JEHAHI babauu ba be—Jeha 10, jeha 20, jeha 30, jeha 39! Nɛ Israelbi ɔmɛ ngɛ nga kplanaa a nɔ kpamisa. Se, Yehowa hyɛ a nɔ ngɛ jeha nɛ ɔmɛ tsuo mi. E ngɔ mana kɛ lɛ mɛ. E kɛ bɔku titima nyɛɛ a hɛ mi piani, nɛ e kɛ la titima nyɛɛ a hɛ mi nyɔ mi. A tadehi gba we, nɛ a nanehi hu fuu we ngɛ jeha abɔ nɛ ɔmɛ tsuo mi.

Kɛ je benɛ a je Mizraim ɔ, amlɔ nɛ ɔ ji jeha nyingmi eywiɛne ɔ we kekle nyɔhiɔ ɔ. Israelbi ɔmɛ ba to si ngɛ Kadesh ekohu. Hiɛ ɔ lɛ a ngɛ loko a tsɔ slaali 12 ɔmɛ kɛ ya slaa Kanaan zugba a maa pee jeha 40 mi ji nɛ ɔ nɛ. Mose nyɛmiyo Miriam gbo ngɛ Kadesh. Nɛ haomi ba ngɛ hiɛ ɔ ekohu.

Ni ɔmɛ nɛ́ nyu nɛ a nu. Enɛ ɔ heje ɔ, a tu munyu kɛ si Mose ke: ‘Wa ná nɛ wa gbo mohu. Mɛni heje o kpaka wɔ kɛ je Mizraim kɛ ba zugba yaya nɛ niye ní ko be nɔ nɛ ɔ nɔ? Blɛfo be ɔ, ngmɔkɔ hu be; nɛ wai yiblii loo akutu ko hu be. Nyu nunui kɛkɛ hu be hiɛ ɔ.’

Benɛ Mose kɛ Aaron ya kpe he bo tsu ɔ nya nɛ a ya sɔle ɔ, Yehowa de Mose ke: ‘Nyɛ bua ma a nya ngɛ he kake. Lɔɔ se ɔ, moo tu munyu kɛ tsɔɔ tɛsa a nɛ ngɛ lejɛ ɔ, ngɛ mɛ tsuo a hɛ mi. Nyu maa je tɛsa a mi kɛ ha ma a kɛ a lohwe ɔmɛ nɛ a nu.’

Lɔɔ he ɔ, Mose bua mabi ɔmɛ a nya, nɛ e de mɛ ke: ‘Nyɛɛ bu tue, nyɛ nihi nɛ nyɛ be hemi kɛ yemi ngɛ Mawu mi! Anɛ i kɛ Aaron ma je nyu kɛ je tɛsa nɛ ɔ mi kɛ ha nyɛ lo?’ Kɛkɛ nɛ Mose ngɔ e tso ɔ kɛ fia tɛsa a si enyɔ, nɛ nyu babauu kaa pa je mi kɛ pue si. Nimli ɔmɛ kɛ a lohwe ɔmɛ tsuo na nyu nɛ a nu.

Se Yehowa mi mi fu Mose kɛ Aaron. Mɛni heje? Ejakaa Mose kɛ Aaron de ke mɛ ji nihi nɛ ma ha nɛ nyu ɔ maa je tɛsa a mi kɛ ba. Se ngɛ anɔkuale mi ɔ, Yehowa lɛ ha nɛ nyu ɔ je tɛsa a mi kɛ ba a nɛ. Se akɛnɛ Mose kɛ Aaron tui mabi ɔmɛ anɔkuale heje ɔ, Yehowa de mɛ kaa e maa gbla a tue. E de mɛ ke: ‘Nyɛ be ye ma a hɛ mi nyɛɛe kɛ ya Kanaan zugba a nɔ hu.’

E kɛ we tsɔ̃ nɛ Israelbi ɔmɛ je Kadesh. Be bɔɔ se ɔ, a ya su Hor Yoku ɔ he. Yoku nɛ ɔ nɔ nɛ Aaron gbo ngɛ. E ye jeha 123 loko e gbo. Israel ma a ye aywilɛho, nɛ a fo Aaron he ya ligbi 30. Aaron bi Eleazar ba ye osɔfo nɔkɔtɔma ha Israel ma a.