YESU se nyɛɛli lɛ ngɛ hiɛ ɔ nɛ. A bu Yesu tue nɛ a mlɛ ngɛ Yerusalem. Benɛ mɛ tsuo a ngɛ mlɛe ɔ, ngmlaa ko ba hyi we ɔ mi. Ngmlaa a pɛmi ngɛ kaa kɔɔhiɔ nɛ nya wa. Kɛkɛ nɛ la lilɛhi ba ma kaseli ɔmɛ a ti nɔ tsuaa nɔ yi kpɛti. Anɛ o na la a ngɛ nɔ tsuaa nɔ yi kpɛti lo? Mɛni enɛ ɔ tsɔɔ?

E ji nyakpɛ nɔ́! Yesu ngɛ hiɔwe ngɛ e tsɛ ɔ ngɔ, nɛ e plɛ Mawu mumi klɔuklɔu kɛ pue e se nyɛɛli ɔmɛ a nɔ. Anɛ o le nɔ́ nɛ mumi nɛ ɔ ha nɛ a pee lo? Mɛ tsuo a bɔni munyu tumi ngɛ gbi slɔɔtoslɔɔtohi a mi.

Nihi babauu nɛ ngɛ Yerusalem ɔ nu ngmlaa nɛ́ e pɛmi ngɛ kaa kɔɔhiɔ nɛ nya wa a he, nɛ a ba konɛ a ba hyɛ nɔ́ nɛ ngɛ nɔ yae. A kpɛti ni komɛ je ma kpahi a mi kɛ ba konɛ a ba ye Israelbi ɔmɛ a Pentekoste gbijlɔ ɔ. Nibwɔ ɔmɛ a nya kpɛ a he nitsɛ! A nu nɛ́ kaseli ɔmɛ ngɛ nyakpɛ ní nɛ Mawu pee ɔmɛ a he munyu tue ngɛ mɛ nitsɛmɛ a je gbihi a mi.

Nibwɔ ɔmɛ bi ke: ‘Anɛ pi Galileabi ji nimli nɛ ɔmɛ tsuo lo? Lɛɛ kɛ ba kɛɛ loko a ngɛ wa je gbi slɔɔtoslɔɔto ɔmɛ tue ɔ mɔ?’

Kɛkɛ nɛ Petro te si nɛ e tsɔɔ mɛ níhi a nya. E wo e gbi nɔ, nɛ e de ni ɔmɛ bɔnɛ a gbe Yesu nɛ Yehowa tle lɛ si kɛ je gbeje ha. Petro de ke: ‘Amlɔ nɛ ɔ, Yesu ngɛ hiɔwe ngɛ Mawu hiɔ nine nɔ. Nɛ e plɛ mumi klɔuklɔu nɛ e wo he si ɔ kɛ pue wa nɔ. Lɔɔ heje nɛ nyɛ na, nɛ nyɛ nu nyakpɛ ní nɛ ɔmɛ hu ɔ nɛ.’

Benɛ Petro tu munyu nɛ ɔmɛ ɔ, ni ɔmɛ babauu pia a he ngɛ nɔ́ nɛ a pee Yesu ɔ heje. Nɛ a bi Petro ke: ‘Mɛni e sa kaa waa pee mɔ?’ Petro de mɛ ke: ‘Nyɛ tsake nyɛ jemiba nɛ a baptisi nyɛ.’ Lɔɔ he ɔ, a baptisi nihi 3,000 jamɛ a ligbi ɔ nɛ a ba plɛ Yesu se nyɛɛli.