ANƐ o le nɔ nɛ ngɛ zugba a lo? Lɛ ji Saulo. Mo kai kaa lɛ ji nɔ nɛ hyɛ nyumu ɔmɛ nɛ fiaa Stefano tɛ ɔ a tade ɔmɛ a nɔ ha mɛ ɔ nɛ. Hyɛ la a nɛ kpɛ ɔ! Mɛni ngɛ nɔ yae?

Benɛ a gbe Stefano se ɔ, Saulo nyɛɛɔ hɛ mi nɛ a ya hlaa Yesu se nyɛɛli ɔmɛ konɛ a wa mɛ yi mi. E yaa wehi a mi nɛ e ya gblaa mɛ kɛ jee kpo, nɛ e woɔ mɛ tsu. Kaseli fuu tu fo kɛ ho ma kpahi a nɔ ya, nɛ a ya fiɛɛ “sane kpakpa” a ngɛ lejɛ ɔmɛ. Se Saulo yaa ma kpa amɛ a nɔ nɛ e ya hlaa Yesu se nyɛɛli ɔmɛ. Amlɔ nɛ ɔ, e ngɛ blɔ nɔ kɛ yaa Damasko. Se benɛ e yaa ngɛ blɔ ɔ nɔ ɔ, nyakpɛ nɔ́ ko nɛ ba ji nɛ ɔ nɛ:

Si kake too ɔ, la ko kpɛ kɛ je hiɔwe kɛ bɔle Saulo kɛ kpe. E nɔ si ngɛ zugba kaa bɔnɛ wa na ngɛ foni ɔ mi ɔ. Kɛkɛ nɛ gbi ko de ke: ‘Saulo, Saulo! Mɛni ha nɛ o ngɛ mi yi mi wae?’ Nyumuhi nɛ piɛɛ Saulo he ɔ na la a, nɛ a nu gbi ɔ pɛmi ɔ hu, se a nui sisi.

Saulo bi ke: ‘Nyɔmtsɛ, mo mɛnɔ?’

Gbi ɔ ha heto ke: ‘Imi Yesu, nɔ nɛ o ngɛ lɛ yi mi wae ɔ.’ Yesu de ja ejakaa e nuɔ yi mi nɛ Saulo ngɛ e se nyɛɛli ɔmɛ wae ɔ he kaa lɛ Yesu ɔ nitsɛ yi mi nɛ e ngɛ wae.

Jehanɛ ɔ, Saulo bi ke: ‘Nyɔmtsɛ, mɛni e sa kaa ma pee?’

Yesu de lɛ ke: ‘Tee si nɛ o ya Damasko. A maa tsɔɔ mo nɔ́ nɛ e sa kaa o pee ngɛ lejɛ ɔ.’ Benɛ Saulo te si nɛ e bli e hɛngmɛ ɔ, e hyɛ we nɔ́. E hɛngmɛ yu! Lɔɔ he ɔ, nyumu ɔmɛ nɛ piɛɛ e he ɔ nu e kɔni si nɛ a kpaka lɛ kɛ ho Damasko ya.

Yesu kɛ e kaseli ɔmɛ a kpɛti nɔ kake nɛ ngɛ Damasko ɔ tu munyu ke: ‘Anania, tee si. Yaa gbɛjegbɛ nɛ a tsɛɛ ke Tlɔmɔɔ ɔ nɔ. Nɛ o ya bi nyumu ko nɛ a tsɛɛ lɛ Saulo ɔ si ngɛ Yuda we ɔ mi. I hla lɛ kaa e pee ye sɔmɔlɔ pɔtɛɛ.’

Anania bu tue. Benɛ e na Saulo ɔ, e ngɔ e nine kɛ pue e nɔ nɛ e de ke: ‘Nyɔmtsɛ ɔ tsɔ mi kaa ma ba ha nɛ́ o hyɛ nɔ́ ekohu, konɛ o ná mumi klɔuklɔu ɔ.’ Amlɔ nɔuu nɛ ní komɛ kaa lo toto je Saulo hɛngmɛ ɔmɛ a nɔ kɛ pue si, kɛkɛ nɛ e bɔni nɔ́ hyɛmi ekohu.

Mawu kɛ Saulo tsu ní wawɛɛ kɛ fiɛɛ kɛ ha jema amɛ fuu. A ba le lɛ kaa bɔfo Paulo. Wa maa kase e he ní fuu pee se. Se kekleekle ɔ, ha nɛ waa hyɛ nɔ́ nɛ Mawu tsɔ Petro nɛ e ya pee.