AO, AO! Mɛni ma a ngɛ pee nɛ ɔ? A ngɛ sɔlee kɛ ngɛ na bi hae! Mɛni heje a ngɛ enɛ ɔ pee?

Benɛ Mose se ya kɛ ngɛ yoku ɔ nɔ ɔ, mabi ɔmɛ de ke: ‘Wa li nɔ́ nɛ ya ba Mose nɔ. Lɔɔ he ɔ, nyɛ ha waa pee mawu nɛ́ ma nyɛɛ wa hɛ mi kɛ je zugba nɛ ɔ nɔ.’

Mose nyɛmi Aaron de mɛ ke: ‘Yoo, i nu. Nyɛ je nyɛ sika tsu tue nya ní ɔmɛ ba ha mi.’ Aaron sile tue nya ní ɔmɛ nɛ a kɛ ba ha lɛ ɔ kɛ pee sika tsu na bi. Nɛ ma a de ke: ‘Wa Mawu nɛ je wɔ kɛ je Mizraim ɔ, lɛ ji nɛ ɔ nɛ!’ Kɛkɛ nɛ Israelbi ɔmɛ ngmɛ okplɔɔ ngua, nɛ a ja sika tsu na bi ɔ.

Benɛ Yehowa na enɛ ɔ, e mi mi fu saminya. Lɔɔ he ɔ, e de Mose ke: ‘Mo kple si esɔesɔ. Ma a ngɛ nɔ́ yayami pee nitsɛ. A je a hɛ ngɛ ye mlaa amɛ a he nɛ a bɔni si kplami ha sika tsu na bi.’

Mose kple yoku ɔ kɛfokɛfo. Nɛ benɛ e su ma a he ta a, nɔ́ nɛ e na ji nɛ ɔ nɛ: Mabi ɔmɛ ngɛ lae nɛ a ngɛ doe kɛ ngɛ sika tsu na bi ɔ bɔlee! Mose mi mi fu nɛ e ngɔ tɛ tɛtlɛɛ enyɔ ɔmɛ nɛ mlaa amɛ ngɛ nɔ ɔ kɛ fia si, nɛ a ywia. Kɛkɛ nɛ e ngɔ sika tsu na bi ɔ hu nɛ e sile lɛ. Nɛ e wɛɛ lɛ kɛ pee mamu.

Ma a pee yayami wawɛɛ nitsɛ. Lɔɔ he Mose de nyumu ɔmɛ a ti ni komɛ kaa a ngɔ a klaatehi. Mose de ke: ‘Nimli yayami ɔmɛ tsuo nɛ a ja sika tsu na bi ɔ sa gbenɔ.’ Enɛ ɔ he ɔ, nyumu ɔmɛ gbe nimli 3,000! Anɛ enɛ ɔ tsɔɔ we wɔ kaa e sa nɛ waa hyɛ nɛ hi konɛ wa ja Yehowa pɛ, se pi lakpa mawu kpa ko lo?