. Ke nɔ ko hɛ pɔɔ jami ɔ, mɛni níhi a he e sa nɛ e susu?

²² Be komɛ ɔ, o hɛ ma ja. Ke e ba jã a, mo kai kaa nɔ tsuaa nɔ kɛ haomi kpeɔ ngɛ e si himi mi. Ngɛ anɔkuale mi ɔ, ‘nyɛmimɛ nɛ a ngɛ je ɔ mi tsuo ɔ’ kɛ haomi ko ngɛ kpee. (1 Petro 5:9) Koo hi nɔ́ nɛ be ɔ he susue kpamisaa. (Fiɛlɔ 7:10) Mo susu ní kpakpahi nɛ o ngɛ náe ɔ mohu a he. Nɔ́ nɛ he hia pe kulaa nɛ e sa kaa o pee ji, nɛ o maa fia o pɛɛ si kaa o maa ya nɔ maa ye Yehowa anɔkuale, konɛ e bua nɛ jɔ.​​—Abɛ 27:11.

23. Mɛni e sa kaa Kristofohi nɛ a pee kɛ ha fɔlɔ kake wekuhi nɛ ngɛ asafo ɔ mi ɔ?

²³ Yemi kɛ buami nɛ nyɛmimɛ Kristofohi kɛ haa wɔ ɔ se be. Yakobo 1:27 ɔ de ke: “Bɔ nɛ nɔ ko ma ja Mawu nɛ maa sa Tsɛ Mawu ɔ nitsɛ hɛ mi ji nɛ ɔ nɛ: awusahi kɛ yalɔyihi nɛ e fĩ mɛ ɔ, e hyɛ a nɔ.” Ngɛ anɔkuale mi ɔ, e ji Kristofohi a blɔ nya ní tsumi kaa a maa ye bua fɔlɔ kake wekuhi. Mɛni ji ní pɔtɛɛ komɛ nɛ a ma nyɛ maa pee kɛ ye bua?

24. Mɛni wa ma nyɛ maa pee kɛ ye bua fɔlɔ kake wekuhi nɛ a ji ohiatsɛmɛ ɔ?

²⁴ A ma nyɛ maa ye bua mɛ ngɛ he lo nya. Baiblo ɔ de ke: “Ke nɔ ko ngɛ je nɛ ɔ mi ní, nɛ e na e nyɛmi nɛ e fĩ lɛ, se e mi mi sãa we lɛ ngɛ e nyɛmi ɔ he nɛ e ye bua lɛ ɔ, anɛ e ma nyɛ de ke e suɔ Mawu lo?” (1 Yohane 3:17) Hela  munyu nɛ a tsɔɔ sisi ke “e na e nyɛmi” ɔ tsɔɔ we kaa nɔ ɔ hɛngmɛ gba e nyɛmi ɔ nɔ kɛkɛ, se mohu ɔ, nɔ ɔ to e nyɛmi ɔ he hɛ saminya. Enɛ ɔ tsɔɔ kaa ke Kristofo no ko ngɛ mi mi jɔmi ɔ, kekleekle ɔ, nɔ́ nɛ e maa pee ji, nɛ́ e maa to he hɛ kaa weku ko hia yemi kɛ buami. Eko ɔ, e ma yɔse kaa weku ɔ hia sika. A ti ni komɛ ngɛ nɛ eko ɔ, a hia nɔ ko nɛ e ba dla nɔ́ ko ngɛ a we mi ha mɛ. Ngɛ ni komɛ hu a blɔ fa mi ɔ, ke nɔ ko tsɛ mɛ ní yemi aloo a fɔ mɛ nine kɛ ya he nya buami ko sisi ɔ, lɔ ɔ ma nyɛ ma ha nɛ a bua maa jɔ wawɛɛ.

25. Mɛni nyɛmimɛ Kristofohi maa pee kɛ tsɔɔ kaa a mi mi sãa mɛ ngɛ fɔli nɛ a be he piɛɛli ɔ a he?

²⁵ Jehanɛ se hu ɔ, 1 Petro 3:8 ɔ de ke: “Nyɛ tsuo nyɛɛ hɛɛ juɛmi kake, nɛ nyɛɛ na ha nyɛ sibi. Nyɛɛ suɔ nyɛ he kaa nyɛmimɛ. Nyɛɛ na nyɛ sibi mɔbɔ.” Binyɛ ko nɛ e be huno nɛ́ e ngɛ bimɛ ekpa a de ke: “Níhi a mi wa ha mi, nɛ be komɛ ngɛ nɛ ye kɔni mi woɔ nyu. Se be komɛ ɔ, nyɛmimɛ deɔ mi ke: ‘Joan, o ngɛ mɔde bɔe wawɛɛ. O kɔni nɛ ko gbo.’ Ke o le kaa nihi susuɔ o he ɔ, lɔ ɔ kɛkɛ po yeɔ bua wawɛɛ.” Yi nikɔtɔmahi nɛ a ji Kristofohi titli ji nihi nɛ a ma nyɛ maa ye bua binyɛmɛ nɛ a wɛ, nɛ a be hunomɛ ɔ. Ke a kɛ haomihi kpe, nɛ e ngɛ mɛ zo pee kaa a kɛ nyumuhi ma susu he, nɛ a ya na yi nikɔtɔma amɛ ɔ, e sa nɛ yi nikɔtɔma amɛ nɛ a bu mɛ tue saminya.

26. Mɛni nyumuhi nɛ a ji Kristofohi nɛ a nane pi si ngɛ Mawu jami mi ɔ, maa pee kɛ ye bua awusahi?

²⁶ Nyumuhi nɛ a ji Kristofohi hu ma nyɛ maa ye bua ngɛ blɔ kpahi a nɔ. Hiob nɛ ji dalɔ ɔ de ke: ‘I jeɔ nihi nɛ a kpaa ngmlaa kɛ tsɛɔ balɔ kɛ awusahi ɔ.’ (Hiob 29:12) Mwɔnɛ ɔ hu ɔ, nyumu komɛ nɛ a ji Kristofohi ɔ susuɔ awusahi a he wawɛɛ, nɛ a kɛ “tsui nɛ mi tsɔ” jeɔ suɔmi kpo kɛ haa mɛ nɛ́ mi gbigblimi be mi. (1 Timoteo 1:5) Be komɛ ɔ, nyɛmimɛ kɛ jokuɛwi kaa jã a ma nyɛ maa ya fiɛɛmi, a ma nyɛ ma ha nɛ a ba piɛɛ a he kɛ pee weku  Mawu jami, aloo kɛ je a hɛja. Se e sɛ nɛ nyɛmimɛ nɛ ɔmɛ nɛ a ngmɛɛ mɛ nitsɛmɛ a wekuhi a he kɛ fɔ si. Ke wa jeɔ mi mi jɔmi kpo kɛ haa awusahi ngɛ blɔ nɛ ɔmɛ a nɔ ɔ, lɔ ɔ maa po a he piɛ, nɛ a be kó bɔe.

27. Mɛni nɔ mi mami nɛ fɔli nɛ a be he piɛɛli ɔ ma nyɛ ma ná?

²⁷ E ji anɔkuale kaa nyagbenyagbe ɔ, fɔli nɛ a be he piɛɛli ɔ maa ‘tloo mɛ nitsɛmɛ a tlomi.’ (Galatia Bi 6:5) Se e sa nɛ a ná nɔ mi mami kaa nyɛmimɛ nɛ a ngɛ asafo ɔ mi ɔ suɔ mɛ, nɛ Yehowa Mawu nitsɛ hu suɔ mɛ. Baiblo ɔ tu Yehowa he munyu ke: “E yeɔ yalɔyihi, kɛ awusahi a sane kɛ haa mɛ.” (La 146:9) Akɛnɛ Yehowa jeɔ suɔmi mi nɛ e yeɔ bua fɔlɔ kake wekuhi he je ɔ, a ma nyɛ maa ye manye!