FONI nɛ ɔ ji paradeiso he foni nɛ́ eko ɔ, Yehowa je kɛ tsɔɔ e gbalɔ Yesaya. Yesaya hi si ngɛ gbalɔ Yona gbenɔ se.

Paradeiso sisi ji “abɔɔ.” Anɛ e kai mo nɔ́ ko nɛ wa kase he ní kɛ sɛ hlami momo ngɛ womi nɛ ɔ mi lo? E ngɛ kaa abɔɔ nɛ ngɛ fɛu ɔ nɛ Yehowa pee ngɔ ha Adam kɛ Hawa a, aloo pi ja? Se anɛ zugba a tsuo ma nyɛ ma plɛ paradeiso niinɛ lo?

Yehowa de e gbalɔ Yesaya kaa e ngma paradeiso ehe nɛ maa ba ha E webi ɔ he sane. E de ke: ‘Ogbetee kɛ jijɔ maa hi si ngɛ he kake ngɛ tue mi jɔmi mi. Nɛ na bi kɛ jata bi ma bla kɛ ye ní, nɛ jokuɛ bɔbɔyoo maa hyɛ a nɔ. Ke bimwɔyo ya fiɛ ngɛ sinɔ duɔtsɛ kasa nya po e be lɛ nɔ́ ko pee.’

Eko ɔ, nihi fuu ma de ke: ‘Enɛ ɔ be nyɛe maa ba mi kɔkɔɔkɔ. Haomi ngɛ zugba a nɔ, nɛ e maa ya nɔ ja daa.’ Se mo susu he nɛ o hyɛ: Kɛ si himi he nɛ Yehowa ha Adam kɛ Hawa ngɛ kɛɛ?

Mawu ngɔ Adam kɛ Hawa kɛ wo paradeiso mi. Yehowa tue nɛ a gbo ɔ heje nɛ a je mɛ kɛ je a si himi he nɛ ngɛ fɛu ɔ nɛ, nɛ a bwɔ nɛ a gbo. Se Mawu wo si kaa e maa ngɔ níhi nɛ je Adam kɛ Hawa dɛ ɔ tsuo kɛ ha nihi nɛ suɔ lɛ ɔ.

Haomi aloo nɔ́ nami ko be paradeiso nɛ maa ba hwɔɔ se ɔ mi hie. Tue mi jɔmi maa hi si. Adesahi tsuo ma ná nɔmlɔtso mi he wami kɛ bua jɔmi. E maa hi kaa bɔnɛ Mawu suɔ kaa e hi ngɛ sisije ɔ pɛpɛɛpɛ. Se pee se ɔ, wa maa kase bɔnɛ Mawu maa pee enɛ ɔ ha a he ní.