BENƐ Yesu hia blɔ kɛ kpa ma amɛ a nɔ tsuo ɔ, e tsa hiɔtsɛmɛ. Nyakpɛ níhi nɛ e pee ɔ he sane gbɛ fia ma amɛ kɛ kɔpe ɔmɛ tsuo a mi. Lɔɔ he ɔ, nihi ngɔ obubuafohi, hɛyuyuili, tuekpokutsɛmɛ kɛ hiɔtsɛmɛ kpahi fuu kɛ ba e ngɔ. Nɛ Yesu tsa mɛ tsuo.

Jeha etɛ kɛ se ji nɛ ɔ nɛ́ Yohane baptisi Yesu. Yesu de e bɔfo ɔmɛ ke e be kɛe nɛ e maa ya Yerusalem, nɛ́ a ma ya gbe lɛ ngɛ lejɛ ɔ, nɛ lɔɔ se ɔ, e maa te si kɛ je gbeje. Se loko jamɛ a be ɔ maa su ɔ, Yesu ya nɔ nɛ e tsa hiɔtsɛmɛ.

Ligbi ko ɔ, Yesu ngɛ ní tsɔɔe ngɛ Hejɔɔmi ligbi ɔ nɔ. Hejɔɔmi ligbi ji ligbi nɛ Yudabi ɔmɛ kɛ jɔɔ a he. Jinɛ yo ɔ nɛ o na ngɛ hiɛ ɔ be he wami kulaa. E kpɛ nɛ e nyɛ we nɛ e kpã e mi jeha 18 sɔuu. Lɔɔ he ɔ, Yesu ngɔ e nine kɛ pue yo ɔ nɔ, kɛkɛ nɛ yo ɔ da si tlɔmɔɔ. E ná he wami!

Enɛ ɔ ha Yuda jami hɛ mi nyɛɛli ɔmɛ a mi mi fu. A kpɛti nɔ kake kpa ngmlaa kɛ de nimli babauu ɔ ke: ‘Ligbi ekpa ngɛ ha wɔ kaa wa kɛ tsu ní. Jamɛ a be ɔ nɛ e sa kaa nyɛɛ ba konɛ a tsa nyɛ, se pi ngɛ Hejɔɔmi ligbi ɔ nɔ!’

Se Yesu ha heto ke: ‘Nyɛ nimli yayamihi. Nyɛ kpɛti nɔ tsuaa nɔ maa pɛne e teji nɛ e kɛ lɛ maa je kpo ya ha lɛ nyu ngɛ Hejɔɔmi ligbi ɔ nɔ. Lɔɔ he ɔ, anɛ e sɛ kaa a tsaa yo nɛ ɔ nɛ be he wami jeha 18 sɔuu ngɛ Hejɔɔmi ligbi ɔ nɔ lo?’ Yesu heto ɔ ha zo gbe nimli yayami ɔmɛ.

Pee se ɔ, Yesu kɛ e bɔfo ɔmɛ pue Yerusalem blɔ. Benɛ a su Yeriko huzu ɔ nya pɛ kɛkɛ nɛ hɛyuyuili ní bali enyɔ komɛ nu kaa Yesu bee. Lɔɔ he ɔ, a kpa ngmlaa ke: ‘Yesu lee, ye bua wɔ!’

Yesu tsɛ hɛyuyuili ɔmɛ kɛ ba e ngɔ, nɛ e bi mɛ ke: ‘Mɛni nyɛ ngɛ hlae kaa maa pee ha nyɛ?’ A de lɛ ke: ‘Nyɔmtsɛ, mo ha wa hɛngmɛ nɛ bli.’ Yesu ta a hɛngmɛ ɔmɛ a he, nɛ amlɔ nɔuu ɔ, a bɔni nɔ́ hyɛmi! O le yi mi tomi heje nɛ Yesu pee nyakpɛ ní nɛ ɔmɛ tsuo lo? Lɔɔ ji kaa, e suɔ nimli a sane nɛ e ngɛ hlae hu kaa a ná hemi kɛ yemi ngɛ e mi. Lɔɔ he ɔ, wa ma nyɛ ma ná he kɛ nɔ fɔmi kaa ke e ba ye zugba a nɔ Matsɛ ɔ, nɔ ko nɔ ko be hiɔ nue hu.