BƆFO Petro ji nɔ nɛ daa si ngɛ hiɛ ɔ nɛ, nɛ e huɛmɛ nɛ daa si ngɛ e se ɔ nɛ. Se mɛni heje nɛ nyumu ɔ kpla si ha Petro ɔ? Anɛ e sa kaa e pee ja lo? O le nɔ nɛ e ji lo?

Nyumu ɔ ji Kornelio. E ji Roma tabuli ɔmɛ we asafoatsɛ. Kornelio li Petro, se a de lɛ kaa e fɔ lɛ nine kɛ ba e we mi. Ha nɛ waa hyɛ bɔnɛ enɛ ɔ plɛ kɛ ba ha.

Yesu kekleekle se nyɛɛli ɔmɛ ji Yudabi, se pi Yudano ji Kornelio. Se e suɔ Mawu nɛ e sɔleɔ kɛ haa lɛ, nɛ e peeɔ nihi fuu kpakpa. Ligbi ko piani ɔ, bɔfo ko ba je e he kpo kɛ tsɔɔ lɛ nɛ e de lɛ ke: ‘Mawu bua jɔ o he, lɔɔ he ɔ, e ma ha o sɔlemi ɔ heto. Moo tsɔ nihi nɛ a ya tsɛ nyumu ko nɛ a tsɛɛ lɛ Petro ɔ kɛ ba. E ngɛ Yopa, ngɛ Simon nɛ ngɛ wo ɔ nya we mi.’

Amlɔ nɔuu nɛ Kornelio tsɔ nihi konɛ a ya hla Petro. E nɔ jena, benɛ e piɛ bɔɔ nɛ tsɔli ɔmɛ maa su Yopa a, Petro ngɛ Simon we ɔ yi mi. Mawu ha e pee Petro kaa nɔ́ nɛ e na bo ngua ko nɛ je hiɔwe kɛ ma zugba. Lohwehi slɔɔtoslɔɔto tsuo ngɛ bo ɔ mi. Ngɛ Mawu mlaa a nya a, lohwe nɛ ɔmɛ a he tsɔ we nɛ a maa ye, se kɛ̃ ɔ, gbi ko de lɛ ke: ‘Petro, tee si. Gbee nɛ o ye.’

Petro ha heto ke: ‘Dɛbi! I yi nɔ́ ko nɛ he tsɔ we gblee.’ Se gbi ɔ de lɛ ke: ‘Moo jɔɔ níhi nɛ Mawu tsu he ɔ tsɛmi ke a he tsɔ we.’ Enɛ ɔ ya nɔ si etɛ. Benɛ Petro ngɛ bɔnɛ ní nɛ ɔmɛ a sisi tsɔɔ ha he susue ɔ, nyumuhi nɛ Kornelio tsɔ mɛ ɔ ba su we ɔ mi, nɛ a bi Petro si.

Petro kple si kɛ ba a ngɔ nɛ e de mɛ ke: ‘Imi ji nɔ nɛ nyɛ ngɛ hlae ɔ nɛ. Mɛni he nyɛ ba ngɛ?’ Benɛ tsɔli ɔmɛ de lɛ kaa bɔfo ko de Kornelio ke e tsɛ lɛ kɛ ba e we ɔ mi ɔ, Petro kplɛɛ kaa e kɛ mɛ maa ya. E nɔ jena a, Petro kɛ e huɛmɛ pue Kaisarea blɔ konɛ a ya na Kornelio.

Kornelio bua e wekuli kɛ e huɛmɛ kpakpahi a nya. Benɛ Petro ba su we ɔ mi ɔ, Kornelio kɛ lɛ ya kpe. E kpla si ngɛ Petro nane nya nɛ e koto lɛ kaa bɔnɛ o na ngɛ hiɛ ɔ. Se Petro de lɛ ke: ‘Tee si; Imi hu nɔmlɔ ji mi kaa mo.’ Ee, Baiblo ɔ tsɔɔ kaa e dɛ kaa nɔ ko ma kpla si nɛ e ja nɔmlɔ ko. Yehowa pɛ lɛ e sa kaa wa ja.

Jehanɛ ɔ, Petro fiɛɛ kɛ ha ni ɔmɛ nɛ bua a he nya ngɛ lejɛ ɔ. E de mɛ ke: ‘I na kaa Mawu kplɛɛɔ nihi tsuo nɛ suɔ kaa a ma sɔmɔ lɛ ɔ nɔ.’ Nɛ benɛ e ngɛ munyu ɔ tue ɔ, Mawu ha E mumi klɔuklɔu ɔ ba ni ɔmɛ a nɔ, nɛ a bɔni gbi slɔɔtoslɔɔtohi tumi. Enɛ ɔ pee kaseli nɛ a ji Yudabi nɛ piɛɛ Petro he kɛ ba a nyakpɛ, ejakaa a susu kaa Yudabi pɛ a sane lɛ Mawu suɔ. Lɔɔ he ɔ, enɛ ɔ ha a na kaa Mawu bui ma ko mi bi kaa a hi pe ma kpa mi bi. Anɛ enɛ ɔ pi nɔ́ kpakpa nɛ e sa kaa wa kai daa lo?