ANƐ o le nɔ́ heje nɛ nyumu nɛ ɔ ngɛ sɔlee ha Yehowa lo? Mɛni heje nɛ e ngɔ womi nɛ ɔmɛ kɛ ba pue Yehowa afɔle sami latɛ ɔ hɛ mi? Nyumu nɛ ɔ ji Hezekia. E ji Israel woyi je wɛtso enyɔ ɔmɛ a matsɛ. Nɛ e sɛ haomi mi. Mɛni heje?

Nɔ́ heje ji kaa, Asiria tabuli ɔmɛ kpata yiti je wɛtso 10 matsɛ yemi ɔ hɛ mi momo. Yehowa ha nɛ a kpata a hɛ mi ejakaa a ji yayami peeli. Nɛ amlɔ nɛ ɔ, Asiria tabuli ɔmɛ ba konɛ a kɛ woyi je wɛtso enyɔ ɔ hu nɛ́ ba hwu ta.

Asiria matsɛ ɔ ngma womi kɛ tsɔ nɔ ya ha Hezekia. Womi ɔmɛ nɛ Hezekia kɛ ba pue Mawu afɔle sami latɛ ɔ hɛ mi ɔ nɛ. Matsɛ ɔ ye Yehowa he fɛu ngɛ womi ɔmɛ a mi, nɛ e de Hezekia kaa e ngmɛɛ e he kɛ ha lɛ. Enɛ ɔ heje ɔ, Hezekia sɔle kɛ ha Yehowa ke: ‘Oo Yehowa, kpɔ wɔ kɛ je Asiria matsɛ ɔ dɛ mi. Kɛkɛ ɔ, jema amɛ tsuo maa na kaa mo pɛ ji Mawu.’ Anɛ Yehowa maa bu Hezekia tue lo?

Hezekia ji matsɛ kpakpa. E be kaa Israel wɛtso 10 matsɛmɛ yayami ɔmɛ, nɛ e be kaa e tsɛ Ahaz hulɔ. Hezekia bɔ mɔde nɛ e ye Yehowa mlaa amɛ tsuo nɔ pɛpɛɛpɛ. Lɔɔ heje ɔ, benɛ e sɔle ta a, gbalɔ Yesaya tsɔ nɛ a ya de lɛ sɛgbi nɛ je Yehowa ngɔ ke: ‘Asiria matsɛ ɔ be Yerusalem bae. E tabuli ɔmɛ a ti nɔ ko nɔ ko hu be ma a mi bae. A be kɛ̃ɛ̃ kake po tsɛ̃e kɛ ba ma a mi.’

Hyɛ foni ɔ ngɛ bafa nɛ ɔ mi. Anɛ o le nihi nɛ́ tabuli nɛ a gbo kɛ pueɔ si ɔ ji lo? Asiriabi ji mɛ. Yehowa tsɔ e bɔfo nɛ e ya gbe Asiria tabuli 185,000 ngɛ nyɔ kake pɛ mi. Enɛ ɔ ha Asiria matsɛ ɔ kpale kɛ ho e ma mi ya.

A baa wɛtso enyɔ matsɛ yemi ɔ yi, nɛ mabi ɔmɛ hi si ngɛ tue mi jɔmi mi be saii. Hezekia ba gbo, nɛ e bi Manase ba ye matsɛ ngɛ e se. Se Manase kɛ e bi Amon nɛ ba ye e se ɔ tsuo ji matsɛmɛ yayamihi. Lɔɔ heje awi yemi kɛ basabasa peemi ba pɔ he ngɛ zugba a nɔ ekohu kaa kekle ɔ. Matsɛ Amon nitsɛ e tsɔli gbe lɛ, nɛ a to e bi Yosia wɛtso enyɔ ɔ nya matsɛ.