Yehowa pee abɔɔ ngɛ he ko nɛ a tsɛɛ ke Eden. Mɔmɔhi, tsohi kɛ lohwehi fuu ngɛ abɔɔ ɔ mi. Mawu ngɔ zu kɛ bɔ kekleekle nyumu nɛ ji, Adam, nɛ e fli mumi kɛ wo e gugwɔ mi. Lɔ ɔ se ɔ, o le nɔ́ nɛ ba lo? Nyumu ɔ ba wami mi! Yehowa de Adam ke e hyɛ abɔɔ ɔ nɔ, nɛ e wo lohwe ɔmɛ tsuo biɛ.

Yehowa wo Adam mlaa ko nɛ he hia wawɛɛ. E de Adam ke: ‘O ma nyɛ maa ye tso ɔmɛ tsuo a nɔ yiblii. Kake pɛ nɛ e sɛ nɛ o ye e nɔ yiblii. Ke o ye jamɛ a tso ɔ nɔ yiblii ɔ, o ma gbo.’

Pee se ɔ, Yehowa de ke: ‘Ma bɔ nɔ ko kɛ piɛɛ Adam he konɛ e ye bua lɛ.’ Mawu ha nɛ Adam hwɔ mahe vii, kɛkɛ nɛ e je Adam kasa wu kake nɛ e kɛ bɔ yo ha Adam. A tsɛɛ yo ɔ ke Hawa. Adam kɛ Hawa ji kekleekle weku nɛ a hi zugba a nɔ. Benɛ Adam na e yo ɔ, anɛ o le bɔ nɛ e pee e ní ha lo? Adam bua jɔ saminya,  nɛ e de ke: ‘Hyɛ nɔ́ nɛ Yehowa ngɔ ye kasa wu kɛ pee! Piɔ lɛɛ i ná nɔ ko nɛ ngɛ kaa imi nɔuu.’

Yehowa de Adam kɛ Hawa kaa a fɔ bimɛ nɛ a hyi zugba a tsuo nɔ. E suɔ nɛ a pee kake kɛ tsu ní konɛ zugba a nɔ tsuo nɛ pee fɛu, nɛ e pee paradeiso kaa Eden abɔɔ ɔ. Se e ya bɛ mi jã. Mɛni he je? Wa maa na ngɛ yi nɛ nyɛɛ se ɔ mi.