HA WAA hyɛ nɔ́ nɛ ya nɔ jeha bɔɔ nɛ be loko Ezra ya Yerusalem ɔ. Mordekai kɛ Ester ji nihi nɛ ngɛ blɔ nya pe Israelbi kpahi tsuo ngɛ Persia matsɛ yemi ɔ mi. Ester ji manyɛ nɛ e tsɛngua bi Mordekai ji matsɛ ɔ se yelɔ. Ha nɛ waa hyɛ blɔ nɔ nɛ enɛ ɔ gu kɛ ba.

Ester fɔli gbo ngɛ e jokuɛ mi, lɔɔ he ɔ, Mordekai ji nɔ nɛ hyɛ lɛ kɛ wa. Ahasuerus nɛ ji Persia matsɛ ɔ ngɛ we ngɛ Susa, nɛ Mordekai ji e tsɔli ɔmɛ a ti nɔ kake. Ligbi ko ɔ, matsɛ ɔ yo nɛ ji Vashti bui lɛ, lɔɔ he ɔ, e ngɔ yo ehe kɛ pee e manyɛ. Anɛ o le yo nɛ e ngɔ ɔ lo? Lɛ ji yiheyo nɛ he ngɛ fɛu nɛ a tsɛɛ lɛ Ester.

Anɛ o na nyumu he nɔ wolɔ nɛ nihi ngɛ si bae ha lɛ ɔ lo? E biɛ ji Haman. E ji nɔmlɔ nguaa ko ngɛ Persia. Haman ngɛ hlae kaa Mordekai nɛ o na nɛ e hii si ngɛ foni ɔ mi ɔ hu nɛ ba si ha lɛ. Se Mordekai kua ja peemi. E susu kaa e dɛ kaa a baa si ha nɔmlɔ yayami kaa ja. Enɛ ɔ wo Haman mi mi la wawɛɛ nitsɛ. Lɔɔ he ɔ, nɔ́ nɛ e pee ji nɛ ɔ nɛ.

Haman tu Israelbi ɔmɛ a he lakpa munyuhi ha matsɛ ɔ. E de lɛ ke: ‘A ji nimli yayamihi nɛ a yi o mlaa amɛ a nɔ. E sa kaa a gbe mɛ.’ Ahasuerus li kaa Israelno ji e yo Ester. Lɔɔ he ɔ, e bu Haman tue nɛ e wo mlaa kaa a gbe Israelbi ɔmɛ tsuo ngɛ ligbi ko nɛ e to ɔ nɔ.

Benɛ Mordekai nu kaa a wo mlaa a, e hao wawɛɛ nitsɛ. E tsɔ nɛ a ya de Ester ke: ‘Mo de matsɛ ɔ munyu nɛ ɔ, nɛ o kpa lɛ pɛɛ nɛ e kpɔ wɔ.’ E ji tɔmi ngɛ Persia mlaa a nya kaa nɔ ko maa ya matsɛ ɔ ngɔ benɛ e tsɛ we lɛ. Se Ester lɛɛ e ya benɛ e tsɛ we lɛ. Matsɛ ɔ ngɔ e sika tsu matsɛ tso ɔ kɛ tsɔɔ lɛ, nɛ tsɔɔ kaa a be lɛ gbee. Ester ngmɛ okplɔɔ ngua ko, nɛ e fɔ matsɛ ɔ kɛ Haman nine kɛ ba sisi. Benɛ a ngɛ lejɛ ɔ, matsɛ ɔ bi Ester nɔ́ nɛ e suɔ kaa e pee ha lɛ. Ester de lɛ kaa e ma de lɛ, ke e kɛ Haman ma ba ye ní ekohu e nɔ jena.

Ngɛ ní yemi ɔ sisi ɔ, Ester de matsɛ ɔ ke: ‘A yaa gbe i kɛ ye ma mi bi ɔmɛ.’ Matsɛ ɔ mi mi fu. Nɛ e bi Ester ke: ‘Mɛnɔ ma nɔ́ ko kaa ja peemi ɔ?’

Ester de ke: ‘Jamɛ a nɔmlɔ yayami ɔ, nɛ ji wa henyɛlɔ ɔ ji Haman!’

Matsɛ ɔ mi mi fu wawɛɛ jehanɛ. E fã kaa a gbe Haman. Pee se ɔ, matsɛ ɔ pee Mordekai e se yelɔ. Mordekai ha nɛ a wo mlaa ehe kaa Israelbi ɔmɛ nɛ a plee a wami he ngɛ ligbi nɛ a to kaa a maa gbe mɛ ɔ nɔ. Akɛnɛ Mordekai ji nɔmlɔ nguaa jehanɛ ɔ heje ɔ, nihi fuu ye bua Israelbi ɔmɛ nɛ a henyɛli ɔmɛ nyɛ we nɛ a pee mɛ nɔ́ ko.