1. Mɛni Yehowa suɔ kaa wekuhi nɛ a pee?

 BENƐ Yehowa bɔ Hawa nɛ e ngɔ lɛ kɛ ha Adam kaa e yo ɔ, Adam da munyu nɛ e tu nɛ lɔ ɔ ji kekleekle Hebri asilɛ ɔ nɔ kɛ tsɔɔ kaa e bua jɔ wawɛɛ nitsɛ. (1 Mose 2:22, 23) Se kɛ̃ ɔ, Bɔlɔ ɔ bɔɛ adesahi kaa a bua nɛ jɔ a he kɛkɛ. E suɔ nɛ nihi kɛ a yihi kɛ wekuhi nɛ a pee e suɔmi nya ní. E de Adam kɛ Hawa ke: “Nyɛ fɔ babauu nɛ nyɛɛ hiɛ; nyɛ hyi zugba a nɔ tsuo, nɛ nyɛɛ ye zugba a tsuo nɔ. Nyɛɛ ye lo ɔmɛ, lohwe pɛlitsɛmɛ ɔmɛ, kɛ zugba a nɔ lohwe ɔmɛ tsuo a nɔ.” (1 Mose 1:28) Enɛ ɔ ji ní tsumi nɛ he hia wawɛɛ nitsɛ! Kaa Adam kɛ Hawa bu Yehowa tue, nɛ a pee e suɔmi nya ní ɔ, jinɛ a kɛ a bimɛ a bua ko jɔ wawɛɛ nitsɛ!

2, 3. Mɛni weku mi bimɛ maa pee konɛ a ná bua jɔmi wawɛɛ mwɔnɛ ɔ?

² Mwɔnɛ ɔ hu ɔ, ke wekuhi pee kake kɛ sɔmɔ Mawu ɔ, a bua jɔɔ. Bɔfo Paulo ngma ke: ‘Mawu jami lɛɛ, kaa bɔ nɛ a wo si ɔ, e he ngɛ se nami babauu ngɛ je nɛ ɔ mi, kɛ nɔ́ nɛ maa ba a mi tete.’ (1 Timoteo 4:8) Weku mi bimɛ nɛ a peeɔ Yehowa suɔmi nya ní, nɛ a kɛ e blɔ tsɔɔmihi nɛ ngɛ Baiblo ɔ mi ɔ tsuɔ ní ɔ, ma ná bua jɔmi ngɛ “je nɛ ɔ mi.” (La 1:1-3; 119:105; 2 Timoteo 3:16) Ke nɔ kake pɛ po kɛ Baiblo sisi tomi mlaahi tsuɔ ní ngɛ weku ko mi ɔ, níhi yaa nɔ saminya pe ke a ti nɔ ko nɔ ko pee we jã.

³ Ngɛ womi nɛ ɔ mi ɔ, a tsɔɔ Baiblo sisi tomi mlaahi fuu nɛ haa bua jɔmi hii weku mi. Eko ɔ, o ma yɔse  kaa a tĩ ekomɛ a mi si abɔ. Mɛni he je? Ejakaa a ji anɔkuale munyuhi nɛ maa ye bua wɔ ngɛ wa wekuhi a mi. Weku mi bimɛ nɛ a bɔɔ mɔde nɛ a ngɔɔ Baiblo sisi tomi mlaahi kɛ tsuɔ ní ɔ, naa niinɛ kaa Mawu suɔmi nya ní peemi “he ngɛ se nami babauu ngɛ je nɛ ɔ mi.” Nyɛ ha wa susu sisi tomi mlaa nɛ ɔmɛ a kpɛti eywiɛ a he ekohu nɛ waa hyɛ.

4. Mɛni he je nɛ he nɔ yemi he hia ngɛ gba si himi mi ɔ?

⁴ Matsɛ Salomo de ke: “Nɔ nɛ nyɛ we e he nɔ nɛ e ye ɔ, e ngɛ kaa ma nɛ a ba tua lɛ, nɛ a ku e gbogbo ɔmɛ kɛ pue si.” (Abɛ 25:28; 29:11) Loko nɔ ko kɛ e yo ma ná bua jɔmi ɔ, e he hia nɛ ‘a ye a he nɔ.’ Subai yaya komɛ kaa abofu nɛ nya wa, kɛ akɔnɔ yaya ma nyɛ ma puɛ ní ngɛ weku ɔ mi. E yee kaa a ma dla níhi nɛ puɛ ɔ.

5. Mɛni adesahi nɛ a yi mluku ɔ maa pee konɛ a nyɛ nɛ a ye a he nɔ? Ke a pee jã a, mɛni se a ma ná?

⁵ Ngɛ anɔkuale mi ɔ, akɛnɛ wa ji Adam sisi bimɛ he je ɔ, wa ti nɔ ko nɔ ko be nɛ e ye mluku. (Roma Bi 7:21, 22) Se kɛ̃ ɔ, he nɔ yemi piɛɛ mumi ɔ yiblii ɔ he. (Galatia Bi 5:22, 23) Ke wa sɔleɔ, nɛ waa kɛ Ngmami ɔ mi ga womi tsuɔ ní, nɛ waa kɛ nihi nɛ a yeɔ a he nɔ bɔɔ, nɛ wa yuɔ wa he ngɛ nihi nɛ a yi a he nɔ ɔ a he ɔ, Mawu mumi ɔ maa ye bua wɔ konɛ waa ye wa he nɔ. (La 119:100, 101, 130; Abɛ 13:20; 1 Petro 4:7) Ke wa peeɔ ní nɛ ɔmɛ nɛ e ba mi kaa waa kɛ ajuama bɔmi he ka ko kpe po ɔ, wa ma nyɛ maa ‘tu nya fo.’ (1 Korinto Bi 6:18) Lɔ ɔ hu ma ha nɛ wa be yi wu tso ní pee, nɛ waa kɛ dã numi hu be wa ní tsumi pee. Wa mi mi hu be fue mlamlaamla, nɛ wa maa to wa tsui si kɛ tsu nyagbahi a he ní. Nɔkɔtɔma ji mo jio, jokuɛ ji mo jio, e ba mi kaa o maa wo mumi ɔ yiblii nɛ ɔ eko.​—La 119:1, 2.

6. (a) Mɛni blɔ nya Mawu to ngɛ nihi nɛ e sa kaa a pee yi ɔ he? (b) Loko bua jɔmi maa hi weku ɔ mi ɔ, mɛni e sa kaa wekuyi ɔ nɛ kai?

⁶ Sisi tomi mlaa enyɔne nɛ he hia ji, nɛ wa maa le nɔ nɛ e sa kaa e pee weku ɔ yi. Paulo tsɔɔ kaa nɔ tsuaa nɔ kɛ e yi. E de ke: “I suɔ nɛ nyɛɛ nu sisi kaa Kristo ngɛ he wami ngɛ nyumuhi tsuo a nɔ kaa bɔ nɛ nyumu ji yi kɛ ha e yo, nɛ Mawu hu ji yi kɛ ha Kristo ɔ.” (1 Korinto Bi 11:3) Enɛ ɔ tsɔɔ kaa nyumu ɔ ji wekuyi, e yo ɔ fĩɔ e se, nɛ jokuɛwi ɔmɛ hu peeɔ tue bumi kɛ haa mɛ. (Efeso Bi 5:22-25, 28-33; 6:1-4) Mo ná nɛ o le kaa loko bua jɔmi maa hi weku ɔ mi ɔ, ja nyumu ɔ tsu e ní tsumi kaa wekuyi ɔ he ní saminya. Hunomɛ nɛ a kɛ Mawu blɔ tsɔɔmi tsuɔ ní ɔ le kaa e sɛ nɛ a wa a weku mi bimɛ yi mi. A kaseɔ Yesu nɛ ji mɛ hu a Yi ɔ. E ngɛ mi kaa Yesu ngɛ “he wami ngɛ níhi tsuo a nɔ” mohu lɛɛ, se “e bɛ nɛ a sɔmɔ lɛ, se e ba sɔmɔ mohu.” (Efeso Bi 1:22; Mateo 20:28) Jã kɛ̃ nɛ Kristofohi nɛ a ji wekuyi ɔ, bɔɔ mɔde kaa a ma sɔmɔ a yihi kɛ a bimɛ, se pi kaa a yihi kɛ a bimɛ ɔmɛ nɛ sɔmɔ mɛ.​—1 Korinto Bi 13:4, 5.

7. Mɛni Baiblo sisi tomi mlaahi maa ye bua yogbayo konɛ e nyɛ nɛ e tsu blɔ nya ní tsumi nɛ Mawu kɛ wo e dɛ ɔ he ní ngɛ weku ɔ mi?

⁷ Yogbayo nɛ e kɛ Mawu blɔ tsɔɔmi tsuɔ ní ɔ kɛ e huno si we koli, nɛ e yi e huno ɔ nɔ. E kɛ bua jɔmi fĩɔ e huno ɔ se, nɛ e kɛ lɛ peeɔ kake kɛ tsuɔ ní. Be komɛ ɔ, Baiblo ɔ tuɔ yogbayo he munyu kaa e ji “nɔ ko yo.” Enɛ ɔ tsɔɔ heii kaa e huno ɔ ji e yi. (1 Mose 20:3) Ke nyumu kɛ yo sɛ gba si himi mi ɔ, ‘gba si himi he mlaa fiɔ yo ɔ kɛ mɛtɛɔ nyumu ɔ he.’ (Roma Bi 7:2) Jehanɛ se hu ɔ, Baiblo ɔ tsɛ yo ke “he piɛɛlɔ nɛ sa.” (1 Mose 2:20) Yo ɔ ngɛ su kpakpa komɛ nɛ nyumu ɔ be eko, nɛ enɛ ɔ yeɔ bua nyumu ɔ. (Abɛ 31:10-31) Baiblo ɔ de hu ke nyumu ɔ kɛ e yo “maa hi si,” nɛ a maa  pee kake kɛ tsu ní. (Malaki 2:14) Ngmami ɔ mi sisi tomi mlaa nɛ ɔmɛ yeɔ bua huno ɔ, kɛ yo ɔ tsuo, konɛ a ti nɔ tsuaa nɔ nɛ le e blɔ he ngɛ weku ɔ mi, nɛ a je bumi nɛ mi kuɔ kpo kɛ ha a sibi hulɔ.

8, 9. Mɛni sisi tomi mlaahi maa ye bua weku mi bimɛ konɛ a nyɛ nɛ a sɛɛ ní saminya?

⁸ Ngɛ womi nɛ ɔ mi ɔ, a tsɔɔ wɔ kaa e he hia nɛ waa sɛɛ ní. Mɛni he je? Ejakaa ke nihi sɛɛɔ ní, nɛ a buɔ a sibi tue ɔ, níhi yaa nɔ saminya. Ngɛ womi nɛ ɔ mi ɔ, a tĩ mi si abɔ kaa ke nihi ngɛ ní sɛɛe ɔ, e he hia nɛ a pee ní enyɔ komɛ. Kaselɔ Yakobo tsɔɔ ní enyɔ nɛ ɔmɛ. E ngma ke: “Ke nɔ ko ngɛ munyu tue ɔ, nyɛɛ bu tue; nyɛ he ko sɔ kɛ tu munyu.”​—Yakobo 1:19.

⁹ E he hia hu nɛ waa hyɛ wa munyu tumi saminya. Ke nyɛ tuɔ munyu gegeege, nɛ nyɛ gbeɔ nyɛ sibi a he guɛ ɔ, e be hae nɛ nyɛ ní sɛɛmi nɛ ngɔ. (Abɛ 15:1; 21:9; 29:11, 20) Ke nɔ́ nɛ o ngɛ dee ɔ da, se o kɛ abofu, aloo he nɔ womi de, aloo o kɔɛ o lilɛ mi kɛ tu munyu ɔ, o munyu ɔ ma nyɛ maa ye nɔ awi. E sa nɛ munyu nɛ maa je wa nyami ɔ nɛ ngɔ kaa “nɔ́ ko nɛ a wo lɛ ngo.” (Kolose Bi 4:6) E sa nɛ wa munyu nɛ pee kaa “sika tsu akutuhi nɛ a to ngɔ wo sika hiɔ nɔ́ mi.” (Abɛ 25:11) Wekuhi nɛ a mi bimɛ sɛɛɔ ní saminya a, náa bua jɔmi wawɛɛ nitsɛ.

10. Mɛni ji suɔmi nɛ he hia pe kulaa nɛ nɔ kɛ e yo ma nyɛ ma je kpo kɛ ha a he?

¹⁰ Munyungu nɛ ji, “suɔmi” ɔ je kpo ngɛ womi nɛ ɔ mi si abɔ. Anɛ o kai suɔmi nɛ a tu he munyu ngɛ womi nɛ ɔ mi ɔ lo? Ngɛ anɔkuale mi ɔ, suɔmi nɛ ngɛ nɔ kɛ e yo a kpɛti (Hela, eʹros) he hia ngɛ gba si himi mi, nɛ e haa bua jɔmi hii nihi kɛ a yihi a kpɛti. Jã nɔuu kɛ̃ nɛ suɔmi kɛ huɛ bɔmi gbagbanii (Hela, phi·liʹa) nɛ hii  nɔ kɛ e yo a kpɛti ɔ hu mi waa. Se suɔmi ko ngɛ nɛ he hia pe kulaa. Lɔ ɔ ji nɔ́ nɛ a tsɛɛ ngɛ Hela gbi mi ke a·gaʹpe ɔ nɛ. Wa jeɔ suɔmi nɛ ɔ kpo kɛ haa Yehowa, kɛ Yesu, nɛ wa jeɔ lɛ kpo kɛ haa wa nyɛmi nɔmlɔ hulɔ. (Mateo 22:37-39) Yehowa jeɔ suɔmi nɛ ɔ kpo kɛ haa adesahi hulɔ. (Yohane 3:16) Hyɛ bɔ nɛ e maa hi wawɛɛ kaa wa ma je suɔmi nɛ ɔ kpo kɛ ha wa hunomɛ, wa yihi, kɛ wa bimɛ ha!​—1 Yohane 4:19.

11. Mɛni blɔ nɔ suɔmi yeɔ bua nihi kɛ a yihi ngɛ?

¹¹ Ngɛ gba si himi mi ɔ, suɔmi ngɛ kaa “kpa nɛ fiɔ níhi tsuo ngɔ peeɔ kake, nɛ lɛ tsuo peeɔ pɛ.” (Kolose Bi 3:14) Suɔmi peeɔ nɔ kɛ e yo kake, nɛ a peeɔ níhi nɛ a kɛ a bimɛ tsuo ma ná he se. Ke wekuhi kɛ haomi ko ngɛ kpee ɔ, suɔmi yeɔ bua mɛ nɛ a peeɔ kake kɛ tsuɔ haomi ɔ he ní. Suɔmi yeɔ bua nihi kɛ a yihi nɛ ke a ngɛ bwɔe po ɔ, be tsuaa be ɔ, a yeɔ bua a sibi, nɛ a bua jɔɔ a sibi a he. ‘Suɔmi fo we lɛ nɔ kake too e nɔ́ mi. Suɔmi haa nɔ toɔ tsui si ngɛ nɔ́ tsuaa nɔ́ mi. E haa nɔ heɔ nɔ́ tsuaa nɔ́ yeɔ; e ngɔɔ e hɛ ngɔ fɔɔ Mawu nɔ, nɛ e miaa e hɛ mi ngɛ níhi tsuo mi. Suɔmi se pui gblegbleegble.’​—1 Korinto Bi 13:4-8.

12. Mɛni he je nɛ ke nɔ kɛ e yo suɔ Mawu ɔ, a gba a ngɔɔ ɔ?

¹² Tsa pi suɔmi nɛ hii nɔ kɛ e yo a kpɛti ɔ pɛ nɛ haa nɛ kake peemi hiɔ a kpɛti, mohu ɔ, suɔmi nɛ a ma ná kɛ ha Yehowa a ji nɔ́ titli. (Fiɛlɔ 4:9-12) Mɛni he je? Bɔfo Yohane ngma ke: “Ke wa suɔ Mawu ɔ, wa yeɔ e mlaa amɛ a nɔ.” (1 Yohane 5:3) Enɛ ɔ he ɔ, e sa nɛ fɔli nɛ a tsɔɔ a bimɛ Mawu he ní. Pi suɔmi nɛ a ngɛ kɛ ha a bimɛ he je nɛ e sa kaa a pee jã ngɛ, mohu ɔ, e ji Yehowa mlaa. (5 Mose 6:6, 7) E sɛ nɛ nihi kɛ a yihi nɛ je a sibi a se. Tsa pi suɔmi nɛ a ngɛ kɛ ha a he ɔ pɛ he je nɛ e sɛ kaa a pee jã ngɛ, mohu ɔ, suɔmi nɛ mi wa nɛ a ngɛ kɛ ha Yehowa a he je. “Mawu maa kojo yaholi, kɛ gba puɛli.” (Hebri Bi 13:4) Ke huno ɔ aloo  yo ɔ kɛ haomi nguahi ngɛ weku ɔ mi bae po ɔ, suɔmi nɛ nɔ kake ngɛ kɛ ha Yehowa a maa ye bua lɛ konɛ e ya nɔ nɛ e kɛ Baiblo sisi tomi mlaahi nɛ tsu ní. Ngɛ anɔkuale mi ɔ, ke weku mi bimɛ suɔ Yehowa, nɛ a suɔ a sibi ɔ, a náa bua jɔmi wawɛɛ!

13. Ke wa fia wa pɛɛ si kaa wa maa pee Mawu suɔmi nya ní ɔ, mɛni blɔ nɔ lɔ ɔ maa ye bua wɔ konɛ waa kɛ wa juɛmi nɛ ma níhi nɛ a he hia wawɛɛ ɔ nɔ ngɛ?

¹³ Kristofohi ngɔɔ Mawu suɔmi nya ní peemi kɛ peeɔ nɔ́ titli ngɛ a si himi mi. (La 143:10) Lɔ ɔ nɛ a peeɔ ɔ tsɔɔ kaa a yeɔ Mawu gbeye nitsɛnitsɛ. Mawu suɔmi nya ní nɛ weku mi bimɛ peeɔ ɔ haa nɛ a kɛ a juɛmi maa níhi nɛ a he hia wawɛɛ ɔ a nɔ. (Filipi Bi 1:9, 10) Kaa nɔ hyɛmi nɔ́ ɔ, Yesu bɔ wɔ kɔkɔ ke: “I ba nɛ ma ba ha binyumuhi nɛ a te si kɛ wo a tsɛmɛ, biyihi nɛ te si kɛ wo a nyɛmɛ, nɛ nganyɛmɛ nɛ a te si kɛ wo nganyɛmɛ. Nɔ nitsɛ e we mi bimɛ ma plɛ e he nyɛli.”  (Mateo 10:35, 36) Munyu nɛ Yesu tu ɔ ji anɔkuale, ejakaa nihi fuu ngɛ nɛ a weku mi bimɛ waa mɛ yi mi. Enɛ ɔ ngɛ dɔmi wawɛɛ nitsɛ! Se kɛ̃ ɔ, e sɛ nɛ waa suɔ wa weku mi bimɛ pe Yehowa Mawu kɛ Yesu Kristo kɔkɔɔkɔ. (Mateo 10:37-39) Ke nɔ ko weku mi bimɛ teɔ si kɛ woɔ lɛ, se e yaa nɔ nɛ e peeɔ Mawu suɔmi nya ní ɔ, eko ɔ, be maa su nɛ a be si tee kɛ wo lɛ hu ngɛ ní kpakpahi nɛ e peeɔ nɛ a naa a he je. (1 Korinto Bi 7:12-16; 1 Petro 3:1, 2) Nɛ ke a yaa nɔ nɛ a teɔ si kɛ woɔ nɔ ɔ po ɔ, nile be mi kaa e ma kpa Mawu jami.

14. Ke fɔli peeɔ Mawu suɔmi nya ní ɔ, kɛ lɔ ɔ maa ye bua a bimɛ ɔmɛ ha kɛɛ?

¹⁴ Ke fɔli peeɔ Mawu suɔmi nya ní ɔ, e maa ye bua mɛ konɛ a mwɔ a yi mi kpɔ ngɛ nile mi. Kaa nɔ hyɛmi nɔ́ ɔ, ngɛ ma komɛ a nɔ ɔ, fɔli hyɛɛ blɔ kaa a bimɛ ɔmɛ maa hyɛ mɛ ngɛ a bwɔmi si. Ngɛ anɔkuale mi ɔ, e da blɔ kaa bimɛ maa hyɛ a fɔli nɛ a bwɔ ɔ a nɔ. Se enɛ ɔ tsɔɔ we kaa e sa nɛ fɔli nɛ tsitsɛɛ a bimɛ ɔmɛ a yi se konɛ a ya di ní nami se. Ke fɔli ha a bimɛ ya di he lo nya níhi a se pe Mawu jami ɔ, lɔ ɔ maa ye a bimɛ ɔmɛ awi.​—1 Timoteo 6:9.

15. Mɛni nɔ hyɛmi nɔ́ kpakpa Timoteo yayo Eunike pee?

¹⁵ Paulo huɛ ji Timoteo. Timoteo yayo Eunike pee nɔ hyɛmi nɔ́ kpakpa ngɛ enɛ ɔ blɔ fa mi. (2 Timoteo 1:5) E ngɛ mi kaa Eunike huno ɔ, pi Kristofo no ji lɛ mohu lɛɛ, se Eunike kɛ Timoteo na Loise nyɛ nɛ a tsɔse Timoteo nɛ e kɛ Mawu jami pee oti ngɛ e si himi mi. (2 Timoteo 3:14, 15) Benɛ Timoteo wa saii ɔ, Eunike ngmɛ Timoteo blɔ nɛ e ya piɛɛ Paulo he kɛ fiɛɛ Matsɛ Yemi sɛ gbi ɔ kaa ma se sane kpakpa fiɛɛli. (Bɔfo Ɔmɛ A Ní Tsumi 16:1-5) Moo hyɛ bɔ nɛ Eunike bua maa jɔ ha benɛ e bi Timoteo ba plɛ ma se sane kpakpa fiɛɛlɔ nɛ nane pi si ɔ! Tsɔsemi kpakpa nɛ Timoteo ná kɛ je e jokuɛ mi ɔ lɛ ha nɛ benɛ e ba wa a, e kɛ Mawu jami fiɛ we ɔ nɛ. E ngɛ mi kaa eko ɔ,  Eunike hɛ jaa ngɛ e bi ɔ he mohu lɛɛ, se atsinyɛ jemi ko be he kaa benɛ e nu kaa Timoteo kɛ anɔkuale yemi ngɛ sɔmɔe ɔ, e bua jɔ, nɛ e tsui hu nɔ e mi.​—Filipi Bi 2:19, 20.

16. Kɛ Yesu pee e ní ngɛ e nyɛ ɔ he ha kɛɛ, se mɛni ji nɔ́ titli nɛ he hia lɛ?

¹⁶ A tsɔse Yesu ngɛ weku ko nɛ e mi bimɛ yeɔ Mawu gbeye ɔ mi. Benɛ Yesu ba wa a, e susu e nyɛ ɔ he wawɛɛ. Jã nɛ e sa kaa bimɛ nɛ a pee. (Luka 2:51, 52; Yohane 19:26) Se nɔ́ nɛ he hia Yesu titli ji kaa e maa pee Mawu suɔmi nya ní. Ngɛ e blɔ fa mi ɔ, blɔ kake nɛ e gu nɔ kɛ pee jã ji kaa e ngɔ e wami nɛ ye mluku ɔ kɛ ba sã afɔle kɛ kpɔ̃ adesa yayami peeli. Enɛ ɔ nɛ e pee ɔ bli blɔ kɛ ha adesahi konɛ a nyɛ nɛ a ná neneene wami.​—Marko 10:45; Yohane 5:28, 29.

17. Mɛni jɔɔmihi nɛ nihi nɛ a peeɔ Mawu suɔmi nya ní ɔ ma ná ngɛ anɔkuale nɛ Yesu ye ɔ he je?

¹⁷ Benɛ Yesu gbo se ɔ, Yehowa tle lɛ si kɛ je gbeje kɛ ho hiɔwe ya nɛ e ha lɛ he blɔ ngua. Nyagbe ɔ, Yehowa wo lɛ Matsɛ ngɛ e hiɔwe Matsɛ Yemi ɔ nya. (Mateo 28:18; Roma Bi 14:9; Kpojemi 11:15) Kɛ gu Yesu gbenɔ afɔle sami ɔ nɔ ɔ, Mawu hla nimli komɛ konɛ a ya piɛɛ Yesu he ngɛ hiɔwe kɛ ye matsɛ ngɛ hiɔwe Matsɛ Yemi ɔ nya. Yesu gbenɔ ɔ ma ha nɛ ni kpahi nɛ a hɛɛ tsui kpakpa a maa hi si kaa nihi nɛ a ye mluku ngɛ paradeiso nɛ maa ba ekohu ɔ mi. (Kpojemi 5:9, 10; 14:1, 4; 21:3-5; 22:1-4) E ji he blɔ ngua nɛ wa ná mwɔnɛ ɔ kaa wa maa fiɛɛ sane kpakpa nɛ ɔ kɛ ha nihi tsuo.​—Mateo 24:14.

18. Mɛni kaimi, kɛ he wami womi munyu nɛ a kɛ ha weku mi bimɛ kɛ nihi tsuo?

¹⁸ Bɔfo Paulo tsɔɔ kaa Mawu wo si kaa nihi nɛ a  peeɔ lɛ Mawu ɔ e suɔmi nya ní ɔ, ma ná jɔɔmihi fuu ngɛ ‘je nɛ maa ba a mi.’ Atsinyɛ jemi ko be he kaa Mawu suɔmi nya ní nɛ wa maa pee ɔ ji nɔ́ nɛ hi pe kulaa nɛ ma ha nɛ wa ná bua jɔmi! Mo kai kaa “je ɔ, kɛ e mi níhi nɛ peeɔ nɔ akɔnɔ ɔ ngɛ bee kɛ yaa. Se nɔ nɛ peeɔ Mawu suɔmi nya ní ɔ, lɛɛ e ngɛ kɛ yaa neneene.” (1 Yohane 2:17) Enɛ ɔ he ɔ, e sa nɛ bimɛ kɛ a fɔli, hunomɛ kɛ yigbayihi, nihi nɛ a wa nɛ a ngɛ bimɛ, kɛ ni nɛmɛ nɛ a wa nɛ a be bimɛ tsuo nɛ a bɔ mɔde kaa a maa pee Mawu suɔmi nya ní. Ke o kɛ nyagbahi nɛ nya wa po ngɛ kpee ngɛ si himi mi ɔ, mo kai kaa o ngɛ Mawu hɛ kalɔ ko sɔmɔe. Moo pee níhi nɛ ma ha Yehowa bua maa jɔ. (Abɛ 27:11) Moo ba o je mi saminya konɛ o ná bua jɔmi amlɔ nɛ ɔ, nɛ́ o ná neneene wami ngɛ je ehe nɛ maa ba a hu mi!