MATSƐ Nebukadnezar ngɔ Israelbi nɛ́ le womi mi saminya a tsuo kɛ ho Babilon ya. Pee se ɔ, matsɛ ɔ hla a kpɛti nihi nɛ a hɛ mi tsɔ, nɛ a he ngɛ fɛu pe kulaa a. A kpɛti nihi eywiɛ lɛ o ngɛ hyɛe ngɛ foni ɔ mi ɔ nɛ. Nɔ kake biɛ ji Daniel, nɛ nihi etɛ nɛ piɛɛ e he ɔ hu Babilonbi ɔmɛ wo mɛ Shadrak, Meshak kɛ Abednego.

Nebukadnezar yi mi tomi ji kaa e ma tsɔse nihewi nɛ ɔmɛ konɛ a sɔmɔ ngɛ matsɛ we ɔ mi. Ke a tsɔse mɛ jeha etɛ se ɔ, e maa hla a kpɛti nihi nɛ a hɛ mi tsɔ saminya, konɛ a ye bua lɛ kɛ tsu sanehi a he ní. Matsɛ ɔ suɔ kaa nihewi ɔmɛ nɛ ná nɔmlɔtso mi he wami ngɛ a tsɔsemi be ɔ tsuo mi. Enɛ ɔ he ɔ, e fã e tsɔli ɔmɛ kaa a ha mɛ niye ní kpakpa nɛ e kɛ e weku ɔ yeɔ, kɛ wai nɛ a nuɔ hu eko.

Moo hyɛ niheyo Daniel ha. O le nɔ́ nɛ e ngɛ Nebukadnezar sɔmɔli ɔmɛ a nya tsɛ Ashpenaz dee lo? Daniel ngɛ lɛ dee ke a be matsɛ ɔ we okplɔɔ nɔ niye ní kpakpa a yee. Munyu ɔ hao Ashpenaz. Lɔɔ he ɔ, e de Daniel ke: ‘Matsɛ ɔ ji nɔ nɛ tsɔɔ nɔ́ nɛ sa kaa nyɛɛ ye. Ke nyɛ yi nɛ́ nyɛ ná nɔmlɔtso mi he wami kaa nihewi kpa amɛ ɔ, e maa gbe mi.’

Lɔɔ he ɔ, Daniel ya nyumu nɛ Ashpenaz ngɔ kɛ to e kɛ e huɛmɛ etɛ ɔmɛ a nya kaa e hyɛ a nɔ ɔ ngɔ. Nɛ e de lɛ ke: ‘I kpa mo pɛɛ nɛ o ka wɔ ligbi 10 nɛ o hyɛ. Ha wɔ ngmɔ mi ní tsɔwi kɛkɛ nɛ waa ye kɛ nyu nɛ́ waa nu. Kɛkɛ ɔ, ngɔɔ wɔ kɛ to nihewi kpa amɛ nɛ yeɔ matsɛ ɔ niye ní ɔ he, konɛ o hyɛ kaa wa ti mɛnɔ ma ná nɔmlɔtso mi he wami pe e nyɛmi.’

A nɔ hyɛlɔ ɔ kplɛɛ nɔ. Nɛ benɛ ligbi 10 su ɔ, e na kaa Daniel kɛ e huɛmɛ etɛ ɔmɛ ngɛ nɔmlɔtso mi he wami kulaa pe nihewi kpa amɛ. Lɔɔ he ɔ, a nɔ hyɛlɔ ɔ ha nɛ a ya nɔ nɛ a ye ngmɔ mi ní tsɔwi ɔmɛ mohu ngɛ matsɛ ɔ niye ní ɔ nane mi.

Ngɛ jeha etɛ ɔ nyagbe ɔ, a ngɔ nihewi ɔmɛ tsuo kɛ ya Nebukadnezar ngɔ. Nɛ benɛ e kɛ mɛ tsuo sɛɛ ní se ɔ, e na kaa Daniel kɛ e huɛmɛ etɛ ɔmɛ ji nihi nɛ a hɛ mi tsɔ pe nɔ fɛɛ nɔ. Lɔɔ he ɔ, e ha nɛ a hi e we ɔ mi nɛ a sɔmɔ lɛ. Nɛ be tsuaa be nɛ Nebukadnezar ma bi Daniel, Shadrak, Meshak kɛ Abednego munyu ko aloo e maa ngɔ sane ko nɛ mi wa kɛ fɔ a hɛ mi ɔ, a leɔ heto ɔ si 10 pe matsɛ ɔ wɔnɔ ɔmɛ kɛ ní leli ɔmɛ.