ANƐ o le nyumu nɛ he wa pe kulaa nɛ hi si hyɛ ɔ biɛ lo? E ji ma nyadalɔ, nɛ a tsɛɛ lɛ ke Samson. Yehowa ji nɔ nɛ ha Samson he wami ɔ nɛ. Loko a ma fɔ Samson ɔ, Yehowa de e nyɛ ke: ‘E be kɛe nɛ o ma fɔ binyumu. E maa nyɛɛ Israel hɛ mi kɛ kpɔ ma a kɛ je Filistibi ɔmɛ a dɛ.’

Filistibi ɔmɛ ji nimli yayamihi nɛ a ngɛ Kanaan. A ngɛ tabuli babauu, nɛ a haoɔ Israelbi ɔmɛ wawɛɛ. Ligbi ko ɔ, benɛ Samson yaa Filistibi ɔmɛ a ngɔ ɔ, jata ngua ko kɛ lɛ ba kpe ngɛ blɔ nɔ. Se Samson ngɔ e nine kɛkɛ nɛ e kɛ gbe jata a. Jehanɛ se ɔ, e gbe Filistibi yayamihi fuu hulɔ.

Pee se ɔ, Samson ya ngɔ yo ko nɛ a tsɛɛ lɛ Delila. Filistibi ɔmɛ a nyatsɛmɛ ɔmɛ wo Delila si kaa, ke e tsɔɔ mɛ nɔ́ nɛ ha Samson he wami ɔ, a ti nɔ tsuaa nɔ ma ha lɛ sika hiɔ 1,100. Delila suɔ kaa e ná sika fuu nɛ a tsɔɔ nɛ ɔ. Pi Samson, loo Mawu webi a huɛ kpakpa ji Delila. Enɛ ɔ heje ɔ, e bi Samson si abɔ konɛ e tsɔɔ lɛ he nɛ e ná e he wami ɔ kɛ je.

Delila hao Samson hluu nɛ nyagbe ɔ, Samson tsɔɔ lɛ he nɛ e he wami ɔ ngɛ. E de lɛ ke: ‘Kɛ je benɛ a fɔ mi ɔ, a sã we ye yi bwɔmi ɔ hyɛ. Ejakaa Mawu hla mi kaa ma pee e sɔmɔlɔ slɔɔto ko nɛ ji Nazirno. Ke a sã ye yi bwɔmi ɔ pɛ, ye he wami ɔ maa je ye mi.’

Benɛ Delila nu munyu nɛ ɔ, e ha Samson hwɔ mahe ngɛ e tɛ nɔ. Kɛkɛ nɛ e tsɛ nyumu ko nɛ e ba sã Samson yi bwɔmi ɔ. Benɛ Samson hɛ tsiɛ ɔ, e he wami ɔ je e mi. Filistibi ɔmɛ ba nɛ a ba nu lɛ. A tá e hɛngmɛ enyɔ ɔmɛ, nɛ a ngɔ lɛ kɛ pee a nyɔguɛ.

Ligbi ko ɔ, Filistibi ɔmɛ ngmɛ okplɔɔ nguaa ko, konɛ a kɛ wo a mawu nɛ ji Dagon ɔ hɛ mi nyami. Lɔɔ he ɔ, a ya je Samson kɛ je tsu ɔ mi kɛ ba lejɛ ɔ, konɛ a ye e he fɛu. Se, Samson yi bwɔmi ɔ bɔni hɛmi ekohu. Lɔɔ he ɔ, Samson de nyumuyo ɔ nɛ pɛtɛ e nine si ɔ ke: ‘Ha ma pɛtɛ titima amɛ a he nɛ ma hyɛ.’ Kɛkɛ nɛ Samson pɛtɛ titima amɛ a he, nɛ e sɔle ha Yehowa kaa e ha lɛ he wami ekohu. E kpa ngmlaa nɛ e de ke: ‘Ha nɛ i kɛ Filistibi ɔmɛ nɛ gbo.’ Filistibi 3,000 nɛ a ngɛ okplɔɔ ngmɛmi ɔ sisi. Nɛ benɛ Samson tsitsɛɛ tɛ ɔmɛ ɔ, tsu ɔ hule kɛ pue nimli yayami nɛ ɔmɛ tsuo a nɔ nɛ a gbo.