MOO hyɛ tso yiblii nɛ nyumu ɔmɛ hɛɛ ɔ. Hyɛ bɔnɛ wai yiblii kɛ sau ɔ kle ha. Ni enyɔ nɛ a hɛɛ lɛ ngɛ tso he. Nɛ hyɛ ngmɔkɔ ɔ kɛ tso yiblii ko kaa akutu ɔ hu ha. Jije a ya ngɔ tso yiblii nɛ ngɛ akɔnɔ kikɛ kɛ je? A kɛ je Kanaan zugba a nɔ. Mo kai kaa Kanaan ji he nɛ Abraham, Isak, kɛ Yakob hi. Se hwɔ nɛ ba zugba a nɔ ɔ ha Yakob kɛ e weku ɔ hia kɛ ba Mizraim. Jehanɛ ɔ, maa pee jeha 216 se ɔ, Mose nyɛɛ Israelbi ɔmɛ a hɛ mi kɛ kpale kɛ yaa Kanaan. A ba su he ko ngɛ nga a nɔ nɛ a tsɛɛ ke Kadesh.

Nimli yayamihi ngɛ Kanaan zugba a nɔ. Lɔɔ he ɔ, Mose tsɔ nyumuhi 12 kaa a ya slaa ma a, nɛ e de mɛ ke: ‘Nyɛɛ hyɛ nimli ɔmɛ a he hiɛmi ngɛ ma a mi, nɛ nyɛɛ hyɛ keji a he wa loo a he wɛ. Nyɛɛ hyɛ kaa zugba a baa ní loo e bɛ ní. Nɛ nyɛɛ bɔ mɔde konɛ nyɛɛ ngɔ zugba a nɔ tso yiblii ɔ eko kɛ ba.’

Benɛ slaali ɔmɛ kpale kɛ ba Kadesh ɔ, a ba de Mose ke: ‘Wa na kaa zugba a ji zugba kpakpa nɛ baa ní.’ A ngɔ zugba a nɔ tso yiblii ɔ ekomɛ kɛ tsɔɔ Mose kaa odase nɛ tsɔɔ kaa zugba a hi. Se, slaali ɔmɛ a kpɛti nihi 10 de ke: ‘Mabi ɔmɛ ji nimli oblaihi nɛ a he wa. Ke wa ka kaa wa maa ngɔ zugba a, a maa gbe wɔ.’

Israelbi ɔmɛ a tsui po benɛ a nu amaniɛ bɔmi nɛ ɔ. A de ke: ‘Afani nɛ wa gbo ngɛ Mizraim zugba a nɔ loo ngɛ nga a nɔ hiɛ ɔ mohu, pe nɛ́ a maa gbe wɔ ngɛ ta mi, nɛ́ a maa ngɔ wa yihi kɛ wa bimɛ nyɔguɛhi. Nyɛ ha nɛ́ waa hla wa nyatsɛ kpa kɛ da Mose nane mi nɛ́ waa kpale kɛ ho Mizraim ya!’

Se slaali ɔmɛ a kpɛti ni enyɔ ngɛ hemi kɛ yemi ngɛ Yehowa mi, lɔɔ he ɔ, a bɔ mɔde kaa a maa jɔɔ mabi ɔmɛ a tsui he. A tsɛɛ mɛ Yoshua kɛ Kaleb. A de mabi ɔmɛ ke: ‘Nyɛ ko ye gbeye. Yehowa ngɛ wa se. Zugba a ngɔmi be yee ha wɔ kulaa.’ Se ni ɔmɛ bui mɛ tue. A ka Yoshua kɛ Kaleb gbemi po.

Enɛ ɔ ha nɛ Yehowa mi mi fu wawɛɛ, nɛ e de Mose ke: ‘Nihi tsuo nɛ ye kɛ je jeha 20 kɛ yaa, a ti nɔ ko nɔ ko be Kanaan zugba a nɔ yae. A na okadihi nɛ i pee ngɛ Mizraim kɛ nga a nɔ, se kɛ̃ ɔ, a ná we hemi kɛ yemi ngɛ ye mi. Enɛ ɔ he ɔ, a maa nyɛɛ ngɛ nga a nɔ jeha 40 kɛ ya si be nɛ a nyagbe nɔ ɔ ma gbo. Yoshua kɛ Kaleb pɛ nɛ a maa ya Kanaan zugba a nɔ.’