STEFANO ji nyumu ɔ nɛ kpla si ngɛ foni ɔ mi ɔ nɛ. E ji Yesu kaselɔ anɔkualetsɛ. Se amlɔ nɛ ɔ, hyɛ nɔ́ nɛ a ngɛ lɛ pee! Nyumu ɔmɛ ngɛ lɛ tɛ fiaae. Mɛni heje a nyɛ Stefano, nɛ a ngɛ lɛ yiwutso nɔ́ nɛ ɔ pee kikɛ ɔ? Ha nɛ waa hyɛ.

Mawu ye bua Stefano nɛ e pee nyakpɛ níhi. Nyumuhi nɛ ɔmɛ a bua jɔɛ enɛ ɔ he, lɔɔ he ɔ, a kɛ lɛ je atsinyɛ ngɛ anɔkuale ɔ nɛ e ngɛ nihi tsɔɔe ɔ heje. Se Mawu ha Stefano ní lemi nɛ mi kuɔ nɛ e kɛ tsɔɔ nya kaa a tsɔɔmi ɔ ji lakpa. Enɛ ɔ ha nɛ a mi mi fu pe kekle ɔ po. Lɔɔ he ɔ, a nu lɛ nɛ a tsɛ nihi kɛ ba nɛ a ba ye e he lakpa odase.

Osɔfo nɔkɔtɔma a bi Stefano ke: ‘Anɛ munyu nɛ ɔmɛ ngɛ mi ja lo?’ Stefano da Baiblo ɔ nɔ nɛ e kɛ ha mɛ heto. Nyagbe ɔ, e tsɔɔ bɔnɛ nimli yayamihi nyɛ Yehowa gbali nɛ hi si blema a. Kɛkɛ nɛ e de ke: ‘Nyɛ ngɛ kaa jamɛ a nimli yayami ɔmɛ. Nyɛ gbe Mawu tsɔlɔ Yesu, nɛ nyɛ yi Mawu mlaa amɛ a nɔ.’

Enɛ ɔ ha osɔfo ɔmɛ a mi mi fu wawɛɛ! Nɛ a kɛ abofu kpe a lungu nya. Se Stefano wo e yi nɔ nɛ e de ke: ‘Hyɛ! I na Yesu nɛ daa si ngɛ Mawu hiɔ nɔ ngɛ hiɔwe.’ Benɛ nyumu ɔmɛ nu munyu nɛ ɔ, a ngɔ a nine kɛ tsi a tue, nɛ a yu Stefano nɔ. A nu lɛ nɛ a gbla lɛ ke je ma a mi.

A je a tadehi kɛ ha niheyo Saulo kaa e hyɛ nɔ ha mɛ. O na Saulo ngɛ foni ɔ mi lo? Kɛkɛ nɛ nyumu ɔmɛ a ti ni komɛ bɔni Stefano tɛ fiaami. Stefano kpla si kaa bɔnɛ o na ngɛ foni ɔ mi ɔ, nɛ e sɔle kɛ ha Mawu ke: ‘Yehowa, koo gbla a tue ngɛ nɔ́ yayami nɛ a ngɛ pee nɛ ɔ he.’ Stefano le kaa osɔfo ɔmɛ pee a ti ni komɛ kuasia. Lɔɔ se ɔ, Stefano gbo.

Ke nɔ ko pee mo nɔ́ ko ɔ, anɛ o bɔɔ mɔde kaa mohu o maa pee lɛ kɛ to nane mi, aloo o biɔ Mawu konɛ e pee lɛ kɛ to nane mi ha mo lo? Stefano kɛ Yesu pee we ja. A pee nihi nɛ pee mɛ yayami ɔ po kpakpa. Ha nɛ waa bɔ mɔde nɛ waa kase a nɔhyɛ nɔ́ ɔ.