ANƐ o le nɔ́ nɛ ha nyumu nɛ ɔ ngɛ e tade ɔ gbae lo? Yehowa ji nɔ nɛ de lɛ kaa e pee ja. Nyumu nɛ ɔ ji Mawu gbalɔ, nɛ a tsɛɛ lɛ Ahiya. Anɛ o le nɔ nɛ ji gbalɔ lo? E ji nɔ ko nɛ Mawu deɔ lɛ nɔ́ nɛ maa ba hwɔɔ se kɛ sɛɛ hlami.

Nɔ nɛ Ahiya kɛ ngɛ munyu tue ɔ ji Yeroboam. Yeroboam ji nyumu ko nɛ Salomo ngɔ lɛ kɛ to tsu mami nítsumi ɔ eko nya. Benɛ Ahiya kɛ Yeroboam kpe ngɛ blɔ nɔ ɔ, Ahiya pee nyakpɛ nɔ́ ko. E je e tade he nɛ e wo ɔ nɛ e dla mi 12. Nɛ e de Yeroboam ke: ‘Moo ngɔ 10.’ Anɛ o le yi mi tomi heje nɛ Ahiya ha Yeroboam tade ɔ nɛ e dla mi ɔ mi 10 lo?

Ahiya tsɔɔ nya kaa Yehowa ma kpɔ matsɛ yemi ɔ kɛ je Salomo dɛ. E de hu kaa Yehowa maa ngɔ wɛtso 10 kɛ ha Yeroboam. Enɛ ɔ tsɔɔ kaa wɛtso enyɔ pɛ nɛ maa piɛ ha Salomo bi Rehoboam nɛ́ e ye nɔ.

Benɛ Salomo nu munyu nɛ Ahiya de Yeroboam ɔ, e mi mi fu wawɛɛ. E ka kaa e maa gbe Yeroboam. Lɔɔ he ɔ, Yeroboam tu fo kɛ ho Mizraim ya. Be bɔɔ se ɔ, Salomo gbo. E ye Israel nɔ jeha 40, se jehanɛ ɔ, a wo e bi Rehoboam matsɛ. Yeroboam nu ngɛ Mizraim kaa Salomo gbo, lɔɔ he ɔ, e kpale kɛ ba Israel.

Pi matsɛ kpakpa ji Rehoboam. E wa mabi ɔmɛ yi mi pe e tsɛ Salomo po. Yeroboam kɛ ma nimeli komɛ ya Matsɛ Rehoboam ngɔ nɛ a ya de lɛ kaa e na mabi ɔmɛ mɔbɔ. Se Rehoboam pui a nya mi fɛɛ. Ngɛ anɔkuale mi ɔ, e yi mi ba wa po pe kekle ɔ. Lɔɔ he ɔ, mabi ɔmɛ ngɔ Yeroboam kɛ to wɛtso 10 nya matsɛ. Se wɛtso enyɔ nɛ ji Benyamin kɛ Yuda lɛɛ a ha Rehoboam ya nɔ nɛ e ye a nɔ matsɛ.

Yeroboam sume kaa e mabi ɔmɛ nɛ ya Yerusalem nɛ a ya ja Yehowa ngɛ sɔlemi we ɔ. Lɔɔ he ɔ, e pee sika tsu na bi enyɔ nɛ e ha wɛtso 10 matsɛ yemi ɔ sisi bi ɔmɛ ja mɛ. E kɛ we nɛ zugba a nɔ ba hyi tɔ kɛ awi yemi kɛ basabasa peemi.

Haomi ngɛ wɛtso enyɔ matsɛ yemi ɔ mi hulɔ. Benɛ Rehoboam ba bɔni matsɛ yemi ɔ, e sui jeha enuɔ nɛ Mizraim matsɛ kɛ Yerusalem ba hwu ta. E ngɔ Yehowa sɔlemi we ɔ mi níhi fuu kɛ je. Lɔɔ he ɔ, bɔnɛ sɔlemi we ɔ ngɛ ha benɛ a ma a, hi si be kpiti pɛ.