NÍ KASEMI 18
Yakob Ho Haran Ya
ANƐ o le nyumuhi nɛ Yakob kɛ mɛ ngɛ munyu tue ɔ lo? Yakob kɛ mɛ ya kpe ngɛ vu ko he, benɛ e hia blɔ ligbihi fuu se. A ngɛ a tohi a nɔ hyɛe. Yakob bi mɛ ke: ‘Jije nyɛ je?’
A ha heto ke: ‘Wa je Haran.’
Yakob kpale bi mɛ ke: ‘Nyɛ le Laban lo?’
Nɛ a ha lɛ heto ke: ‘Ee, hyɛ, e biyo Rahel nɛ kpaka to ɔmɛ kɛ ma a nɛ.’ Anɛ o na Rahel jee nɛ ma lo?
Benɛ Yakob na kaa Rahel kɛ e tsɛko Laban to ɔmɛ ba su vu ɔ he ɔ, e tsitsɛɛ tɛ ɔ ngɛ vu ɔ nya ha to ɔmɛ konɛ a nu nyu. Kɛkɛ nɛ Yakob fiɔ Rahel nya he nɛ e tsɔɔ lɛ nɔ nɛ e ji. Rahel bua jɔ saminya, nɛ e ho we mi ya nɛ e ya de e tsɛ Laban.
Laban bua jɔ kaa Yakob maa hi a ngɔ. Nɛ benɛ Yakob de Laban kaa e maa ngɔ Rahel ɔ, e bua jɔ. Se, Laban de Yakob ke ja e kpaka e tohi ha lɛ jeha kpaago loko e ma ha nɛ e ngɔ Rahel. Akɛnɛ Yakob suɔ Rahel wawɛɛ heje ɔ, e kplɛɛ nɔ ja. Se, benɛ be ɔ su nɛ a maa ngɔ yo ɔ kɛ ha lɛ ɔ, o le nɔ́ nɛ ba?
Laban ngɔ e biyo Lea mohu kɛ ha Yakob ngɛ Rahel nane mi. Nɛ benɛ Yakob kplɛɛ nɔ kaa e maa ngɔ jeha kpaago kpa kɛ tsu ní ɔ, Laban ngɔ Rahel hu kɛ ha lɛ. Jamɛ a be ɔ mi ɔ, Mawu ngmɛɛ blɔ nɛ nyumuhi ngɔɔ yihi pe kake. Se amlɔ nɛ ɔ, Baiblo ɔ tsɔɔ kaa yo kake pɛ nɛ e sa kaa nyumu nɛ ngɔ.