ANƐ o le nɔ́ nɛ jokuɛ yoyo nɛ ɔ ngɛ dee lo? E ngɛ nyakpɛ ní nɛ Yehowa gu gbalɔ Elisha nɔ nɛ́ e pee ɔmɛ a he ní sɛɛe ha alua a. Alua a li Yehowa ejakaa pi Israelno ji lɛ. Se ha nɛ waa hyɛ nɔ́ nɛ ha jokuɛ yoyo ɔ ba je alua a we mi.

Siriayo ji alua a nɛ. A tsɛɛ e huno ke Naeman, nɛ e ji Siria tabuli ɔmɛ a tatsɛ. Siriabi ɔmɛ nu Israel yoyo nɛ ɔ nɛ a ngɔ lɛ ba ha Naeman yo ɔ konɛ e sɔmɔ lɛ.

Hiɔ yaya nɛ a tsɛɛ ke kpiti ɔ ngɛ Naeman he. Hiɔ nɛ ɔ nyɛɔ nɛ e haa nɔ helo po yeɔ. Lɔɔ heje ɔ, nɔ́ nɛ jokuɛ yoyo ɔ ngɛ Naeman yo ɔ dee ji: ‘I ná nɛ ye nyɔmtsɛ ɔ ya Yehowa gbalɔ ɔ ngɔ ngɛ Israel. Jinɛ e ma tsa e kpiti ɔ ha lɛ.’ Pee se ɔ, a ya bɔ e huno ɔ amaniɛ.

Naeman suɔ nɛ a tsa lɛ; lɔɔ heje ɔ, e pee e juɛmi kaa e maa ya Israel. Benɛ e su Israel ɔ, e pue Elisha we ɔ mi blɔ. Elisha tsɔ e sɔmɔlɔ ɔ kaa e ya de Naeman nɛ́ e ya du e he ngɛ Yordan Pa a mi si kpaago. Munyu nɛ ɔ wo Naeman mi mi la, nɛ e de ke: ‘Pa amɛ ngɛ ye ma a mi ɔ hi kulaa pe Israel pa amɛ!’ Benɛ Naeman de enɛ ɔ pɛ kɛkɛ nɛ e kpale.

Se e tsɔli ɔmɛ a kpɛti nɔ kake de lɛ ke: ‘Nyɔmtsɛ, kaa pe Elisha de mo ke o pee nɔ́ ko nɛ he wa a, o ko pee we lo? Nɛ mɛni heje nɛ o ya dui o he kɛkɛ mɔ, kaa bɔnɛ e de ɔ?’ Naeman bu e tsɔlɔ ɔ tue nɛ e ya du ngɛ Yordan Pa a mi si kpaago. Kɛkɛ nɛ e he womi ɔ pee ehe ekohu!

Naeman bua jɔ saminya. E kpale kɛ ho Elisha ngɔ ya nɛ e de lɛ ke: ‘Kpaako i na kaa Israel Mawu ɔ pɛ ji anɔkuale Mawu ngɛ zugba a nɔ tsuo. Lɔɔ he ɔ, i kpa mo pɛɛ, ngɔɔ nike ní nɛ ɔ.’ Se Elisha he nɔ ke: ‘Dɛbi, i be ngɔe.’ Elisha le kaa e ji tɔmi kaa e maa ngɔ nike ní ɔ, ejakaa Yehowa lɛ tsa Naeman. Se Elisha tsɔlɔ Gehazi lɛɛ e suɔ nike ní ɔ.

Lɔɔ he ɔ, nɔ́ nɛ Gehazi pee ji nɛ ɔ nɛ. Benɛ Naeman je kɛ yaa, Gehazi tu fo kɛ ya ná lɛ ngɛ blɔ ɔ nɔ. Nɛ e de lɛ ke: ‘Elisha tsɔ mi ke ma ba de mo nɛ o ha lɛ nike ní ɔ eko nɛ́ e kɛ ha e huɛmɛ nɛ ba lɛ slaami ɔ.’ Enɛ ɔ ji lakpa. Se Naeman lɛɛ e li ja; lɔɔ heje ɔ, e ha lɛ ní ɔmɛ eko.

Benɛ Gehazi kpale kɛ ba we mi ɔ, Elisha le nɔ́ nɛ e ya pee ɔ. Yehowa de lɛ. Lɔɔ he ɔ, e de lɛ ke: ‘Akɛnɛ o pee nɔ́ yayami nɛ ɔ heje ɔ, Naeman kpiti ɔ ma pue mo.’ Nɛ amlɔ nɔuu ɔ, e ba mi ja!

Mɛni wa ma nyɛ maa kase kɛ je sane nɛ ɔ mi? Kekleekle nɔ́ ji kaa, e sa nɛ waa sɛɛ Yehowa he ní ha ni kpahi kaa bɔnɛ jokuɛ yoyo ɔ pee ɔ. Se nami ngɛ he babauu. Enyɔne ji kaa, wa ko wo wa he nɔ kaa bɔnɛ Naeman pee kekle ɔ, mohu ɔ, waa bu Mawu tsɔli ɔmɛ tue. Nɛ etɛne ɔ, wa ko ye lakpa kaa bɔnɛ Gehazi pee ɔ. Anɛ wa be ní babauu lee ke wa kase Baiblo ɔ lo?