KE O kane adafi fiami womi, aloo o hyɛ tiivi ɔ, o naa yi wu tso, kɛ awi yemi ní peepeehi fuu, kɛ ta hwumi. Jã kɛ̃ nɛ ke o bu hleedio hu tue ɔ, o nuɔ níhi kaa jã. Eko ɔ, mo nitsɛ o ngɛ nɔ́ nae ngɛ hiɔ dɛ mi, aloo eko ɔ, o suɔlɔ ko gbo.

Mo bi o he ke:

• Anɛ yi mi nɛ Mawu to ngɛ i kɛ ye weku ɔ wa he ji nɛ ɔ lo?

• Jije ma nyɛ ma ná yemi kɛ buami kɛ je kɛ da ye haomi ɔmɛ a nya?

• Anɛ tue mi jɔmi nitsɛnitsɛ ma nyɛ maa ba ligbi ko lo?

Baiblo ɔ ha sane bimi nɛ ɔmɛ a heto, nɛ heto ɔmɛ haa nɛ nɔ tsui nɔɔ nɔ mi.

• Nɔ́ yeyee be nihi pee hu, nɔ ko be bwɔe hu, nɛ nɔ ko be gboe hu.​—Kpojemi 21:4

• “Glɔtsɛmɛ ma hlu kaa odabɔ.”​—Yesaya 35:6

• “Hɛ yuyuili maa hyɛ nɔ́ ekohu.”​—Yesaya 35:5

•  A ma tle gbogboehi a si kɛ ba wami mi ekohu.​—Yohane 5:28, 29

• Hiɔ se maa po.​—Yesaya 33:24

• Nɔ fɛɛ nɔ nɛ ngɛ zugba a nɔ ɔ ma ná niye ní fuu maa ye.​—La 72:16

Eko ɔ, o ma susu kaa níhi nɛ o kane ngɛ womi nɛ ɔ mi kɛ sɛ hlami ɔ ji nlami ko kɛkɛ. Se Mawu wo si kaa e be kɛe kulaa nɛ e kɛ tsakemi nɛ ɔmɛ maa ba zugba a nɔ, nɛ Baiblo ɔ tsɔɔ blɔ nɔ nɛ e maa gu kɛ pee jã.

Pi lɔ ɔ pɛ nɛ Baiblo ɔ tsɔɔ. Baiblo ɔ deɔ wɔ níhi nɛ a he hia kaa waa pee konɛ wa ná bua jɔmi nitsɛnitsɛ nɛ wa tsui hu nɛ nɔ wa mi amlɔ nɛ ɔ. Mo susu níhi nɛ haa nɛ o haoɔ ɔ a he bɔɔ nɛ o hyɛ. Eko ɔ, jamɛ a ní ɔmɛ ekomɛ ji, ohia, weku mi nyagbahi, hiɔ, aloo o suɔlɔ ko nɛ e gbo. Baiblo ɔ ma nyɛ maa ye bua mo konɛ o da haomi nɛ ɔmɛ a nya. E ma nyɛ ma ha sane bimihi nɛ nyɛɛ se nɛ ɔ a heto hulɔ, nɛ lɔ ɔ maa wo o bua:

• Mɛni he je nɛ wa naa nɔ́ ɔ?

• Kɛ wa ma plɛ kɛ da wa nyagba amɛ a nya ha kɛɛ?

• Anɛ bua jɔmi ma nyɛ maa hi wa weku ɔ mi lo?

• Ke wa gbo ɔ, mɛni baa wa nɔ?

• Anɛ wa maa na wa suɔli nɛ a gbo ɔ ekohu lo?

• Mɛni he je nɛ wa ma nyɛ ma ná nɔ mi mami kaa Mawu maa pee níhi tsuo nɛ e wo si kaa e maa pee ɔ?

 Womi nɛ ɔ nɛ o ngɛ kasee ɔ po tsɔɔ kaa o suɔ kaa o maa le níhi nɛ ngɛ Baiblo ɔ mi. Womi nɛ ɔ maa ye bua mo. Sane bimihi ngɛ nɛ o maa da nɔ kɛ susu kuku ɔmɛ a he. Sane bimi ɔmɛ maa ye bua mo konɛ o nu munyuhi nɛ ngɛ Baiblo ɔ mi ɔ a sisi saminya. Nimli ayɔhi abɔ a bua jɔ he kaa Yehowa Odasefohi kɛ mɛ nɛ susu Baiblo ɔ he, nɛ Yehowa Odasefohi kɛ mɛ susuɔ he. Wa he ye kaa mo hu o maa suɔ kaa a kɛ mo nɛ susu Baiblo ɔ he. Mawu nɛ jɔɔ mo konɛ o nyɛ nɛ o yɔse anɔkuale nɛ ngɛ Baiblo ɔ mi ɔ!