KE NƆ ko nyɛɛ kɛ ma o ngɔ nɛ e kami su tsu yi mi ɔ, mɛni o ma susu? Nɔ nɛ ngɛ kikɛ ɔ ji oblai! Be ko ɔ, oblaihi hi zugba a nɔ nitsɛ. Baiblo ɔ tsɔɔ nya kaa, a tsɛmɛ ji bɔfohi nɛ je hiɔwe kɛ ba. Mɛni ha e ba mi ja?

Mo kai kaa bɔfo yayami nɛ ji Satan ɔ ngɛ nihi haoe kpamisa. E bɔ mɔde kaa e ma ha bɔfo ɔmɛ po a pee ní yayamihi. Pee se ɔ, bɔfo ɔmɛ ekomɛ bu Satan tue. A ngmɛɛ nítsumi nɛ́ Mawu ha mɛ ngɛ hiɔwe ɔ he. Nɛ a ba zugba a nɔ nɛ a ba tsake a he kɛ pee nimli. O le nɔ́ nɛ ha a pee ja lo?

Baiblo ɔ tsɔɔ kaa nɔ́ nɛ ha bɔfo ɔmɛ ba zugba a nɔ ji kaa, a na yihi nɛ́ a he ngɛ fɛu, nɛ a suɔ kaa a kɛ mɛ nɛ́ hi si. Lɔɔ he ɔ, a ba zugba a nɔ nɛ a ba ngɔ yi nɛ ɔmɛ. Baiblo ɔ tsɔɔ nya kaa enɛ ɔ ji tɔmi, ejakaa Mawu bɔ bɔfohi kaa a hi hiɔwe se pi zugba a nɔ.

Benɛ bɔfo ɔmɛ a yi ɔmɛ fɔ bimɛ ɔ, bimɛ ɔmɛ je muno. Eko ɔ, benɛ a wɛ lolo ɔ, a yo we kaa a ngɛ slɔɔto. Se benɛ a ngɛ wae ɔ, a bɔni timi gbagbanii gbagbanii, nɛ a he hu bɔni wami kɛ ya si benɛ a plɛ oblaihi.

Oblaihi nɛ ɔmɛ ji yiwutsotsɛmɛ. Nɛ akɛnɛ a ti nɛ́ a he hu wa heje ɔ, a yeɔ nihi awi. A bɔɔ mɔde kaa a maa nyɛ nɔ tsuaa nɔ nɔ pani nya konɛ a pee nimli yayamihi kaa mɛ kɛ̃.

Enok gbo, se e piɛ nyumu ko ngɛ zugba a nɔ nɛ́ e ji nɔmlɔ kpakpa. Nyumu nɛ ɔ biɛ ji Noa. E peeɔ nɔ́ nɛ Mawu deɔ lɛ kaa e pee be tsuaa be.

Ligbi ko ɔ, Mawu de Noa ke be su nɛ́ e ma kpata nimli yayamihi tsuo a hɛ mi. Se Mawu ma he Noa kɛ e weku ɔ, kɛ lowhehi fuu a yi wami. Ha nɛ waa hyɛ bɔnɛ Mawu pee enɛ ɔ ha.