HYƐ nítsumihi tsuo nɛ ngɛ nɔ yae ngɛ hiɛ ɔ. Israelbi ɔmɛ ngɛ Yerusalem gbogbo ɔ fiae nɛ́ deka be mi. Benɛ Matsɛ Nebukadnezar ba kpata Yerusalem hɛ mi jeha 152 nɛ be ɔ, e ku gbogbo ɔ kɛ pue si nɛ e ngɔ la kɛ sã ma agbo ɔmɛ. Benɛ Israelbi ɔmɛ je Babilon kɛ ba a ma mi ɔ, a ba fiɛ gbogbo ɔ.

Kɛ o susu kaa mabi ɔmɛ maa nu he kɛɛ, benɛ a ngɛ ma nɛ gbogbo be he ɔ mi jehahi abɔ ɔ? A be slɔkee. A henyɛli ɔmɛ ko nyɛ ba tua mɛ. Se amlɔ nɛ ɔ, nyumu nɛ ɔ nɛ a tsɛɛ lɛ Nehemia a ba ngɛ mɛ ye buae konɛ a fia gbogbo ɔ ekohu. Anɛ o le nɔ nɛ Nehemia ji lo?

Nehemia ji Israelno nɛ je Susa ma a mi, he nɛ Mordekai kɛ Ester hi ɔ. Nehemia tsu ní ngɛ matsɛ we ɔ mi. Lɔɔ he ɔ, eko ɔ, e huɛmɛ ji Mordekai kɛ Manyɛ Ester. Se Baiblo ɔ de we kaa Nehemia sɔmɔ Ester huno Matsɛ Ahasuerus. E sɔmɔ matsɛ nɛ ba ye e se nɛ ji Matsɛ Artaherhes mohu.

Mo kai kaa Artaherhes ji matsɛ kpakpa nɛ́ e ha Ezra sika fuu kɛ ya Yerusalem nɛ e kɛ ya dla Yehowa sɔlemi we ɔ nɛ. Se Ezra ya fiɛ ma a gbogbo ɔ nɛ ku ɔ. Ha nɛ waa hyɛ bɔnɛ e ba ha loko Nehemia ji nɔ nɛ ya tsu ní nɛ ɔ.

Jeha 13 ji nɛ ɔ nɛ Artaherhes ha Ezra sika kaa e kɛ ya dla sɔlemi we ɔ. Amlɔ nɛ ɔ, Nehemia ji Matsɛ Artaherhes da nɔhyɛli ɔmɛ a nɔkɔtɔma. Enɛ ɔ tsɔɔ kaa lɛ ji nɔ nɛ ngmɛɔ da kɛ haa matsɛ ɔ, nɛ e hyɛɔ konɛ nɔ ko nɛ ko wo da mi duɔ ha matsɛ ɔ. E nítsumi ɔ he hia saminya.

Ligbi ko ɔ, Nehemia nyɛminyumu Hanani kɛ ni kpa komɛ je Israel zugba a nɔ kɛ ba slaa Nehemia. A bɔ lɛ haomihi tsuo nɛ Israelbi ɔmɛ kɛ ngɛ kpee, kɛ bɔnɛ a fiɛ Yerusalem gbogbo ɔ lolo. Enɛ ɔ ha Nehemia ye aywilɛho wawɛɛ, nɛ e sɔle ngɛ he ha Yehowa.

Ligbi ko ɔ, matsɛ ɔ na kaa Nehemia bua jɔɛ, lɔɔ he ɔ e bi lɛ ke: ‘Mɛni heje o be bua jɔmi kulaa a?’ Nehemia de lɛ ke akɛnɛ Yerusalem si fɔfɔɛ hí nɛ́ gbogbo ɔmɛ hu ku pue si ɔ heje. Matsɛ ɔ bi lɛ ke: ‘Mɛni o suɔ nɛ maa pee ha mo?’

Nehemia ha lɛ heto ke: ‘Ha ma ya Yerusalem nɛ ma ya fia gbogbo ɔ.’ Matsɛ Artaherhes ji nɔmlɔ kpakpa. Lɔɔ he ɔ, e ha Nehemia blɔ kaa e ya, nɛ e ha lɛ tsohi nɛ e kɛ ya tsu ní ɔ. Nehemia ba su Yerusalem nɔuu nɛ e je juɛmi nɛ e hɛɛ kɛ ba a kpo ha mabi ɔmɛ. A bua jɔ Nehemia ga womi ɔ he nɛ a de ke: ‘Nyɛ ha waa je nítsumi ɔ sisi amlɔ nɔuu.’

Benɛ Israelbi ɔmɛ a henyɛli ɔmɛ na kaa a ngɛ gbogbo ɔ fiae ɔ, a de a sibi ke: ‘Wa ma ya gbe mɛ, nɛ waa tsi a nítsumi ɔ nya.’ Se Nehemia nu munyu ɔ he, lɔɔ heje ɔ, e ha ní tsuli ɔmɛ klaatehi kɛ akplɔhi. Nɛ e de mɛ ke: ‘Nyɛ ko ye wa henyɛli ɔmɛ gbeye. Nyɛ fã nyɛ nyɛmimɛ, kɛ nyɛ bimɛ, kɛ nyɛ yihi, kɛ nyɛ wehi a he.’

Mabi ɔmɛ pee kã saminya. Nɛ a ngɔ a tahwu ní ɔmɛ kɛ wo a he, nɛ a kɛ ma tsu ɔ nyɔ kɛ pia. Lɔɔ he ɔ, a ngɔ ligbi 52 pɛ kɛ gbe gbogbo ɔ fiami nya. Jehanɛ lɛɛ, mabi ɔmɛ a he maa jɔ mɛ ngɛ ma a mi. Nehemia kɛ Ezra tsɔɔ mɛ Mawu mlaa amɛ nɛ a bua jɔ saminya.

Se kɛ̃ ɔ, níhi be kaa bɔnɛ e ngɛ loko a ngɔ Israelbi ɔmɛ kɛ ho nyɔguɛ si himi mi ya ngɛ Babilon ɔ hu. Persia matsɛ ɔ ji nɔ nɛ ngɛ a nɔ yee, nɛ e sa kaa a sɔmɔ lɛ. Se Yehowa wo mɛ si kaa e ma ha mɛ matsɛ ehe ko, nɛ e maa ngɔ tue mi jɔmi kɛ ba ha mɛ. Mɛnɔ ji kikɛmɛ a matsɛ nɛ ɔ? Mɛni blɔ nɔ e maa gu kɛ ngɔ tue mi jɔmi kɛ ba zugba a nɔ? Maa pee jeha 450 ba be loko a ba le matsɛ nɛ ɔ he sanehi fuu. Pee se ɔ, a ba fɔ bimwɔyo ko nɛ he hia wawɛɛ. Se lɔɔ hu e ji sane kpa.